Dita ndërkombëtar e Librit dhe të drejtave autoriale që është përzgjedhur të jetë 23 prilli, është një datë me kuptim simbolik për letërsinë botërore. Me këtë datë të vitit 1616, lidhet vdekja e dy kolosëve të letërsisë botërore: Shekspirit në Angli dhe Miguel de Servantes në Spanjë.

I pari konsiderohet si shkrimtari më i madh i të gjitha kohëve dhe vendeve, ndërsa i dyti është autori i veprës më të përkthyer në botë. Kjo datë lidh edhe autorë tjerë në ditën e lindjes a vdekjes së tyre: Inca Garcilaso de la Vega, Maurice Druon, Halldór Kiljan Laxness, Vladimir Nabokov, Josep Pla dhe Manuel Mejia Vallejo.

Kjo datë shënohet në botë që nga viti 2003, ndërsa është pazgjedhur në vitin 1995 me qëllim të kontribuojë në mbarë botë për të drejtat e autorit duke inkurajuar të gjithë, e në veçanti të rinjtë për të zbuluar kënaqësinë e leximit.

Kjo datë është edhe një thirrje për të rritur respektin për kontributet e pazëvendësueshme të autorëve dhe librit në progresin social dhe kulturor të njerëzimit.

Suksesi i librit dhe i të drejtës autoriale varet kryesisht në mbështetjen që duhet marrë nga të gjitha palët e interesuara ku hyjnë autorët e librit, botuesit, mësuesit, bibliotekistët, institucionet publike dhe private, OJQ-të dhe mediat, të cilat mobilizohen në çdo vend.

Duke qenë një nga mjetet më të vjetra të komunikimit dhe shpërndarjes, jo vetëm libri që ka ndikim shpirtërore, arsimore dhe kulturore, por ai përfshin edhe aspektet ligjore ekonomike të tregtisë botuese.

Dita botërore e librit dhe të drejtës autoriale këtë vit shënohet edhe në Kosovë në bashkëpunimin e organizatave të shoqërisë civile që mbështesin kulturën.

Kjo ditë është një mundësi për të nisur një fushatë të gjerë dhe të qëndrueshme për ngritjen e vetëdijes, duke synuar të mbështesë veprimin e akterëve lokalë dhe institucioneve në favor të librit dhe të leximit. Ajo bazohet në një qasje pjesëmarrëse dhe në partneritet me profesionistë, akterët politikë dhe përfituesit që nënkuptohet në nivel kombëtar dhe rajonal.

Rektori i Universitetit “Ukshin Hoti” në Prizren, Ramë Vataj në ceremoninë solemne mbajtur më 22 prill 2015 i ka dorëzuar titullin, Doktor Nderi “Dr. honoris causa” shtetases amerikane, Dr. Ellejn Berkovic, për kontributin e rëndësishëm në zhvillimin e marrëdhënieve njerëzore në mbështetjen dhe konsolidimin e paqes, në Kosovë dhe me gjerë.

Pjesëmarrës në këtë ceremoni madhështore ishin mysafirë nga KFOR-i amerikan, MASHT-i, FSK-ja, përfaqësues të pushteteve lokale në komunat e regjionit të Prizrenit, përfaqësues të institucioneve të drejtësisë në komunën e Prizrenit, përfaqësues të shoqërisë civile, përfaqësues të komuniteteve fetare, etj.

Rektori Vataj me këtë rast shprehi mirënjohjen dhe falënderim për Dr. Ellejn Berkovic për kontributin e dhënë sa ka shërbyer në Kosovë dhe theksoi se anëtarët e Senatit të UPZ-së kanë pas nderin dhe kënaqësinë që të ndajnë këtë çmim për të duke e njohur kontributin e madh të sajë për vendin tonë.Ky titull nderi për një qytetare të thjeshtë amerikane, por me vlera të larta, Rektori Vataj tha se është një shenjë falënderimi dhe nderimi për të gjithë popullin amerikan për mbështetjen e popullit të Kosovës në rrethanat më të vështira dhe në veçanti për ushtarët amerikan që kanë dhënë kontributin vendimtar për çlirimin e Kosovës dhe konsolidimin e paqes në këtë vend që kishte vuajtur për një kohë të gjatë nga robëria.

Ndërkaq, Dr. Ellejn Berkovic theksoi se ndihet e nderuar që pranon këtë titull në Kosovë, nga Universiteti “Ukshin Hoti” në Prizren. Ajo tha se ka një ndjenjë të veçantë për popullin mikpritës të Kosovës, ku spikati se “shoqërinë që ka në Kosovë, i konsideron si pjesëtar të familjes”, pasi që me ta ka kaluar jashtëzakonisht mirë sa ka shërbyer në Kosovë. “Njerëzit nga Kosova më kanë hapur zemrën, dhe për këtë nuk i harroj kurrë”, theksoi ajo e emocionuar, që nuk mund t’i ndalte as lotët.Gjeneral Brigade Enver Cikaqi, e lexoi jetëshkrimin e sajë, në cilësinë e laudatorit(falënderuesit).

Ellejna, shkollimin themelor dhe atë të lartë e ka mbaruar në Universitetin e Pitsburgut në drejtimin e mjekësisë, në fushën e stomatologjisë. Në Universitetin e Pitsburgut, si asistente dhe dentiste shërbeu për shumë vite. Që nga mosha katërmbëdhjetë vjeçare ajo vullnetarisht ka dhënë kontribut në shumë fusha të ndryshme profesionale, ushtarake dhe njerëzore.Në Universitetin e Prishtinës ka ligjëruar nga viti 2007 deri në vitin 2011. Gjatë këtyre viteve është shquar me pjesëmarrje aktive në aktivitet të ndryshme, si në konferenca shkencore dhe simpoziume të ndryshme me motivacion profesional dhe të ndërtimit dhe konsolidimit të paqes në Republikën e Kosovës.