Anëtari dhe ish -kandadti për kryetar të Prishtinës, i AAK-së, Besnik Tahiri thotë se tani për tani vendi nuk mund të shkojë në zgjedhje.
Sipas Tahirit, kjo për shkak se nuk mund të shkohet në zgjedhje pa u shpërndarë Kuvendi i Kosovës.

Ai madje thotë se as presidentja e vendit, Atifete Jahjaga, nuk ka bazë kushtetuese për ta çuar vendin në zgjedhje.

Lexojeni të plotë postimin e Tahirit në Facebook
Në rrethanat në të cilat jemi, vendi nuk mund të shkoj në zgjedhje pa u shpërndarëq kuvendi i Kosovës, legjitimiteti i të cilit buron ekskluzivisht nga zgjedhjet e 8Qershorit 2014.

Për më shumë , ë këto rrethana as për Presidenten nuk ekziston baza Kushtetuese për të quar vendin në zgjedhje të reja. Kjo për faktin se Neni 82 i Kushtetutës ka precizuar saktë se kur dhe ë çfarë rrethana ka mundur të shpërndahet Kuvendi dhe atë si në vijim:
1) Nëse brenda afatit 60 ditor nga data e caktimit nuk zgjidhet qeveria
2) Nëse për shpërndarje të Kuvendit votojnë 2/3 e deputetëve.
3) Nëse brenda peridhës 60 ditore nga fillimi i procesit të zgjedhjes së presidentit i njëjti nuk zgjidhet.
Poashtu edhe pika 126 e Aktgjykimit parandalon zgjedhjet në rast se dështon zgjedhja e pamundshme që t’i mirret mandati deputetit i cili buron direkt nga sovrani.
Duke konstatuar këto argumente, është e qartë se zgjidhja është në Kuvend, nga deputetët gjithmonë duke e jetësuar parimin e shumicës

Shërbimi Klinik Spitalor i Kosovës ka kërkuar nga Zyra e Personelit që të ndërmarrë masa ligjore për punonjësit shëndetësor që punojnë në këtë shërbim e që u arrestuan nga Policia e Kosovës.

Një shkresë që posedon “Zëri” e që drejtori i SHSKUK-së Curr Gjocaj i ka dërguar udhëheqësit të personelit, Skender Shabanit e që i ka bashkëngjitur edhe kryetarit të Bordit të SHSKUK-së Isuf Dedushajt, drejtorit të Klinikës së Kardiologjisë Gani Bajraktarit është kërkuar që ndaj mjekëve të arrestuar të merren masa ligjore.

“Sipas informatave zyrtare për masë të arrestit ndaj disa punëtorëve shëndetësor, staf i SHSKUK-së, ju lutemi të ndërmerrni të gjitha veprimet e duhura ligjore për të gjithë stafin publik si staf nën varësinë e SHSKUK-së”, i shkruan drejtori Gjocaj, udhëheqësit të personelit, raporton Zëri.

Gjithashtu, Gjocaj kërkon që të njoftohen menaxherët e të arrestuarve për masën që është ndërmarrë ndaj tyre.

“Pra për QKUK-ë do të ndërmeri masën e duhur juve si zyrë e personelit dhe për institucionet tjera i njoftoni për të ndërmarrë të njëjtën masë siç parashikohet nga baza ligjore në fuqi”, thuhet në shkresën e Gjocajt, të siguruar nga gazeta “Zëri”.

Tutje Gjocaj i shkruan Shabanit që derisa e mailin po e dërgon gjatë ditës së diel kur është vikend, veprimet ligjore kërkon nga ai që të ndërmerren gjatë orarit zyrtar të Punës.

Tutje përmes një e maili zyrtar, zëdhënësi i QKUK-së Shpend Fazliu, thotë që meqë masa e paraburgimit është caktuar ditëve të vikendit, të hënën do të ndërmerren masat ligjore, konform ligjeve në fuqi.

“SHSKUK, do të ofrojë bashkëpunim dhe përkrahje të plotë për organet e drejtësisë. SHSKUK, fton të gjithë pacientët që kanë ankesa lidhur me trajtimin e tyre ta shfrytëzojnë të drejtën e tyre ligjore dhe ankesat do të shqyrtohen me seriozitet”, apelon Fazliu.

Presidentja e vendit, Atifete Jahjaga nuk do t’i drejtohet më Gjykatës Kushtetuese. Këtë tashmë e ka bërë të qartë e para e vendit përmes këshilltarit të saj për medie, Arbër Vllahiu.

E para e vendit, si duket nuk e ka marrë parasysh kërkesën që ia bën disa liderë të partive, gjatë konsultimeve , që të kërkoj sqarime shtesë nga Gjykata Kushtetuese e Republikës së Kosovës, në mënyrë që të tejkalohet kriza politike në të cilën është futur vendi.

“Gjatë konsultimeve ka pasur propozime nga disa liderë, që Jahjaga t’i drejtohet edhe njëherë Gjykatës Kushtetuese me sqarime shtesë, mirëpo ajo nuk do ta bëjë një gjë të tillë”, ka thënë një burim i afërt me Presidencën e Kosovës.

Edhe pse nga Presidenca kanë deklaruar se nuk ka nevojë më që t’i drejtohen gjykatës me arsyetimin se duhet të respektohet Kushtetuta e vendit dhe aktgjykimet e Gjykatës Kushtetuese, deputetë të LDK-së kanë shprehur dyshime nëse një arsyetim i tillë është i qëndrueshëm.

“Ky arsyetim është i paqëndrueshëm. Mund të ketë ndoshta arsye tjetër pse Jahjaga s’po i drejtohet edhe njëherë Gjykatës. Ndoshta ajo mund të ketë frikë nga ndonjë parti apo nga ndonjë lider”, ka thënë një deputet i LDK-së në kushte anonimiteti.

Vendimi i Gjykatës Kushtetuese për kryetarin e Kuvendit e ka thelluar krizën politike në vend. Ndonëse në aktgjykim theksohet se nuk bën të shkohet në zgjedhje të reja, në anën tjetër nuk e ka kufizuar kohën se deri kur duhet të zgjedhet kryetari i ri i Kuvendit, duke ia lënë mundësinë Flora Brovinës që ta ketë të drejtën ekskluzive që ajo të shtyj seancën sa herë të dojë ajo. /Gazeta Blic/

Në fshatin Qifllak të Rahovecit, një person derisa drejtonte motoçikletën e tij nga pakujdesia ka goditur një këmbësor. I dyshuari dhe viktima kanë pësuar lëndime trupore.

“Raportohet se i dyshuari mashkull K/Shqiptar derisa drejtonte motoçikletën e tij nga pakujdesia ka goditur këmbësorin mashkull K/Shqiptar”.

“I dyshuari dhe viktima kanë pësuar lëndime trupore të cilët janë dërguar në QKUK-së për trajtim të nevojshëm mjekësor”, thuhet në raportin e Policisë./PrizrenPress.com/

Një grua në Prizren, ka raportuar në Polici se derisa ishte në veturën e saj është sulmuar fizikisht dhe kanosur me armë zjarri.

Këtë e ka bërë një burrë, i cili për viktimën ishte i panjohur.

Viktima ka pranuar tretman mjekësor ndërsa nuk raportohet për të arrestuar. /PrizrenPress.com/

Njohës të Kushtetutës konsiderojnë se presidentja, Atifete Jahjaga nuk ka fuqi ligjore për të vepruar për daljen nga ngërçi politik.

Shoqëria civile në anën tjetër thotë se është koha që presidentja të marr veprime të guximshme politike, raporton televizioni publik.

Ftesat apo takimet e presidentes me përfaqësuesit e partive politike me qëllim tejkalimin e situatës, nuk janë të mjaftueshme për shoqërinë civile. Driton Selmanaj nga Instituti Demokratik i Kosovës i cili monitoron njëherit edhe punën e Kuvendit, konsideron se është koha për veprime të guximshme politike nga ana e presidentes, qofshin ato edhe sfiduese për kushtetutshmërinë.

“Si mund të jesh garante e funksionimit demokratik të institucioneve, duke dëgjuar palët !? Mendoj që ajo duhet të ketë një pro-aktivitet madje edhe në ofrimin e modaliteteve për zgjidhje. Dhe jo vetëm për të prit nga ana e subjekteve politike sepse tanimë, shihet. Nuk ka asnjë lëvizje për 4 muaj të sujekteve politike në kontekstin e zgjidhjes së ngërçit politik, prandaj presidentja sot është i vetmi autoritet legal. Tek e fundit duhet të marr veprime të guximshme politike të cilat do t’i japin zgjidhje situatës”.

Por njohës të kushtetutës, thonë se në këtë situatë, presidentja nuk mund të ofoj zgjidhje, për shkak të hapësirës juridike. Xhavit Shala thotë se presidentja në këtë moment, ka vetëm rol ndihmues, dhe ajo po e bënë këtë.

“Ajo nuk e ka fuqinë, as kushtetuese, por as ligjore, që mundet me e përcaktu zgjidhjen. Në momentin që fillon procedura apo përfundimi i zgjidhjes, apo konsituimit të kuvendit, me zgjedhjen e kryetarit dhe nënkryetarëve Presdientja mund ta nxjerrë dekretin për formimin e qeverisë, e cila më pastaj i hap rrugë dhe që e faktorizn edhe atë, qoftë në konsolidimin e institucioneve, qoftë në shkuarjen në zgjedhje të reja”.

Shala po ashtu konsideron se kryesuesja e seancës, Flora Brovina më së paku duhet të sillet si anëtare e partisë, pasiqë roli i saj në këtë rast duhet të jetë rol unifikues.

Për sociologun e analistin politik, Artan Muhaxhiri, me bllokadën aktuale politike është duke ndodhur një gjë e pazakonshme për situata të tilla. Sipas tij, në vend se me kalimin e kohës të ketë përafrim të qëndrimeve dhe përshtatje të ofertave politike, në fakt po ngjan e kundërta – hendeku mes VLAN-it dhe PDK-së është duke u rritur, kurse animoziteti duke u shtuar.

Për këtë arsye, Muhaxhiri thotë se zgjedhjet tashmë janë një mundësi reale pasi dy blloqet nuk japin sinjale se mund të arrijnë marrëveshje, e as bashkësia ndërkombëtare nuk dëshiron të ndërhyjë për të ofruar zgjidhje.

“Kjo status-quo është bërë e zorshme për t’u duruar, thotë Muhaxhiri për portalin Koha.net.

Muhaxhiri thotë se zgjedhjet e reja do ta vulosin paaftësinë e politikanëve kosovarë për të bërë politikë normale, të bazuar në realizëm, planifikim dhe vizion.

“Kjo krizë ka mundur të parandalohet që në fillim, por edhe tash do të mund të zgjidhej vetëm nëse do të kishte racionalitet, guxim dhe vullnet politik”, ka thënë Muhaxhiri. “Një gjë e mirë nga kjo bllokadë është fakti se në zgjedhjet e ardhshme nuk do të ketë paqartësi procedurale – partitë apo koalicionet do të jenë të vetëdijshme se fituesi do ta ketë përparësinë e propozimit të mandatarëve për Kryeministër dhe për Kryeparlamentar”, ka shtuar më tej ai.

E nëse mbahen zgjedhjet e reja, sipas sociologut Muhaxhiri, rrethanat do të jenë të ndryshme nga ato të zgjedhjeve të 8 qershorit, teksa thotë se mund të bëhen disa kalkulime orientuese statistikore duke u mbështetur në gjendjen e tanishme.

“Koalicioni VLAN do të jetë në përparësi evidente, sepse aktualisht i ka 53.4 për qind të votave, në krahasim me 35.1 përqindëshin e koalicionit të nënkuptuar PDK-AKR. Kjo diferencë do të ndryshojë, të rritet apo të zvogëlohet, por sigurisht nuk do të mund të përmbyset. Mirëpo, nëse Lëvizja Vetëvendosje nuk do të jetë pjesë e listës së përbashkët, atëherë koalicioni LAN s’do të ketë shumë komoditet, pasi do të hyjë në fushatë me 39.8 për qind të votuesve, pra me 4.7 për qind më shumë se PDK-AKR”, ka thënë Muhaxhiri për koha.net.

Ai është shprehur i bindur se nëse mbahen zgjedhjet, Lëvizja Vetëvendosje mund t’ia sigurojë fitoren LAN-it, apo t’i japë shpresë PDK-së.

Muhaxhiri ka thënë se përparësia e VLAN’it do të jetë në faktin se do ta ketë të garantuar fitoren, gjë që do të ndikojë pozitivisht në mobilizimin e strukturave partiake, sepse ardhja në pushtet do të jetë e sigurt, rrjedhimisht edhe avancimet politike dhe përfitimet tjera që ndërlidhen me to.

“Mirëpo, VLAN-i mund të ketë probleme me garën politike brenda llojit, sepse përveç se do të ketë konkurrencë mes katër partive për t’u pozicionuar sa më mirë në koalicion, gjithashtu do të ketë beteja edhe gjatë sistematizimit të numrit të katërfishuar të kandidatëve për deputetë”.

Analisti politik ka thënë se nuk është e qartë se si do të reagojë elektorati kosovar ndaj një oferte të tillë të përbashkët qeverisëse, e cila do të ndodhë për herë të parë në Kosovë – nëse do ta vlerësojë si “evoluim pozitiv”, apo si “hipokrizi meskine”. Fushatat e kaluara zgjedhore janë përshkruar nga akuzat dhe kritikat e ashpra të të gjithëve kundër të gjithëve.

“Dy pikëpyetjet më të mëdha do të jenë për elektoratin e LDK-së dhe Lëvizjes Vetëvendosje, sepse LDK-ja nuk do të ketë kandidat të vetin për Kryeministër, ndërsa Lëvizja Vetëvendosje do të përballet me një pozitë krejtësisht të re, duke u përbashkuar me të kundërtit e deridjeshëm”, ka thënë Muhaxhiri, teksa ka treguar edhe pse do ta kishte vështirë PDK-ja.

“PDK-ja do ta ketë shumë të vështirë të përballet me katër kundërshtarë të unifikuar. Edhe nëse arrin ta ruajë përqindjen e votuesve, apo edhe ta rrisë paksa, fija e hollë e shpresës së saj do të mbetet vetëm mospërfshirja e Lëvizjes Vetëvendosje në listën e përbashkët të (V)LAN-it. Në të kundërtën, opozitën do ta ketë të rezervuar ende pa filluar fushata”, ka thënë Muhaxhiri.

Në fund, Muhaxhiri ka shprehur bindjen se nëse mbahen zgjedhjet e reja do të ketë nivel të lartë të rrezikshmërisë, sepse tensioni politik do të jetë shumë i madh, prandaj mund të ketë konflikte mes militantëve respektivë gjatë fushatës, ose në ditën e zgjedhjeve.

Tashmë kur zgjedhjet e jashtëzakonshme po duken si opsion real, pavarësisht kundërshtimeve të ndërkombëtarëve, duket se edhe të dy Blloqet politike kanë filluar edhe përgatitjet e strategjive dhe planeve se si t’i qasen atyre.

Derisa Partia Demokratike e Kosovës është duke synuar që në zgjedhje të hyjë pos me PD-në, LB-në, PSHDK-në, ajo në koalicion parazgjedhor do ta marrë edhe AKR-në e Behgjet Pacollit. “Kemi fillluar kontaktet e para me AKR-në. Gjithsessi se do të hyjmë bashkë në koalicion parazgjedhor”, ka thënë një zyrtar i PDK-së për Gazetën Blic.

Ndërkaq, në anën tjetër edhe Blloku LDK- AAK- Nisma dhe Lëvizja Vetëvendosje janë duke i dikustuar idetë se të hyjnë në zgjedhje.

Burime brenda Blloku kanë thënë se pos që është duke u diskutuar ideja që katër partitë të garojnë me një listë të përbashkët, nëse do të ketë zgjedhje, partitë LDK dhe AAK që janë në koalicion me PDK-në nëpër komuna të dalin nga koalicioni.

“Nëse do të shkojmë në zgjedhje, pos që do të jemi bashkë katër partitë, LDK-ja, AAK-, VV-ja dhe Nisma për Kosovën, do të tërhiqemi nga koalicioni me PDK-në nëpër të gjitha ato komuna ku ajo udhëheq. Edhe në zgjedhjet lokale me gjasë do të shkojmë së bashku, në mënyrë që PDK-së t’ia marrim pushtetin jo vetëm në nivel qendror por edhe në nivel lokal”, ka thënë ky zyrtar i lartë i Blloku LVAN për Gazetën Blic.

“Do ta lëmë PDK-në vetëm në Skenderaj e në Drenas”, thotë ky zyrtar.

Kundër zgjedhjeve të reja kategorisht po dalin diplomatët e huaj në Kosovë. Njëri prej tyre është ambasadori Ian Cliff, i cili ka thënë se nuk bën të shkohet në zgjedhje të reja.

Mirëpo, opsionin e zgjedhjeve e ka përmendur edhe presidentja e Kosovës, Atifete Jahjaga. Ajo u ka thënë partive se nëse edhe për një kohë nuk do të ketë zgjidhje, atëherë zgjedhjet janë opsion.

Pro zgjedhjeve deri më tani publikisht është shprehur vetëm PDK. Zyrtarët e saj në secilën paraqitje publike deklarojnë se ose ata do të jenë në pushtet, ose vendi do të shkojë në zgjedhje.

Për zgjedhje është shprehur i gatshëm edhe lideri i VV-së, Albin Kurti. Ai ka thënë se Lëvizja Vetëvendosje është e gatshme, mirëpo nuk ka dhënë detaje nëse do të graojnë me një listë me LAN-in, apo do të hyjnë në zgjedhje si subjekt i vetëm politik.

Ndërkohë, kanë kaluar më shumë se katër muaj që kur janë mbajtur zgjedhjet e reja, dhe vendi ende është pa institucione. PDK edhe pse partia e parë e dalë nga zgjedhjet parlamentare të 8 qershorit, nuk po gjen partner për bashkëqeverisje. Në anën tjetër, LDK- VV, AAK dhe Nisma kanë arritur marrëveshje për bashkëqeverisje, mirëpo vendimi i Gjykatës Kushtetuese duket se e ka bllokuar situatën, duke ia njohur vetëm PDK-së të drejtën që të propozojë kandidatin për kryetar të Kuvendit.