Lideri i AAK-së, Ramush Haradinaj ka thënë se gjatë takimit me kryetarin e Kuvendit të Shqipërisë, Ilir Meta ishte përpjekur për ta gjetur një zgjidhje për tejkalimin e krizës politike në vend.

Haradinaj e ka vlerësuar iniciativën e Metës, por ka thënë se opozita nuk ka ndryshuar qëndrim. “Qëndrimi ynë është anulimi i marrëveshjeve dhe lirimi i të burgosurve politikë”, është shprehur ai.

Sa i përket thirrjes se kryeministrit Mustafa për një takim me liderët e opozitës, Haradinaj ka theksuar se opozita nuk shkon në takim te kryeministri. “Ne nuk shkojmë në takim me kryeministrin. Është një ftesë e vonuar dhe e thatë”, ka deklaruar Haradinaj në një intervistë për Epokën e Re.

Lideri i AAK-së, ka paralajmëruar se këto do ditë opozita mund të ketë takime edhe me presidenten Atifete Jahjaga.

Z. Haradinaj sot keni pasur një takim në Prishtinë me kryetarin e Kuvendit të Shqipërisë, Ilir Meta. Cili ishte qëllimi i takimit?

Haradinaj: Biseda ishte krejtësisht e fokusuar te gjetja e një mundësie për t’iu kthyer normaliteti institucioneve institucionale. Pra, z. Meta ishte i interesuar për ta gjetur një zgjidhje, e cila do ta kthente normalitetin e jetës institucionale. Ai ka thënë se do t’i dëgjojë të gjithë për ta parë mundësinë e gjetjes së një zgjidhje.

Takimet me z. Meta kanë qenë të ndara?

Haradinaj: Unë e kam pasur takimin vetëm me z. Meta. Ne kemi një traditë të komunikimit me të edhe më herët.

Çfarë përgjigje i dhatë ju z. Meta për situatën politike?

Haradinaj: Unë gjatë bashkëbisedimit me z. Meta prezantova qëndrimin tim se dalja nga gjendja e tashmë është anulimi i marrëveshjeve të dëmshme për vendin dhe lirimi i atyre, që janë të burgosur politikë.

A pati kërkesë z. Meta që të gjithë liderët të ulën në një tavolinë të përbashkët?

Haradinaj: Meta tha se në këtë etapë do të dëshironte t’i dëgjonte të gjithë.

Ju si e shihni këtë iniciativë të z. Meta?

Haradinaj: Çdo interesim për temat që kanë të bëjnë me situatën në Kosovë është i mirëseardhur. Pra kjo iniciativë e tij është e mirëseardhur. Meqenëse kemi një traditë të komunikimit me të gjithë, që vijnë nga Tirana zyrtare, ne jemi të interesuar që të bisedojmë.

Opozita mbetet në qëndrimin e njëjtë?

Haradinaj: Po. Ne e kemi pas rastin për të zhvilluar edhe takime të ndara si liderë opozitarë me presidenten e vendit. Mund të ndodhë që do të takohemi këto ditë sërish me presidenten Jahjaga. Kuptohet, qëndrimi ynë është anulimi i marrëveshjeve dhe lirimi i të burgosurve politikë.

Kryeministri Mustafa i ka ftuar në takim liderët opozitare, i cili ishte planifikuar të mbahet nesër. A ka ndryshuar qëndrim opozita rreth kësaj ftese?

Haradinaj: Ne nuk shkojmë në takim me kryeministrin. Është një ftesë e vonuar dhe e thatë. Është i njëjti kryeministër, i cili ia ka shkaktuar këto trauma vendit që disa muaj. Tash së fundi, pas gjithë kësaj, ai kërkon një takim të thatë, pa përmbajtje dhe nuk ka kuptim kjo sjellje e tij.

Kryetari i Kuvendit të Shqipërisë, Ilir Meta, ka përfunduar takimet me tre liderët e partive opozitare në Kosovë, por thotë se nuk ka ardhur të ndërmjetësojë për zgjidhjen e krizës politike.

Të fundit që e ka takuar Meta është kryetari i Nismës për Kosovën, Fatmir Limaj, ndërsa para tij politikani nga Shqipëria është takuar edhe me Visar Ymerin e Ramush Haradinajn, transmeton Klan Kosova.

Pas takimit Limaj-Meta ata edhe janë prononcuar për media.

Ilir Meta ka thënë se në Kosovë ka qëndruar vetëm për vikend dhe ka takuar miqtë e tij të shumtë që i ka këtu.

Ndërsa, duke iu referuar krizës politike, ka shtuar se ka parë shumë mundësi për zgjidhje dhe dialogë për ngërçin që po vazhdon në politikën kosovare.

Ai ka thënë e nuk ka ardhur këtu në rolin e ndërmjetësuesit, por ka pohuar se po të vinte në Prishtinë e të mos bisedonte me miqtë e tij për krizën politike do të ishte pa përgjegjësi.

Ndërsa Limaj ka thënë se me një analizim të thellë të situatës në të cilën gjendet Kosova, ka shumë mundësi për të dal nga kriza e tanishme politike.

Sekretari i Përgjithshëm i “Nismës për Kosovën”, Bilall Sherifi ka thënë se Serbia e di se ku janë personat e pagjetur, por nuk dëshiron ta zbardh fatin e tyre.

“Personat e pagjetur, në fakt nuk janë të pagjetur, janë persona për të cilët Serbia shumë mirë e dinë se ku janë, por nuk është e gatshme të tregoj dhe të zbardh fatin e secilit qytetarë që e ka kidnapuar, e ka vrarë dhe e ka dërguar në Serbi. Pra për neve ata mund të jenë të pagjetur, por jo edhe për Serbinë”, ka potencuar Sherifi për “Zërin”.

Ai madje ka thënë se shteti serb, kriminelët e luftës po i konsideron heronj. Kjo sipas Sherifit nënkupton që Serbia nuk ka heq dorë nga krimi që e ka bërë.

“Serbia pas krimin dhe gjenocidit që e ka bërë duke i vrarë e masakruar, tani po e bënë krimin e dytë mbi ta. Ju e patë se si e vlerësoi Aleksander Vulini dhe çka tha për një gjeneral të dënuar për krime të luftës në Kosovë, tha se ai është heroi i tyre, tha se nuk do të heqin dorë nga heronjtë. Pra ai nuk heq dorë nga krimi që e ka bërë”, ka thënë më tej ai.

E përgjegjëse për mos zbardhjen e fatit të këtyre 1650 personave Sherifi e bënë edhe Qeverinë e Kosovë, e cila sipas tij, nuk ka një agjendë të qartë se si do të sillet në raport me nevojat dhe kërkesat e Kosovës, por ka hy tërësisht në agjendën e Serbisë për të biseduar për kërkesat e këtij shteti që i ka në raport me Kosovën.

Përplasjet pozitë-opozitë për marrëveshjet me Serbinë e Malin e Zi

Abrashi duhet të shkarkohet, njëjtë siç u veprua me Jabllanoviqin

“Pas gjithë këtij shkatërrimi, pas të gjitha burgosjeve dhe pas të gjithë skenarëve titistë e poshtërues kundër Kosovës dhe opozitës, ftesa e Isa Mustafës për dialog është më shumë se hipokrizi. Dialogu me opozitën, pa i hequr nënshkrimet, pa i anuluar marrëveshjet dhe pa i liruar nga burgu deputetët, nuk ka asnjë kuptim, nuk ka asnjë logjikë, përveç përpjekjeve për ndonjë intrigë, mashtrim a kurth të radhës, për të cilat Isa Mustafa është i specializuar”, shprehet analisti Shefqet Dibrani

Ftesa e kryeministrit Isa Mustafa për dialog me opozitën duket një hipokrizi. Pas arrestimeve të shumta të deputetëve, ndërhyrjes në selinë e partisë më të madhe opozitare dhe pas asaj dhune të shfaqur e të demonstruar deri në armiqësi ndaj të gjithë opozitarëve dhe sidomos subjektit ‘Vetëvendosje’ në selinë e saj, si dhe cilësimi si ISIS ndaj opozitës nga zëdhënësi i Qeverisë ‘Mustafa’ e humb kuptimin edhe dialogu. Analistë dhe përfaqësues të opozitës mendojnë se oferta është joserioze. Ish-deputetja e Kuvendit të Kosovës, Myzejene Slemani, thotë për gazetën se dialogu do të duhej të kishte ndodhur përpara se të nënshkruheshin marrëveshjet.

“Dialogu mes pozitës dhe opozitës është dashur të ndodhë para se kryeministri Isa Musatafa të shkojë në Bruksel për marrëveshje. Atëherë nuk do të ndodhte as arrestimi i deputetëve, as skemat e gazit as ndërhyrja e policisë në zyrat e VV-së. Me këtë koalicioni LDK-PDK në Kosovë ka vdekur demokracia dhe arroganca e numrave u vërejt se nuk sjell rezultat. Kjo ftesë tani pas vizitës së Kerry-y i këndelli pak, sepse kjo pozitë kishte besim se po vepronte mirë, por u pa se duhet respektuar edhe deputetët opozitarë, sado që kanë pak numra në Parlament.

Selmani habitet se pse ftesa nuk është bërë më herët, por pasi dikush i ka bërë trysni. “Dialogu ka mundur të ndodhë herët dhe jo arrestime, gaz, protesta dhe përdorim të Policisë së Kosovës. Turpi i madh ka ndodhur, që nga shtatori në Kuvendin e Kosovës dhe tani kjo deklaratë e ministrit dhe zëdhënësit të Qeverisë që e krahasoi opozitën me ISIS-in do të duhej që ai vetë të japë dorëheqje morale”, thotë ajo./kosova sot/