Në fshatin Nashec është përkujtuar në 27- vjetorin e rënies, dëshmori Vetim Shala.
Për të përkujtuar jetën dhe veprën e dëshmorit Shala në fshatin Nashec,ishin mbledhur familjarë,miqë dhe shokë të dëshmorit dhe zyrtarë të Lëvizjes Vetëvendosje në Prizren.
Vëllai i dëshmorit, Amiri, tha se përkundër dhimbjes 27 mars është shndërruar edhe në festë për brezat e rinj të familjes, e cila me krenari kujton birin e saj të shtrenjtë .
Ai shprehu edhe shqetësimet e familjes së tij për mospërkujdesje të duhur institucionale ndaj dëshmorëve që u flijuan për lirinë e atdheut në etapa të ndryshme kohore para luftës në Kosovë.
Ndërkaq, zyrtari i LVV-së në Prizren, Arbër Rexhaj, tha se dëshmori Vetim Shala, ka dhënë më të çmuaren, jetën e tij për kombin, duke qenë frymëzues i fillimit të celulave të para të luftës sonë çlirimtare.
“Duke rënë në protestat e viteve të 80-ta, dëshmori Vetim Shala, do të përkujtohet me nder dhe respekt nga të gjitha gjeneratat që vijnë pas tij”, tha Rexhaj.
Vetim Shala ishte student i Fakultetit të Mjekësisë në Universitetin e Prishtinës. Ai ishte pjesëmarrës i demonstratave gjithëpopullore.
Shala u vra nga forcat serbe, duke qenë në ballë të protestave me 27 mars të vitit 1989./TVPZ/