Kosova jo vetëm që po krijon kushte për bashkëjetesë me komunitetet pakicë, por komunat e vogla ku jetojnë pakicat po shndërrohen edhe në minishtete të pakicave.

Ndonëse me Kushtetutën e Kosovës, Neni 6 (Simbolet) thuhet se flamuri, stema dhe himni janë simbolet shtetërore të Republikës së Kosovës, të cilat pasqyrojnë karakterin shumetnik të saj, simboleve të Kosovës në Mamushë iu qëndrojnë kudo përkrah ato të Turqisë.

Dikur një fshat i vogël në jugperëndim të Kosovës, Mamusha tani është shndërruar në “Turqi të vogël”. Në fillim të hyrjes së këtij qyteti të duhet pak kohë të përcaktohesh se ku ndodhesh.

Rrugët janë të emërtuara vetëm në turqisht (Pasha, Cumhuriyet, Yildiz, Harmanlik, Baglik, Saat Kulesi, Lale…), mbishkrimet e dyqaneve, barnatoreve, bizneseve po ashtu në turqisht, edhe emrat e shkollave ku fillorja quhet “Anadolu”, si dhe “Ataturk” e mesmja….

E arrin të të bind se je në Kosovë vetëm flamuri i Kosovës në rrethrrotullimin para se të arrish në atë që quhet “qendër e qytetit”, ku qëndron ngjitur edhe flamuri i Turqisë, shkruan gazeta “Zeri”.

Dalin në dritë detaje të reja nga dosja në ngarkim të të arrestuarve në kuadër të operacionit antidrogë “Ballkani” që u finalizua me vënien në pranga të trafikantëve, mes tyre 14 shqiptarë.

Qyteti i Prizrenit ka qenë një nga pikat ku trafikantët shqiptare kanë realizuar blerjen e një sasie droge të llojit heroinë. Në dosje saktësohet se Jurgen Molla ka organizuar të paktën 3 raste të trafikun e drogës nga trafikantë turq.

Rasti i parë është në Prizren ku biznesmeni i ndërtimit, Arben Molla, kosovari, Arfi Çiço ndërmjetës, kanë rënë dakord me 2 trafikantë turq për blerjen e 15 kg heroinë që vinte nga Turqia, raporton “Shqiptarja”.

Më 29 qershor, Jurgen Molla përmes shtetasve Orest Myftaraj dhe Klodian Veizaj ka çuar në Prizren 230 mijë Euro për blerjen e drogës.

Pas kësaj trafikantët turq i kanë dhënë sasinë prej 15 kg heroinë, korrierit, Arben Prendi, i cili me mjetin e tij kamion do sillte lëndën narkotike ne Shqipëri.

Fati nuk ishte me trafikantët teksa më 29 qershor kamioni me drogë u kap në pikën kufitare të Morinit dhe u arrestua mirditori Arben Prendi. Bashkëpunëtorët e këtij të fundit fikën telefonat për ditë më radhë, ndërsa gjatë kësaj kohë telefonat e tyre kanë qenë nën përgjim, teksa rezulton se janë përpjekur për fshehjen e parave.

Sakaq pasi dështuan në rastin e parë trafikantët nuk hoqën dorë nga misioni i tyre, teksa destinacioni i radhës ishte qyteti i Selanikut.

Jurgen Molla dhe Anesti Koromonai porosin sërish 15 kg heroinë, e cila vjen me korrierë turq, por droga kapet nga policia Greke dhe oficerët e DEA në Selanik, si dhe arrestohen dy korrierët.

Pas dy dështimeve, Jurgen Molla, ka vendosur t’i rikthehet sërish qytetit të Prizrenit ku është bërë e mundur blerja e një sasie prej 500 gramë heroinë.

Sakaq këtë herë sasia e lëndës narkotike u bllokua nga policia në Tiranë, teksa në pranga përfunduan Anesti Koromani dhe Romeo Beqo.

Dy muajt e fundit, banorët e Zhurit të Komunës së Prizrenit po përballen me raste të shumta të vjedhjeve nga persona ende të paidenitifkuar nga organet e rendit. Ata kërkojnë më shumë angazhim nga policia që të zbulojë autorët, dhe kërkojnë nga komuna që sa më shpejt që është e mundur të rregullojë ndriçimin publik, sidomos në Zhurin e Ri.

Familja e Ramiz Kabashit, është një ndër dhjetëra familje të cilat janë vjedhur nga hajna të ndryshëm. Ramizi, mjek me profesion, tregon se në fillim të muajit qershor në orët e mbrëmjes në shtëpinë e tij nga hajnat janë vjedhur stoli ari në vlerë të të 7 mijë eurove dhe para të gatshme 1 e 200 euro.

Ai thotë se lidhur me rastin ka informuar organet e rendit dhe kryetarin e fshatit. Sipas tij, nënstacioni policor i Zhurit nuk ka kapacitete të mjaftueshme për të luftuar këtë dukuri për shkak të numrit të vogël të policëve, ndërsa shprehu bindjen se me vendosjen edhe të ndriçimit publik, hajnat nuk do të mund të operonin më lehtë.

Kabashi kërkon që për këtë çështje tejet shqetësuese, edhe bashkëfshatarët të bashkëpunojnë me organet e rendit për zbulimin e autorëve që po kryejnë vjedhje të rënda.

Me të gjitha rastet është informuar edhe kryetari i fshatit, Behar Begaj, i cili tha se gjendja është alarmante pasi hajnat përveç se po vjedhin, ata edhe po kërcënojnë me jetë edhe familjarët të cilët po hasin në momentet kur ata po kryejnë vepra të paligjshme. Ai thotë se për të gjitha rastet e vjedhjeve ka informuar policinë në Zhur, dhe se pas dërgesës së një kërkese me shkrim në fund të muajit të kaluar, janë shtuar patrullimet dhe angazhimet konkrete për të ofruar më shumë siguri për banorët e Zhurit dhe ruajtjen e pronës.

Begaj thotë se një kërkesë i është drejtuar edhe drejtorisë së shërbimeve publike, ku është kërkuar që sa më shpejtë që është e mundur të instalohet ndriçimi publik sidomos në lagjen “Zhuri i ri”.

Lidhur me këtë shqetësim të banorëve të Zhurit, ne jemi orvatur të marrim edhe prononcimin e përgjegjësit të policisë së nënstacionit në Zhur, por kontakti me të ka qenë i pamundur, përkundër edhe faktit se ne gjatë ditës së shtunë vizituam edhe objektin e këtij nënstacioni, ku nga disa policë na është thënë se komandanti ndodhet në pushim vikendi.

Dukuria e vjedhjeve fatkeqësisht është shndërruar në përditshmëri në shumë lagje dhe vendbanime të Prizrenit, dhe përkundër disa deklaratave të drejtuesve të policisë rajonale se në disa vende janë lokalizuar shumë hajna, këta të fundit gjatë muajve maj dhe sidomos qershor, janë mjaft aktiv jo vetëm në Zhur, por edhe në zona të tjera të komunës. /TV Prizreni

Vërmica shtrihet në jugperëndim të Prizrenit, ku edhe sot atje hasen disa motive të skalitura në gur, si: motivet nga kulti i Diellit, kulti ktonik i gjarprit, dhe motive të tjera.

Të skalitura në gurët këndorë, apo siç u thonë në popull, mbi qoshnikë, këto motive i gjejmë sot në kullën e Sherif Kadriajt, ndërtuar në mëhallën e Kadriajve, shek.XIX – sot e braktisur, apo edhe në disa kulla të tjera të këtij fshati.

Vërmica dikur njihet për kullat e familjeve Fanaj, Pulaj, Çovanaj dhe Xhoxhaj, Kadrijajt e të tjera, por më vonë ishpushteti jugosllav që mbi këta banorë përdori të gjitha masat represive që këta banorë t’i bëjnë të shitur, por ata stoikisht qëndruan nëpër histori. Prandaj, ata edhe u keqtrajtuan e u burgosën, tregon profesor Maksut Rakaj, shkruan gazeta Kosova Sot.

Ai tregon se në vitin 1980, për shkak të mbylljes së grykës së lumit Drin, u përmbytën të gjitha tokat pjellore të këtij fshati dhe ata u degdisën mbi 80 për qind e këtij fshati u ndanë në fshatra dhe hapësira të ndryshme që atëbotë ishin prona shtetërore.

Ky vendbanim është i banuar që nga parahistoria, përkatësisht që nga koha e neolitit, dhe i përkiste krahinës së Dardanisë.

“Lënda antropologjike dëshmon se varreza u përkiste banorëve të tipave antropologjikë adriatikë dhe varianteve të tyre adriatike- mesdhetare, karakteristike për popullsinë arbërore”, tregon profesori Xhevat Xhoxhaj.

Lumjanët, halë në sy i kishte Serbia

Rizaj Xhoxhaj, i dënuar politik, tani 95- vjeçar, thotë se pushteti aq shumë i shtrëngonte familjet atdhetare, saqë u ndalonte edhe për të shkuar në mal të tyre për të marrë dru. Ai tregon se burgun e kishte kryer në Goli Otok, në njërin ndër burgjet më të vështira të asaj kohe.

Fshati Vërmicë është i ngulitur rrëzë malit Koritnik, dhe shtrihet mbi disa kodra të ngritura, të cilat krijojnë një peizazh të bukur. Pozita e këtillë e fshatit mundëson një pamje të gjerë mbi gjithë arealin në mes maleve të Koritnikut dhe Pashtrikut si dhe mbi liqenin e Vërmicës. Nga çdo cep i këtij fshati, po ashtu, shpërthejnë pamje mahnitëse edhe mbi shpatijet e malit të Koritnikut.

Vlen të theksohet se, ceremoni të caktuara rituale ndodhnin edhe në Majë të Gjallicës së Lumës (2486 m). Maja e Gjallicës, pastaj Maja e Pashtrikut, si dhe Maja e Koritnikut, komunikojnë vizualisht dhe gjenden jo fort larg njëra- tjetrës.

Pleqtë e këtij fshati tregojnë edhe për të bëmat e mëdha që bënin trimat e këtij fshati. Por, ata u degdisën pastaj edhe si familje, sepse Serbia i kishte shënuar si njerëz të rrezikshëm lumjanë, ata mbeten atdhetarë, edhe pse pushteti atje punoi pareshtur mbi pesë dekada. Pleqtë e këtij fshati ende tregojnë se si në oda kur ishin fëmijë kishin dëgjuar histori të dhembshme për ngjarjet e serbëve. Ata tregojnë se pas Luftës së Dytë Botërore, kur kishin shkuar ushtarë në Serbi atje trajtoheshin shumë keq, sepse në historinë e tyre serbe kishin dëgjuar për Lumën që u kishte sjellë shumë të zeza ushtrisë serbe në të gjitha rrethanat.

Maja e Pikëllimës

Prof. Xhevat Xhoxhaj, që njëherësh është edhe poet, ka ditur mirë të skalisë edhe për Majën e Pikëllimës, edhe për dhembjen e vajzës së Vëmicës, që ka hapëruar nëpër dhembjen e kohës së vet. Ai pastaj ka ditur dhe ka trashëguar gjithë dhembjen e këtij fshati nëpër kohë për ta skalitur në vargje.

Por, prof. Maksut Rakaj tregon edhe një fakt tjetër se atje banorët janë të pakët, janë afër 600, por atje ka infrastrukturë të mirë, ka një kërkesë që kullat e atjeshme të mos harrohen nga pushteti. Por, karshi kësaj, ai pohon se duhet parë edhe dëmet shpirtërore që regjimi jugosllav u shkaktoi atyre banorëve, tokat iu përmbytën, fushat iu morën, kurse atje tha se kishte presion të natyrave të ndryshme.
“Por, tani kur mendojmë të përbashkojmë atdheun, besoj në mundësinë e renovimit të atyre kullave të lashta të këtij fshati”, thotë ai.

Nga këtu kanë dalë emra të njohur edhe të dijetarëve e mjekëve që pastaj i kanë dhënë shumë dije e mundësi shërimi popullatës. /Kosova Sot

Në qendrën emergjente të QKUK-së përveç rasteve të paraqitura për shkak të temperaturave të larta, ka pasur edhe raste të thumbimit nga rriqrat. Kështu ka thënë Avdush Begolli, mjek në këtë klinikë, që sipas tij, këto raste janë trajtuar menjëherë në qendrën infektive.

Na ana tjetër, Ministria e shëndetësisë për të paralajmëruar qytetarët nga rreziku prej rriqrave ka organizuar fushata informuese e forma tjera organizative, që sipas tyre kanë rezultuar me përgjysmim të rasteve të pickimit nga rriqrat.

Faik Hoti, nga Ministria e Shëndetësisë, për televizionin Tribuna Channel ka thënë se në Malishevë, Rahovec, Klinë, Suharekë, për shkak të pranisë së rriqrave në këto zona, janë organizuar fushata, takime me banorë, ligjerata me nxënës dhe është bërë dezinsektimi i territorit.

”Gjithashtu nuk ka pasur asnjë të vdekur. Sezona kundër Etheve Hemorragjike është në muajt e mbylljes tash”, ka bërë të ditur Hoti.

Në takimin e Këshillit Ndërministror për parandalimin dhe luftimin e Etheve Hemoragjike Krime Kongo, të cilin e kryeson Ministri i Shëndetësisë Imet Rrahmani, disa ditë më parë u tha se numri i pickimeve nga rriqrat sivjet është përgjysmuar, ndërsa prej 46 rasteve të trajtuara si të dyshimta, pas analizave laboratorike, të gjitha kanë rezultuar negative.