Po e pret një sinjal nga lideri i PDK-së, Hashim Thaçi, për të nisur procedurën për mandatimin e mandatarit për Qeverinë e ardhshme të Kosovës.

E para e shtetit të Kosovës, presidentja Atifete Jahjaga, edhe pse tashmë e ka të qartë nga Kushtetuesja se cili do të jetë roli i saj për mandatarin e qeverisë, duket se nuk po ka “guximin” të nisë këtë procedurë pa e marrë pëlqimin e kryeministrit në detyrë, njëherësh shefit të PDK-së. Ky veprim i Presidentes është dëshmia më e mirë se Thaçi e Jahjaga vazhdojnë bashkëpunimin e tyre, duke forcuar edhe më shumë raportet miqësore e edhe institucionale. Ky vendim i Jahjagës po ashtu është dëshmia më e mirë se e para e shtetit sikur edhe shumë herë të tjera vazhdon të jetë nën “komandën” e Thaçit.

Por këtë neglizhencë të presidentes Jahjaga për ta caktuar mandatarin për kryeministër nuk e arsyeton Dren Doli, përfaqësues i Grupit për studime politike dhe juridike. Sipas tij Presidentja nuk ka asnjë detyrim që të pres vendimin e Gjykatës, për aq kohë sa Gjykata nuk ka kërkuar nga presidentja që të mos ushtrojë funksionet e saj për shkak të efektit që mund të ketë ankesa e PDK-së në Gjykatën Kushtetuese.

I pyetur nga “Botapress” nëse e para e shtetit të Kosovës po pret një vendim të z. Thaçi për të nisur procedurat për mandatarin e ri, Doli beson se në rastin konkret presidentja edhe sipas vendimit të Gjykatës Kushtetuese, por edhe sipas Kushtetutës, ka detyrimin që të fillojë procedurat për caktimin e mandatarit për formimin e qeverisë. “Në rastin konkret i bie që sipas vendimit përshkrues të Gjykatës, Presidentja duhet të kërkojë nga Partia Demokratike që të propozoj një individ, të cilin ajo do ta caktojë për mandatar për kryeministër. Moszgjedhja e pjesës tjetër të nënkryetarëve të Kuvendit të Kosovës dhe ankesa që PDK-ja ka ushtruar në Gjykatën Kushtetuese në lidhje me vendimin e Kuvendit për zgjedhjen e z. Mustafa për kryeparlamentar nuk është arsye e cila shtyn në vetvete ushtrimin e funksioneve kushtetuese të presidentes”, tha Doli, transmeton bota press.

Treshja LDK-AAK-Nisma me asnjë çmim nuk do të pranojnë që të jenë pjesë e një qeverie në të cilën do të ishte e pranishme edhe PDK e Hashim Thaçit. Qëndrim të prerë në këtë çështje ka edhe Lëvizja Vetëvendosje.

Treshja po konsideron se i ka numrat e nevojshme për të qeverisur me vendin dhe nuk ka nevojë për një qeveri gjithëpërfshirëse. Këmbëngulje për të qeverisur me vendin edhe për një mandat po bën edhe PDK si fituese e zgjedhjeve nacionale.

Ky insistim nga të dyja blloqet se kanë të drejtë në formimin e qeverisë, po e qojnë vendin drejt një krize të thellë politike, e cila mund të qojë në zgjedhje të jashtëzakonshme.

Partnerët ndërkombëtarë deri më tash nuk kanë ndërhyrë, por kanë sugjeruar që qeveria të krijohet shpejt dhe të ketë një shumicë të fuqishme../tribuna/

Kryeministri në detyrë i Kosovës, Hashim Thaçi, si duket po ndjehet tejet i relaksuar në këtë periudhë kur politika po kalon në një fazë të vështirë.

Nëpërmjet rrjetit social Facebook, Thaçi ka postuar një fotografi të vreshtave të Rahovecit, ndërsa ka thënë se qytetarët e Kosovës nuk kanë nevojë të shkojnë larg për të gjetur qetësinë dhe bukurinë natyrore.

“Vera sjell momentet e pushimit me familjarët dhe të dashurit tonë, por nuk kemi nevojë të shkojmë larg për të gjetur oaza të bukura të qetësisë dhe bukurisë natyrore. Kosova ka shumë vende që meritojnë të vizitohen dhe ftoj sidomos diasporën t’ia zbulojnë më të rinjve dhe fëmijëve bukuritë përrallore të atdheut, nga malet e Rugovës e Brezovicës e deri tek vreshtat e Rahovecit”, ka shkruar Thaçi në Facebook.

Valon Murati, sekretar i përgjithshëm në Lëvizjen për Bashkim, ka komentuar në lidhje me zhvillimet e fundit politike në vend pas zgjedhjeve të përgjithshme të 8 qershorit. Zgjidhjen e ngërçit politik në të cilin po ndodhet Kosova aktualisht, Murati e sheh në zgjedhje të jashtëzakonshme.

“Po flitet për një qeveri teknike apo me bazë të gjerë, që do të kishte një kryeministër të dobët. Ky do të ishte varianti më i keq për vendin dhe stabilitetin e tij politik. Varianti më i mirë, e që do të duhej të ishte pjesë e një vendimmarrje konsesuale, pa marrë parasysh vendimet e Gjykatës Kushtetuese, do të ishte që presidentja në bashkëpunim me partitë politike të merreshin vesh që të shkohet në zgjedhje të jashtëzakonshme”, ka thënë Murati në një postim në Facebook.

Sipas tij, këto zgjedhje do të ishin përgjigja më e mirë realitetit politik që është krijuar pas zgjedhjeve të qershorit, ndërsa, siç thotë Murati, për të gjithë do të ishte më mirë që të kemi një qeveri stabile dhe cila do të reflektonte realitetet e reja politike.

“Në anën tjetër kjo situatë politike e krijuar pas zgjedhjeve të qershorit, do të duhej që ta vetëdijesonin tërë garniturën politike në Kosovë, për domosdonë e rirregullimit kushtetues të shtetit të Kosovës, i cili shfaq paqartësi dhe nevojë për interpretim edhe për gjërat aq bazike siç është mandatimi i kryeministrit apo zgjedhja e kryekuvendarit. Normalisht, kjo punë nuk është e lehtë, për shkak të fuqisë bllokuese që kanë pakicat, e sidomos serbët në Kuvendin e Kosovës”, përfundon Murati.

Ish zëdhënësi i UÇK-së, Jakup Krasniqi ka reaguar pas vizitës që kryeprokuori i Task Forcës, Clin Williamson i bëri sot Beogradit. Williamson është në fazën përmbyllëse të raportit të tij për krimet e pretenduar nga raporti i ish senatorit, Dick Marty.

Ish zëdhënësi i UÇK-së, thotë se Aleksandar Vuçiq, kryeministër i Serbisë dhe prokurori serb për krime të luftës, Vladimir Vukçeviq është dashur ta njoftojnë Williamsonin për krimet serbe të kryera në Kosovë.

Ja postimi i plotë i Jakup Krasniqit në Facebook:

Vuçiqi dhe Vukçeviqi është dashur ta e njoftojnë Williamsonin për krimet serbe të kryera në Kosovë.

Është e vërtetë e pamohueshme së këta zyrtarë serb nuk kanë mundur t’i dëshmojnë ”krimet” e shqiptarëve të kryera në Kosovë, pasi ato ishin pretendime të shpifura te Dick Martit, të diktuara nga strukturat e organizuara kriminale të regjimit të Millosheviqit në Kosovë. Këtu natyrshëm shtrohet pyetja: Sa strukturat e sotme qeveritare në Serbi, kanë marrë masa për ndriçimin e krimeve të kryera nga makineria policore e ushtarake (shtetërorë) serbe në Kosovë, së paku pas dëbimeve të shqiptare nga të drejtat elementare të tyre për punë e jetë (1989/90)?!

A nuk ishte ajo përpjekje e organizuar shtetërore për shfarosje e cila gjatë luftës 1998/99 u shndërrua në politikë të gjenocidit (dëshmi plani “Patkoi”)?! Sa këta zyrtarë të rinj serbë u distancuan nga ajo politikë gjenocidit e ushtruar nga regjimi i Milloshevicit (të cilët ishin pjesë e atij regjimi), duke kërkuar falje publike për atë politikë?! Pse ata as sot, pas 15/16 viteve nuk mund ta pranojnë këtë të vërtetë të madhe: për politikën e gjenocidit dhe të shfarosjes të ushtruar për dekada në Kosovë?

Nuk e di nëse Uilliamsoni i ka pyetur zyrtarët qeveritarë në Beograd, sesi po shkonin punët me dënimet e krimeve serbe të kryera në Kosovë gjatë luftës? Kur dihet botërisht se regjimi i Milloshevicit është përpjekur t’i mbulonte krimet e veta duke i dërguar të vrarët e të masakruarit shqiptarë në anë të ndryshme të Serbisë, deri edhe në Batajnicë? Madje, as sot e kësaj dite nuk dihet fati i të burgosurve shqiptarë si: Ukshin Hoti, Hafir Shala dhe Xhavit Haziri? Madje nuk dihet as fati i mbi 200 të burgosurve shqiptar të vrarë e të masakruar në Burgun e Dubravës? A janë duke u hetuar kryerësit e këtyre veprave kriminale në Serbinë e Vucicit?

Unë, ndoshta edhe nuk mund ta e di, por po i pyesë, luftëtarët e të “drejtave të njeriut” në Serbi: Si të vlerësohet: Ri ndjekja e viktimave të një regjimi shfarosës, si po veprohet me shqiptarët e Kosovës?! Nuk ka asnjë dyshim se, Serbia e bëri luftën në Kosovë, për pushtimin e tokave të shqiptarëve pa shqiptarët! Për atë politikë, mbase edhe për sot, shqiptari i mirë është vetëm “shqiptari i vdekur”?! Nëse nuk është kështu, le ta dëshmojnë të kundërtën zyrtarët e përmendur.