Presidenti i zgjedhur i Kosovës, Hashim Thaçi, përsëri ka hedhur poshtë pretendimet se ai ishte i përfshirë në krime lufte.
Në një intervistë për Die Presse, Thaçi kërkon nga partitë opozitare të Kosovës që të mbështesin dialogun me Serbinë dhe flet edhe për pritshmërinë që ruta e re e refugjatëve të përfshijë edhe Kosovën, përmes së cilës të depërtohet në Evropën Qendrore.
Mediat serbe raportojnë se refugjatët po udhëtojnë gjithashtu përmes Kosovës drejt Evropës Qendrore. Qëndron këtu një rutë e re për refugjatë?
Hashim Thaçi: Ne nuk kemi asnjë indikacion se refugjatët mund të vijnë në Kosovë. Ne kosovarët ishim vetë refugjatë gjatë luftës në vitin 1999, kështu që ne jemi të mësuar me situata të tilla. Çdo hap që ne do të ndërmarrim, do t’i koordinojmë me partnerët tanë në BE. Natyrisht, Kosova ka mundësi të kufizuara. Por, në qoftë se është përcaktuar një kuotë për shpërndarjen e refugjatëve, ne jemi të gatshëm të realizojmë pjesën tonë. Është gjithashtu e qartë se shumica e refugjatëve nuk planifikojnë të qëndrojnë në Kosovë. Ata dëshirojnë të shkojnë për në Austri ose Gjermani.
Do t’i mbyllni edhe ju kufijtë e Kosovës – sikurse vendet e tjera – në raste të jashtëzakonshme, si me Maqedoninë apo Shqipërinë?
Hashim Thaçi: Unë nuk do të doja të spekuloja para se të përpiqen refugjatët të hyjnë në Kosovë. Masa të tilla si mbylljet kufitare janë në çdo rast vetëm masa të përkohshme. Problemin e refugjatëve nuk mund të zgjidhë vetëm një vend i vetëm. Kjo ka nevojë për një zgjidhje evropiane.
Opozita në Kosovë deklaron se zgjedhja e juaj si president ishte shkelje e Kushtetutës. Si mund të tejkalohet kjo çarje e thellë në vend?
Hashim Thaçi: Zgjedhja ime si president ishte legjitime. Por, ne duhet ta respektojmë vendimin e opozitës për të dërguar një ankesë në Gjykatën Kushtetuese. Kjo është demokracia.
Opozita kërkon zgjedhje të reja. Ka pasur përleshje në rrugë me policinë. Përfaqësuesit e partisë opozitare Vetëvendosje kanë hedhur gaz lotsjellës në parlament. Gjendja është goxha e tensionuar…
Hashim Thaçi: Çfarë duhet të jetë e qartë: askush nuk guxon të përdorë dhunën për qëllime politike. Në zyrën time të re si President, unë do të përpiqem të ndërtojë ura ndërmjet partive. Data për zgjedhje nuk qëndron në duart e presidentit apo tek njëra parti, por tek parlamenti.
A nuk është e vështirë për ju të ndërtoni ura, kur ju nuk njiheni nga opozita si president?
Hashim Thaçi: Unë do të jem president i të gjithë qytetarëve të Kosovës, pa marrë parasysh cilat ide politike ose cilat përkatësi fetare apo etnike ata përfaqsojnë. Opozita shtron dy tema kryesore, përkatësisht marrëveshjet që kemi nënshkruar në Bruksel dhe në Vjenë. Ka të bëjë me asociacionin e komunave serbe në Kosovë. Unë jam i bindur, se në fund të gjithë do t’i vendosin interesat e Kosovës mbi interesat e partive politike dhe ne do të mund të punojmë të gjithë së bashku për të ardhmen e Kosovës.
Partitë opozitare akuzojnë që me themelimin e Asociacionit të Komunave Serbe, Kosova do të mund të ndahet si Bosnja dhe Hercegovina?
Hashim Thaçi: Kosova nuk do të ndahet. Kjo nuk do të ndodhë në asnjë rrethanë. Kjo është e përkufizuar qartë në marrëveshje. Që projekti i Kosovës të ketë sukses, duhet t’i përfshijmë të gjitha grupet e popullsisë, duke përfshirë edhe serbët. Ne nuk guxojmë t’i izolojmë. Asociacioni i Komunave Serbe nuk do të ketë as pushtet legjislativ e as ekzekutiv. Ajo do të funksionojë në përputhje të plotë me Kushtetutën e Kosovës. Normalizimi i marrëdhënieve me Beogradin është parakusht për paqen dhe stabilitetin në rajon.
Çfarë dëshironi ju si president i ri të kontribuoni për këtë?
Hashim Thaçi: Unë personalisht e kam udhëhequr këtë proces një kohë të gjatë. Dhe, unë do ta mbështesë gjithashtu tutje atë edhe tani si president i Kosovës. Ne nuk duhet të jemi peng i së kaluarës sonë, por të punojmë për një të ardhme më të mirë të përbashkët për në BE dhe NATO. Ndoshta është shumë herët që për shkak të së kaluarës sonë të hidhur ta pranojmë këtë gjë. Por, kjo nuk do të thotë se ne nuk mund ta respektojmë njëri-tjetrin dhe të punojmë së bashku. Dhe, unë shoh gatishmërinë për të bërë këtë në Kosovë dhe në Serbi.
Por, a do të njohë Serbia si shtet të pavarur Kosovën?
Hashim Thaçi: Po, patjetër. Por, jo menjëherë. Njohja e shtetit të Kosovës nga ana e Serbisë do të pasoj paralelisht me procesin e integrimit të Serbisë në BE.
Kohët e fundit ka pasur në gazetat serbe akuza të reja që ju jeni të përfshirë në trafikimin e organeve njerëzore…
Hashim Thaçi: Këto akuza janë një shpikje e çmendur. Ne nuk kemi asgjë për të fshehur. Prandaj, Kuvendi i Kosovës ka miratuar krijimin e Gjykatës Speciale. Unë përsonalisht e kam mbështetur, sepse unë e shoh atë si një avantazh për Kosovën.
Kryeprokurori i gjykatës ka bërë të ditur se askush nuk do të ketë imunitet. A jeni të shqetësuar se ish-anëtarët e “Ushtrisë Çlirimtare të Kosovës” dhe ju personalisht mund të jeni në shënjestër të Gjykatës?
Hashim Thaçi: Ne nuk duhet të paragjykojmë vijueshmërinë e procesit të gjykatës. UÇK-ja nuk i ka shkelur rregullat ndërkombëtare. Ne i kemi shkelur vetëm ligjet e diktatorit serb Sllobodan Millosheviq dhe unë jam krenar për këtë. /Telegrafi/
