Dështimi i Kuvendit të Kosovës që në seancën e 18 shtatorit të zgjedhë kryetarin e ri, ka bërë që dy blloqet më të mëdha politike t’i vazhdojnë konsultat e ndara para vazhdimit të kësaj seance të caktuar për 2 tetor.

Gjatë javës së fundit, blloku i partive LDK, AAK, Nisma dhe Vetëvendosje ishte më aktiv në mbajtjen e takimeve. Por ky koalicion nuk ka ofruar asnjë formulë se si do të mund të kandidoj kandidatin e saj për kryetar të Kuvendit, përderisa kryesuesja e seancës ka deklaruar se do ti pranoj vetëm kandidaturat që vijnë nga grupi më i madh parlamentar.

Lideri i AAK-së, Ramush Haradinaj, gjatë javës në disa raste e ka përsëritur se pas dështimit të PDK-së që të marrë postin e kryetarit të Kuvendit më 18 shtator, tani koalicioni paszgjedhor duhet ta ketë të drejtën e kandidimit.

“Është e turpshme prej PDK-së dhe prej të gjithëve që janë bërë pjesë e kësaj zvarritje. Ne iu kemi thënë që edhe ky abuzim e ka një kufi. Me gjithë faktin që ne jemi të zgjedhur, jemi në institucione edhe zgjidhjen po e kërkojmë në institucione. Por, nuk mundemi pa kufi t’i presim duke e vazhduar këtë abuzim”, ka theksuar Haradinaj.

Në anën tjetër, Partia Demokratike e Kosovës vazhdon të mbështetet në aktgjykimin e Gjykatës Kushtetuese, i cili, sipas interpretimit të saj, i jep të drejtën të propozojë kandidatin për kryetar të Kuvendit si grupi më i madh parlamentar.

Por, edhe PDK nuk ka dhënë ndonjë sqarim se si do t’i sigurojë 61 votat minimale. Në seancën e fundit më 18 shtator, PDK kishte arritur t’i siguronte vetëm 44 vota për kandidatin e saj.

Zyrtarët e PDK-së gjatë kësaj jave kanë qenë më të heshtur në komunikim me mediat. Përderisa kryeministri në largim dhe lideri i saj, Hashim Thaçi, përmes shkrimeve në rrjetin social Facebook, ka thënë se institucionet e reja do të formohen mbi bazën e vullnetit të shprehur në zgjedhje dhe në harmoni me Kushtetutën.

Nisur nga këto pozicione të kundërta ndërmjet dy blloqeve më të mëdha politike, analisti i Institutit për Politika Zhvillimore- KIPRED, Albert Krasniqi kishte propozuar që PDK të merrte postin e kryetarit të Kuvendit, kurse blloku LDK, AAK, Nisma dhe Vetëvendosje të riformulojnë marrëveshjen.

“Opsioni më i arsyeshëm kish me qenë që të votohet kandidati i PDK-së për kryetar të Kuvendit. Edhe ashtu kish me qenë mirë për Kosovën që ta ketë një opozitë që do ta kishte kryetarin e kuvendit karshi një qeverie me dy të tretat e votave, që është e rrezikshme sepse çdo qeveri që i ka dy të tretat mund të ketë tendencë të keqpërdorë pushtetin. Kështu që një PDK në opozitë me kryetar të Kuvendit, për Kosovën nuk kishte me qenë e dëmshme dhe do të mund të bënte një mbikëqyrje më të mirë të punës së qeverisë”, ka theksuar Krasniqi.

Për riformulimin e marrëveshjes gjatë javës kanë folur edhe zyrtarë të Lidhjes Demokratike të Kosovës. Ata u vunë në mbështetje të idesë që LDK, të merrte potin e kryeministrit duke ia lënë PDK-së atë të kryetarit të Kuvendit.

Deklaratat e tilla të disa zyrtarëve të LDK-së, lideri i saj, Isa Mustafa i ka cilësuar si personale duke ua konfirmuar partnerëve të koalicionit se LDK mbetet tek marrëveshja fillestare.

“Ne e kemi një përcaktim që e kemi rikonfirmuar në organet e LDK-së, në Këshillin e Përgjithshëm dhe në Kryesinë e LDK-së se e kemi arritur një marrëveshje dhe se ne nuk e ndryshojmë marrëveshjen çdo ditë në bazë të ideve të njerëzve. Mirëpo ne nuk e kundërshtojmë që njerëzit japin idetë e tyre. Ne do të vazhdojmë me këtë marrëveshje”, ka deklaruar Mustafa.

Bllokada i krijuar, sipas opinionistëve nuk do të mund të tejkalohet pa një rol më aktiv të faktorit ndërkombëtar. Lidhur me këtë rol, së fundit ka folur Përfaqësuesi Special i Bashkimit Evropian në Kosovë, Samuel Zbogar.

“Ndërhyrja e jonë e vetme është rekomandimi për të gjithë që të gjejnë zgjidhje sa më shpejt që të jetë e mundur”, ka thënë Zbogar. Ai i ka rikujtuar partitë politike që zgjedhjet janë mbajtur më 8 qershor, kurse institucionet e reja nuk janë formuar ende.

Tani mbetet që më 2 tetor të shihet se me çfarë skenarësh do të shkojnë në vazhdimin e seancës konstituive si PDK-ja ashtu edhe koalicioni pas zgjedhor. Mirëpo, vlerësimet e përgjithshme janë se nëse nuk ka një marrëveshje edhe mes këtyre dy blloqeve, zgjidhja do të jetë gati se e paarritshme./Rel/

Imami i arrestuar i Xhamisë së Madhe të Prishtinës, Shefqet Krasniqi, ka qenë shoqërues për disa ditë i ish deputetit, Gani Gecin në qelinë e tij. Mirëpo, sipas burimeve të gazetës Tribuna, Gecit i kanë penguar ritet fetare të Imamit Shefqet Krasniqi.
Ky i fundit ka qëndruar së bashku me Gani Gecin katër ditë në një dhomë të përbashkët dhe pastaj ata janë ndarë.

Sipas këtyre burimeve, Gani Geci ka kërkuar që të zhvendoset në një dhomë tjetër me arsyetimin se Imami Shefqet Krasniqi po zgjohet herët për ti kryer ritet fetare dhe në këtë mënyrë Geci po e ka të pamundur të vazhdoj fjetjen.

Ndryshe këta të dy po qëndrojnë në paraburgim, njëri për shpëlarje parash e tjetri për vrasjen e një personi. /Tribuna/

Krusha e Vogël e komunës së Prizrenit, kërkon të dijë për fatin edhe të 68-të personave, që u vranë, u masakruan dhe u dogjën nga paramilitarët sërb, të ndihmuar nga serbët e fshatit.

Deri më tani në varreza pushojnë vetëm 45 prej tyre, ndërsa sytë e krushjanëve janë drejtuar tek çdo lajm, që përhapet për gërmime në varrezat masive anekënd vendit dhe më gjerë.

Krusha e Vogël e komunës së Prizrenit është një ndër fshatrat që përjetoi më së shumti shkrumimin e trupave të bijëve e bijave të tyre në fillimin e pranverës së vitit 1999-të.
Kanë kaluar më shumë se 15-të vite dhe nënë Vezirja, ka shpresuar shumë se ndonjëri nga bijtë e saj , do të vintë krejt papritur të trokiste në xhaminë e dritares së shtëpisë.

Sipas Gani Zylfiut, edhe një nënë tjetër nga Krusha e Vogël, shpreson se djalin e ka të gjallë, pavarësisht se mbetjet mortore të trupit të tij janë identifikuar.
Por shpresa nga dita në ditë po venitet për banorët e Krushës së Vogël. Ata janë tërë sy e vesh tek çdo lajm që jepet për gjetjen e varrezave masive, ndërsa shpresojnë shumë, se të paktën në përvjetore, do të kenë një vend ku t””i kujtojnë 113-të krushianët, nga mosha më e vogël vetëm 2 vjeq e deri tek plaku më i vjetër.

Tani jeta në këtë fshat po gjallërohet… Dikur , nga heshtja që kishte pllakosur fshatin, kishe frikë të qëndroje në oborrët e shtëpive, thonë banorët./rtk/

Një aksident trafiku ka ndodhur në Suharekë. Aksidenti ka ndodhur në mes dy veturave civile.

Policia e Kosovës njofton se një person në gjendje të dehur ka goditur me veturë një veturë tjetër, e cila ishte duke u vozitur nga një femër.

“Deri te aksidenti ka ardhur kur i dyshuari mashkull K-Shqiptar duke lëvizur me veturën VË Pikap ne gjendje te dehur dhe duke mos e përshtatur shpejtësinë e lëvizjes ka goditur veturën Ford Eskort me ngasës viktimën femër K-Shqiptare”.

“Si pasoj e aksidentit lëndime trupore ka pësuar viktima dhe një pasagjer mashkull K-Shqiptar te cilët pas tretmanit mjekësor ne QKMF-Suhareke lirohen”/PrizrenPress.com/

Imami i arrestuar i Xhamisë së Madhe të Prishtinës Shefqet Krasniqi po qëndron në paraburgim në një dhomë me ish- deputetin e LDD (Lidhja Demokratike e Dardanisë) Gani Gecin.
Imami Krasniqi akuzohet për shpëlarje parash dhe nxitje të urrejtjes, ndërsa Geci për vrasjen e një personi në Skenderaj në korrik të këtij viti.

Burimet e sigurta të gazetës “Illyria” kanë treguar në kushte anonimiteti se përzgjedhja e dhomave të paraburgimit ka qenë e rastësishme dhe se Krasniqi dhe Geci nuk kanë edhe aq raporte të mira në dhomën e qëndrimit.

Geci thuhet të këtë kërkuar zhvendosje nga dhoma me arsyetimin se Imami Krasniqi po zgjohet herët për t’u falur dhe kësisoj ai po e ka të pamundur të vazhdoj fjetjen.

Rasti ndaj imamit Krasniqi është rikthyer në rigjykim nga shkalla e dytë e gjykatës dhe pritet të vendoset gjatë javës që po hyjmë.

Kurse, Gani Geci ju është dorëzuar autoriteteve të EULEX-it dhe nuk ka pranuar t’u dorëzohet autoriteteve vendore me arsyetimin se nuk ndihet i sigurt në duart e tyre./Illyria/

Policia e Kosovës ka njoftuar se dje në fshatin Kramovik të Rahovecit është arrestuar një banor i këtij fshati si i dyshuar për vjedhjen e disa mjeteve të punës.

“Në fshatin Kramovik të Rahovecit, pas realizimit të hetimeve të pandërprera është arrestuar një i  dyshuar  pasi që tek i njëjti janë gjetur disa mjete pune që dyshohet të jenë të vjedhura. Me urdhër të prokurorit i dyshuari dërgohet në mbajtje”, thuhet në njoftimin e Policisë së Kosovës/PrizrenPress.com/