Drejtoria e Shërbimeve Publike ka njoftuar se të martën, më 11 shkurt 2025, nga ora 09:00 deri në orën 16:00, rruga “Saraçët” në Prizren do të jetë e bllokuar për qarkullim.

Sipas njoftimit zyrtar, bllokimi do të bëhet në segmentin nga Shtëpia e Kulturës “Xhemajli Berisha”, për shkak të largimit të kabllove të panevojshme të internetit dhe vendosjes së ndriçimit modern.

“Kabllot që nuk janë funksionale po shkaktojnë ngarkesë të tepërt në shtyllat elektrike dhe si pasojë po deformohen, prandaj do të largohen. Po ashtu, do të vendoset ndriçimi ‘Smart’ për përmirësimin e kushteve në këtë rrugë”, thuhet në njoftim./PrizrenPress.com/

Oferta e Shoqatës Bamirëse “Jetimat e Ballkanit” për shfrytëzimin e hapësirës përkatësisht pronës së Komunës së Prizrenit për ndërtimin e qendrës komunitare është shpallur si e përgjegjshme nga komisioni përkatës ka njoftuar drejtori i Punës dhe Mirëqenies Sociale, Rasim Demiri.

“Komisioni pas vlerësimit të dokumentacionit përkatës të organizatave që kanë aplikuar, shpall si të përgjegjshme OJQ-në ‘Jetimat e Ballkanit’”, thuhet në njoftimin e tij.

Aty theksohet se afati për ankesa është 7 ditë nga dita e publikimit të këtij njoftimi.

DPMS në muajin janar ka shpallur thirrjen publike për organizatat joqeveritare që veprojnë në fushën e shërbimeve sociale që të aplikojnë për shfrytëzimin e hapësirës përkatësisht pronës së Komunës së Prizrenit për ndërtimin e qendrës komunitare.

“Qëllimi i qendrës sociale-komunitare është të ofrojë përkujdesje për personat në nevojë, rastet sociale, grupet e margjinalizuara dhe të moshuarit. Shërbime përmes një kuzhine popullore, duke krijuar një hapësirë ku ata të ndihen të mbështetur, të përfshirë dhe të respektuar. Qendra duhet të ofrojë gjithashtu aktivitete sociale, kulturore dhe shërbime bazë për mirëqenien e tyre”, thuhej mes tjerash në thirrjen publike, raporton Telegrafi.

Dhënia e pronës së Komunës së Prizrenit për ndërtimin e qendrës komunitare bazohet në vendimin e Kuvendit të Komunës të miratuar në korrik të vitit 2024.

Kjo vendimmarrje ishte kundërshtuar nga anëtarë të Kuvendit nga radhët e LVV-së me arsyetimin se prona e sipërpërmendur ka shërbyer si hapësirë publike përkatësisht park për fëmijë. Megjithatë vendimi i KK-së së Prizrenit pati kaluar filtrin e ligjshmërisë nga MAPL-ja.