Një rrugë me pluhur të çon në Bucca. Nga qyteti i dytë më i madh irakian, Basra, deri në Bucca janë vetëm 94 kilometra, por askund nuk sheh ndonjë tabelë që të sinjalizon vendin e burgut të dikurshëm më të madh të Irakut.

Duhet t’i pyesësh banorët: Papritur në mesin e shkretëtirës shfaqen fusha të gjelbra në anë të rrugës: Ullinj dhe portokaj: Një kullë vëzhgimi, mure betoni e një postbllok: “Po”, thotë roja, “kjo është Bucca”.

Ndërkohë që në ndërtesën e dikurshme të administratës amerikane ka zënë vend një firmë logjistike nga Basra, qelitë e burgut po përdoren nga një njësi e ushtrisë irakiane.

Nuk ka ndryshuar gati asgjë, qëkur amerikanët u larguan nga ky kamp në fundin e vitit 2009. Asgjë nuk është shkatërruar, siç është raportuar në medie.

Aty gjen edhe sheshin kryesor me projektorë të mëdhenj, ku bënin shëtitjen e ditës të burgosurit. Më pas barakat që mbanin secila rreth 200 të burgosur brenda.

Kreu i IS-it ka qenë në burgun e Bucca-s

Në kohën kur Marvan shërbeu për katër vjet tek Kryqi i Kuq Ndërkombëtar në Bucca, në burg qëndronin 30.000 vetë. Disa qëndruan për vite, disa pak muaj e të tjerë vetëm disa javë. Sa kohë qëndroi këtu koka e të ashtuquajturit “Shteti Islamik”, Abu-Bakr al-Bagdadi, nuk mund të thuhet me saktësi. Ka burime që thonë se ai qëndroi vetëm katër muaj, të tjerë thonë disa vjet.

Ka gjasë që kreu i ISIS-it të jetë burgosur disa herë. “Arrestimet kryesore janë bërë nga viti 2007 dhe 2008”, thotë Marvan që nuk do të përmendë emrin e plotë. Kryqi i Kuq Ndërkombëtar ka premtuar heshtje, punonjësit e tij punojnë në ilegalitet.

Marvani vetë ishte përgjegjës për vizitat që iu bëheshin të burgosurve nga familjet që bënin rrugë të gjatë. Dy vjet me radhë ka negociuar ai me amerikanët dhe britanikët derisa sa iu mundësua të hynte e të jetonte në ndërtesën e administratës.

Në fillim ka pasur vetëm sunitë

Shumica e të burgosurve vinin nga rajonet sunite, që sot kontrollohen nga ISIS-i: Ramadi, Falluxha, Salahudin, Dijala dhe Nineva. Edhe rezistenca kundër amerikanëve e pati origjinën e saj tek popullsia sunite.

Gati përditë shpërthenin bomba të atentatorëve vetëvrasës apo lëndë eksplozive për të vrarë amerikanë e ata që punonin bashkë me ta. Bucca ishte burgu i rebelëve, që konkurronin mes tyre se kush kishte vrarë më shumë njerëz: “Kam vrarë 300 prej tyre”, citon Marvan një nga fjalitë e të burgosurve.

Deri në vitin 2007 në këtë burg gjeje vetëm sunitë. Kur filloi lufta qytetare erdhën të burgosur shiitë. Para barakave ata qëndronin të gjithë të veshur mekostumet e verdha: kasta drejtuese e “Shtetit Islamik” përreth strategut dhe ideologut të vrarë në vitin 2014 në Siri, Haji Bakr, simpatizantë e anëtarë të terrorit sunit të “Al-Qaida”-s, ish-oficerë sekretë të Sadam Huseinit, dhëndri i tij, ish-ministri i Brendshëm dhe në fund edhe krerë të rezistencës shiite dhe milicisë së tyre.

Në Bucca skicoheshin plane, diskutoheshin ideologji, krijoheshin aleanca, ujdi për kalifatin. “Sunitët duhej të ndaheshin nga shiitët”, kujton anëtari i Kryqit të Kuq, Marvan. “Ndryshe do të kishim edhe në burg luftë civile”.

“Varrezë e të mbijetuarve”

Në një nga rrugët anësore në breg të Shat-Al-Arab në Basra rri ulur në zyrën e tij, Saad Abdulla-Al Fatlavi dhe rrotullon në gishta tespihet. Abu-Khaled, siç e thërrasin miqtë, ka qenë dy vjet në burgun e Buccas.

Tani ai shet udhëtime në Iran, si punë dytësore ai lufton krah milicisë Hizbollah kundër ISIS-it dhe Abu-Bakr-Al Bagdadit në frontin e Samarës, aty ku filloi konflikti mes sunitëve dhe shiitëve para dhjetë vjetësh. Tani ai është përhapur në të gjithë rajonin- “Bucca ishte për mua një varrezë e të mbijetuarve”, e komenton ai kohën në burgun amerikan.

“Ata erdhën natën me helikopter, thyen derën e shtëpisë më lidhën duart në banjë dhe më goditën në gjunjë”, rrëfen 47-vjeçari arrestimin e tij nga ushtarë britanikë e amerikanë. “Ata erdhën drejt e tek unë e më akuzuan si burim i mbledhjes së parave për Hizbollahun. Duhej të jepja informacione, të tradhtoja shokët”. Hetimi u bë në Bagdag, pastaj Al-Fatlavi u zhvendos në Bucca, në burg ndodhej ndërkohë Al-Bagdadi dhe “trupa” e tij, rrëfen ish-i burgosuri.

Kur amerikanët filluan të tërhiqen nga Iraku, nga shtatori 2009, ata filluan të boshatisnin njëri-pas tjetrit burgjet: Në intervale të rregullta 170 të burgosur dërgoheshin në Bagdad.

Vetëm 250 iu kaluan qeverisë irakiane. Ndër ta ishin kryesisht përfaqësues të lartë të regjimit të Sadam Huseinit, si ish-ministri i Jashtëm, Tarek Azis.

Të tjerëve iu jepej liria me një “happy bus”. Saad Abdulla-Al Fatlavi u kthye fillimisht tek dy gratë dhe pesë djemtë e tij në Basra. Abu Bakr al-Bagdadi krijoi një vit më vonë organizatën ISIS – “Shteti Islamik në Irak dhe Siri”.

Ndërkohë ISIS-i ka vënë nën kontrollin e tij pjesë të mëdha të Irakut dhe ka shpallur kalifatin. Edhe Hizbollahu i Fatlavit është kthyer në një nga milicitë shiite më të fuqishme.

“Në Bucca të gjithë u bënë ata që janë sot”, i komenton ish-punonjësi i Kryqit të Kuq, zhvillimet në Irak. DW

Protesta kundër vendimit të presidentit të Maqedonisë, për të falur politikanët e hetuar për krime ka eskaluar.

Të zemëruar me këtë vendim, protestuesit e mbledhur në Shkup, i kanë vënë flakën zyrës së presidentit.

Protesta po zhvillohet përpara zyrës së Presidentit, Gjorgje Ivanov. Mijëra persona të mbledhur në shesh kanë hedhur fishekzjarre dhe gjëra të forta në drejtim të ndërtesës shtetërore.

Me thirrjet “Nuk ka drejtësi, nuk ka paqe”, protestuesit marshuan në drejtim të ndërtesës së Presidencës si reagim kundër vendimit të Ivanovit për të falur të gjithë politikanët nën hetim, ndërkaq Zyra e Ivanovit është përfshirë në flakë.

Amnistia u mor dy ditë më parë dhe kishte për qëllim që të mos kishte tensione gjatë zgjedhjeve. Protestat organizohen nga shoqëria civile.

Gruaja e divorcuar Gëzime Lleshi, 33 vjeç, që plagosi me thikë dhe dëmtoi në organet gjenitale ish-punonjësin e CEZ-it, që tentoi ta përdhunonte, i telefonoi fill pas ngjarjes gruas së dhunuesit.

Gruaja, e cila është e moshës rreth 35 vjeçe, pasi e goditi disa herë me thikë H. B., i ka telefonuar bashkëshortes së tij, duke i kërkuar të mbërrijë në shtëpinë e saj dhe ta largojë nga aty, ndryshe do t’i priste organet gjenitale.

“Panorama” shkruan se autori është me inicialet H.B., rreth 60 vjeç dhe i ka shpëtuar për mrekulli nga pasojat e goditjeve me thikë dhe mjete të tjera prerëse nga gruaja e re.

Mësohet se ai, në gjendje të dehur, ka tentuar të kryejë marrëdhënie seksuale me një femër në lagjen “Gjeologu” të Bulqizës, por jo vetëm ka hasur në rezistencën e gruas së divorcuar, por është qëlluar disa herë me thikë, madje mendohet se, është tentuar prerja e organeve gjenitale të agresorit.

Ngjarja e rëndë është mbajtur sekret nga mjekët e spitalit të Bulqizës dhe policia lokale për mediat, por burime jozyrtare kanë arritur të nxjerrin në dritë ngjarjen e rëndë, të ndodhur pak ditë më parë.

Mësohet se, në momentin kur ish-punonjësi i CEZ-it ka mbërritur në spital, në gjendje kritike, me plagë të rënda në dy kofshë, mjekët e urgjencës i kanë telefonuar Komisariatit të Policisë dhe kanë informuar se një shtetas me plagë të shkaktuara nga mjete prerëse, ndodhet në spitalin e qytetit.

Oficerë të Policisë Gjyqësore kanë mbërritur menjëherë në spitalin e Bulqizës.

Kanë kontaktuar me shtetasin me inicialet H.B. dhe kanë kërkuar prej tij të tregojë rrethanat e ngjarjes.