Protesta qytetare për të kërkuar llogari nga institucionet lokale dhe qendrore për vdekjen e tre vjeçares Xheneta Gashi do t’i ketë dy kërkesa: dorëheqjen e Kryetarit të Komunës së Prizrenit dhe dy ministrave të qeverisë së Kosovës, atij të kulturës dhe atij të planifikimit hapësinor, si dhe ndjekjen penale të të gjithë përgjegjësve institucional që me mosveprimin e tyre shkaktuan tragjedinë, ka bërë të ditur përmes një komunikate OJQ-ja, Ec Ma Ndryshe.

Kjo OJQ thotë se thirrjes për protestë në Prizren për të kërkuar llogari për tragjedinë e javës së kaluar po i përgjigjen edhe shumë organizata nga qytete të ndryshme të Kosovës.

Ec Ma Ndryshe bën të ditur se deri në këtë moment këto organizata janë deklaruar se e përkrahin dhe i bashkohen protestës së Prizrenit: Fondacioni Kosovar për Shoqëri Civile – KCSF, Instituti GAP, Iniciativa për Progres – INPO, Qendra Kosovare për Studime të Sigurisë – QKSS, Forumi për Iniciativa Qytetare – FIQ, Anibar, Grupi për Studime Juridike dhe Politike – GSJP, Lëvizja FOL, Qendra për Politika dhe Avokim – QPA, Syri i Vizionit, Instituti për Politika Zhvillimore – INDEP, Klubi Politik i Studentëve, Instituti Demokraci për Zhvillim – D4D, Interneës Kosova, BIRN Kosova, 7 Arte dhe Integra.

“Ne kërkojmë që rasti i neglizhencës institucionale që prodhoi tragjedinë e javës së kaluar të diskutohet si pikë e veçantë e rendit të ditës në seancën e ardhshme të Kuvendit të Kosovës. Për këtë, i ftojmë deputetët e Kuvendit të Kosovës që vijnë nga Prizreni që sa më parë të marrin këtë nismë për debat parlamentar për tragjedinë e Prizrenit”, thuhet në komunikatë.

Gjithashtu, Ec Ma Ndryshe thotë se, “i bashkohemi thirrjes së nënës së Xheneta Gashit për drejtësi për vajzën e saj dhe e konsiderojmë si qëndrim shumë të dinjitetshëm refuzimin e saj për të pranuar ndihmën financiare nga Komuna e Prizrenit. Në këtë rast, u bëjmë thirrje të gjithë qytetarëve të vullnetit të mirë për solidarizim me nënën e Xhenetës, e cila ka apeluar për ndihmë nga qytetarët për të siguruar një kulm të sigurt mbi kokë. Ky qëndrim i saj është thirrje për të gjithë qytetarët, të cilët nesër me pjesëmarrjen e tyre në protestë do të kërkojmë llogari nga institucionet e shtetit për këtë tragjedi”./PrizrenPress.com/

Lidhja Demokratike e Kosoves(LDK) në Prizren ka akuzuar pushtetin komunal të Ramadan Mujës, se po punëson militantët e PDK-së.

“LDK shpreh indinjatën e thellë karshi militantizmit të madh të të punësuarve në Komunën e Prizrenit, duke lënë anash profesionistë dhe persona të merituar”, thuhet në komunikatën e LDK-së në Prizren.

Sipas këtij subjekti politik, Komuna e Prizrenit nuk është e interesuar për profesionist.

“Në konkursin i datës 20.04.2016,Komuna e Prizrenit, ka lënë anash vërtetë njerëz meritor, profesionist dhe të ndershëm, duke marrë në ato pozita militantët e tyre”./PrizrenPress.com/

Lëvizja Vetëvendosje i është bashkuar mbi 10 organizatave të shoqërisë civile të cilat kanë konfirmuar pjesëmarrjen e tyre në protestën e thirrur për të mërkurën që për kërkesë ka dorëheqjen e Ramadan Mujës dhe Ministrit të Kulturës dhe atij të Ambientit pas vdekjes së një vajze tre vjeçare nga shembja e një shtëpie të vjetër në Priren.

“Duke pasur parasysh tragjedinë e fundit në Prizren, gjendjen e rëndë të trashëgimisë kulturore si dhe neglizhencën e Komunës së Prizrenit dhe Qeverisë së Republikës së Kosovës si përgjegjësit kryesor për këtë situatë, Qendra e Lëvizjes Vetëvenodsje në Prizren mbështet protestën e thirrur nga organizatat e shoqërisë civile”, thuhet në një njoftim të partisë më të madhe opozitare në vend.

Protesta do të mbahet të mërkurën, më 15 qershor, në ora 12:00, në sheshin ‘Shadërvan’.

Më 6 qershor një fëmijë tre vjeçar humbi jetën pasi një mur i një shtëpie të vjetër u shemb duke lënduar edhe dy anëtarë të tjerë të familjes.

Sipas Policisë, shembja e murit ka ndodhur pas reshjeve të shiut dhe se në gjendje të rëndë janë edhe nëna me fëmijë tjetër, 10 vjeçar.

Ngjarja tragjike ka nxitur Ministrinë e Kulturës dhe Komunën e Prizrenit që të fajësojnë njëra tjetrën si përgjegjëse për atë zonë.

Drejtoresha e Departamentit të Trashëgimisë Kulturore në Ministrinë e Kulturës, Vjollca Aliu, ka thënë se ministria ka insistuar që ajo zonë ku ka edhe shtëpi të tjera të vjetra duhet të ruhet, porse sipas saj, ata kanë dërguar kërkesë nga Komuna e Prizrenit që të ndërmarrë masa për të siguruar ambientin.

Është raportuar se Komuna e Prizrenit ka vonuar një tender që parashihte intervenim në këto shtëpi.

Në anën tjetër, Kryeprokurori nga Prizreni, Sylë Hoxha, ka thënë se për rastin do të nisin hetimet, duke mos përjashtuar se në këtë rast ka pasur edhe elemente penale dhe të neglizhencës. Por, deri më tani nuk ka pasur të dyshua

Këshilli Organizativ për shënimin e 16 Qershorit – Ditës së Çlirimit dhe Ditës së Dëshmorëve të Komunës së Malishevës, i drejtuar nga kryetari Ragip Begaj, ka mbajtur sot mbledhjen e fundit të saj, në kuadër të përgatitjeve për shënimin e 16 Qershorit.

Këshilli Organizativ, ka vlerësuar se çdo gjë është gati dhe se janë kryer të gjitha parapërgatitjet.

Kryetari Begaj, i ka falënderuar të gjithë anëtarët e Këshillit Organizativ, për kontributin e tyre në përgatitjet për shënimin e kësaj dite të shenjtë për Malishevën, ndërsa më pas, drejtoresha për kulturë, rini dhe sport, Blerta Krasniqi, i ka njoftuar anëtarët e këshillit, me agjendën e dy ditëve për shënimin e 16 Qershorit.

Sipas Krasniqit, disa aktivitete sportive tashmë kanë përfunduar, ndërsa disa tjera janë në përfundim e sipër, ku më 15 qershor planifikohen të përfundojnë, ndërsa edhe disa aktivitete kulturore, do të përfundojnë po më 15 qershor, kurse pjesa tjetër, e aktiviteteve tradicionale, do të mbahen më 16 qershor.

Këtë agjendë të cilën e ka miratuar edhe Këshilli Organizativ, më 16 qershor, aktivitetet do të fillojnë me mbledhjen solemne të Kuvendit të Komunës, për vazhduar me homazhe dhe nderime, pastaj tubimi qendror, kurse gjatë tërë ditës do të ketë edhe përurime të projekteve, kryesisht infrastrukturë rrugore, si dhe zbulimi i memorialit kushtuar UÇK-së, si dhe në fund do të mbahet një koncert në parkun e qytetit. /PrizrenPress.com/