Aleanca për Ardhmërinë e Kosovës dhe lideri i saj Ramush Haradinaj kanë apeluar me anë të një komunikate që të tërhiqen të gjithë të përfshirët në incidentet e dhunshme pas protestës së sotme të opozitës në Prishtinë.

“Protesta e sotme e mbajtur në Prishtinë, ishte protesta më e madhe e mbajtur që nga paslufta”, thuhet në një komunikatë të AAK-së.

“Dhjetëra mijëra qytetarë nga të gjitha përcaktimet politike, sot i thanë jo qeverisë Mustafa”.

“Mesazhet e kësaj proteste ishin më të qartat dhe më të vendosurat se kjo qeveri nuk mund ta vazhdojë mandatin e saj”.

“Ne si parti politike u shprehim falëndërimet më të thella qytetarëve të Kosovës, për angazhimin e tyre dhe për vendosmërinë që të jënë aktiv në vendimet e rëndësishme për vendin”.

AAK shpreh keqardhjen për incidentet që pasuan protestën e sotme.

”Prandaj AAK dhe Kryetari Haradinaj, ftojnë të gjithë ata që eventualisht kanë mbetur të përfshirë në incidente të dhunshme, që të tërhiqen sa më parë dhe të mos e rrezikojnë as sigurinë e vetë e as të policisë së Kosovës dhe njëkohësisht ta zbehin zërin e fuqishëm qytetarë kundër kësa qeverie”.

“Incidentët e dhunshme janë të papranueshme, po aq sa është e papranueshme edhe sjellja e papërgjegjshme e qeverisë ndaj reagimit qytetar”.

“Aleanca do të vazhdojë të jetë e lidhur ngushtë me qytetarin e vendit, në këto procese të rëndësishme për vendin”, thuhet në komunikatë. /PrizrenPress.com

Lëvizja Vetëvendosje! thotë se protesta e sotme, e organizuar nga opozita, është protesta me e madhe prej pasluftës.

Kjo lëvizje, nëpërmjet një njoftimi për media, thotë se pjesëmarrja masive e mbi 100 mijë qytetarëve tregon mbështetjen e madhe që ka kauza e opozitës.

“Protesta më e madhe prej pasluftës! Pjesëmarrja masive e mbi 100 mijë qytetarëve tregon mbështetjen e madhe që kanë kauzat e opozitës. Qeveria tani nuk ka më mbështetje. Ajo duhet të largohet”, thekson Vetëvendosje!

Prishet qetësia e protestës. Disa protestuese kanë nisur të gjuajnë me gurë dhe koktej molitovi në drejtim të objektit të Qeverisë.

Një pjesë e objektit qeveritar ka marrë zjarr nga hedhja e koktej molotovit.

Policia ka nisur hedhjen e gazit lotsjellës.

Lideri i Lëvizjes Vetëvendosje, Visar Ymeri, në protestën e organizuar nga opozita është shprehur se qytetarët me anë të peticionit shumë muaj para Gjykatës Kushtetuese i ka shpallur marrëveshjet e 25 gushtit antikushtetuese.

“Nuk ka pasur kurrë forcë e as fuqi që e ka gjunjëzuar një popull të tërë, e nuk ka as sot”.

“Qyetarët me peticion i ka shpallur antikushtetuese para Gjykatës Kushtetuese”.

“Kushtetutese më vonë e konstatoi që Zajednica e përmbys rendin kushtetues, e Isa e Hashimi po vazhdojnë ta kërcënojnë Republikën me Zajednicë e me Demarkacion, sepse ata e kanë lidhur ngushtë fatin e tyre me Zajednicën dhe nuk ka kush t’i ndajë”.

Sipas Ymerit, pushtetarët kanë bërë çdo gjë që të mbrojnë Zajednicën.

“E shkelën kushtetutën për Zajednicën, gënjyën, i burgosën deputetët e qytetarët e përmes Zajednicës dëshirojnë të qëndrojnë në pushtet”.

“Kjo ditë e bukur sot, është ditë jashtëzakonisht e rëndësishme për Kosovën, ky numër i juaji këtu ja garanton Kosovës republikën, pavarësinë e sovranitetin”.

“Kjo kohë fillon sot me juve këtu, pa Zajednicë, pa Isën e Hashimin”.

Lideri i Nismës për Kosovën, Fatmir Limaj, në protestën e sotme kërkoi zgjedhje të lira, pasi tha se qeveria ka rënë sot.

“Sot në kryeqytetin e Kosovës në sheshin “Nënë Tereza” pranë bustit të Skënderbeut ka ra qeveria e Republikës së Kosovës. Ne kërkojmë zgjedhje të lira dhe të dilet nga kjo krizë politike”, tha Limaj.

Ai ua ndaloi pjesëmarrjen në këto zgjedhje, atyre që sipas biseduan kundër Republikës së Kosovës.

“Sot Kosova është bashkuar në Prishtinë për t’u thënë shkelësve të kushtetutës ju nuk mund të qeverisni më Republikën e Kosovës”, tha Limaj, duke bërë të ditur se në të gjitha shtetet e botës do të ngriheshin kundër shkelësve të tillë të aktit më të lartë juridik.

Limaj në fjalimin e tij iu drejtua edhe qeveritarëve

“Nëse ju refuzoni të jepni llogari, ne refuzojmë të na qeverisni”, tha Limaj, duke e quajtur ditën e protestës një fillim të ri.

Kryetari i AAK-së, Ramush Haradinaj, si folësi iparë në protestën e sotme e ka pasur një mesazh të qartë për rivalët e tij politik, Kryeministrin Isa Mustafa dhe ZëvendësKryeministrin Hashim Thaçi.

“Isë dhe Hashim – shkoni, se Kosova nuk ju duron ma”, u shpreh Haradinaj.

Fjalimi i plotë i Haradinajt:

Të nderuar qytetarë, ngado që keni ardhë, faleminderit. Kjo është dita juaj. Më në fund erdhi. Me meritë. Urime.

Është bërë shumë gjatë dhe u bënë shumë herë që këta që po qeverisin e mashtruan qytetarin.

E thirrën qytetarin që t’ju besojë, që ti mbrojë nga armiku, do të thotë nga njëri-tjetri dhe e armiqësuan qytetarin, në kohët më të vështira për popullin tonë, duke i shkaktuar plagë të rënda vendit dhe shoqërisë. Armiqësi e cila u shfrytëzua nga të gjithë, kundër nesh.

Këta i thanë njëri-tjetrit vëlla, dhe u bënë bashkë vetëm në kohë të vështira për këta vet.

Ju kujtohet 14 shkurti 2014, kur Isa dhe Hashimi i përbinë të gjitha ato me të cilat na kishin armiqësu ma herët dhe u bënë bashkë për vete, që të shpëtojnë edhe ndonjë ditë nga qytetari, nga populli.

Por, edhe ditët e këtyre po perëndojnë. Po vjen dita juaj qytetarë. Po vjen dita juaj atdhetarë, dita juaj të rinjë e të reja. E drejta po fiton.

Këtyre sot iu thonë JO pikërisht ata të cilët u mashtruan gjatë prej tyre, atdhetari – në vlerat e të cilit u thirrën, intelektuali, i riu dhe e reja që e kuptuan mashtrimin e tyre.

Këtyre sot, të gjithë ne iu themi: JO – SHKONI.

Në ditët e fundit të tyre, për ta shpëtu lëkurën e vet edhe ndonjë ditë, e treguan dhe po e tregojnë egërsinë e tyre duke arrestu e shypë opozitën, e cila iu tha jo këtyre. I tha Jo – korrupcionit që e ka varfëru Kosovën,

JO – Kosovës pa ushtrinë e vet, JO “zajednicës” që na e bjen Serbinë në Kosovë, JO – demarkacionit, që nga Çakorri e bjen kufirin në Kuqishtë dhe nga Kulla e Zhlepit në Savino Vodë.

Këta po e humbin fuqinë, po e humbin kontrollin, këta po shkojnë, e bashkë me ta edhe korrupcioni, edhe “zajednica” edhe demarkacioni. Gjykata Kushtetuese ua konfirmoi këtë.

Këta që dikur na armiqsonin ndërmjet vete e që populli e ka kuptu hilen e tyre, e që nuk po munden me e mashtru më qytetarin e vendit, tani po duan me e tutë bashkësinë ndërkombëtare prej opozitës, dhe në panikë po shkojnë te miqt, e besa edhe te armiqtë me iu thanë se Kosova është në rrezik nga opozita.

Por miqt e dijnë të vërtetën për Kosovën dhe e njohin Kosovën e vërtetë. E Kosova e vërtetë nuk janë këta mashtrues.

Po mundohen me i frikësu të gjithë, edhe komunitete etnike në Kosovë, por nuk po ju bën punë më. Të gjithë e kanë kuptu hilen e tyre.

Edhe pse zor është me e ba Kosovën, Kosova do të fillojë me u ba kur të shkojnë këta.

Shkoni, që të bëhet Kosova,

Shkoni, që të ndalet korrupcioni,

Shkoni, që të ndodhë zhvillimi ekonomik,

Shkoni, që të kthehet Trepca…

Shkoni, që të mos i mbushim kampet e azilit nëpër Evropë,

Shkoni, që të kemi Ushtrinë tonë,

Shkoni, që t’i kthejm kufijt tanë,

Shkoni, që të kemi shtet me sovranitet,

Isë dhe Hashim – shkoni, se Kosova nuk ju duron ma.

Policia e Kosovës nëpërmjet një njoftimi për media ka mohuar akuzat e Lëvizjes Vetëvendosje se Policia intervenoi dhunshëm ndaj protestuesve që po vinin nga Shqipëria.

Policia thotë se bazuar në procedurat ligjore kufitare, 42 personave ju është refuzuar hyrja.

“Në pikën kufitare që lidhë Republikën e Kosovës me atë të Shqipërisë, bazuar në procedurat ligjore kufitare, një numri prej dyzet e dy (42) personave ju është refuzuar hyrja”, thuhet në saqrimin e PK-së, transmeton PrizrenPress.

Sqarimi i plotë i Policisë:

Me qëllim të informimit të drejtë të opinionit publik lidhur me shkrimet dhe deklarimet e publikuara sot (09.01.2016) në media dhe portale, se kinse Policia e Kosovës po i ndalon dhe pengon protestuesit që në mënyrë të organizuar me autobus të vijnë nga rajonet e ndryshme në Prishtinë, ky deklarim nuk është i vërtet dhe nuk qëndron.

Po ashtu edhe deklarimi në media se kinse Policia e Kosovës ka rrahur dhe maltretuar protestues të ndryshëm duke përfshirë ata nga Shqipëria, nuk qëndron dhe nuk është aspak i vërtetë.

Ashtu siç e kemi bërë të ditur Policia e Kosovës (PK) me kohë ka bërë të gjitha përgatitjet e nevojshme duke hartuar planin operativ, për tu kujdesur për sigurinë e përgjithshme në Republikën e Kosovës, mbajtjen e rendit dhe sigurisë publike, zbatueshmerinë e ligjit, si dhe ndërmarrjen e masave të nevojshme policore ndaj veprimeve të mundshme kundërligjore dhe luftimi i të gjitha dukurive negative që mund të shkaktojnë jostabilitet.

Andaj referuar planit policor si dhe përgjegjësive ligjore që kemi, PK-ja është duke ndërmarr veprimet e saja konform autorizimeve ligjore duke përfshirë edhe kontrollin në komunikacionin rrugor, por në asnjë rast të vetëm nuk ka ndaluar dhe penguar qarkullimin e asnjë autobusi në asnjë rajon.

Ndërsa në pikën kufitare që lidhë Republikën e Kosovës me atë të Shqipërisë, bazuar në procedurat ligjore kufitare, një numri prej dyzet e dy (42) personave ju është refuzuar hyrja.

Policia e Kosovës e ri-thekson se njeh të drejtën e qytetarëve për tubime publike, fjalën e lirë në tubime publike, protesta e manifestime publike në pajtim me Kushtetutën dhe ligjet në fuqi.

Policia e Kosovës siguron opinionin e gjerë se do të ndërmarrë të gjitha masat e nevojshme për zbatimin e ligjit, garantimin e rendit dhe qetësisë publike, lëvizjen e lirë dhe mbarëvajtjen e qetë dhe pa incidente të kësaj proteste, i cili edhe është prioritet i yni.

Me respekt,
Zyra për Informim e PK-së

Lëvizja Vetëvendosje akuzon Policinë e Kosovës se intervenoi dhunshëm ndaj protestuesve që po vinin nga Shqipëria. Sipas VV-së, ndalimi dhe përdorimi i dhunës ndaj protestuesve që po vinin nga Shqipëria, është veprim antikombëtar dhe i kundërligjshëm

“Policia e Kosovës intervenoi dhunshëm ndaj protestuesve që po vinin nga Shqipëria. Policia i ndaloi ata në kufi për të mos lejuar hyrjen e tyre dhe përdori dhunën për t’i shpërndarë”, thuhet në një reagim të VV-së.

“Qeverisë së Kosovës, e orientuar që ta lejojë futjen e Serbisë në Kosovë, po i pengon ardhja e motrave dhe vëllezërve tanë nga Shqipëria, për të protestuar në mbrojtje të Republikës së Kosovës”.

“Policia që nga mëngjesi ka filluar me provokime të rënda ani pse çdo konventë ndërkombëtare e obligon që të sigurojë të drejtën e pjesëmarrjes së lirë të njerëzve në protesta”.

“Ndalimi dhe përdorimi i dhunës ndaj protestuesve që po vinin nga Shqipëria, është veprim antikombëtar dhe i kundërligjshëm”. /PrizrenPress.com

Janë nisur 17 autobusë nga Malisheva si dhe mijera aktivistë me vetura private për të protestuar në Prishtinë kundër qeverisë antikushtetuese për shtet me Sovranitet.

Drejt Prishtinës janë nisur edhe dhjetëra autobus me protestues nga të gjitha qytetet e Kosovës.