Disa zëvendësministra janë emëruar javë më parë, pastaj janë emëruar edhe pesë të tjerë, kurse katër janë emëruar javën që lamë pas.

Deputetja e Aleancës për Ardhmërinë e Kosovës (AAK), Teuta Haxhiu nga 25 janari ka një pyetje parlamentare për kryeministrin Isa Mustafa, për të cilën nuk ka marrë ende përgjigje.

Edhe në njërën nga seancat e fundit, Haxhiu e shtroi këtë pyetje, që ka të bëjë me zëvendësministrat.

“Kanë kaluar një muaj kur unë kam kërkuar nga kryeministri i Kosovës të tregojë se sa zëvendësministra i ka, sepse në vazhdimësi nga dy-tre fshehura po i emërojnë zëvendësministrat dhe nuk po tregojnë se mund të jenë rreth 50 sosh. E nga përllogaritjet që i kam bërë unë ka dalë që shtetit të Kosovës i kushtojnë diku 160 mijë euro”, ka thënë Haxhiu.

Deri më tani janë emëruar disa zëvendësministra ndërsa gjatë javës që lamë pas janë emëruar katër zëvendësministra të tjerë. Ky në fakt, është një proces, të cilin opozita dhe shoqëria civile e ka kritikuar vazhdimisht, ngase janë bërë katër muaj dhe ende Qeveria nuk është kompletuar me zëvendësministra.

Shqipe Pantina, deputete e Vetëvendosje!-s, thotë se Qeveria ka harruar të merret me problemet tjera, duke u marrë më zëvendësministra.

“Për katër muaj rresht dy partitë e koalicionit më shumë kanë harxhuar kohë dhe energji duke negociuar për postet e zëvendësministrave e në këtë mënyrë për t’i shuar qoftë pakënaqësitë, apo për t’i përmbushur orekset e anëtarëve, simpatizantëve, ose militantëve të subjekteve politike, sesa të uleshin dhe të punonin në programin qeverisës dhe në ndryshimet kaq të nevojshme në Kosovë”, ka thënë Pantina.

Zëdhënësi i Qeverisë, Arban Abrashi, ka thënë ky është një proces, i cili merr kohë, ngase ka të bëjë me verifikimin e emrave e për të cilin proces konsultohen edhe agjencionet e ndryshme të sigurisë dhe është proces në vazhdimësi. I pyetur se sa do të jetë numri i përgjithshëm i zëvendësministrave, pasi që opozita kritikon vazhdimisht për numrin e madh të tyre, Abrashi nuk dha përgjigje konkrete.

“Nuk do jepja një numër të përgjithshëm në total sa do të jetë, por jemi duke punuar që t’i emërojmë sa më shpejtë, në mënyrë që t’i funksionalizojmë këto sektorë. Edhe ne jemi të interesuar që të përfundojë sa më shpejtë, por është proces që vazhdon. Besoj që gjatë muajit të ardhshëm do të përfundojë”, ka thënë Abrashi për “Radio Kosovën”.

E derisa të përfundojë procesi i emërimit të zëvendësministrave, edhe deputetja e AAK-së, Teuta Haxhiu thotë se do të vazhdojë të kërkojë të njëjtën llogari nga kryeministri Isa Mustafa. “Unë do ta bëjë prapë këtë pyetje, derisa të marrë përgjigje nga kryeministri”, ka thënë Haxhiu.

Deputeti nga radhët e LDK-së, Arben Gashi sot tha se protestat e VV-së, AAK-së dhe NISMA-së i kupton pasi që të bëhen për të mbajtur afër elektoratin e tyre. Mirëpo i të njëjtit mendim nuk është zëdhënësi i Lëvizjes Vetëvendosje, Frashër Krasniqi.

Ai ka thënë se jo gjithçka bëhet për arsye elektorale duke shtuar se një gjë e tillë nuk është e kuptueshme për subjektet që bëjnë gjithçka për të arritur në pushtet.

“Jo gjithçka në këtë vend bëhet për arsye elektorale, siç mendon Arben Gashi. Por kjo nuk është e kuptueshme për subjektet që janë të gatshme të braktisin çdo marrëveshje dhe fjalë të dhënë, për të arritur në pushtet. Ne po protestojmë kundër kapjes së shtetit, ngase partia e Arbenit ia humbi rastin Kosovës që në mënyrë institucionale të çlirohet nga kjo kapje”, ka shkruar Krasniqi në Facebook.

Ai më tutje ka shtuar se krejt çka u ka mbetur qytetarëve tani është rruga.

“Dhe po protestojmë jo vetëm sepse kemi të drejtë por sepse kjo është bërë e domosdoshme dhe e pashmangshme në një gjendje ku çdo institucion publik, duke filluar nga gjykatat për të vazhduar tek televizioni publik, është vënë nën kontrollin e Qeverisë. Krejt çka i ka mbetur qytetarëve është rruga. Edhe këtë të fundit pat tendenca që t’ia ndalojnë, por normalisht që këtu pushteti është i pafuqishëm – sado që e përdorë dhunën”, ka përfunduar ai.

Deputeti i LDK’së, Arben Gashi, nuk sheh kurrfarë rreziku nga protestat e paralajmëruara të opozitës. Madje, thotë se VV, AAK dhe NISMA nuk janë duke provuar të marrin pushtetin përmes protestave, por se po e përdorin këtë metodë demokratike për të mbajtur afër elektoratin.

“Nuk mendoj se mund të marrin pushtetin përmes protestave. Ideja e protestave, me sa po kuptoj unë, është të mobilizohen njerëz sa më shumë në mënyrë që të mbajnë elektoratin e vetë. Nuk ka të bëjë me marrjen e pushtetit sepse pushteti me dhunë nuk merret në demokraci”, ka thënë Gashi, për Gazetën Express.

Anëtari i Këshillit të Përgjithshëm të LDK’së thotë se VV, AAK dhe NISMA duhet të kenë kujdes të mos i kthejnë protestat në akte dhune.

Nëse përsëritet dhuna sikur në dy protestat e mëparshme, Gashi vlerëson se mund të ketë dëme për Kosovën, institucionet dhe partitë organizatore të protestave.

“Është angazhim politik për më i arrit qëllimet e veta politike. Në demokraci këto janë normale. E rëndësishme është të mos ketë akte dhunë dhe degjenerim në dhunë. Nëse degjeneron protesta dhunë do të ishte shumë e dëmshme për Kosovën dhe besueshmërinë e institucioneve, partive politike dhe të ardhmen e vendit”, ka thënë Gashi.

Ndryshe, Vetëvendosje, AAK dhe NISMA kanë paralajmëruar protesta për 18 prill me moton “Kundër kapjes së Shtetit”.

Këto parti kanë organizuar, po ashtu, dy protesta të tjera, në të cilën ka pasur të lënduar policë e qytetarë./GazetaExpress/

Serbët janë pakëz skizofrenikë, sepse zemrat e tyre ende rrahin për Lindjen, ndërsa kokat e tyre qojnë kah Perëndimi, ka thënë ambasadori i SHBA-ve në Serbi Michael Kirby.

Duke folur në një intervistë për B92-ishin serb, Kirby e ka përshkruar Aleksandër Vucin si një lider që brengoset për të ardhmen e vendit të vet.

“Aleksandër Vuçiq është një lider që brengoset për popullin e vet. Ai po përpiqet që t’i qojë serbët në Europë, por ata janë pakëz skizofrenikë në këtë aspekt. Ende u rrahë zemra për Lindjen”, ka thënë ambasadori Kirby.

Sipas tij, dilema mes Rusisë dhe Europës është një farsë e cila u është serbëve përpara, por në realitet ajo nuk ekziston.

“Do të vazhdoni të keni miqësi me të dy vendet , por pyetja nuk është më te miqësia, sa është tek interesat strategjike të Serbisë. Duhet që t’i implementoni reformat që janë të kërkuara nga Evropa, dhe të afroheni nga Evropa. Të tjerat janë opsione të rreme”, ka shtuar ambasadori Kirby. /Indeksonline/