Sot në fshatin Gollubovc të Malishevës, edhe zyrtarisht ka filluar ndërtimi i objektit të shkollës fillore në këtë fshat. Gurëthemelin e ndërtimit të shkollës, e vendosi i pari i Malishevës, Ragip Begaj, i cili bashkë me drejtorin e arsimit, Blerim Thaçi dhe drejtorin e urbanizimit, Urim Kastrati, morën pjesë në fillimin e punimeve të objektit të ri të shkollës.

“Unë para marrjes së mandatit për udhëheqjen e Komunës së Malishevës, kam dhënë një pretim, të cilin po e mbaj, e premtim i imi ishte, se do të investoj në zonat më të thella të komunës sonë, në ato zona ku kanë munguar investimet”, tha Begaj, në ceremoninë e fillimit të punimeve për ndërtimin e shkollës së fshatit.

“Urime për shkollën e re, në veçanti për ju nxënës shumë urime, e trashëgofshi shkollën”, tha mes tjerash Begaj, e më pas i porositi mësimdhënësit, që të punojnë në arsimimin e fëmijëve.

Kjo shkollë, ka një hapësirë prej 1300 metra katrorë dhe objekti do ti ketë dhjetë klasa për mësim, ndërsa ndërtimi i saj, sipas kontratës është me kohëzgjatje dy vjeçare. Ndërtimi i shkollës do të bëhet nga buxheti i Komunës së Malishevës dhe kap një shumë 298 mijë euro. Punëkryes i punimeve është N.N.P. “Sinani ING” nga Prishtina.

Fshati Gollubovc, është prej fshatrave më të largëta nga qendra komunale e Malishevës. /PrizrenPress.com/

Komisioni Qendror i Zgjedhjeve dhe Paneli Zgjedhor për Ankesa dhe Parashtresa thonë se partitë politike mbesin fushë e pakontrolluar në aspektin e llogaridhënies financiare. Ato vazhdojnë të shohin shumë zbrazëti në skemën institucionale që mbikëqyr dhe heton aktivitete financiare të subjekteve politike.

Dy segmentet që shqyrtojnë dhe vendosin rreth raportimit financiar të partive politike thonë se skemës i nevojitet një mekanizëm shtesë që kontrollon mirëfilli aktivitetet financiare të tyre.

Bazuar në raportet e financave që partitë politike dërgojnë në Komisionin Qendror të Zgjedhjeve (KQZ), kryetarja e këtij organi Valdete Daka, thotë se nuk ekziston ende kontroll i mirëfilltë financiar në raport me subjektet politike.

“Aktualisht me ligj jemi njëfarë mbledhësi i raporteve financiare që ua dërgojmë Auditorit. Por, vërehet që ka shumë zbrazëti në mekanizmin e kontrollit, që duhet t’i bëjë subjektet politike më llogaridhënëse ndaj publikut”, i ka thënë Daka Radio Kosovës.

Paneli Zgjedhor për Ankesa dhe Parashtresa deri më tani ka shqiptuar mbi 2000 gjoba për parregullsi ndaj partive politike. Totali i këtyre gjobave ka shkuar në miliona euro. Për, këtë arsye ky organ konsideron se aktivitetin financiar të partive politike nuk ka kush ta kontrolloj. Mul Desku, nga PZAP thotë se nevojitet një mekanizëm më serioz kontrolli.

“Këtu mungon një mekanizëm që do të ishte një lloj auditori apo hetuesi i pavarur që heton çdo aktivitet financiar të partive politike. Kjo për të ditur se nga po i marrin ato financa , si po i shfrytëzojnë ato, a po i japin llogari ndokujt dhe a po i kalojnë kufizimet ligjore të kuotave për shpenzime”, ka thënë Desku.

Deri më tani Prokuroria e Shtetit sipas koordinatores Kundër Korrupsionit Laura Pula, nuk ka ndryshuar metodë hetimi të keqpërdorimeve të mundshme të subjekteve politike. Pula i ka thënë Radio Kosovës se po pritet të nënshkruhet serish memorandumi që ishte nënshkruar me segmentet tjera në zgjedhjet e kaluara lokale.

Nëse materia e këtij memorandumi do të jetë e njëjtë, atëherë as prokuroria nuk konsiderohet se disponon gjithë mekanizmat që kontrollojnë mirëfilli aktivitet e paligjshme financiare të partive politike.

Megjithatë në këtë betejë shumica e institucioneve po mbështeten tek Qendra e Inteligjencës Financiare, e cila mund të hetoj transaksionet e mundshme të dyshimta të partive politike.

Donika Gërvalla, vajza e Jusuf Gërvallës, nuk do të jetë pjesë e listës së Lidhjes Demokratike të Kosovës. Këtë, e ka thënë vet Gërvalla në rrjetin social të Facebook. Thotë se e di qe disa prej njerëzve janë të zhgënjyer nga vendimi i saj, por që kërkon mirëkuptimin e të gjithëve.

Më poshtë po e sjellim vendimin e plotë të Donika Gërvalla- Schwarz

Të nderuar miq,

gjatë muajve të fundit jam pyetur nga një numër i madh njerëzish – qytetarë të thjeshtë dhe aktivistë të LDK-së, jo pak prej tyre e kanë kërkuar madje me ngulm nga unë, se a do të kandidoj për deputete në kuadër të Lidhjes Demokratike të Kosovës. Lista e LDK-së vendoset sot dhe nesër dhe unë nuk do të jem pjesë e kësaj liste. Jam e ndërgjegjshme që disa prej jush do të ndihen të zhgënjyer nga vendimi im, shpresoj megjithatë që shumica të më kuptojë:

1. Lidhjes Demokratike të Kosovës i uroj sukses në këto zgjedhje. LDK, me virtytet që përfaqëson, fuqinë e saj elektorale, potencialin e jashtëzakonshëm në radhët e aktivistëve të saj, por edhe me të gjitha dobësitë që mund të manifestojë, është në rrethanat aktuale megjithatë zgjidhja më e mirë për Kosovën. Lidhja Demokratike e Kosovës duhet ta qeverisë vendin pas datës 8 qershor 2014.

2. Një kandidim i imi në këto zgjedhje në listën e LDK-së është i pamunduar. Arsyeja ime për këtë është mungesa e guximit të drejtuesve të LDK-së për të përjashtuar qartë dhe me vendosmëri – para zgjedhjeve – çdo kompromis me përfaqësues të krimit dhe korrupsionit nga të gjithë krahët e mundshëm.

3. Elektorati i LDK-së mund të votojë megjithatë qartë kundër krimit dhe korrupsionit, të cilat po e mbajnë peng çdo zhvillim të vendit. Votuesit do të mund t’ia japin votën e tyre 5 kandidateve dhe kandidatëve të guximshëm në qëndrimet e tyre, të shquar në profesionalitetin e tyre dhe të tillë ka plot në listën e LDK-së. Unë njoh shumë prej tyre dhe sidomos atyre iu uroj të gëzojnë një mbështetje masive.

Lidhjes Demokratike të Kosovës dhe të gjithë mbështetësve të saj iu uroj të fushatë zgjedhore të guximshme dhe pa kompromise të dëmshme. Në mënyrën time do të mundohem të ndihmoj që vendi ynë të ketë një të ardhme më të mirë.

Kryetari i Lidhjes Demokratike të Kosovës, Isa Mustafa, nuk e ka përjashtuar mundësinë që nëse LDK-ja fiton zgjedhjet të bashkëpunojë edhe me “Listën Serbe”.

I pari i LDK-së ka paralajmëruar se partia e tij do të dal fituese e zgjedhjeve parlamentare.

“Ne do te jemi fitues dhe do ti ofrojmë mundësinë gjitha partive që përfaqësojnë popullatën jo shumicë të bashkëpunojnë me neve”, ka thënë ai, transmeton Indeksonline, duke shtuar se gjitha aktivitete që janë ndërmarrë deri më tani janë ndërmarr që të integrohen gjitha pakicat.

Ndryshe, në LDK sot kanë aderuar Bajram Gecaj, Drita Konxheli si dhe Valon Maloku.

“Prangosjen” e mendësisë politike në Kosovë, me ide se pushteti është “fabrika” kryesore që prodhon milionerë, për analistët kosovarë është fenomen që kërkon kohë të zhbëhet. Sipas tyre, kastat politike në rajonin e Ballkanit, si pasojë e kësaj mendësie, vazhdimisht nxjerrin oligarkë të rinj.

Profesori i Shkencave Politike, Bekim Baliqi, ka thënë për Telegrafin se shumica e të angazhuarve nëpër parti politike, janë aty për të realizuar interesa personale.

Sipas tij, nuk është interesi i përgjithshëm ai që po i shtyn individët t’i hyjnë betejës politike.

“Përgjithësisht kemi të bëjmë me njerëz që kalkulimi personal i ka afruar me politikën”, ka thënë ai për Telegrafin.

Ndërsa, i pyetur se a po krijojnë ambiciet e individëve për tu pasuruar përmes politikës, një klasë të oligarkëve të rinj, Baliqi ka thënë: “Kjo më së miri mund të vërehet me deklarimin e pasurisë të cilin e kanë bërë përfaqësuesit e popullit në Kuvendin e Kosovës”.

Në anën tjetër, analisti Bexhet Shala mendon se ajo çka është vërejtur deri më tani, është se “njerëzit po i hyjnë politikës për të bërë para dhe për të fituar një status të ri shoqëror”.

Ai tha për Telegrafin se kjo “dëshirë” është prezente edhe nëpër shumicën e vendeve të Ballkanit, duke shtuar se në Kosovë janë dhënë disa sinjale që kjo qasje ndaj politikës ka filluar të ndryshojë.

“Edhe në vendet e Perëndimit ka individë që kanë ambicie të tilla, mirëpo funksionimi i mirëfilltë i shtetit nuk ia mundëson një gjë të tillë. Vendet në tranzicion kanë probleme të tilla, mirëpo ajo që duhet të vihet në spikamë është shpejtësia e kalimit të kësaj mendësie politike. Kroacia është shembulli më i mirë sesi një shtet e kalon tranzicionin në një mënyrë shumë të mirë. Ata kanë arritur që ish-kryeministrin e vendit ta arrestojnë, që është tregues i qartë i konsolidimit të shtetit”, ka thënë Shala.

Ndryshe, Kosova nga institucionet relevante ndërkombëtare shpeshherë është kritikuar për mungesën e gatishmërisë për luftimin e korrupsionit dhe funksionin e gjyqësorit, si mekanizmi kryesor për luftimin e këtij fenomeni.