Këshilli për Trashëgimi Kulturore (KTK) i Qendrës Historike të Prizrenit me anë të një komunikate për media ka shprehur shqetësimin rreth ngjarjeve të fundit në kompleksin e Kishës Katolike (Katedralja e Prizrenit)

“Dështimet e vazhdueshme të institucioneve përgjegjëse për t’i mbrojtur objektet në Qendrën Historike të Prizrenit që janë në listën e trashëgimisë kulturore nën mbrojtje të përkohshme, kanë çuar në degradimin sistematik të Qendrës Historike të Prizrenit, me një theks të veçantë në ngjarjen e fundit në kompleksin e Kishës Katolike. Është hera e dytë brenda një periudhe të shkurtër kohore që ky objekt i mbrojtur përfshihet nga zjarri. Ky është një tregues i qartë që Komuna e Prizrenit, e cila është e obliguar me Ligjin për Qendrën Historike të Prizrenit (neni 13, paragrafi 1) të mbrojë këtë Qendër, nuk ka marrë asnjë masë parandaluese e mbrojtëse kundër zjarrit, rreziqeve, fatkeqësive natyrore dhe fatkeqësive të tjera.”

“Objekti në kompleksin e Kishës Katolike që është përfshirë nga zjarri në Qendrën Historike të Prizrenit është vlerë e trashëgimisë arkitekturore e regjistruar me numrin unik 004203 në Bazën e të Dhënave të MKRS dhe është e përfshirë me nr. rendor 844 në Listën e Trashëgimisë Kulturore në mbrojtje të përkohshme, të miratuar nga Ministri i MKRS me 09.10.2015,” thuhet në reagim të KTK-së.

Ky këshill ka kërkuar të ndërmerren masa që të hetohet rasti dhi kanë kërkuar fond për riparim të dëmeve.

“Me qëllim që të parandalohet degradimit apo humbja e trashëgimisë kulturore, KTK kërkon urgjentisht nga institucionet kompetente të hetojnë rastin në fjalë dhe të dalin me rezultate konkrete. “

“Këshilli për Trashëgimi Kulturore i Qendrës Historike të Prizrenit kërkon nga MKRS dhe Kuvendi Komunal i Prizrenit të themelojnë një fond emergjent me karakter shpëtimi për riparimi të dëmeve dhe ndërhyrjen në të gjitha objektet që janë të rrezikuara nga shembja për të parandaluar shkatërrimin e mëtutjeshëm të Qendrës Historike të Prizrenit,” përfundon reagimi i KTK-së.

Një aksident i ndodhur më 28 mars rreth orës 18:20 në Malishevë, ka lënë me lëndime së paku një person i cili ka qenë duke u trajtuar në QKUK.

Mirëpo, si pasojë e lëndimeve të marra, raportohet se viktima (mashkull K-Shqiptar), më datën 09.04.2016 ka ndërruar jetë në QKUK-Prishtinë.

Me urdhër të prokurorit, trupi i pa jetë i viktimës dërgohet në IML për obduksion.

Zëvendëskryeministri i Serbisë dhe Ministri i Punëve të Jashtme, Ivica Daçiq, nuk ka pranuar të tregojë nëse ndonjëherë Serbia do t’i kërkojë falje Kosovës për krimet e kryera gjatë luftës së fundit, njofton Klan Kosova.

Daçiq tha se kërkim-falja mes vendeve vetëm sa do ta thellonte ndarjen.

Sipas tij, Kosova e Serbia duhet ta gjejnë një formulë pajtimi të njëjtë sikurse shtetet evropiane “për shembull Gjermania dhe Franca”.

Ministri serb i cili gjendet në një vizitë në Kosovë, nga Prizreni, vendi ku edhe është lindur, ka thënë se ai nuk ishte ministër në kabinetin e ish-Presidentit serb, Sllobodan Millosheviq.

Jo vetëm opozita në Kosovë po kërkon zgjedhje të parakohshme. Edhe brenda koalicionit qeverisës tashmë kanë dalë zëra që e kërkojnë një gjë të tillë. Deputeti i PDK-së, Nait Hasani, është një prej tyre. Në një bisedë për Radio Kosovën, deputeti Hasani thotë se vendi duhet të shkojë në zgjedhje jo pse kërkon opozita, por sepse Qeveria aktuale nuk ka mundësi të qeverisë si duhet. Hasani thotë se vetëm zgjedhjet e reja, mund t’ua kthejnë shpresën e humbur qytetarëve të Kosovës.

Deputeti i Partisë Demokratike të Kosovës, Nait Hasani është mjaft kritik me qeverisjen e Isa Mustafës. E duke parë që kjo Qeveri sipas tij, nuk mund të ndryshojë, ai thotë se vendi duhet të shkojë në zgjedhje. Në një bisedë për Radio Kosovën, deputeti Hasani thotë se zgjedhjet duhet të mbahen brenda këtij viti, por jo vetëm pse ato i kërkon opozita.

“Jo pse kërkon zgjedhje opozita ne duhet të shkojmë në zgjedhje, por për shkak të mungesës së investimeve, premtimet që i ka dhënë Qeveria nuk ka mundur t’i realizojë, prandaj duhet të shkojmë në zgjedhje”, tha Hasani për Radio Kosovën.

Teksa i kërkon zgjedhjet si mënyrë për daljen nga kriza politike e institucionale në vend, deputeti Hasani shprehet mjaft kritik për Qeverinë e drejtuar nga Isa Mustafa.

“Performanca e Qeverisë tregon që nuk ka një zhvillim të vendit dhe mungesa e zhvillimit të vendit, jep një mundësi që ne duhet të ndryshojmë. Ndryshimet janë, ose duhet të shkojmë në zgjedhje, ose duhet të performojë Qeveria. Qeveria nuk ka mundësi të performojë, prandaj duhet të shkojmë në zgjedhje”, shprehet ai.

Një arsye shtesë pse vendi duhet të shkojë në zgjedhje, sipas tij, është mosfunksionimi i duhur i Kuvendit të Kosovës.

“Ana tjetër është mungesa e zhvillimit demokratik të sistemit në Kuvend, tregon se ne jemi në gjendje të anarkisë brenda Kuvendit, në gjendje të papërshtatshme të zhvillimit të punimeve të Kuvendit dhe kjo tregon se ne domosdo duhet të shkojmë në zgjedhje”, tha ai.

Sipas Hasanit, zgjedhjet i kërkon edhe elektorati i Partisë Demokratike të Kosovës.

“Unë mendoj se qytetarët e kanë humbur besimin, e kanë humbur shpresën dhe atyre do t’u kthehet shpresa me anë të zgjedhjeve. Edhe elektorati i PDK-së, e ka humbur shpresën dhe edhe ai kërkon zgjedhje për ndryshim të kësaj gjendje”, tha Hasani për Radio Kosovën.

Ndryshe, opozita tash e disa muaj po kërkon zgjedhje të parakohshme, ndërsa krerët e partive të koalicionit qeverisës thonë se zgjedhje do të ketë sipas afatit kushtetues në qershorin e vitit 2018.