Kryetari i Aleancës për Ardhmërinë e Kosovës (AAK), Ramush Haradinaj, ka thënë se Kuvendi i Kosovës është bërë mbulesë për kapjen e shtetit.

Në këtë intervistë për “Epokën e re”, Haradinaj ka thënë se partitë opozitare nuk do të marrin pjesë në seancat e Kuvendit të Kosovës. Ky veprim i partive opozitare, sipas Haradinajt, nuk nënkupton dorëzim të mandateve.

“Nuk dorëzohen mandatet, por deputetët e opozitës nuk do të marrin pjesë në punimet e një Kuvendi, sepse e konsiderojnë jolegjitim”, është shprehur Haradinaj, i cili ka bërë me dije se opozita mbetet e bashkuar në pikat për të cilat është rënë dakord më herët, pavarësisht dallimeve që mund të kenë si subjekte politike.

“Opozita ka pasur dhe ka dallime, pasi jemi parti të ndryshme politike. Por, mund t’ju them se opozita ka një qëndrueshmëri së bashku për temat për të cilat kemi rënë në dakord, për kundërshtimin e dy marrëveshjeve, për kundërshtimin e kësaj qeverie antikushtetuese dhe për dërgimin e vendit në zgjedhje të parakohshme. Pra, për këto pika jemi bashkë dhe s’ka ndarje e as përçarje të opozitës”, është shprehur Haradinaj.

Ai ka shtuar se tash opozita do ta rrisë kundërshtimin e saj me anë të protestave deri në dorëheqjen e regjimit Mustafa – Thaçi. Kurse sa i përket paralajmërimit të presidentes Atifete Jahjaga për formimin e një komisioni të pavarur me ekspertët ndërkombëtarë për çështjen e demarkacionit me Malin e Zi, Haradinaj ka thënë se kjo ide tashmë është e vonuar.

“Mendojmë se ideja për një komision të tillë është e vonuar. Pra, në bazë të rendit, i pari veprim që është dashur të ndodhë ka qenë shkarkimi i komisionit të kryesuar nga z. Meha, pastaj fillimi i një komisioni të ri”, ka deklaruar Haradinaj. /Epoka e Re/

Situata nëpër të cilën po kalon vendi, në këtë thellim të krizës politike dhe institucionale në 7 mujorin e fundit, shtator 2015- mars 2016, dhe vazhdimin e saj pa sinjale të zgjidhjes, sipas analistëve politikë ka filluar të ndikojë negativisht te disponimi i qytetarëve dhe besimi edhe ashtu i zbehur në këtë klasë politike.

Analisti politik, Albrim Badallaj thotë se kupa e zhgënjimit të qytetarëve të Kosovës ka filluar të mbushet kaherë, por ka kulmuar me këto zhvillimet e fundit.

“Shpresa e humbur e qytetarëve daton që prej kohësh. Fillimisht statusi i zgjatur politik i Kosovës, papunësia, varfëria, moszhvillimi ekonomik, izolimi i vendit nga proceset integruese, korrupsioni e shumë dukuri të tjera negative kanë kontribuar që qytetarët e këtij vendi të mos kenë besim në klasën tonë politike dhe institucionet shtetërore, e si rezultat të kësaj pakënaqësie e kemi procesin e zgjedhjeve ku dalin vetëm 30% e popullit”, u shpreh ai për Kosova Sot.

“Realisht ngjarjet e fundit, të situatave konfliktuoze mes pozitës dhe opozitës, e këto jo vetëm verbale, kanë qenë të papara deri më tani dhe rrallëkush prej qytetarëve para 1 viti do të besonin se do të vinin situata të këtilla”, tha Badallaj. /Kosova Sot/

Policia e Prizrenit bën të ditur se ka arrestuar një person i cili kishte therur një epror të policisë një javë para Vitit të Ri.

“Një javë para Vitit të Ri, një epror i Policisë së Dragashit i cili ishte jashtë detyre dhe po lëvizte nëpër oborrin e një kafeneje ishte plagosur me mjet të mprehtë pas shpine në mënyrë tinëzare nga një person, i cili deri në ditën sotme kishte qenë i panjohur për policinë, mirëpo pas një hetimi të gjatë dhe këmbëngulës i njëjti është identifikuar dhe arrestuar”, thuhet në komunikatën e Policisë.

Sipas Policisë gjatë intervistës, në prani të avokatit mbrojtës, i dyshuari ka zgjedh të mbrohet në heshtje. Pas njoftimit lidhur me rrethanat e rastit, prokurori i shtetit ka nënshkruar vendimin për masën e arrestit policor për të dyshuarin. /PrizrenPress.com/