Premiera e filmit “Në tokë të huaj” pritet të shfaqet më 17 maj 2014 në Falkenberg të Suedisë, në praninë e autoriteteve suedeze dhe njohësve e dashamirëve të çështjes shqiptare në Suedi. I njëjti film pritet të shfaqet në Kosovë me rastin e manifestimit tradicional “Ditët e diasporës”, i cili organizohet nga Ministria e Diasporës e Republikës së Kosovës, raporton Epoka e re.
“Në tokë të huaj” (I rämmande land) titullohet filmi më i ri i xhiruar në Suedi e në Kosovë në periudhën 2010-2012, i cili trajton peripecitë e shqiptarëve që si pasojë e represionit serb u larguan nga Kosova dhe gjetën strehim në Suedi.
Integrimi i shqiptarëve në Suedi, telashet me të cilat ballafaqohen familjet shqiptare në këtë vend skandinav, janë bosht i rrëfimit të filmit “Në tokë të huaj” të producentit Hamdi Arifaj me regji të Nimon Muçajt, në të cilin luajnë aktorë të njohur nga Kosova e Suedia.
Temë bosht e filmit janë dy familje nga Kosova që kërkojnë strehim në Suedi. Njëra familje arrin të integrohet me sukses në shoqërinë suedeze, tjetra ballafaqohet me shumë probleme e sfida që i sjell jeta në tokë të huaj.
Në film gërshetohen hallet dhe telashet e mërgimtarëve tanë në Suedi. Familja Gashi ka probleme qysh në Kosovë dhe këto probleme e përcjellin edhe në Suedi, ku kërkon lejeqëndrim dhe refuzohet nga autoritetet e këtij vendi. Me ndihmën e mikut të tyre, Agimit, i cili edhe e ka sjellë në Suedi, pjesëtarët e kësaj familje fshehën në objektin e një instituti i cili është i njohur për të drejtat e fëmijëve, i cili shërben si çerdhe e të huajve.
Pas shumë peripecive dhe marrjes së lejeqëndrimit, telashet me familjen Gashi vazhdojnë. Djali i vetëm i tyre, Flamuri, fillon të merret me shpërndarjen e drogës dhe realizon përfitime të mëdha të cilat kryefamiljari (babai i Flamurit) nuk i pranon. Sjelljet e tilla të të birit i shkaktojnë kryefamiljarit probleme shëndetësore si pasojë e të cilave pëson sulm në zemër dhe vdes me dëshirën e tij të fundit që të varroset në atdhe, dëshirë kjo që i realizohet falë ndihmës së shokëve.
Njohja e Flamurit me një vajzë shqiptare nga familja Berisha (Teuta) ndryshon shumëçka në jetën e tij dhe të familjes Gashi. Këta dy të rinj që u njohën e u dashuruan rastësisht gjatë një ndeje në Suedi, ishin komshi derisa jetonin në Kosovë. Teuta me karakterin e saj të fortë të trashëguar nga familja (babai i saj, Agimi, është mësues në Suedi dhe angazhohet për ruajtjen e gjuhës dhe kulturës shqipe në këtë shtet skandinav) ia del ta kthejë Flamurin në rrugë të mbarë. Ngjarja në film kulmon me martesën e dy të rinjve (Flamurit e Teutës), të cilët e bëjnë një dasmë të madhe në vendlindje.
Premiera e filmit “Në tokë të huaj” shfaqet më datën 17 maj 2014 në Falkenberg të Suedisë, në praninë e autoriteteve suedeze dhe njohësve e dashamirëve të çështjes shqiptare në Suedi. I njëjti film pritet të shfaqet në Kosovë me rastin e manifestimit tradicional “Ditët e diasporës”, i cili organizohet nga Ministria e Diasporës e Republikës së Kosovës.
Producent e skenarist: Hamdi Arifaj
Regjia: Nimon Muçaj
Luajnë: Sylejman Lokaj Nimon Muçaj, Fortesa Hoti (aktore në Suedi) etj.
Kamera: Anders Ahlberg, Martin Vildehav, Avdi Islami
Montazhi: Anders Ahlberg, Avdi Islami
Zëri: Anna Öst