“Pa një udhëheqësi të mirëfilltë të vetë gjyqësorit, që do të fillojë të kërkojë më shumë dhe të ngritë zërin më shpesh, nuk do të hiqet as mendësia e varshmërisë prej politikës”, tha ekspertja nga Instituti KIPRED, Ariana Qosaj-Mustafa
Lufta kundër krimit të organizuar edhe korrupsionit, një nga kriteret kyçe të hapjes së perspektivës evropianë të shtetit të Kosovës, duke përfshirë edhe lirinë e lëvizjes, po mbetet një betejë e pashpresë për qytetarët. Analistët politikë dhe ekspertë të sundimit të ligjit konsiderojnë se prokuroria e gjyqësori nuk po mund të dalin nga kthetrat e mafiopolitikës në pushtet edhe nga ndikimi i mafio-parapolitikës oligarkike, kur dihet fare mirë se mafiozët nuk kanë as vullnet dhe as interes që ta luftojnë korrupsionin dhe krimin e organizuar. Të gjitha proceset integruese, por edhe të gjitha mbështetjet dhe zhvillimet e tjera në interes për qytetarët dhe vendin, lidhen e kushtëzohen me luftën efikase e konkrete që duhet të bëhet kundër korrupsionit, krimit të organizuar dhe klaneve, karteleve e nepotizmit, që kanë kapur te gjitha segmentet, në të gjitha nivelet e pushtetit.
Politologu Faik Krasniqi i ka pohuar gazetës se luftimi i korrupsionit vazhdon edhe sot të mbetet njëra nga sfidat kryesore në të gjitha segmentet e shoqërisë.
“Korrupsioni po e nxin jetën e qytetarëve të Kosovës si dhe padrejtësitë e tjera të mëdha, ku gjithçka bëhet me miqësi, klane, grupe me dredhi të fshehta, dinakëri e marrëveshje verbale. Prej pas luftës Kosova është duke vuajtur nga korrupsioni i nivelit të lartë, i instaluar nga kjo klasë politike, e sidomos nga partitë që udhëheqin shtetin prej shpalljes së pavarësisë. Edhe Qeveria e tanishme e Kosovës ka dështuar në luftimin e korrupsionit dhe në vend të luftimit të tij, korrupsioni është rritur edhe më shumë”, ka theksuar ai./kosova sot/