Ata janë Mbretërit e Europës. Reali i Madridit është shpallur për të 11-n herë kampion në Champions League, duke e fituar trofeun më të rëndësishëm për klube në finalen ndaj Atletico-s pas gjuajtjeve të 11-metërshave, pasi 120 minutat e lojës ishin mbyllur në barazim 1-1.

Sergio Ramos dhe Carrasco ishin autorët e dy golave të shënuar përkatësisht nga një për secilën pjesën. Megjithatë në fund vendimtar ishte sërish Ronaldo. Portugezi ktheu në gol penalltinë e pestë të Realit, ndërsa më parë kishte gabuar për Atletico-n Juanfran.

“Los Blancos” e nisën në mënyrë të shkëlqyer ndeshjen, duke kaluar në avantazh që në minutën e 15 me anë të mbrojtësit Sergio Ramos. Bale devijon topin që vinte nga një goditje dënimi dhe Ramos e dërgon në rrjetë. Lojtarët e Atletico-s pretenduan për pozicion jashtë loje, por gjyqtari nuk ishte i këtij mendimi.

Më pas, Atletico tentoi më shumë drejt portës së Realit, por pa arritur të gjejë golin e barazimit. Ekipi i drejtuar nga Simeone e nisi furishëm pjesën e dytë dhe menjëherë fitoi një 11-metërsh, por sulmuesi francez Griezmann u tregua i pasaktë, duke goditur traversën.

Më pas ndeshja u zhvillua thuajse e barabartë, ku Reali po tregohej i kujdesshëm duke e mbrojtur mirë rezultatin. Por ishte minuta e 79 e takimit, kur Carrasco bëri të heshtin tifozët madrilenë.

Belgu 22-vjeçar e dërgoi topin në rrjetën e Realit pas një krosimi nga krahu i djathtë duke barazuar rezultati. Minutat e mbetura, por edhe shtesa, dy herë nga 15 minuta nuk mjaftuan për të vendosur kampionin dhe u nevojitën goditjet e 11-metërshave.

Juanfran ndëshkoi ekipin e Simeones, duke gabuar penalltinë e katërt për Atletico-s, ndërsa madrilenët ishin perfektë, duke u kurorëzuar me titullin e 11 në Champions, si askush tjetër në Europë.

Klubi spanjoll, Barcelona duket se është pajtuar për ta shitur mbrojtësin Dani Alves.

Brazilian është duke u kërkuar nga disa klube, dhe e ardhmja e tij duket se do të jetë larg “Camp Nou-t”.

Sipas mediave spanjolle, drejtuesit e Barcelonës tashmë janë hedhur në sulm për të gjetur pasardhësin e Alves-it.

“Blaugranat” janë duke menduar për Serge Aurier e PSG-së dhe Bruno Peres e Torinos, të cilët kanë bërë sezone mjaft të mira më skuadrat përkatëse.

Robert Lewandowski mund të ndryshojë skuadër në sezonin e ardhshëm.

Polaku ka kohë që është cak i skuadrave më të mëdha europiane, pasi këtë edicion ka shkëlqyer tek Bayern Munich.

Agjenti i sulmuesit polak ka konfirmuar tashmë se ka nisur bisedimet me drejtuesit e Real Madrid.

“Kemi folur me drejtuesit e Realit dhe te Bajerni e dinë këtë. Reali i Madridit është një klub i madh e prestigjioz”, ka thënë ai.

Real Madridi edhe Atletico Madridi do të përballen për herë të dytë në një finale të Ligës së Kampionëve, pas asaj të Lisbonës. Kësaj radhe dy ekipet nga Madridi matin forcat në ‘San Siro’.

Anësori Gareth Bale, i cili po kalon nëpër një formë të jashtëzakonshme këtë edicion, ka thënë se ‘Los Blancos’ kanë përgatitur disa plane për këtë finale dhe se janë gati për të triumfuar.

“Ndeshjet ndaj Atleticos janë gjithmonë të vështira. Ata mbrohen shumë mirë dhe me kundërsulme luajnë me të vërtetë mirë. Por ne kemi disa plane për ndeshjen e sotme. Të mbajmë mirë topin, të mbrohemi kur nuk e kemi atë dhe të jemi saktë para portës kundërshtare. Mund të luajmë me harkime, kundërsulme dhe shumëçka tjetër. Jemi gati, besoj se do të triumfojmë”, ka thënë Bale për ‘The Guardian’.