Zëvendëskryeministri i parë Hashim Thaçi thotë se në takimin e zhvilluar sot me Presidenten Atifete Jahjaga dhe Kryeministrin Isa Mustafa nuk është diskutuar për Gjykatën Speciale. Nëpërmjet një komunikate Thaçi përgënjeshtron Presidenten, e cila njoftoi se në takim u diskutua rreth hapave për votimin e amandamenteve kushtetueses për Gjykatën Speciale, në seancën e nesërme të Kuvendit të Kosovës.

Ministri i Punëve të Jashtme thotë se temë diskutimi ishte përfaqësimi i Kosovës në Asamblenë e OKB’së, pas insistimit të presidentes që ajo ta udhëheq delegacionin kosovar, si dhe ndryshimet në Ligjin për Benificionet e Ish Zyrtarëve të Lartë Shtetërorë pas përfundimit të mandatit.

“Zyra e Zëvendëskryeministrit të Parë të Qeverisë së Republikës së Kosovës njofton opinionin se deklarata e lëshuar sonte nga Zyra e Presidentes së Republikës së Kosovës se në takimin e mbajtur në mbrëmje në mes të Kryeministrit, z. Isa Mustafa, Zëvendëskryeministrit, z. Hashim Thaçi dhe Presidentes, Znj.Atifete Jahjaga, është diskutuar për Gjykatën Speciale, nuk qëndron. Takimi nuk ka pasur fare të bëjë me Gjykatën Speciale por ka qenë temë diskutimi vetëm përfaqësimi i Kosovës në Asamblenë e OKB-së, pas insistimit të presidentes që ajo ta udhëheq delegacionin kosovar, si dhe ndryshimet në Ligjin për Benificionet e Ish Zyrtarëve të Lartë Shtetërorë pas përfundimit të mandatit. Për çështje të tjera, e theksojmë edhe një herë, nuk është diskutuar”, thuhet në njoftimin e zyrës së Hashim Thaçit.

Ndërkohë në njoftimin nga Presidenca u tha se në takim ‘Kryeministri Mustafa dhe Zv/Kryeministri Thaçi theksuan pritjet e tyre për votimin e amandamenteve dhe procedimit të ligjit i cili rregullon çështjen e Gjykatës Speciale’.

“Presidentja e Republikës së Kosovës, zonja Atifete Jahjaga takoi sot Kryeministrin zotëri Isa Mustafa dhe Zv/Kryeministrin zotëri Hashim Thaçi me të cilët diskutoi rreth hapave për votimin e amandamenteve kushtetueses për Gjykatën Speciale, në seancën e nesërme të Kuvendit të Kosovës.Presidentja Jahjaga theksoi rëndësinë e përmbushjes së obligimeve ndërkombëtare që ka marrë shteti i Kosovës përmes votimit në Kuvendin e Kosovës. Kryeministri Mustafa dhe Zv/Kryeministri Thaçi theksuan pritjet e tyre për votimin e amandamenteve dhe procedimit të ligjit i cili rregullon çështjen e Gjykatës Speciale”, thuhej në njoftim.

Deputetja e Kuvendit të Kosovës nga radhët e komunitetit boshnjak Duda Balje tha për Kallxo.com se nuk e sheh të arsyeshme krijimin e një Gjykate të tillë.

“Si është mundur që të krijohet një Gjykatë Speciale për Kosovën e në anën tjetër nuk është krijuar për Srebrenicën në Bosnje – edhe sot e kam një mendim negativ për këtë çështje”, u shpreh Balje.

Për rastin ”Drenica”, Balje tha se nuk është kompetente për të thënë nëse është vendim i drejtë apo sipas saj vendimi i Gjykatës mbetet vendim.

Isa Mustafa është kapur në një fotografi jo aq mirë në Samitin ‘Tirana Talks’. Atje kryeministrat e rajonit u mblodhën për të biseduar për sfidat e kësaj hapësirë.

Mustafa në një moment të pushimit shihet të jetë lenë vetëm, e gjersa kryeministrat tjerë flasin më njeri-tjetrin.

Përveç konfirmimit të votës kundër themelimit të Gjykatës Speciale nga deputetët e opozitës në Kuvend, votën kundër kësaj gjykate e kanë konfirmuar edhe disa deputetë të Partisë Demokratike të Kosovës (PDK).

Deputeti Nait Hasani dhe deputetja Ganimete Musliu, kanë thënë për Telegrafin se do të votojnë kundër themelimit të kësaj gjykate.

Hasani ka sqaruar se nuk ka lëvizur nga qëndrimet e tij të mëhershme.

“Qysh para një muaji dihet qëndrimi im lidhur më këtë çështje. Nuk kam ndryshu mendim. Nesër do të votoj kundër”, ka deklaruar Hasani.

Edhe deputetja Ganimete Musliu ka theksuar do ta përsëris atë që e ka thënë edhe më parë.

“Vota ime ishte dhe do të jetë kundër themelimit të Gjykatës Speciale”.

Ndryshe, të premten deputetët e Kuvendit të Kosovës, do të votojnë për ose kundër themelimit të Gjykatës Speciale, e cila do të merret me krimet të cilat supozohen se janë kryer nga ana e ish-pjesëtarëve të Ushtrisë Çlirimtare të Kosovës (UÇK)./Telegrafi/

Gregor Guy Smith, avokat mbrojtës i Sylejman Selimit, është shprehur i shokuar me dënimet e shpallura nga gjykata për të akuzuarit në Rastin “Drenica”.

Ai gjithashtu tha se Gjykata Speciale nuk duhet votuar ngase nuk sjell kurrfarë dobie për Kosovën.

Avokati Smith në “Info Magazine” të Klan Kosovës foli për dënimin e klientit të tij, dëshmitë e ofruara nga prokuroria, si dhe procedurën e gjykimit.

Ai i quajti të munguara dëshmitë që vërtetojnë fajësinë e klientit të tij dhe paralajmëroi apelim të aktgjykimit në shkallën e dytë.

“Bazuar në atë që kam parë në gjykata, mendoj se është e drejtë të them se jam i zhgënjyer dhe i shokuar me vendimin e gjykatës. Lloji i dëshmive që janë prezantuar nuk kanë qenë të mjaftueshme që gjykata të marrë një vendim të tillë. Prandaj, nuk u besoj dëshmive të ofruara”, tha ai.

“Besoj që kemi argumente të qëndrueshme ligjore për ta apeluar aktgjykimin. Duhet të presim për të parë aktgjykimin në formë të shkruar. Por, do ta apelojmë”, tha Smith.

Avokati i Selimit e forcoi qëndrimin e tij kundër vendimit të gjykatës duke e quajtur “proces politik”.

“Duke pasur parasysh kohën dhe sfidat me të cilat po përballet vendi juaj dhe kërkesat ligjore të cilat do të paraqiten në të ardhmen, mendoj se do të ngrihen shumë çështje politike. Ky rast ka të bëjë me çështje politike më shumë sesa që është pritur”.

Guy Smith foli edhe për Gjykatën Speciale, mënyrën në të cilën ajo po krijohet, krimet që do t’i gjykojë dhe gjyqësinë paralele që ajo do të krijojë.

“Unë mendoj se nesër do të jenë dy vendime – jo një. Vendimi i parë është për ndryshimin e Kushtetuesës, ndërsa vendimi i dytë për Gjykatën Speciale. Ende nuk i dimë premisat e Gjykatës Speciale dhe krimet që do të trajtohen – janë shumë parime që do të tejkalohen me këtë gjykatë” , tha ai.

“Në fakt, ato nuk do të jenë ligje kosovare, por ligje që do të konstituohen brenda gjykatës. Jam habitur kur kam dëgjuar që arkivat e gjykatave – që nënkuptojnë procesverbalet – nuk do të jenë në dispozicion të Kosovës. Nëse nuk keni arkiva që nuk janë në dispozicionin tuaj, atëherë njerëzit e juaj nuk kanë histori”, tha ai.

Smith po ashtu tha se kjo gjykatë nuk duhet votuar ngase nuk sjellë kurrfarë dobie për Kosovën.

“Nuk e kam të qartë qëllimin pse një vend lejon që t’i ndodh kjo. Cili është përfitimi për kombin, për vendin, për popullin? Duhet të ketë ndonjë përfitim, përndryshe pse duhet të votohet?”, tha ai. /Klan Kosova/