Kryetari i Komunës së Malishevës, Ragip Begaj, ka pritur sot në zyrën e tij, drejtorin ekzekutiv të Shoqatës së personave të verbër të Kosovës, Mexhid Foniqi, me të cilin biseduan për gjendjen e personave të kësaj kategorie dhe përkrahjen institucionale për këtë kategori të shoqërisë.

Drejtori ekzekutiv i shoqatës, Foniqi, fillimisht e falënderoi kryetarin Begaj, për pritjen dhe për mirëkuptimin e tij, në raport me personat të cilët kanë probleme me shikim, si dhe për përkrahjen e vazhdueshme që Komuna e Malishevës, ka dhënë për këtë shoqatë në Malishevë, si dhe shtroi nevojën, për përkrahje edhe të mëtutjeshme.

“Zbatimi i tërësishëm i ligjit, do të na ndihmonte shumë, sidomos tek benifitet, të cilat nuk i gëzojnë”, tha drejtori Foniqi.

Nga ana tjetër kryetari Komunës së Malishevës, z.Ragip Begaj, duke i përgëzuar për punën që bëjnë si shoqatë, tha se “ndien obligim moral në raport me këtë kategori” dhe sipas tij, “përkujdesja ndaj këtyre kategorive, është një sprovë për institucionet dhe shoqërinë”.

“Mundësitë tona buxhetore, janë shumë të kufizuara, por ne do ti analizojmë të gjitha mundësitë tona buxhetore, në mënyrë që t’iu ofrojmë përkrahje edhe shoqatës në Malishevë, shoqatë të cilën e kemi përkrahur edhe në të kaluarën”, tha kryetari Begaj.

Përndryshe në Komunën e Malishevës, bazuar në të dhënat e shoqatës së personave të verbër, jetojnë 276 persona, të cilët kanë probleme me shikim, dhe janë tërësisht ose pjesërisht të verbër dhe që kanë nevojë për përkrahje.

Një delegacion i Lëvizjes VETËVENDOSJE! , i përbërë nga deputeti Visar Ymeri, Koordinatori i Qendres së LVV në Suharekë Leonard Shala dhe aktivistja Albana Gashi, vizituan ish punëtorët e IGK Ballkani, të cilët ka më shumë së një vit që kanë hyrë në grevë. Këshilli grevist e njoftoi delegacionin me kërkesat e tyre si dhe për hapat që kanë ndërmarrë.

Ata kërkuan nga LVV që të vazhdojë përkrahjen e kërkesave të tyre si dhe i njoftuan për hapat që do ndërmarrin në ditët në vijim nëse këto kërkesa nuk do merren parasysh nga ana e Qeverisë.

Kërkesë e tyre imediate ishte themelimi i një komisioni hetimor parlamentar i cili do hetonte mënyrën e privatizimit të Ballkanit, ngase ata mendojnë që gjatë procesit kishte shumë parregullësi dhe që pronari i ri nuk i ka plotësuar kriteret të cilat ishin kërkuar në kontratë, meqë privatizimi i kësaj fabrike ishte bërë me spin off special.

Në fjalën e tij, deputeti VV Visar Ymeri i njoftoi ish-punëtorëve grevistë për aktivitetet e Lëvizjes VETËVENDOSJE! në lidhje me privatizimin në përgjithësi, e në vecanëti të IGK Ballkan. Ai tha që kërkesat e tyre janë të drejta dhe që Lëvizja VETËVENDOSJE! do vazhdojnë t`i përkrahin punëtorët në vazhdimësi në kërkesat e tyre.

Në Prishtinë ka filluar mbledhje e Këshillit për Integrim Evropian ku si çështje urgjente po diskutohet migrimi ilegal i cili është i shprehur kohët e fundit. Presidentja e Kosovës Atifeta Jahjaga ka thënë se trendet e migrimit ilegal janë shqetësuese. Sipas Jahjagës kjo po ndodhë për shkak të mungesës së zhvillimit ekonomik.

Presidentja me këtë rast ka përmendur edhe rastin e Ali Fetahut i cili është ngrirë në kufirin mes Hungarisë dhe Serbisë. “Cilado qofshin rrethanat e migrimit, një gjë mbetet e pa kontestuar. Kjo nuk duhet të jetë Kosova e vitit 2015. Në rastet si kjo dëshmojmë nevojën që të bëjmë çdo gjë që është e mundshme për ta parandaluar këtë dukuri”, tha Jahjaga. Sipas liberalizimi i vizave jo vetëm që do të mundësojë lëvizjen e lirë por edhe do të reformojë institucionet që janë ndërtuar qe një dekadë e gjysmë. Jahjaga tha se numri në rritje i azilkërkuesve kosovarë e vështirëson liberalizimin e vizave.

Në takim po marrin pjesë kryeministri i Kosovës Isa Mustafa, ministri i Integrimeve Bekim Çollaku, ai i Punëve të Brendshme Skender Hyseni, drejtori i Policisë Shpend Maxhuni, shef i zyrës së BE-së Samuel Zhbogar, etj.

Komuna e Malishevës ka vendosur një tendë në Parkun e qytetit, në mënyrë që jo vetëm të bjerë në sy, por edhe që përmes saj të shpërndajë fletushka, për të rritur kësisoj interesimin e qytetarëve në mënyrë që ata të aplikojnë për legalizimin e objekteve të tyre. Një muaj para përmbylljes së afatit për aplikim, Ministria e Mjedisit dhe Planifikimit Hapësinor (MMPH) ka nisur intensifikimin e fushatës në kuadër të të ashtuquajturës “Dita e legalizimit”, kushtuar procesit të legalizimit të ndërtimeve pa leje.

Disa minuta pas hapjes, disa qytetarë në tendë janë informuar me procedurat e legalizimit dhe kushtet që duhet t’i plotësojnë në mënyrë që objektet e tyre të bëhen legale. Kryetari i Komunës së Malishevës, Ragip Begaj, duke përkrahur nismën për legalizim ka inkurajuar të gjithë qytetarët, që kanë ndërtime pa leje, t’i fillojnë procedurat për legalizimin e ndërtimeve të tyre, brenda ligjeve dhe rregulloreve, për ndërtim.

“Duhet të mësohemi të zbatojmë ligjet, në këtë rast edhe Ligjin për Ndërtim, pasi të gjitha ndërtimet duhet të jenë në harmoni me rregullat, me planifikimet dhe me kushtet urbane”, ka thënë ndër të tjera ai. Malisheva ka marrë shtrirje, sidomos pas përfundimit të luftës, me ç’rast edhe janë ngritur lagje të reja. Sipas zyrtarëve, jo vetëm në pjesët periferike, por edhe në vetë zonën e parë, ka një numër të objekteve të cilat nuk posedojnë dokumentacion.

Legalizimi po kryhet mbështetur në Ligjin për Trajtimin e Ndërtimeve Pa Leje, të Ministrisë për Mjedis dhe Planifikim Hapësinor, të miratuar më 2013.
Referuar zyrtarëve, nuk do të ketë legalizim të objekteve, sidomos të atyre afariste të cilat janë ndërtuar në parcela, që janë pronë publike apo që në kadastër figurojnë si rrugë. Aktivitetet për njoftimin e malishevasve për procesin e legalizimit do të vazhdojnë me fushatën informimit që mendohet të shtrihet në shkollat e mesme, ku do të shpërndahen broshura, me qëllim të informimit sa më të gjerë të qytetarëve.

Lideri i AAK-së, Ramush Haradinaj, ka thënë se Kosovën po e shkatërron korrupsioni, papunësia, varfëria, luksi i Qeverisë dhe vonesat në integrimet evropiane.

Ai në Facebook, ka thënë se sot duhet të ishte temë debati perspektiva e vendit e jo migrimi ilegal.

Shkrimi i plotë i Haradinajt në Facebook:

Të nderuar qytetarë të vendit,

Ka kohë që në shoqërinë tonë, lidershipi dhe institucionet po merren me pasojat dhe veprimet e gabuara të institucioneve. Kurse, në fakt, debati për pasojat do të duhej të zhvendoset në debat për shkaqet.

Sot nuk do të duhej të ishte temë migrimi ilegal. Sot do të duhej të ishte temë çka po e mbyt perspektivën e qytetarëve të Kosovës? Dhe, nga një debat i tillë, do të duhej të dalin veprime konkrete për eliminimin e shkaqeve që për rezultat kanë këtë fenomen.

Çka po e shkatërron perspektivën e qytetarit të Kosovës?

– Korrupsioni:

Korrupsioni i sistematizuar dhe i strukturuar nëpër të gjitha mekanizmat e shtetit të Kosovës.

Të gjithë e dimë, edhe vendorët edhe ndërkombëtarët, dhe që të gjithë në këtë temë përfundojnë me deklarata politike, por kurrë veprime serioze.

– Papunësia dhe varfëria:

Kosova si një vend me moshën më të re të popullsisë rrezikon ta shndërrojë këtë karakteristikë nga pasuria në kërcënim.

– Luksi megaloman i Qeverisë:

Të dy partitë në koalicion po dëshmojnë se shqetësimi kryesor i tyre është akomodimi i militantëve partiak dhe ruajtja e rrjeteve të tyre klienteliste. Këto janë shqetësimet e vetme që kanë partnerët e koalicionit.

– Vonesat në integrimet evropiane:

Është e padrejtë që për shkak të keq-qeverisjes së toleruar të ndëshkohen dy milionë qytetarë të Kosovës, e jo keq-qeverisja. Janë dy milionë qytetarë të vetmit në Evropë të cilëve u është pamundësuar lëvizja e lirë.

Është i kot debati dhe apelet e thata të zyrtarëve qeveritarë përderisa arsyet për ikje nga Kosova nuk po luftohen.

Tashmë është e qartë: Ikja e qytetarëve do të ndalet atëherë kur ikë kjo Qeveri.

Partia Demokratike e Kosovës nuk ka diskutuar ende për emrat e Zëvendësministrave. Shefi i Grupit Parlamentar të PDK’së, Adem Grabovci, thotë se gjithçka do të vendoset në mbledhjen e Kryesisë, ku do të merren propozime edhe nga degët e partisë.
“Ende nuk është diskutuar për emrat e Zëvendësministrave. Duhet të mbahet një herë mbledhja e Kryesisë dhe të diskutohen emrat. Duhet të merren propozimet edhe nga degët e partisë”.

Grabovci është shprehur se nuk ka asnjë mosmarrëveshje brenda PDK’së rreth emrave për Zëvendësministra, duke u dhënë përparësi atyre të cilët i vlerëson komisioni kadrovik.

“Absolutisht nuk asnjë mosmarrëveshje. Normalisht se PDK është një parit e madhe, që ka kuadro të shumta, dhe ne duhet t’i zgjedhim më të mirët. Unë besoj se do të ketë mirëkuptim dhe të gjithë do t’u japin përparësi atyre të cilët i vlerëson komisioni kadrovik”, thotë Adem Grabovci për Politiko.net.

Sipas marrëveshjes së koalicionit, PDK dhe LDK do të kenë 38 Zëvendësministra për 19 Ministri, ndërsa po ashtu ata do të emërojnë edhe 126 këshilltarë politikë, që i bie nga gjashtë për secilin Ministër.

Kryetari i Gjykatës Kushtetuese të Kosovës, Enver Hasani, ka kërkuar nga Kuvendi i Kosovës që të fillojë procedurën për propozimin e gjyqtarëve të rinj, të cilët prej qershorit të këtij viti do të emërohen në vend të tij dhe gjyqtarit Kadri Kryeziu.

Pas gjashtë vitesh angazhim, gjyqtarët Hasani dhe Kryeziu, në mesin e këtij viti do të përmbyllin mandatet e tyre në Kushtetuese, dhe në bazë të dispozitave të Propozimit Gjithëpërfshirës për Statusin e Kosovës nuk kanë mundësi rizgjedhjeje.

Sipas zëdhënësit të Gjykatës Kushtetuese, Veton Dula, javë më parë kreu i këtij institucioni ia ka adresuar shkresën përkatëse Kuvendit të Kosovës../koha ditore/