Nga Xhavit Haliti
U bë kohë që raportet mes opozitës dhe shumicës politike në Kuvendin e Kosovës, të acaruara dhe konfliktuale qysh nga konstituimi i vonuar i tij, duket se janë inekzistente.
Tashmë pas mëse dy javësh nga lëshimi i udhëresave prej prokurorisë për katër deputet të opozitës, arrestimi publik i Albin Kurtit nga policia, në Ditën e Flamurit dhe brenda selisë së VV-së, ka demtuar rëndë, për të mos thënë që ka mbyllur rrugët lidhëse për bashkëbisedim e dialog.
Raporti është marrëdhënie, është bashkëveprim i rregulluar nga rregulla e norma të bashkëpranuara nga palët.
Edhe mes armiqësh në luftë njihet dhe respektohet ligji i luftës, që përmban norma për shpalljen e luftës, për armëpushimet, për procedurat e përfundimit të luftës etj.
Kurse në Kuvend, në sallën e mbledhjeve plenare, që konsiderohet e shenjtëruar demokracia për ndërtimin dhe funksionimin e shtetit ligjor, u pamundësua përdorimi i fjalës me mjete e veprime të dhunshme.
Pra në tempullin e fjalës, në vendin e vetëm të zgjidhjes së problemeve, u ndërpre raporti, marrëdhënia dhe mundësia e marrëveshjes mes opozitës dhe pozitës për “Zajednicën” dhe vijën e demarkacionit.
Protesta kundër qeverisë në Kosovë e organizuar më 28 Nëntor, që historikisht është ngjarje vendimtare mbrojtëse edhe për krijimin, ekzistencën dhe njohjen ndërkombëtare të Republikës së Pavarur të Kosovës, duket e papërshtatshme, madje e papranueshme.
Si nënkryetar i Kuvendit të Republikës së Kosovës, nuk më takon dhe nuk ia lejoj vetes të konkludoj, sidomos publikisht, për përgjegjësitë e konfliktit mes palëve politike në Kuvend dhe protestave të dhunshme në rrugët e Prishtinës.
Por di vetëm, dhe kjo është e qartë për këdo, që konflikti aktual në Kosovë e ka thelluar hendekun ndarës mes pozitës dhe opozitës dhe po e bën radikalizmin e politikës të rrezikshëm për të tashmen dhe të nesërmen e Kosovës.
Aleanca e partive opozitare po rrëshqet drejt një pozicioni revolucionar për marrjen e pushtetit, sikurse partitë në pushtet po rrëshqasin drejt shfaqeve represive për ruajtjen e institucioneve dhe të rendit nga veprimet e dhunshme të protestuesve nëpër rrugë dhe të disa deputetëve në sallën e Kuvendit.
Kemi mësuar qysh në fëmijëri se çdo veprim pasohet nga kundërveprimi. Kjo ligjësi, që është vepruese në natyrë dhe shoqëri, përjashtohet në funksionimin e çdo shteti që e mban veten për demokratik. Në demokraci, forcat politike, konkurruese për të qeverisur vendin, nuk e konsiderojnë dhe nuk e trajtojnë njera-tjetrën si të kundërt dhe aq më pak si armike, por si të ndryshme në objektiva dhe rrugë për të mirën e vendit.
Te ne, në shtetin tonë të ri, opozita parlamentare guxon të akuzojë qeverinë, jo thjesht si armike të vetën, por dhe të shitur e në shërbim të Beogradit.
Të gjithë ne, të përfshirë e aktivë në jetën politike, pavarësisht nga CV-të tona personale dhe mosha jonë, të rinj a më të vjetër, jemi të gjithë të rinj, jemi në start për të njohur praktikën, kulturën, bashkëjetesën, bashkëpunimin, lojën politike, rrugët format dhe mënyrat e protestës ndaj pushtetit, respektimin e ligjit, të institucioneve shtetërore, të votës, që ngrihet e vepron mbi të drejtën demokratike të shumicës së qytetarëve votues.
Të papërvojë për ndërtimin e fuksionimin normal e të natyrshëm të demokracisë, jemi ende më pranë traditës të zgjidhjes së konfliktit me mjete të dhunshme.
Dhe me sa duket opozita aktuale ka zgjedhur këtë rrugë për të dalë nga ngërçi i rrezikshëm, ku jemi përfshirë. Ka përjashtuar urën e vetme lidhëse mes forcave politike kundërshtare, takimin, parashtrimin e kundërshtive në dialogim dhe zgjidhjen e tyre në përputhje me sasinë dhe vlerën e argumenteve. Mbi argumentet, forcën e fjalës dhe besimit reciprok ne shqiptarët historikisht kemi bërë pajtimin e gjaqeve.
Politika aktuale në Kosovë vërtet është grindur, është provokuar, ndonjëherë edhe ndjeshëm, por nuk është gjakosur.
Mendoj se partitë politike i kanë mundësitë, aftësitë dhe predispozitën të gjejnë zgjidhjen e konfliktit. Ngërçi politik do zgjidhet vetëm nga ne dhe kam bindjen se mbi të gjitha do të mbizotërojë atdhetarizmi mbi çdo ekip partiak në mbarë Kosovën.
