Policia e Kosovës, siç ka premtuar, në orën 15:00 ka plasuar komunikatën për media ku bën me dije detaje nga arrestimi i drejtorit për Migrim dhe të Huaj, dy pjesëtarëve të FSK-së dhe disa të tjerëve.

Policia tregon se ka shoqëruar një kapiten policor, një zyrtar policor, dy pjesëtarë të FSK-së, një sekretar të shkollës së mesme teknike profesionale si dhe një profesor i shkollës së mesme në Drenas.

Personat e dyshuar janë intervistuar në prani të avokatëve mbrojtës dhe me vendim të prokurorit kompetent të njëjtëve u është caktuar masa e ndalimit policor për 48 orë me dyshimin se të njëjtit kanë kryer veprat penale: Zbulimi i fshehtësisë zyrtare, Keqpërdorimi i detyrës apo autoritetit zyrtarë, Marrja e ryshfetit, Ushtrim i ndikimit, Dhënia e ryshfetit, Mbajtja në pronësi, kontroll ose posedim të paautorizuar të armëve, Moslajmërimi i veprave penale apo kryesve të tyre dhe Dhënia e ndihmës kryesve pas kryerjes së veprave penale.

Aty tregohet se në orët e mbrëmjes të datës 17.03.2015 dhe më 18.03.2015 Inspektorati Policor i Kosovës në bashkëpunim me Drejtorinë për hetimin e trafikimit me qenie njerëzore të PK-së ka realizuar operacionin e koduar me emrin “Sinjali”.

Në konsultim me Prokurorinë Themelore në Ferizaj, Inspektorati Policor i Kosovës (IPK) ka filluar hetimet për këtë rast nga shtatori i 2014-ës.

“Ky plan operativ është zbatuar sipas urdhëresave të lëshuara nga gjykata themelore në Ferizaj me ç’rast janë bastisur dhe kontrolluar pesë lokacione të ndryshme në Ferizaj, Fushë Kosovë dhe Prishtinë. Me këtë rast janë bastisur: një restorant dhe një lokal i lojërave të fatit në Ferizaj, dy lokale banimi dhe objekte përcjellëse nga ku janë konfiskuar dëshmi të ndryshme materiale”, thuhet në komunikatën e PK-së.

Në këtë operacion të IPK-së kanë marrë pjesë edhe njësi të specializuara të Policisë së Kosovës, Doganës së Kosovës dhe Administratës Tatimore të Kosovës.

IPK garanton qytetarët e vendit dhe institucionet se do të vazhdojë të bashkëpunojë me çdo institucion të zbatimit të ligjit në Kosovë dhe do të kontribuojë në profesionalizmin, humanizmin, objektivitetin dhe llogaridhënien edhe më të madhe të policisë sonë, si një ndër policitë më të mira në rajon.

Zëdhënësi i Komunës së Prizrenit,Ymer Berisha thotë se hartimi i strategjisë për informim është në fazën finale.

“Priten komentet nga gazetarët, organizatat joqeveritare dhe të gjitha grupet e interesit”, tregon Berisha për TVO.

Berisha tregon se me 20 mars në organizim të OSBE-së do të mbahet një takim e përfaqësuesit e subjekteve politike në Prizren, të cilat gjithashtu do të mund t’i japin mendimet dhe sugjerimet e tyre.

“ Janë marrë sugjerimet e 5 organizatave joqeveritare, dhe të gjithë të interesuarit do të kenë ende mundësi që t’i japin mendimet e tyre”.

“Pas kësaj faze dokumenti do të dërgohet për shqyrtim në Komitetin për politikë dhe financa e nga aty në Kuvendin Komunal”.

“E vetmja kërkesë e Komunës në hartimin e kësaj strategjie është që të gjitha propozimet të jenë në përputhje me ligjin për informim dhe ligjin për transparencë”./PrizrenPress.com/

Kryetari i Komunës së Malishevës, Ragip Begaj, ka pritur sot në një takim pune, Abedin Selimaj, bashkëpunëtor profesional në Institutin për Hulumtimin e Krimeve të Luftës, me të cilin kanë biseduar për bashkëpunimin e ndërsjellë mes këtij instituti dhe Komunës, për hulumtimin e krimeve të luftës, me ç’rast, kryetari Begaj, ka ofruar bashkëpunimin e plotë të komunës, për hulumtimin e krimeve të bëra gjatë luftës së fundit.

Fillimisht, Selimaj, e ka informuar kryetarin, me punën e institutit në hulumtimin e krimeve dhe nevojën e madhe për kryerjen e këtij hulumtimin, në mënyrë që të dihen saktësisht krimet e bëre, duke filluar nga vrasjet, dhunimet, dëmet në trashëgiminë kulturore, dëmet në ekonomi dhe të gjitha dëmet tjera.

Nga ana tjetër, kryetari Begaj, e quajti pak të vonuar hulumtimin e krimeve të luftës, mirëpo ofroi bashkëpunim dhe furnizim me materialet që disponon Komuna e Malishevës, të grumbulluara menjëherë pas luftës. “Të gjitha dëshmitë që ka komuna, do të jenë në shërbimin e institutit”, i ka thënë Begaj, përfaqësuesit të Institutit për Hulumtimin e Krimeve të Luftës, Abedin Selimaj.

Tre persona janë arrestuar në Prizren. Arrestimi i tyre është bërë me urdhër të Gjykatës Themelore në Prizren.

Raporti i Policisë

Rr. Tefik Qanga, Prizren, 18.03.2015-08:10. Në bazë të urdhëresës së lëshuar nga Gjykata Themelore –Prizren është arrestuar i dyshuari mashkull K-Shqiptar dhe i njëjti pas kryerjes së obligimeve te përcaktuara nga Gjykata është liruar.

Rr. Ulqinit, Prizren, 18.03.2015-09:10. Në bazë të urdhëresës së lëshuar nga Gjykata Themelore-Gjilan është arrestuar i dyshuari mashkull K-Shqiptar dhe i njëjti dërgohet në Gjykatë në seancë gjyqësore.

Rr. William Woker, Prizren, 18.03.2015-13:10. Në bazë të urdhëresës së lëshuar nga Gjykata Themelore-Prizren është arrestuar i dyshuari mashkull K-Shqiptar dhe i njëjti pasi ka kryer obligimet e përcaktuara nga Gjykata është liruar .

Udhëheqësit e NISMA-s janë takuar me Ambasadoren e Republikës së Francës, Maryes Daviet ku i shprehen shqetësimet rreth skandalit në rastin “Kleçka”.

“Në kuadër të takimeve me përfaqësuesit e korit diplomatik të akredituar në Kosovë, udhëheqësit e NISMA për Kosovën, të kryesuar nga Kryetari i Këshillit Kombëtar, Jakup Krasniqi, sot kanë zhvilluar takim me Ambasadoren e Republikës së Francës, Maryes Daviet.

Në takimin e zhvilluar mes udhëheqësve të NISMA-s për Kosovën dhe Ambasadores franceze, Maryes Daviet, është diskutuar për situatën aktuale, ku Kryetari i Këshillit Kombëtar i NISMA për Kosovën, Jakup Krasniqi i ka shprehur shqetësimet e NISMA-s rreth skandalit të fundit të EULEX-it në rastin ‘Kleçka’, të publikuara ditë më parë në media”, thuhet në njoftim.

Kryetari i Komunës së Malishevës, Ragip Begaj, i ka pritur sot në një takim nxënësit e klasës së pestë të shkollës fillore “Ibrahim Mazreku” në Malishevë, të cilët janë fitues të projektit “Kosovision kontest”, për klasat e pesta, dhe ideja e tyre është pastrimi i qytetit, për çka morën përkrahjen e kryetarit Begaj, për mbështetje të projektit, si dhe për pjesëmarrje në fushatën e pastrimit të ambientit në qytet. Ndihmë për realizimin e këtij projekti, ofroi edhe njësia e “Eko regjionit” në Malishevë.

Sipas mësueses Violeta Marmullaku dhe nxënësve J.Krasniqi, R.Morina E.Mazreku, janë fitues të projektit dhe iniciativa është për pastrimin e ambientit në qytetin e Malishevës, kurse shuma e fituar për këtë projekt, është pesëqind euro, por kjo nuk është shumë e mjaftueshme për realizimin e projektit, për çka nxënësit kërkojnë edhe ndihmën e komunës dhe donatorëve tjerë nga sektori i biznesit në Malishevë.

Kryetari Begaj, duke shprehur kënaqësinë e tij për këtë iniciativë, tha, “ më vjen mirë që ju keni ide dhe vullnet për një aktivitet të tillë të pastrimit”. Më pas kryetari Begaj, tha se “mirëmbajtja e ambientit, është edhe njëra prej qëllimeve me shumë prioritet dhe të gjithë së bashku, mund ta pastrojmë dhe ta mirëmbajmë ambientin në përgjithësi dhe qytetin në veçanti”. Kryetari Begaj, premtoi që do ta përkrahë këtë iniciativë dhe do të jetë pjesë aktive.

Projekti pritet të realizohet më 22 prill në Ditën Ndërkombëtare të Tokës, kurse aksionin e nxënësve të klasës së pestë, sipas menaxherit të njësisë së kompanisë “Eko regjioni” në Malishevë, z.Nuhi Shala, do ta përkrahë me mjete konkretizuese.

Edhe pse në atë kohë, përkatësisht në vitin 2007 as që flitej për mundësinë e themelimit të Gjykatës Speciale, ka pasur komandantë të tillë që në shenjë revolte ndaj denigrimit të luftës kanë kërkuar nga institucionet e drejtësisë në vend t’i hetojnë të bëmat në luftë, për të dëshmuar kështu luftën e pastër të Ushtrisë Çlirimtare të Kosovës.Se ish-luftëtarët e Ushtrisë Çlirimtare të Kosovës (UÇK), kanë filluar të revoltohen me proceset e vazhdueshme gjyqësore ndaj individëve të cilët e kanë udhëhequr këtë luftë, tregon më së miri edhe rasti i ish-pjesëtarit të UÇK-së, Aziz Bici.

Bici, i cili vjen nga fshati Mazgit, Komuna e Obiliqit, ka qenë Komandant i Batalionit të Parë të Brigadës 142, Zona Operative e Shalës (ZOSH), kishte vendosur që lëndën e tij në vitin 2007 ta dërgoj në prokurori, që kjo e fundit ta hetoj luftën të cilën ai e ka bërë në uniformën e UÇK-së.

Këtë e ka bërë në shenjë revolte për të dëshmuar pastërtinë e luftës së UÇK-së.

“Gjatë gjithë periudhës së pasluftës (nga pushtetet vendore dhe ndërkombëtare, madje edhe mediat) është tentuar që të denigrohet lufta jonë për liri. Andaj tash kam vendosur që luftën time të drejtë, për lirinë e popullit ta dërgoj në prokurori”, ka thënë Bici për Telegrafin.

Forumi Transparenca vlerëson se strategjia e Komunës së Prizrenit për informim është hartuar me qasje përjashtuese.

“Komuna e Prizrenit ka iniciuar hartimin e Strategjisë Komunale për Informim, Komunikim dhe Pjesëmarrje qytetare. Në versionin para-final, të shpërndarë nga Zyra për Informim e Komunës së Prizrenit, në pjesën ku përshkruhet metodologjia në faqen 15 thuhet se “strategjia është hartuar me një pjesëmarrje të gjerë, duke përfshirë përfaqësues të organeve komunale relevante, organizatave të shoqërisë civile dhe të medieve”, thuhet në reagimin e Forumit Transparenca.

“Ndërsa në faqen 14 sqarohet se “fillimisht është organizuar një punëtori me pjesëmarrje të gjerë të të gjitha palëve me interes, ku janë identifikuar fushat problemore që duhen adresuar me strategji. Gjithashtu, është bërë një analizë gjithëpërfshirëse e problemeve sipas fushave problemore”. Tutje shkruan se “për hartimin e strategjisë dhe të planit të veprimit për komunën e Prizrenit është formuar një grup i punës, i përbërë nga përfaqësues të komunës, nga OSHC-të, OJQ-të dhe ekspertë të fushave përkatëse, si dhe organeve gjegjëse komunale, sic është ZIP, zyra ligjore dhe zyra për integrime evropiane”. Përvec kësaj, thuhet se janë “konsultuar edhe përfaqësues të zyrave për informim nga komunat tjera…”.”

“Po ashtu theksohet se “tryezat dhe punëtoritë gjatë fazës përgatitore me sukses i kanë shërbyer synimit për përfshirjen e sa më shumë palëve nga qeverisja lokale dhe komuniteti i OJQ-ve” dhe se kjo qasje “ofron garanci që strategjia do të zbatohet me sukses dhe do të ketë përkrahjen e shoqërisë së gjerë”. Në këtë draft potencohet se “metodologjia e përdorur në procesin e hartimit të strategjisë dhe të planit të veprimit është përmes planifikimit me pjesëmarrje të gjerë, gjegjësisht përmes metodologjisë së kornizës logjike dhe veglave të saja të planifikimit”.

Forumi Transparenca përmes kësaj letre publike dëshiron që ta njoftojë opinionin se pjesa dërrmuese e anëtarëve të saj, e veçanërisht komuniteti i gazetarëve nuk janë përfshirë fare në procesin e konsultimeve për hartimin e kësaj strategjie.
“Për këtë shkak Forumi Transparenca konsideron se Strategjia komunale për informim, komunikim dhe pjesëmarrje qytetare e Komunës së Prizrenit është hartuar me një qasje përjashtuese, sidomos ndaj komunitetit të gazetarëve, por edhe aktivistëve të shoqërisë civile që kanë përvojë disavjeçare në monitorimin e punës së organeve komunale, si dhe grupeve të qytetarëve, të cilat në këtë rast janë palë tejet të rëndësishme të interesit sa i përket informimit, komunikimit dhe pjesëmarrjes qytetare”.

“Forumi Transparenca dëshiron të sjellë në vëmendje se vendimi i kryetarit të komunës për lejimin e hartimit të strategjisë është marrë më 3 shkurt, derisa drafti i parë është prezantuar para gazetarëve dhe monitoruesve nga shoqëria civile vetëm pas tre javësh, më 25 shkurt, dhe atë në një konferencë për shtyp. Pas vërejtjeve të paraqitura, kanë pasuar ftesat për OJQ-të për një punëtori e një tryezë, por jo edhe për gazetarët.

Forumi Transparenca vlerëson se gazetarët e Prizrenit nuk e kanë merituar një injorim të tillë në hartimin e këtij dokumenti strategjik dhe se është dashur të jenë të përfshirë nga fillimi në procesin e hartimit të këtij dokumenti strategjik, njëjtë sikurse edhe aktivistët e shoqërisë civile që kanë përvojë shumëvjeçare në monitorimin e punës së organeve komunale”.

“Me këtë rast Forumi Transparenca shpreh dyshimet e bazuara të anëtarëve të saj se hartimi i strategjisë nuk është realizuar me pjesëmarrje të gjerë dhe se si i tillë është ndërtuar bazuar në vlerësimet e ngushta, pa i përfshirë nevojat e të gjitha palëve të interesit”./PrizrenPress.com/