Albin Kurti dhe Albulena Haxhiu janë ftuar nga Departamenti për Krimeve të Rënda në Prokurorinë Themelore në Prishtinë për tu paraqitur në zyrën e prokurorit të çështjes, më datën 22 tetor 2015.

“Prokurori i Shtetit e respekton plotësisht të drejtën demokratike të secilit qytetarë për të protestuar, mirëpo Prokurori i Shtetit është i obliguar që në bazë të ligjit të ndërmerr të gjitha masat nëse protestat shoqërohen me dhunë dhe veprime tjera kundërligjore.

Për këtë arsye dje Departamenti për Krime të Rënda në Prokurorinë Themelore të Prishtinës ka paraqitur kërkesë për caktimin e paraburgimit kundër 5 personave të ndaluar gjatë zhvillimit të protestës, së datës 12 Tetor 2015, ndërkaq për katër të tjerë ka kërkuar masën paraqitja në stacionin policor. Të gjithë këta të pandehur dyshohen se kanë kryer veprën penale: Pjesëmarrja në turmë që kryen vepër penale dhe huliganizmi nga neni 412 të Kodit Penal të Republikës së Kosovës.

Siç kemi njoftuar opinionin edhe më herët, Departamenti për Krimeve të Rënda në Prokurorinë Themelore të Prishtinës ka filluar hetimet kundër deputetëve të Kuvendit të Republikës së Kosovës Albin Kurti dhe Albulena Haxhiu, të cilët dyshohet se kanë kryer veprat penale: Shkaktimi i rrezikut të përgjithshëm, nga neni 365 i Kodit Penal të Republikës së Kosovës dhe Përdorimi i armës, nga neni 375 i Kodit Penal të Republikës së Kosovës.

Duke u bazuar në nenin 173 paragrafi 1 nënparagrafi 1.1 të Kodit të Procedurës Penale, Departamenti për Krimeve të Rënda në Prokurorinë Themelore në Prishtinë deputetëve Kurti dhe Haxhiu u ka dërguar dje ftesa për tu paraqitur në zyrën e prokurorit të çështjes, më datën 22 tetor 2015, për të dhënë deklaratat e tyre lidhur më dyshimet që ju vihen në barrë.

Gjithashtu, në bazë të nenit 151 paragrafi 2 të Kodit të Procedurës Penale pas thirrjes nga prokurori, të gjithë të pandehurit, e në këtë rast edhe Kurti dhe Haxhiu duhet të paraqiten para Prokurorit të Shtetit, mirëpo të njëjtit mund të paraqesin ankesë te gjyqtari i procedurës paraprake për të vendosur mbi ligjshmërinë e detyrimit të tyre për t’u paraqitur para prokurorit të shtetit.

Nëse të pandehurit, në rastin konkret Kurti dhe Haxhiu, të cilët janë thirrur me rregull nuk paraqiten dhe nuk e arsyetojnë mungesën e tyre ose kur thirrja nuk ka mundur t’iu dërgohet sipas rregullit dhe kur sipas rrethanave është e qartë se të pandehurit i shmangen pranimit të thirrjes, sipas dispozitës së nenit 175 paragrafi 1 të Kodit të Procedurës Penale, gjyqtari i procedurës paraprake më kërkesë të prokurorit të çështjes lëshon urdhërarrest.

Prokurori i Shtetit pret që të pandehurit, në rastin konkret Kurti dhe Haxhiu, tu përgjigjen ftesave dhe të kontribuojnë në zhvillimin dhe përfundimin normal të procedurës penale.

Prokurori i Shtetit është i vendosur që të respektoj të gjitha dispozitat ligjore për secilin rast, pavarësisht së kush është i dyshuar për vepër penale, duke respektuar dinjitetin e secilit individ në përputhje me dispozitat ligjore”, thuhet në komunikatën e Prokurorisë së Shtetit.

Mënyra se si është menaxhuar kriza parlamentare nga kryekuvendari Kadri Veseli dhe ndërhyrja e policisë për të arrestuar deputetin e Lëvizjes ‘Vetëvendosje’, Albin Kurti, me pretekstin për t’u dërguar në intervistim nga Prokuroria në mënyrë shumë të parregullt, gjatë orëve të natës dhe pa e dëshmuar autorizimin e Prokurorisë së shtetit, nga deputetë të LDK-së dhe analistë politikë interpretohet si skenar i qëllimshëm i përdorimit të elementeve kriminale të SHIK-ut të PDK-së. Sipas analistëve, këto elemente janë kudo në institucione, në polici, gjykata, prokurori e media, dhe përmes këtyre verimeve synojnë të nxisin trazira, me qëllimin final rrëzimin e Qeverisë aktuale dhe të sjelljes në krye të ekzekutivit të ri të ish-shefit të SHIK-ut, Kadri Veseli, në vend të Isa Mustafës.

Deputeti i LDK-së, Adem Salihaj, i ka thënë gazetës Kosova Sot se këtë skenar e ka hetuar kaherë dhe dyshon se është edhe qëllimi final i krejt këtyre zhvillimeve që po e trazojnë vendin.

“Unë e kam theksuar që nga fillimi se Kadri Veseli jo vetëm që po e toleron ‘Vetëvendosjen’ për veprimet në Kuvend, por ai me mjeshtri po i nxit ata që të krijojnë anarki dhe krizë politike. Në seancën e fundit ai luajti rolin e soditësit të kënaqur në gjithë atë tollovi në Kuvend, duke bërë sehir skenarin e tij për një konfrontim fizik të deputetëve të opozitës me ata të pozitës”, deklaroi Salihaj.

“Skenarët e fundit ishin kryekëput të SHIK-ut, duke krijuar situata shumë të tensionuara, duke arrestuar një deputet pa fletarrest, duke nxitur kështu trazira dhe duke e liruar pastaj atë. E gjithë kjo shërbeu për nxitje dhe inkurajim të ‘Vetëvendosjes’ për të vazhduar trazirat… Këto lojëra të rrezikshme të SHIK-ut nuk i sheh vetëm ai që është i verbër politikisht. U pa qartë se Policinë e Kosovës dhe prokurorë të caktuar i kontrollon SHIK-u dhe bën me ta çfarë të dojë”, tha deputeti Adem Salihaj. /Kosova Sot

Lideri i Lëvizjes Vetëvendosje, Albin Kurti, në emisionin Opinion të Tv Klanit, duke komentuar gjuajtjen me vezë të Petrit Selimit, Zëvendësministër i Punëve të Jashtme, nga aktivistë të kësaj lëvizje, e ka justifikuar plotësisht sulmin.

“Fotografia e Petrit Selimit me Daçiqin është perversitet”.

“Të fotografohesh me një kriminel si Daçiqi, me urdhërin e të cilit janë vrarë mijëra shqiptar, madje edhe fëmijë nën moshën shtatë vjeçare dhe poashtu kemi mijëra të zhdukur dhe të prekur – të dalësh në fotografi me të duke buzëqeshur është plotësisht e papranueshme”.

Kryetari i Komunës së Malishevës, Ragip Begaj, ka pritur të mërkurën në një takim përfaqësuesit e Agjencisë zvicerane të mjekësisë tropikale dhe të shëndetit publik, përkatësisht Debra Stevenson dhe Qamile Ramadanin, udhëheqës të projektit që kjo agjenci planifikon ta realizojë për ndihmë në kujdesin shëndetësor parësor.

Fillimisht Begaj ka falënderuar këtë agjenci për përfshirjen e Komunës së Malishevës në këtë projekt për përkrahje në fushën e shëndetësisë. “Ne si komunë jemi të gatshëm të bashkëpunojmë në projektin tuaj, pasi është me rëndësi të madhe për shëndetësinë në Malishevë”, është shprehur Begaj.

Ndërsa Debra Stevenson, duke e prezantuar projektin në fjalë, ka thënë se në të janë të përfshira 12 komuna dhe ky projekt kërkon që të merren parasysh prioritetet e komunave në fushën e shëndetësisë.

Ky projekt pritet të realizohet në bashkëpunim të ngushtë me Ministrinë e Shëndetësisë e sidomos me nivelin lokal dhe për këtë nevojitet edhe bashkëpunimi i Malishevës, përkatësisht Drejtorisë për Shëndetësi dhe QKMF-së. /PrizrenPress.com