Policia në Prizren ka konfiskuar një armë, pas publikimit nga një femër në rrjetin social ‘Facebook’

“E dyshuara femër kishte publikuar në rrjetin social ‘Facebook’ disa fotografi në të cilat mbante një armë zjarri. Pasi që është kontaktuar ka pranuar se ka pasur në dorë armën në fjalë, por e njëjta armë sipas saj, është pronë e të dyshuarit mashkull K/Shqiptar dhe i njëjti e ka në posedim”,njofton Policia e Kosovës.

“Pasi që është kontaktuar i dyshuari është intervistuar dhe ka dorëzuar armën me gas te kalibrit 9 mm”. Nuk raportohet për të arrestuar. Rasti është nën hetime. /PrizrenPress.com/

Dy qese plastike, njëra me peshë prej 11.95 gr dhe tjetra prej 14-49 gr. substancë e dyshuar narkotike e llojit “Marihuanë” janë konfiskuar në rrugën “Papa Gjon Pali” në Prizren.

Sipas raportit të Policisë, njësiti policor gjatë patrullimit ka vërejtur disa veprime të dyshuara të një personi.

Gjatë tentimit të identifikimit i njëjti nga vetura me një çantë është larguar ndërsa në veturë ka lënë tre të dyshuar të tjerë shokë të tij.

Në raport gjithashtu thuhet se gjatë kontrollit 10 metra nga automjeti është gjetur dhe konfiskuar një qese plastike të cilën i dyshuari e ka hedhur me herët, transmeton Klan Kosova.

I dyshuari me t’u kthyer ka sulmuar zyrtarët policor në vendin e ngjarjes i cili është arrestuar dhe me urdhër të prokurorit është në mbajtje ndërsa ndërsa tre të dyshuarit e tjerë janë liruar në procedurë të rregullt.

Vetura ‘Mercedes’ pronë e të dyshuarit, si dhe pesë telefona celularë po ashtu janë konfiskuar

Drejtori i Institutit Demokratik të Kosovës (KDI), Ismet Kryeziu, ka reaguar përmes profilit të tij në Facebook rreth dënimit të ish- punëtorit të ProCredit Bank, Abdullah Thaçi.

Sipas Kryeziut, ky është rasti më eklatant se si biznesi, pushteti dhe shteti veprojnë të përbashkuar në diskriminimin dhe shkeljen e të drejtave qytetare, si stimulojnë dhe ndihmojnë në veprime korruptive dhe keqpërdorime të buxhetit publik.

“Kur bizneset private, pushteti dhe shteti (gjykatat) i nënshtrohen ndikimeve politike dhe korrupsionit.

Abdullah Thaçi si sinjalizues i rastit të korrupsionit, largohet nga ProCredit Banka. Sepse ka thyer rregullat bankare dhe ka nxjerr informacione për transaksionet dhe keqpërdorimin e parasë së qytetarëve, nga drejtori i arsimit në Prizren.

Komuna e Prizrenit dhe pas sa vitesh vazhdon ta mbajë të njëjtin drejtor në punë dhe nuk i jep as dhe një masë shqiptuese për keqpërdorimin dhe përvetësimin e parasë publike.

Gjykata themelore e Prizrenit dënon denoncuesin dhe nuk e trajton fare rastin e drejtorit i cili ka abuzuar me mjetet publike.

Ky është rasti më eklatant se si biznesi, pushteti dhe shteti veprojnë të përbashkuar në diskriminimin dhe shkeljen e të drejtave qytetare, si stimulojnë dhe ndihmojnë në veprime korruptive dhe keqpërdorime të buxhetit publik”, ka shkruar Kryeziu. /PrizrenPress.com/

Lëvizja Vetevendosje! në Prizren reagon ashpër ndaj vendimit të padrejtë dhe joligjor të Gjykatës Themelore në Prizren me të cilën Abdullah Thaçi, ish-punëtor i Procredit Bank është dënuar me gjobë prej 5000 euro, sepse, sipas aktakuzës, gjendjen e llogarive të Drejtorit të Arsimit në Prizren Nexhat Çoçajt, dhe mësimdhënësit Bekim Thaçi, i kishte futur në një zarf dhe ia kishte dorëzuar Lëvizjes VETËVENDOSJE!, e cila këto llogari bankare i ka përdorur për të ushtruar kallëzim penal ndaj tyre.

“Sipas aktgjykimit të gjykatës, Abdullah Thaçi është dënuar për shkak se ka thyer procedurat e aplikueshme bankare, respektivisht marrëveshjen mbi konfidencialitetin dhe moszbulimin e informacioneve bankare, pavarësisht se ato dëshmi i janë dërguar prokurorisë dhe flasin për keqpërdorim të parasë publike nga Drejtori i Arsimit në Prizren, Nexhat Çoçaj. Neni 203, paragrafi 2 i Kodit Penal të Kosovës thotë se “personi nuk është penalisht përgjegjës sipas paragrafit 1. të këtij neni nëse e ka zbuluar informacionin konfidencial për interes publik nëse interesi i tillë peshon më shumë se mos zbulimi i informatës së fshehtë”. Andaj, me aktgjykimin e vet për këtë rast Gjykata Themelore e Prizrenit, përpos që ka marr vendim të padrejtë ka bërë edhe shkelje ligjore”, thuhet në komunikatën e VV-së.

“Më 8 gusht, Qendra e Lëvizjes VETËVENDOSJE! në Prizren deponoi kallëzim penal, pranë Prokurorisë Komunale në Prizren, ndaj Nexhat Çoçajt, Drejtor i Arsimit të Komunës së Prizrenit, dhe Bekim Thaqit, mësimdhënës, për keqpërdorim të parasë publike. Sipas dëshmive që ia dërguam Prokurorisë, ne konsiderojmë se Nexhat Çoçaj dhe Bekim Thaqi u kanë shkaktuar dëm të konsiderueshëm qytetarëve të Komunës së Prizrenit dhe rrjedhimisht kanë kryer këto vepra penale: 1. Neni 339 par 1 dhe 5,shpërdorim i pozitës zyrtare dhe i autorizimit; 2. Neni 340 pa par 1dhe 3, përvetësim gjatë ushtrimit të detyrës; 3. Neni 341 par 1 dhe 3 mashtrim në detyrë; dhe 4. Neni 342 përdorim të paautorizuar të pasurisë”.

“Prandaj, në bazë të nenit 220 par 1 të Kodit Penal të Republikës së Kosovës i propozuam Prokurorit Publik Komunal që të fillojë hetimin kundër Bekim Thaqit dhe Nexhat Çoçajt, pasi që ekziston dyshim i bazuar se këta, kanë kryer veprat penale, duke u mbështetur në provat e paraqitura. Këto keqpërdorime kanë ndodhur me rastin e organizimit të “Javës së Remzi Ademajt”, manifestim ky për nder të dëshmorit, në vitin 2011”.

“Karakteri universal i drejtësisë, e në veçanti i së drejtës penale është që të parandalojë dhe të eliminojë pasojat e mundshme që do të mund të jenë shkaktuar si pasojë e një veprimit i cili në vete përmban rrezikshmëri shoqërore. Kjo rrezikshmëri në vete përmban një hierarki brenda të së cilës bëhet edhe klasifikimi i interesit të përgjithshëm të ndjekjes penale. Kjo hierarki shprehet në parimin e quajtur anti-drejtësi. Sipas këtij parimi interesi i shoqërisë është gjithmonë që të zbulojë dhe të ndjek veprat që paraqesin rrezikshmëri më të madhe shoqërore. Rasti në fjalë është pikërisht e kundërta. Madje kjo është shpërfaqja kryesore e aparatit të PDK-së në krye me Ramadan Mujën. Prona, shteti dhe familja janë paradigma që e shpjegon ndërlidhshmërinë se më e rëndësishme është llogaria bankare e Nexhat Çoçajt, sesa llogaria e qytetarëve të Komunës së Prizrenit”. /PrizrenPress.com/