Edhe në Prizren ka filluar nënshkrimi i peticionit përmes të cilit kërkohet të kundërshtohen marrëveshjet e fundit të arritura në Bruksel, ndërmjet Kosovës dhe Serbisë, në organizim të opozitës.

Një tendë e vendosur në afërsi të Urës së Arastës në Shatërvan, është pika e parë e vendosur për nënshkrimin e këtij peticioni në Prizren.

Zyrtari i lartë i LVV-së në Prizren, Arbër Rexhaj tha se ky peticion duhet të shfrytëzohet edhe si një mundësi që zëri i qytetarëve të dëgjohet edhe më shumë.

Ai tha se qysh në ditën e parë të nënshkrimit të këtij peticioni, interesimi nga qytetarët e Prizrenit që përmes këtij aktiviteti për t’i kundërshtuar marrëveshjet e fundit në Bruksel, është tejet i lartë.

Qytetarët të cilët e nënshkruan këtë peticion, Jashar Skenderi dhe Hasim Lecaj, thanë se marrëveshjet e arritura në Bruksel janë të dëmshme për shtetin e Kosovës, dhe se ato janë bërë vetëm për t’iu plotësuar dëshirat e ndërkombëtarëve.

Peticioni do të zgjasë disa ditë, pasi ende nuk është bërë e ditur sa do të zgjas saktë peticioni. Sipas organizatorëve në Prizren, ditëve në vijim do të vendosen edhe pika të reja në qytet, ku qytetarët mund të nënshkruajnë këtë peticion./Tv Prizren

Zyra e Kryeprokurorit të Shtetit njofton opinionin publik se Prokuroria Speciale e Republikës së Kosovës, nga Prokuroria Themelore në Prizren, ka marr në kompetencë për të shqyrtuar rastin e vrasjes në Prizren të Hekuran Morinës.

Hetimet policore për ta zbardhur këtë rast tani do t’i kryej Drejtoria për Hetimin e Krimeve të Rënda në Prishtinë, në mbikëqyrje të Prokurorisë Speciale të Kosovës.

Lënda është marrë në kompetencë nga Prokuroria Speciale e Republikës së Kosovës, në bazë të Ligjit për PSRK-në, pasi që ekziston dyshimi i bazuar se PSRK-ja, për shkak të rrethanave të veçanta, ose të komplikimit, a të natyrës së sjelljes së supozuar kriminale, është organi i vetëm që mund të realizojë hetimin ose ndjekjen tërësore të krimit.

Dega e Partisë Demokratike e Kosovës në Malishevë, ka reaguar ndaj kryetarit të Komunës së Malishevës, Ragip Begajt, duke thënë se nuk po zbaton vendimin e formës së prerë të Gjykatës se Apelit, për kthim në vendin e punës të Agim Samadraxhës.

“Edhe pse ka vendimin e formës se prerë të gjykatës, Agim Samadraxha nuk po lejohet të kthehet në vendin e tij të punës Drejtor në Gjimnazin “Hamdi Berisha” në Malishevë. Këtë vendim nuk po e zbaton Ragip Begaj, kryetar i Komunës së Malishevës i cili me njoftim të veçantë e ka njoftuar edhe vetë z.Samadraxha duke u munduar ta joshë me privilegje të tjera”, thuhet në komunikatën e PDK-së. /PrizrenPress.com

Për me shumë lexoni shkresën e drejtorit Agim Samadraxha dhe përgjigjën e kryetarit Ragip Begaj.

Në agjendën e prezantuar për festën “Festari”, është traditë që të jetë një shkrim nga kryetari i komunës, drejtuar qytetarëve.

Po çka ka në këtë vit në këtë tekst. Përveç fjalëve klishe, aty sheh shumë gabime së pari logjike e më pas 29 gabime drejtshkrimore, duke e kursyer në disa raste nga ndërrimi i gjithë fjalisë e cila nuk ka logjikë. Dikund mund të çuditeni se pse është gabim por kjo fushë e komunikimit ka rregulla dhe janë shumë të lehta të arrihen, siç është kur një diçka shprehet me një fjalë, tog fjalësh apo fjalë me pjesëza në njërin vend të tekstit, ajo duhet të jetë e njejtë edhe në vendet tjera, transmeton TherandaPost.

Më poshtë shihni fotografinë dhe gabimet të cilat i kemi bërë me shenjë se ku është gabim, por që këshilltarët e kryetarit që i rrinë afër, le t’i përmirësojnë e biles shumë prej tyre janë edhe profesorë të gjuhës shqipe.

Edhe në anën tjetër të agjendës ka disa gabime të cilat nuk është dashur të ndodhin sepse edhe në tërë stafin e Komunës së Suharekës, ka njerëz të cilët mund t’i kenë këto fjalë përpara dhe t’i lektorojnë. /therandapost/

Në orët e para të ditës së sotme, ambasadori i Shqipërisë në Kosovë, Qemajl Minxhozi, është takuar me drejtorin për Zhvillim Ekonomik dhe Turizëm në Prizren, Mensur Bytyçi, nga i cili është informuar për iniciativën e mbajtjes së konferencës me gazetarë nga 23 shtetet më të fuqishme ekonomike të botës në Prizren.

Konferenca ka për synim promovimin e turizmit në komunat e regjionit të Prizrenit.

Me këtë rast, ambasadori Minxhozi, e vlerësoi të rëndësishme këtë iniciativë të këtij dikasteri dhe shprehu besimin se konferenca në fjalë do të jep efektin e vet jo vetëm për Prizrenin dhe Kosovën, por edhe më gjërë.

Përveç ambasadorit Minxhozit, në takimin e sotëm, kanë marrë pjesë edhe zyrtarë të komunave të rajonit të Prizrenit, në kuadër të përgatitjeve për organizimin sa më të mirë të kësaj ngjarje të rëndësishme në promovimin e turizmit, dhe jo vetëm, e cila pritet të mbahet në fund të muajit tetor. /Tv Prizreni