Sot pas një sëmundje, ka vdekur Feride Krasniqi, nëna e Dëshmorit të Kombit Imer Ramë Krasniqi nga Carralluka e Malishevës.

Sipas informatave brenda familjes varrimi i të ndjerës bëhet sot në ora 14:00 në varrezat e fshatit, raporton MalishevaPress.

Pavarësisht që janë ngritur shumë dilema në pritje të zgjedhjes së presidentit të ri të vendit, për shkak të mundësisë së rrezikimit të kuorumit nga bojkoti i opozitës dhe turbulencat në LDK, presidentja e vendit Atifete Jahjaga duket se nuk e ka ndërmend që t’i drejtohet Gjykatës Kushtetuese për sqarime shtesë rreth mënyrës së zgjedhjes së pasardhësit të saj, shkruan Kosova Sot.

Në pyetjen që gazeta i ka adresuar Zyrës së Presidencës, nëse eventualisht do të kërkohet edhe një sqarim shtesë për të gjetur rrugëdalje nga kriza që mund të jetë me dy të tretat e deputetëve të pranishëm në seancë, Presidenca nuk ka dhënë përgjigje.

Nga ana tjetër, edhe ekspertë të legjislacionit theksojnë se sa i takon këtij procesi gjithçka është e qartësuar me Kushtetutë dhe nuk ka asnjë nevojë që e para e vendit të trokasë në Gjykatën Kushtetuese.

Eksperti i kësaj fushe, Mazllum Baraliu thotë se madje do të ishte krijim i një situate paragjykuese nëse e para e vendit tani i drejtohet Gjykatës Kushtetuese rreth situatës që mund edhe të krijohet në momentin e caktuar, prandaj me të drejtë do të ishte që partitë politike të merren vesh me kohë dhe të mos krijojnë situata të tilla. /Kosova Sot

Presidenti i Aleancës Kosova e Re (AKR), Behgjet Pacolli, ka përsëritur qëndrimin e tij që presidenti i Kosovës duhet të zgjedhet nga populli.

Në një intervistë për “Epokën e re”, Pacolli ka thënë se vazhdon të jetë i pajtimit se sot, më shumë se kurrë, presidenti i vendit duhet të zgjedhet nga populli përndryshe, sipas tij, vendi do të hyjë në krizë presidenciale.

“Vetëm një president i zgjedhur nga populli mund t’i jepte fund krizës pa qenë nevoja për t’i përfshirë miqtë tanë të huaj si ndërmjetësues. Njerëzit e pushtetit nuk po respektojnë një rezolutë parlamentare me vlerë kushtetuese dhe po bëhen gati ta fusin vendin në një krizë të re, paralele me atë të ndërlidhur me dy marrëveshjet, gjegjësisht atë të Asociacionit të komunave serbe dhe atë të Demarkacionit të kufirit me Malin e Zi. Jemi në prag të një krize të re presidenciale, të cilën do ta shkaktojnë pikërisht ata që, sipas një skenari konspirativ, e bënë në rastin tim”, ka thënë Pacolli.

Ai ka thënë se nëse opozita, siç pretendon, ka kandidatë të mirë dhe gëzon mbështetje popullore, pse ajo nuk mban qëndrim thelbësor sa i përket postit të presidentit.

“Pse nuk janë gati të garojnë ata dhe ta testojnë popullaritetin e tyre?”, ka pyetur Pacolli.

Pacolli në këtë intervistë e ka kritikuar qeverisjen aktuale. Ai ka thënë se kjo Qeveri ka dështuar më së pari në ekonomi. Sipas tij, ka një diferencë të madhe midis premtimeve të fushatës dhe asaj çfarë po bëhet.

“Ka një retorikë vetëshkatërruese antievropiane, e cila nuk e kuptoj se kujt i shërben. Por, e di se nuk i shërben Kosovës. Përgatitja e negociatave të Brukselit me Serbinë është e dobët. Ky ekzekutiv ka një fat të madh, megjithatë opozita e kapur në një temë fikse, po e lejon të qeverisë si të dojë. Opozita nuk po merret me çështjet më të rëndësishme, por ka mbetur peng i dy temave me të cilat do ta rrëzojë Qeverinë, tema këto që nuk mbështeten nga miqtë tanë, as nga popullata paqedashëse që paraqet shumicën e popullsisë”, ka thënë Pacolli.

Ish-presidenti i Kosovës, Behgjet Pacolli, është pro mbajtjes së zgjedhjeve të parakohshme në situatën aktuale kur është krijuar një ndarje e fortë midis dy palëve. Por, Pacolli nuk mendon se zgjedhjet duhen të bëhen tani, pa përgatitje serioze për kuadrin zgjedhor dhe për administratën zgjedhore.

“Pas këtyre përgatitjeve, mendoj se fundi i këtij viti ose fillimi i vitit tjetër do të ishte koha më e mirë”, ka deklaruar Pacolli.

Ai ka bërë me dije se në verë do të mbahet Kongresi i Punës së AKR-së, në të cilin do të dalë edhe udhëheqësia e re. Pacolli ka thënë se AKR-ja do të rikthehet fuqishëm në skenën politike.

Pacolli ka treguar se tashmë gjendet jashtë shtetit, ku ka filluar lobimin për njohje të reja për Kosovën. /Epoka e Re

Lëvizja Vetëvendosje ka organizuar tryezë me shoqërinë civile ku është diskutuar situata në Kosovë dhe mundësitë që ka Kosova për të dalë nga kriza aktuale politike.

Në një video në Facebook, Vetëvendosje ka montuar fjalimet e përfaqësuesve të shoqërisë civile, në sekuencat ku ata i shohin “zgjedhjet si e vetmja zgjidhje”.

Me mbishkrimin “Ja çka kërkuan përfaqësuesit e Shoqërisë Civile në tryezën e sotme të organizuar nga VETËVENDOSJE!”, kjo parti ka bërë një përmbledhje të shumicës prej pjesëmarrësve në debat, ku flasin për zgjedhjet si mundësi për dalje nga kriza.

Përfaqësues të partive opozitare kanë mohuar të jetë përmendur brenda strukturave të tyre ndonjë emër i përveçëm si kandidat i mundshëm për pozitën e presidentit të Republikës së Kosovës.

Nënkryetari i Aleancës për Ardhmërinë e Kosovës, Pal Lekaj ka thënë për Tribuna Channel se AAK as që e ka diskutuar këtë çështje deri më tani.

Për më tepër, sipas tij, AAK nuk do të marr pjesë fare në seancën kur do të votohet presidenti.

Në të njëjtën vijë është edhe sekretari i Nismës për Kosovës, Bilall Sherifi.

Ai ka thënë se të gjitha emrat e përmendur për kandidat të mundshëm janë spekulime.

Sherifi thotë se edhe po të kishte kandidat opozita nuk i ka numrat për të zgjedhur presidentin.

Përfaqësuesit e të dyja partive opozitare shprehen të një mendimi se Qeveria ka humbur legjitimitetin dhe se vendi duhet të shkojë në zgjedhje.