Gjatë vazhdimit të gërmimeve, në lokacionin e shënjuar në fshatin Rrezallë të Komunës së Skenderajt, ekspertët nga Departamenti i Mjekësisë Ligjore sot kanë hasur në pjesë kockore, me origjinë njerëzore, që i takojnë periudhës së luftës së fundit në Kosovë

Mbetjet mortore janë gjetur pikërisht në lokacionin ku ishin të groposur kufomat e viktimave civile, nga fshati Rrezallë dhe fshatrat tjera përreth, pas ekzekutimit me 5 prill 1999 nga forcat ushtarake-policore serbe. Ata ishin zhvarrosur pas tri jave, për t’u dërguar në drejtim të panjohur deri më tani, në përpjekjen e forcave serbe për të fshehur gjurmët e krimit.

Punimet do të vazhdojnë edhe në ditët në vijim, deri në mbylljen e plotë të këtij rasti.

Kryeministri në detyrë, Hashim Thaçi, thotë se PDK do ta përmbushë misionin e saj përballë qytetarëve që ua kanë besuar votën. Ai pret që nesër në seancën e Kuvendit, spektri politik “të reflektojë” dhe “ti kryejë të gjitha obligimet kushtetuese.

“Është moment i veçantë për të gjithë ne pas zgjedhjeve të 8 qershorit. Zgjedhjet, prej më të mirave të organizuara ndonjëherë pas luftës, me fitues të qartë, të pastër, fitues me PDK-në dhe koalicionin e saj.Nesër pres që do të jetë seancë e rregullt, me një simbolikë të veçantë, thellimin e demokracisë” , ka thënë Thaçi për RTK-në.

“Me një urtësi dhe pjekuri, pres nga gjithë spektri politik që t’i kryejmë të gjitha obligimet tona kushtetuese. PDK është fituese bindëse e zgjedhjeve të 8 qershorit. Do ta implementojmë në tërësi vullnetin e qytetarëve, edhe për kryeparlamentarin edhe për vizionin tonë që kemi prezantuar para qytetarëve”, ka thënë ai.

“Nuk dëshiroj të hyj në çështje teknike, ajo që është me rëndësi është se duhet të respektohet legjitimiteti në atë që ka folur vetë qytetari.Duhet të kemi sjellje duke respektuar vullnetin e qytetarëve”, ka thënë veç tjerash Thaçi.

Bilall Sherifi nga Nisma për Kosovën, ka reaguar pas deklaratave të PDK’së, të cilët kanë thënë se nuk do të punojnë në bazë të agjendës së kryesisë së vjetër.

Sherifi ka deklaruar për mediat se anashkalimi i agjendës së përcaktuar nga kryesia do të përbënte kapje të seancës dhe se blloku paszgjedhor nuk do ta pranonte një gjë të tillë, raporton Express.

Përveç Sherifit, në lidhje me deklaratat e PDK’së kanë reaguar edhe zyrtarë të AAK’së, të cilët kanë thënë se në qoftë se i jepet PDK’së e drejta për nominimin e kryeparlamentarit, atëherë ky subjekt politik do t’i drejtohet Gjykatës Kushtetuese.

Analisti politik, Halil Matoshi ka thënë se vendimi i Kryesisë së Kuvendit të kaluar është shumë i qartë, dhe pret që PDK-ja ta respektojë një vendim të tillë. Ai madje, i ka bërë ftesë edhe Lëvizjes Vetëvendosje që të reflektojë në Seancën e nesërme dhe ta votojë Isa Mustafën për Kryetar të Kuvendit.

“Në situatën aktuale Kryesia e legjislaturës së kaluar e ka kryer pjesën e vetë të punës. Tash varet se si do të sillen palët”, ka thënë Matoshi për Gazetën Blic.

“Unë objektivisht pres që PDK të mos e bllokojë formimin e institucioneve dhe kësisoj ta çon vendin në zgjedhje”, ka thënë Matoshi.

Ai pret nesër që Grupi më i madh parlamentar LDK- AAK- Nisma ta zgjedh Kryetarin e Kuvendit.

Matoshi nuk parasheh as ndonjë fërkim të mundshëm ndërmjet deputetëve të PDK-së dhe të bllokut.

“Sa i përket bllokut opozitar, sipas deklaratës së djeshme të Isa Mustafës nuk do të jenë iniciator të përplasjes. Kështu që pres një reflektim të bllokut tjetër, të PDK-së”, ka thënë ai.

Madje, ai e ka ftuar edhe Lëvizjen Vetëvendosje të Albin Kurtit që nesër të reflektoj dhe të votoj për kandidatin e koalicionit LDK- AAK- Nisma, Isa Mustafën për kryetar të Kuvendit.

Në Kosovë nesër pritet të mbahet mbledhja e parë e Parlamentit të dalë nga zgjedhjet e parakohshme parlamentare të tetë qershorit. Por, zgjedhja e organeve drejtuese të tij mund të shfaq probleme.

Partitë politike janë vënë në përpjekje për të siguruar numrin e nevojshëm të deputeteve për të propozuar kryetarin e Parlamentit.

Javën e kaluar, kryesia e Parlamentit të Kosovës, pa Partinë Demokratike, përcaktoi koalicionin ndërmjet Lidhjes Demokratike, Aleancës për Ardhmërinë e Kosovës dhe Nismës për Kosovën, si grupin më të madh parlamentar. Sipas këtij vendimi në mbledhjen e parë të Parlamentit, ky grup ka të drejtën të propozojë kryetarin e Parlamentit.

Por, me këtë nuk është pajtuar Partia Demokratike, e cila doli e para në zgjedhjet e tetë qershorit dhe synon të drejtojë institucionet.

Kryetari i Partisë Demokratike, Hashim Thaçi, njëherësh edhe kryeministër në detyrë i Kosovës, tha sot pas mbledhjes së kryesisë së kësaj partie se institucionet e reja do të ndërtohen në përputhshmëri të plotë me rezultatin zgjedhor të tetë qershorit, që sipas tij përcakton qartë besimin e qytetarëve.

“Përcakton qartë vendimin e qytetarëve, sovranit, fituesin e qartë dhe të pastër dhe organizimin e zgjedhjeve ferr, të lira, transparente me fitues Partinë Demokratike të Kosovës. Pra, Partia Demokratike e Kosovës dhe koalicioni i saj parazgjedhor do të propozoj dhe zgjedhin edhe kryetarin e parlamentit edhe mandatarin e ardhshëm”, tha zoti Thaçi.

Por, koalicioni ndërmjet Lidhjes Demokratike, Aleancës për Ardhmërinë e Kosovës dhe Nismës për Kosovën thonë se janë ato që i kanë numrat e nevojshëm për të ngritur institucionet dhe se aktualisht janë përfshirë në bisedime me lëvizjen Vetëvendosje për të arritur një marrëveshje për të përkrahur këtë koalicion në procesin e përpjekjeve për formimin e qeverisë së re, por deri më tani kanë dështuar të arrijnë për shkak të kushtëzimeve të kësaj lëvizjeje me ndryshimin e qasjes ndaj bisedimeve për normalizimin e marrëdhënieve me Serbinë dhe procesin e privatizimit. Lëvizja Vetëvendosje ka bërë të ditur se nuk do të votojnë asgjë në parlamentin e Kosovës, pa miratimin e këtyre parimeve në formë të shkruar.

Kryetari i Aleancës Për Ardhmërinë e Kosovës, Ramush Haradinaj tha se ende mund të arrihet një marrëveshje me lëvizjen Vetëvendosje, por pas mbledhjes së parë të parlamentit.

“Sa i përket seancës për nesër, vështirë që mundemi të ndryshojmë gjendjen, mirëpo ekziston mundësia e komunikimit të mëtejmë për shkak se pritet edhe etapa tjera për ndërtimin e institucioneve, nesër është vetëm zgjedhja e kryetarit të parlamentit dhe kryesisë së saj, pra mund ndodhë që të krijohen mundësitë për të komunikuar prapë”, tha zoti Haradinaj.

Haradinaj tha se shpreson që nesër partitë politike të pakicave kombëtare të përfshira në parlament do të përkrahin Koalicionin ndërmjet Lidhjes Demokratike, Aleancës për Ardhmërinë e Kosovës dhe Nismës për Kosovën në përpjekjet e tyre për zgjedhur kryetarin e Parlamentit nga radhët e tyre.

Ky Koalicion ndërkaq së bashku me lëvizjen Vetëvendosje janë zotuar se nuk do t’i përgjigjen asnjë ftese të mundshme të Partisë Demokratike për formimin e qeverisë së re të Kosovës, ndërsa PDK me kushtin që të ketë votat e të gjitha pakicave kombëtare do të ketë nevojë për të paktën 4 vota shtesë që duhet t’i kërkojë në radhët e partive rivale.

Dita e nesërme , do të jetë sprova e parë për procesin më të ndërlikuar deri tash të formimit të institucioneve të reja. Nëse nuk arrihet ndonjë zgjidhje vendi mund të shkojë në zgjedhje të jashtëzakonshme./VOA/