Kryetari i Komunës së Malishevës, Ragip Begaj, ka thënë se rezultatet e punëve, janë treguesi dhe vlerësimi më i mirë i punës sonë gjatë këtij viti.

Ai thotë se është munduar maksimalisht t’i realizojë objektivat për këtë vit, gjë që sipas tij, ja ka arritur, duke i realizuar projektet e parapara, por edhe duke filluar me disa projekte tjera.

“Rezultatet e punëve tona, janë treguesi dhe vlerësimi më i mirë i punës sonë gjatë këtij viti. Janë dhënë disa vlerësime të organizatave të ndryshme, që monitorojnë punën e komunës dhe vlerësimi i dalë, deri më tani është pozitiv, por kjo nuk duhet të na kënaq, prandaj, kërkoj që në vitin e ardhshëm të jemi edhe më të angazhuar”, tha Begaj, në fillim të mbledhjes së fundit të rregullt të Këshillit të Drejtorëve.

“Jam munduar maksimalisht ti realizojmë objektivat për këtë vit, gjë që mendoj se ja kemi arritur, duke i realizuar projektet e parapara, por edhe duke filluar me disa projekte tjera, dhe këtë e kemi arritur, falë punës së përbashkët me të gjitha drejtoritë”.

Begaj kërkoi nga drejtorët komunal që në vitin e ardhshëm të jenë edhe më të angazhuar, në realizimin e projekteve.

“Kërkoj që në vitin e ardhshëm të jemi edhe më të angazhuar, në realizimin e projekteve, por mbi të gjitha, në ofrimin e shërbimeve sa më të mira për të gjithë banorët e Komunës së Malishevës”, tha Begaj, duke i porositur përgjegjësit e drejtorive komunale, për angazhim edhe më të madh në vitin 2016.

Në këtë vit, Komuna e Malishevës, duke u bazuar në të dhënat e publikuara nga disa organizata, që e monitorojnë punën e komunave, si KDI, GAP dhe “EC Ma Ndryshe”, është renditur në vendin e parë në regjion për transparencë, për realizimin të premtimeve, si dhe ndër të parët në vend, në realizimin e buxhetit, në investime kapitale, në investimin e të hyrave vetanake në projekte, dhe të tjera. /PrizrenPress.com

Instituti për Kriminologji dhe Kriminalistikë (ICCJ) në Kosovë, ka bërë një hulumtim-analizë dy vjeçare mbi funksionalitetin, përmbajtjen e informatave dhe lehtësinë e qasjes në ueb faqet zyrtare të komunave të Kosovës.

Nga ky hulumtim, ICCJ ka gjetur se ueb faqet zyrtare të komunave në Kosovë përveç se kanë mangësi në përmbajtjen e tyre, ato kanë edhe mungesë serioziteti dhe mos përgjegjësi në listim të e-mailave zyrtarë të zyrtarëve komunal.

Po ashtu, ICCJ ka konstatuar se tri komuna me shumicë serbe ajo Zubin Potokut, Zveçanit dhe Leposaviqit, ueb faqet e tyre zyrtare i kanë në konstruksion tash e dy vite dhe kjo tregon pa përgjegjësi ndaj qytetarëve të këtyre komunave dhe mos gatishmëri për të pranuar formatin standard që e kanë edhe komunat tjera në Kosovë.

Kurse një ngecje tjetër në përmbajtje të ueb faqeve komunale është edhe ai i përditësimit të informatave në gjuhët zyrtare duke publikuar informacione vetëm në gjuhën e shumicës që graviton në atë komunë dhe duke lënë anash qytetarët e etnive tjera që jetojnë në Kosovë.

“Sa i përket lidhjes së ueb faqeve komunale m e rrjetet sociale shumica e komunave nuk e kanë bërë një gjë të tillë, por edhe në ato raste kur e kanë bërë këtë e kanë bërë nëpërmjet e-mailit personal të ndonjërit zyrtar e jo nga e-maili gjenerik i komunës.

Mirëpo një tjetër veprim jo serioz i ueb faqeve komunale është edhe mungesa e listimit të e-mailve zyrtar të personelit Një pjesë e madhe e zyrtarëve komunal, në ueb-faqen e komunës kanë të publikuar vetëm e-mail-a personal privat”, thuhet në njoftim.

ICCJ në vitin 2015-të ka kontaktuar gjithsejtë 86 zyrtarë komunal në 29 komuna të ndryshme, kurse përgjigje ka marrë vetëm nga 14 prej tyre, kurse në vitin 2014-të nga 102 zyrtarë të kontaktuar janë përgjigjur po ashtu vetëm 14-të sosh.

ICCJ nëpërmjet një komunikate ka thënë se rekomandon komunat që të fokusohen më shumë në funksionalizimin dhe rifreskimin e ueb-faqeve të tyre, pasi që një pjesë e madhe e qytetarëve iu referohen faqeve zyrtare për të marrë informata, ngase funksionalizmi i ueb faqeve komunale do të ndihmonte zyrat kadastrale, administratën publike, zyrat për urbanizëm etj, të cilat janë të stërngarkuara nga fluksi i qytetarëve, për të marrë një informatë të thjeshtë, dhe e cila mund të gjendej në ueb faqe, nëse e njëjta do të ekzistonte aty.

Në anën tjetër, parakusht për aplikimin e suksesshëm të e-qeverisjes është funksionimi dhe mirëmbajtja e faqeve zyrtare të komunave.

Lidhja e ueb faqeve zyrtare me rrjetet sociale, do të ishte një mundësi e mirë për komunat që të promovojnë punën e tyre, duke pasur parasysh faktin se sa shumë qytetarët e Kosovës i frekuentojnë rrjetet sociale.

Organizimi pa ftesa për këshilltarët i ceremonisë së vënies së gurit themeltar për Qendrën Kulturore Boshnjake ka shkaktuar irritim si të përfaqësuesve boshnjakë, ashtu edhe të atyre nga partia më e votuar në zgjedhjet e fundit lokale, PDK.

Këshilltari i PDK-së, Alush Shala, i ka theksuar se Qendra Kulturore Boshnjake është përuruar në lagjen ku ai graviton dhe se nuk është njoftuar për organizimin e një ceremonie të tillë. Madje, ka akuzuar drejtuesit e dikastereve për personalizim të projekteve.

“Drejtorët e qeverisë sonë komunale po sillen si t’i kishin realizuar këto projekte me mjetet e familjeve të tyre dhe nganjëherë edhe e mbivlerësojnë veten”, ka thënë Shala.

Këshilltari i “Vakat”-it, Muso Salihi, ndërkaq ka bërë të ditur se këshilltarët e këtij subjekti politik boshnjak nuk ishin ftuar fare në ceremoninë e vënies së gurit themeltar për ndërtimin e Qendrës Kulturore Boshnjake.

“Ndonëse qe 12 vjet presim realizimin e këtij projekti, megjithëkëtë nuk kemi marrë asnjë ftesë për ceremoninë në fjalë, ani pse ky ka qenë një emocion i veçantë për ne, pjesëtarët e komunitetit boshnjak”,ka thënë ai.

“U bëj thirrje që të krijoni një rregull institucional në këtë rrafsh”, ka deklaruar Shala.

Ndërsa këshilltari nga radhët e LDK-së, Haziz Hodaj, është ankuar se në fshatin Gjonaj, nga vjen, Komuna ka iniciuar projekte, dhe se asnjëherë nuk janë ftuar këshilltarët e KK-së, por vetëm militantët partiak të afërt me pushtetin.