Pas raportimit të Gazetës Blic se LDK rrezikon që të mos marrë pjesë në zgjedhje në rast se nuk e mban Kuvendin zgjedhor, ka reaguar ashpër anëtari i kësaj partie në KQZ, Florian Dushi. Ai ka thënë se në Kosovë ka parti qe për një dekadë nuk kanë mbajtur fare Kuvende zgjedhore.

Sipas tij, e vetmja është LDK-ja që deri më tani i ka mbajtur rregullisht kuvendet zgjedhore.

Lexojeni të plotë reagimin e Dushit.

“Ne Kosove ka parti politike qe nuk kane mbajtur zgjedhje per gati nje dekade, ka te atilla qe ne prag te zgjedhjeve e improvizojne nje kuvend zgjedhor te nivelit qendror dhe ka vetem nje, Lidhja Demokratike e Kosoves – LDK qe zgjedhjet i mbane rregullisht…e sot, dikush qe i paska rene ne dore njera nga rregullat e KQZ e paska marr mundin me i tregu LDK-se se ne rast se do te vonohet akoma ne shpalljen dhe mbajtjen e zgjedhjeve te brendshme, atehere KQZ nuk do ta certikoj per pjesmarrje ne zgjedhje te jazhtezakonshme nese ato eventualisht do te mbaheshin si te tilla!?
Mos e merrni mundin me i interpretu keto rregulla, sepse dy faktet kryesore po i anashkaloni qellimisht, faktin qe jeni duke folur per “zgjedhje te jashtezakonshme” dhe faktin se nuk behet fjale per mosmbajtje te zgjedhjeve te brendshme ne LDK (siç jeni mesuar me partite politike kalemxhinje te te cilave jeni) por vetem per shtyerje eventuale te tyre per nje afat te shkurter, deri ne zgjidhjen e “ngerçit” dhe krijimin e institucioneve. FD” (sic), ka shkruar Dushi në Facebook.

Fatmir Sheholli, emër kontrovers i politikës dhe medias në Kosovë dhe Serbi, kërkon revolucion. Ai thotë se nëse Hashim Thaçi nuk i lëshon udhë Bllokut për ta bërë qeverinë, qytetarët duhet të dalin në rrugë për ta rrëzuar atë.

Fatmir Sheholli i cili në vitet 90’, gjatë instalimit të masave të dhunshme serbe në Kosovë, kishte punuar si gazetar në Radio Televizionin e Prishtinës (RTP), thotë se PDK duket t’i hapë rrugë LAN-it për ta formuar qeverinë.

Bile ai thotë, se nëse PDK vazhdon të insistojë me qëndrimet e saj, atëherë qytetarët duhet të dalin në rrugë dhe ta rrëzojnë këtë qeveri me revolucion.

Sheholli i cili paraqitet edhe si gazetar i agjencisë së lajmeve shtetërore serbe Tanjug, në një prononcim për mediat serbe, ka thënë se “Kosova është duke u përballur me sfidën më të madhe deri më tani. Dhe kjo sfidë është largimi i regjimit të Hashim Thaçit, edhe me revolucion në rrugë”.

Ai thotë se nëse Kosova nuk e formon shpejtë qeverinë, do të shkojë drejtë falimentimit.

“Kur nuk keni rrugë tjetër për të treguar fuqinë që keni, atëherë demokracia i lejon qytetarit një rrugë, e ajo është revolucioni”, ka thënë Sheholli, i cili dikur ishte edhe këshilltar politik e zëdhënës në Ministrinë e Komuniteteve dhe Kthimit kur Ministër ishte Slavisha Petkoviq. /lajmi.net/

Ministri në largim i Financave Besim Beqaj, në një intervistë për gazetën “Zëri”, ka bërë të qartë se Partia Demokratike e Kosovës (PDK) duhet të formoj Institucionet.

Nëse sipas tij, nuk ndodh një gjë e tillë, atëherë Kosova do të shkoj në zgjedhje të jashtëzakonshme.

“Besoj se PDK-ja ka dhënë qartë opsionin e vetë ose duhet të bëhet një zgjedhje konform kushtetutës, respektivisht një marrëveshje, ose opsioni tjetër është zgjedhja. Ne s’mundemi ta mbajmë shtetin kështu pafundësisht. Ata duhet të reflektojnë nëse i kanë numrat le t’i formojnë institucionet, nëse e kanë të drejtën ligjore, po ashtu le t’i formojnë institucionet, e nëse nuk e kanë le të ulen në tryezë e të flasim për opsionet e tyre e tona e të gjithëve” ka thënë ai.

E në rast se ndodh se vendi shkon në zgjedhje të jashtëzakonshme, ai nuk e ka përjashtuar mundësinë që partia e tij të hyj në koalicion me partinë e Behgjet Pacollit.

“Nuk e di a do ta marrim AKR-në në koalicion, për këtë vendos këshilli drejtues i partisë, sepse kryesia merr vendimet për këto. Ne do t’i fitojmë zgjedhjet edhe në këtë format edhe nëse ata të gjithë bëhen bashkë” ka thënë Beqaj.

Lidhja Demokratike e Kosovës, e drejtuar nga Isa Mustafa rrezikon që të mbes jashtë garës, nëse do të ketë zgjedhje të jashtëzakonshme. Sipas Rregullave zgjedhore, secila parti që të certifikohet nga Komisioni Qendror i Zgjedhje duhet që të paktën çdo 48 muaj të ketë mbajtur Kuvendin e saj zgjedhor.

Lidhja Demokratike e Kosovës nga data 7 nëntor 2010, kur edhe është zgjedhur Isa Mustafa kryetar i partisë nuk ka mbajtur më asnjë Kuvend zgjedhor. Praktikisht vetëm edhe 20 ditë i bie që LDK të plotësoj afatin ligjor, që pastaj të mos mund të certifikohet nga ana e Komisionit Qendror të Zgjedhjeve për të qenë pjesëe e garës, nëse do të ketë zgjedhje të jashtëzakonshme, shkruan Gazeta Blic.

Në Pikën e 15 të Rregullave për regjistrimin e partive politike thuhet shumë qartë se: “Partia e regjistruar politike mban kuvendin brenda gjashtë muajve nga data e regjistrimit të partisë, dhe pastaj së paku çdo dyzetetetë muaj”.

Pra, sipas kësaj rregulle zgjedhor, i bie që LDK është dashur që Kuvendin e saj zgjedhor ta mbajë në nëntor të këtij viti, për t’i plotësuar afatet ligjore për të qenë pjesëmarrëse në zgjedhje, në rast të zgjedhjeve eventuale.

LDK kishte planifikuar që zgjedhjet t’i mbajë gjatë vjeshtës, në mënyrë që brenda afateve ligjore të përmbyll procesin e brendshëm zgjedhor, mirëpo për shkak të ngërçit politik kjo parti ka marrë vendim që t’i shtyjë zgjedhjet e brendshme.

Nëse do të kemi zgjedhje të reja shumë shpejt, atëherë LDK-së nuk do t’i mbetet tjetër gjë pos që të improvizoj një Kuvend Zgjedhor formal, ashtu sic e kishte praktikuar PDK-ja para zgjedhjeve të vitit 2010.

PDK më 2010 ishte detyruar që të mbajë një ekspes Kuvend, vetëm e vetëm që t’i plotësoj kushtet formale, në mënyrë që kjo parti të marrë pjesë në zgjedhje.

Analistët politik kishin vlerësuar se një nga arsyet pse Isa Mustafa pranoi marrëveshjen me AAK-në e Nismën, duke hequr dorë edhe nga posti i kryeministrit, vetëm e vetëm që ta “rimarrë” veten dhe kësisoj të shpëtoj nga largimi si udhëheqës i partisë.

Isa Mustafa u zgjodh në krye të LDK-së më 7 nëntor të vitit 2010. Atë kohë Mustafa ishte kryetar i Prishtinës dhe këshilltar i presidentit Fatmir Sejdiu. Ardhjes së tij në krye të LDK-së, i ndihmoi shumë edhe fitorja bindëse që e kishte pasur në zgjedhjet lokale të vitit 2009, ku fitoi bindshëm, madje pa balotazh, falë gjuhës së ashpër që e pati ndaj PDK-së e SHIK-ut.
Gazeta Blic

Anëtari dhe ish -kandadti për kryetar të Prishtinës, i AAK-së, Besnik Tahiri thotë se tani për tani vendi nuk mund të shkojë në zgjedhje.
Sipas Tahirit, kjo për shkak se nuk mund të shkohet në zgjedhje pa u shpërndarë Kuvendi i Kosovës.

Ai madje thotë se as presidentja e vendit, Atifete Jahjaga, nuk ka bazë kushtetuese për ta çuar vendin në zgjedhje.

Lexojeni të plotë postimin e Tahirit në Facebook
Në rrethanat në të cilat jemi, vendi nuk mund të shkoj në zgjedhje pa u shpërndarëq kuvendi i Kosovës, legjitimiteti i të cilit buron ekskluzivisht nga zgjedhjet e 8Qershorit 2014.

Për më shumë , ë këto rrethana as për Presidenten nuk ekziston baza Kushtetuese për të quar vendin në zgjedhje të reja. Kjo për faktin se Neni 82 i Kushtetutës ka precizuar saktë se kur dhe ë çfarë rrethana ka mundur të shpërndahet Kuvendi dhe atë si në vijim:
1) Nëse brenda afatit 60 ditor nga data e caktimit nuk zgjidhet qeveria
2) Nëse për shpërndarje të Kuvendit votojnë 2/3 e deputetëve.
3) Nëse brenda peridhës 60 ditore nga fillimi i procesit të zgjedhjes së presidentit i njëjti nuk zgjidhet.
Poashtu edhe pika 126 e Aktgjykimit parandalon zgjedhjet në rast se dështon zgjedhja e pamundshme që t’i mirret mandati deputetit i cili buron direkt nga sovrani.
Duke konstatuar këto argumente, është e qartë se zgjidhja është në Kuvend, nga deputetët gjithmonë duke e jetësuar parimin e shumicës

Shërbimi Klinik Spitalor i Kosovës ka kërkuar nga Zyra e Personelit që të ndërmarrë masa ligjore për punonjësit shëndetësor që punojnë në këtë shërbim e që u arrestuan nga Policia e Kosovës.

Një shkresë që posedon “Zëri” e që drejtori i SHSKUK-së Curr Gjocaj i ka dërguar udhëheqësit të personelit, Skender Shabanit e që i ka bashkëngjitur edhe kryetarit të Bordit të SHSKUK-së Isuf Dedushajt, drejtorit të Klinikës së Kardiologjisë Gani Bajraktarit është kërkuar që ndaj mjekëve të arrestuar të merren masa ligjore.

“Sipas informatave zyrtare për masë të arrestit ndaj disa punëtorëve shëndetësor, staf i SHSKUK-së, ju lutemi të ndërmerrni të gjitha veprimet e duhura ligjore për të gjithë stafin publik si staf nën varësinë e SHSKUK-së”, i shkruan drejtori Gjocaj, udhëheqësit të personelit, raporton Zëri.

Gjithashtu, Gjocaj kërkon që të njoftohen menaxherët e të arrestuarve për masën që është ndërmarrë ndaj tyre.

“Pra për QKUK-ë do të ndërmeri masën e duhur juve si zyrë e personelit dhe për institucionet tjera i njoftoni për të ndërmarrë të njëjtën masë siç parashikohet nga baza ligjore në fuqi”, thuhet në shkresën e Gjocajt, të siguruar nga gazeta “Zëri”.

Tutje Gjocaj i shkruan Shabanit që derisa e mailin po e dërgon gjatë ditës së diel kur është vikend, veprimet ligjore kërkon nga ai që të ndërmerren gjatë orarit zyrtar të Punës.

Tutje përmes një e maili zyrtar, zëdhënësi i QKUK-së Shpend Fazliu, thotë që meqë masa e paraburgimit është caktuar ditëve të vikendit, të hënën do të ndërmerren masat ligjore, konform ligjeve në fuqi.

“SHSKUK, do të ofrojë bashkëpunim dhe përkrahje të plotë për organet e drejtësisë. SHSKUK, fton të gjithë pacientët që kanë ankesa lidhur me trajtimin e tyre ta shfrytëzojnë të drejtën e tyre ligjore dhe ankesat do të shqyrtohen me seriozitet”, apelon Fazliu.

Presidentja e vendit, Atifete Jahjaga nuk do t’i drejtohet më Gjykatës Kushtetuese. Këtë tashmë e ka bërë të qartë e para e vendit përmes këshilltarit të saj për medie, Arbër Vllahiu.

E para e vendit, si duket nuk e ka marrë parasysh kërkesën që ia bën disa liderë të partive, gjatë konsultimeve , që të kërkoj sqarime shtesë nga Gjykata Kushtetuese e Republikës së Kosovës, në mënyrë që të tejkalohet kriza politike në të cilën është futur vendi.

“Gjatë konsultimeve ka pasur propozime nga disa liderë, që Jahjaga t’i drejtohet edhe njëherë Gjykatës Kushtetuese me sqarime shtesë, mirëpo ajo nuk do ta bëjë një gjë të tillë”, ka thënë një burim i afërt me Presidencën e Kosovës.

Edhe pse nga Presidenca kanë deklaruar se nuk ka nevojë më që t’i drejtohen gjykatës me arsyetimin se duhet të respektohet Kushtetuta e vendit dhe aktgjykimet e Gjykatës Kushtetuese, deputetë të LDK-së kanë shprehur dyshime nëse një arsyetim i tillë është i qëndrueshëm.

“Ky arsyetim është i paqëndrueshëm. Mund të ketë ndoshta arsye tjetër pse Jahjaga s’po i drejtohet edhe njëherë Gjykatës. Ndoshta ajo mund të ketë frikë nga ndonjë parti apo nga ndonjë lider”, ka thënë një deputet i LDK-së në kushte anonimiteti.

Vendimi i Gjykatës Kushtetuese për kryetarin e Kuvendit e ka thelluar krizën politike në vend. Ndonëse në aktgjykim theksohet se nuk bën të shkohet në zgjedhje të reja, në anën tjetër nuk e ka kufizuar kohën se deri kur duhet të zgjedhet kryetari i ri i Kuvendit, duke ia lënë mundësinë Flora Brovinës që ta ketë të drejtën ekskluzive që ajo të shtyj seancën sa herë të dojë ajo. /Gazeta Blic/