Donika Gërvalla vlerëson se qeverisja me PDK’në, do të ishte vetëvrasje kolektive për LDK’në. Gërvalla në vazhdimësi ka qenë kundër koalicioneve të LDK’së jo vetëm me PDK’në por edhe me AAK’në. Ajo kishte dalur me disa deklarata të ashpra në adresë të zyrtarëve të AAK’së.

Në mesazhin e saj të fundit në Facebook, ajo shkruan se bashkëpunimi i LDK’së me PDK’në, do të ishte një vetëvrasje kolektive, pasiqë sipas saj, kjo parti “krimin dhe korrupsionin i ka shndërruar në mjete të preferuara të qeverisjes dhe politikës”.

Mesazhi i plotë në Facebook:

Ka mjaft rezistencë brenda LDK-së ndaj përpjekjes së Isa Mustafës për të shkelur premtimin e tij më të përsëritur gjatë fushatës zgjedhore. Premtimin që me të në krye nuk do të ketë koalicion me PDK-në. Bashkëpunimi me PDK-në, e cila krimin dhe korrupsionin i ka shndërruar në mjete të preferuara të qeverisjes dhe politikës, paraqet për LDK-në as më shumë e as më pak sesa një vetëvrasje kolektive.
Ka pak shpresë se do të mund të shmanget në strategji e tillë. LDK-ja për Kosovën, megjithë devijimet e njëpasnjëshme, ka rolin më të rëndësishëm në ekuilibrin e vendit. Nuk jemi në vitin 2000, dhe as në vitin 2004, kur vendi përplasej me probleme krejt të tjera. Nëse LDK-ja shkon këtë herë në shtrat ose lejon që të tjerët ta dërgojnë në shtrat me PDK-në, atëherë ajo do të humbasë kredibilitetin edhe ashtu të lëkundur dhe si pasojë e kësaj, do të prishë ekuilibri shumë të brishtë të Kosovës. Një bashkëpunim i tillë mund t’i duket praktik për momentin klikës politike, por për Kosovën dhe popullin e saj do të ishte jo më pak se një katastrofë e vërtetë.

Kur dështon udhëheqja politike, atëherë populli duhet ta ndalë rrugën drejt humnerës. Rumunët na dëshmuan këto ditë se si mund të ndalet rrëzimi. Populli rumun, me votë të drejtpërdrejtë, zgjodhi një president, i cili me zell dhe korrektësi dëshmoi se si arrihet suksesi dhe kthehet shpresa. Ai i fitoi zemrat e rumunëve duke u bërë simbol i politikës që premton zero tolerancë ndaj krimit dhe korrupsionit.
Isa Mustafa i ka shkaktuar LDK-së humbje të njëpasnjëshme. Tani duket sikur është nisur, me apo pa qëllim, t’i japë goditjen përfundimtare. Lidhja Demokratike e Kosovës vendos nesër për fatin e saj dhe për fatin e Kosovës. Këtë duhet ta ketë të qartë secili nga anëtarët e Këshillit të Përgjithshëm, pavarësisht se a i pëlqen apo jo. Ai që hesht bëhet bashkëfajtor. LDK-ja është molisur nga veprimtarë të saj, të cilët vrapojnë dhe bërtasin për t’u zgjedhur në pozicione drejtuese, mirëpo heshtin si në kohërat e vjetra, kur duhet ngritur zërin dhe thënë hapur mendimin. Ne mund ta çlirojmë Kosovën nga kanceri i krimit dhe korrupsionit, por nuk duhet të lejojmë që nga një bashkëpunim i tillë i paprincip me PDK-në të infektojmë vetveten.

Partia Demokratike e Kosovës dhe Aleanca për Ardhmërinë e Kosovës nuk kanë arritur ta finalizojnë një akord për bashkëqeverisje, për çfarë u bisedua seriozisht mbrëmë dhe sot.

Klan Kosova mëson se për këtë ka ndërmjetësuar ambasadori britanik, Ian Cliff, i cili në dy ditët e fundit ka takuar liderët e subjekteve politike në fjalë. Ai sot është parë në selinë e AAK-së ku, ndër tjera, sipas zyrtarëve të kësaj partie, ka folur për rëndësinë e një koalicioni qeveritar stabil.

Por, një takim që u zhvillua në orët e para të mbrëmjes së sotme, rezultoi me shprehje të besueshmërisë së brishtë që PDK dhe AAK kanë për njëra-tjetrën, duke bërë që bisedimet të mos e arrijnë qëllimin.

Zhvillimi i fundit, siç iu tha televizionit Klan Kosova nga burime ndërkombëtare, i ka hapur dyert një negocimi të mundshëm të partisë së Hashim Thaçit me LDK-në, duke ditur se edhe kjo e fundit është prishur me AAK-në për postin e kryeministrit, duke këputur kështu shpresat për bashkëqeverisje të opozitës së vjetër.

Këto informacione nuk kanë mundur të konfirmohen zyrtarisht nga ambasada britanike, por as nga partitë, me gjithë që zyrtarë të të gjitha subjekteve politike partive kanë pranuar se janë duke ndodhur zhvillime interesante.

Megjithatë, mësohet se nisma e emisarit londinez Cliff, për të pasur sa më shpejt një koalicion qeveritar stabil që vazhdon dialogun me Serbinë dhe shpejton punët për themelimin e Gjykatës Speciale për krime lufte – e cila duhet të miratohet nga Kuvendi, në pak muaj – ka mbështetje në parim edhe nga Washingtoni. /Klan Kosova/

Lidhja Demokratike e Kosovës dhe Partia Demokratike e Kosovës kanë marrëveshje për bashkëqeverisje. Pritet që shumë shpejt kjo gjë edhe të bëhet publike. Kështu ka bërë të ditur një burim i Gazetës Blic brenda LDK-së.

Sipas këtij burimi, edhe në mbledhjen e sotme të Kryesisë është vendosur që LDK të mos mbes në opozitë në asnjë formë. “Është vendosur që LDK të mos mbes në opozitë, por që me e pas kryeministrin”, ka thënë ky burim i gazetës Blic brenda takimit të sotëm të Kryesisë.
E vetmja që ka qenë kundër kësaj marrëveshjeje me PDK-në, është Vjosa Osmani. Ajo fuqishëm e ka kundërshtuar një ide të tillë, duke paralajmëruar se nuk do ta votoj këtë koalicion.

“Vjosa Osamni ka qenë kategorik kundër hyrjes në bashkëqeverisje me PDK-në”, ka thënë ky burim.
Deputetja më e votuar femër në Kosovë edhe para mbledhjes së Kryesisë ka thënë se nuk do të votoj për ndonjë koalicion mes PDK-së e LDK-së.

Pas mbledhjes së kryesisë, Lutfi Haziri deklaroi se nuk do të shkojnë me PDK dhe se brenda Bllokut e duan kryeministrin.

Ndërkohë, pak orë më vonë ai e dha edhe një deklaratë se çfarë do të ndodh nesër në mbledhjen e Këshillit Drejtues të kësaj partie.

Ai tha se organi më i lartë i LDK’së do të përcaktohet qartë.
“Nesër vendoset; ose i prijmë Qeverisë ose shkojmë në Opozitë”, ka deklaruar Lutfi Haziri në emisionin InfoMagazine të Klan Kosovës.

Kjo do te thote fundi i Bllokut LDK-AAK-Nisma. Dhe, duket se fundi i këtij koalicioni zyrtarizohet nesër në Këshillin Drejtues të LDK’së./ Gazeta Blic

Nënkryetari i AAK-së, Ahmeti Isufi, i ftuar në edicionin e lajmeve të RTV21, ka thënë se marrëveshja që është bërë në mes partive të Bllokut duhet të zbatohet.

Ai ka thënë se do të shohin në ditë në vijim se si do të sillet Lidhja Demokratike e Kosovës, pasi sipas tij është ajo që ka filluar të bëjë këtë kërkesë.

Isufi ka thënë se AAK është parti të cilës mund t’i besohet, duke shtuar se edhe pse kjo marrëveshje mund të dëmtojë.

Ndërkaq, Petrit Zogaj nga Lëvizja Fol ka thënë se në momentin që bie një pikë e marrëveshjes, bie krejt marrëveshja.

Ai ka thënë se kryeministri në detyrë, Hashim Thaçi, është duke pritur se cila partin nga Blloku do të dal fituese dhe të bëjë ofertën për koalicion. Sipas tij, Blloku VLAN është në fund të marrëveshjes.

Deputeti i zgjedhur i Aleancës për Ardhmërinë e Kosovës, ka mohuar takimin me kryetarin e Partisë Demokratike të Kosovës, Hashim Thaçin.
Në një prononcim për Express, Lekaj ka thënë se takimi nuk ka ndodhur, ndërsa ka bërë të ditur se nuk është i autorizuar për takime të tilla.

“Nuk ka ndodhur takimi. Nuk jam i autorizuar për një takim të tillë”, ka thënë Lekaj për Express.

Gazeta Express duke u thirrur në burime të veta, ka raportuar se sot gjatë ditës Pal Lekaj ka zhvilluar një takim me Hashim Thaçin, ku është biseduar për mundësinë e një koalicioni midis dy partive, PDk dhe AAK.

Në rrugën “Vesli Klark ” në Prizren, janë rrënuar sot disa objekte të vogla biznesore të cilat kanë qenë të ndërtuara në mënyrë ilegale.

Pronarët e objekteve nuk kanë bërë rezistencë, por kanë pasur disa shqetësime të tyre.
Sebahate Salla, ka thënë se nuk janë kundër vendimeve të Komunës për lirimin e hapësirave publike, por sipas saj , “në këtë gjendje të rëndë për bizneset ato në masë të madhe po dëmtohen edhe përmes këtij aksioni”.

Inspektorët e Komunës së Prizrenit, në bashkëpunim me Policinë e Kosovës, kanë vazhduar aksionin e rrënimit në këtë lagje.

Sefedin Krasniqi, thotë se e mirëpret këtë aksion.

“Jemi të vetëdijshëm se kemi vepruar në prona publike”, ka thënë Krasniqi.
Drejtori i Inspektoratit në Prizren, Bedri Bytyçi, tha ndërkaq se aksionet e filluara për lirimin e hapësirave publike në qytetin e Prizrenit nuk do të ndalen, sidomos në ato pjesë që janë paraparë në Planin detal rregullativ. Ai tha se së shpejti priten aksione të ngjashme edhe në disa objekte banimi në lagjën ‘Ortakoll’ për tejkalime urbanistike./TV Prizreni/

Dy pjesëtarë të Policisë së Kosovës në Malishevë, janë sulmuar fizikisht nga një person me të meta mendore. I dyshuari pas arrestimit është liruar me procedurë të rregullt.

“Një persona me të meta mendor është arrestuar pasi që ka sulmuar fizikisht dy policë”, njofton Policia e Kosovës. I dyshuari me urdhër të prokurorit është liruar me procedurë të rregullt.

Ndërkaq, një kërcënim ndaj pjesëtarëve të policisë ka ndodhur në fshatin Bellanicë të Malishevës. Tre persona kanë kërcënuar zyrtarët e policisë gjatë kryerjes së detyrës së tyre zyrtare.
“Me urdhër të prokurorit tre persona e dyshuar janë dërguar në mbajtje”, njofton Policia e Kosovës. /PrizrenPress.com/