Për tejkalimin e ngërçit politik, zgjedhjet nga shumëkush po shihen si mundësi e mirë, sado që partitë hezitojnë për një proces të ri zgjedhor.

Zyrtarë të Aleancës për Ardhmërinë e Kosovës, e kanë konfirmuar se do të shkojnë në një listë të përbashkët si LAN, për sa kohë që Vetëvendosja do të shkojë si e vetme.

Në LDK kanë refuzuar të flasin për zgjedhje në këtë kohë, pasi sipas tyre shkuarja në zgjedhje nuk duhet të jetë opsion, shkruan Tribuna.

Zëdhënësi i Aleancës për Ardhmërinë e Kosovës, Ernest Luma, ka thënë se vendi nuk ka nevojë për zgjedhje, mirëpo nëse sipas tij një gjë e tillë imponohet, atëherë blloku është i gatshëm për një sfidë të tillë dhe se do të konkurrojnë me një listë të përbashkët.

“Vendi nuk ka nevojë për zgjedhje, derisa ka një shumicë parlamentare, që është e gatshme për t’i bërë institucionet. Por, nëse kjo surrogat demokraci që po imponohet nga pengmbajtësit e shtetit me zor dhe medoemos do që ta shtyjë vendin në zgjedhje, blloku i shumicës është i gatshëm për një sfidë të tillë, ka thënë Luma.

Institucionet ndërkombëtare nuk pritet të ndërhyjnë në zgjidhjen e ngërçit politik në Kosovë, duke u shprehur të bindur se këtë çështje do ta zgjidhë presidentja e vendit, Atifete Jahjaga.

Kjo e fundit ka filluar takimet me liderët e subjekteve politike parlamentare pas dështimit të zgjedhjes së kandidatit të PDK-së, Arsim Bajramit, për kryetar të Parlamentit të Kosovës në seancën e 18 shtatorit 2014, shkruan Zëri.

Kryetari i Partisë së Drejtësisë, Ferid Agani, ka vlerësuar se vetëm me marrëveshje politike do të tejkalohet ngërçi i krijuar pas zgjedhjeve të 8 qershorit. Agani ka thënë se situata politike është mjaft e tensionuar dhe në kundërshtim me interesat e qytetarëve të vendit.

Në këtë intervistë për “Epokën e re”, ai ka shprehur optimizëm se liderët e partive politike do të gjejnë forcë për të arritur një marrëveshje politike për tejkalimin e ngërçit.

“Situata politike në vend është mjaft e tensionuar, në kundërshtim me interesat e qytetarëve të vendit si dhe në kundërshtim të zhvillimit ekonomik e shoqëror në përgjithësi. Them se ky ngërç duhet të përfundojë sa më shpejt që është i mundur. Rrugëdaljen nga ky ngërç politik që po e pamundëson formimin e institucioneve të vendit e shoh vetëm nëpërmjet arritjes së një marrëveshje politike ndërmjet partive të koalicionit të ‘Misionit të Ri’, përkatësisht të Partisë Demokratike të Kosovës si lidere e këtij koalicioni dhe partive të cilat janë grumbulluar në të ashtuquajturin bllok opozitar politik”, ka deklaruar Agani, duke shtuar se deputetët e koalicionit LDK-AAK-Nisma-VV duhet të reflektojnë në mënyrë të përgjegjshme në obligimin e tyre kushtetues për ta zhbllokuar procesin e themelimit të institucioneve.

“Mendoj se partitë e bllokut opozitar duhet të reflektojnë në mënyrë të përgjegjshme në obligimin kushtetues që ta votojnë kandidatin e propozuar nga koalicioni parazgjedhor, sepse ky është detyrim kushtetues dhe këtë e ka qartësuar Gjykata Kushtetuese duke përjashtuar çfarëdo mundësie që të votohet ndonjë kandidat i partive të tjera, sepse si grup më të madh parlamentar Kushtetuesja e ka definuar PDK-në dhe partnerët e saj të koalicionit”, është shprehur Agani.

Sipas tij, është koha e qëlluar që presidentja e vendit të ndërhyjë në proces duke mbledhur liderët e partive relevante për të gjetur një emërues të përbashkët, i cili do t’i bashkojë të gjithë rreth interesave të qytetarëve të vendit.

Lideri i PD-së ka thënë se zgjedhjet e jashtëzakonshme nuk janë në interes të qytetarëve. Agani ka folur edhe për tërheqjen e deputetit të PD-së, Gëzim Kelmendi, nga grupi parlamentar i PDK-së. Ai ka thënë se ky vendim i Kelmendit nuk e luhat qëndrimin e Partisë së Drejtësisë që të jetë pjesë e koalicionit me PDK-në.

Presidentes së Kosovës, Atifete Jahjaga, i është ndarë çmimi “Lidership në sferën publike” të ndarë nga Clinton Global Initiative për promovim të paqes.

Presidentja Jahjaga e ka vlerësuar si çmim të ndarë nga njerëzit të cilët përmes përkushtimit të hatashëm në sferën publike dhe lidershipit të tyre u kanë sjellë paqe dhe drejtësi miliona njerëzve, dhe të cilët vazhdojnë të punojnë me të njejtin pasion për t’i përmirësuar jetërat e njerëzve anë e kënd globit.

“Përkundër shumë prioriteteve që i ka një shoqëri që sapo e ka mbijetuar luftën, me gjithë lëkundjet e tranzicionit dhe sfidat për të krijuar një shtet të qëndrueshëm, ne arritëm ta bëjmë”, ka thënë ajo me rastin e pranimit të çmimit.
Sot Kosova frymon në liri ka shtuar ajo, dhe se në paqe dhe me vetëbesim po e trason vizionin e saj të anëtarësimit në Bashkimin Evropian dhe NATO.

Blloqet parlamentare nuk janë duke dhënë sinjale për arritjen e ndonjë marrëveshjeje, para se Kuvendi të mblidhet për herën e tretë, me tendencë të zgjedhjes së kryeparlamentarit. PDK me aleatët e saj në njërën anë dhe koalicioni LAN-VV në anën tjetër nuk kanë qëndrim unik as sa i përket mënyrës dhe kohës së thirrjes së seancës konstituive.

Kryesuesja e Kuvendit të Kosovës, Flora Brovina, ka thënë se vetëm ajo mund ta thërrasë vazhdimin e kësaj seance. Bile, e ka lënë të hapur mundësinë që brenda kësaj jave të zhvillohet kjo seancë, ndonëse nuk e ka përcaktuar ditën. Mirëpo, ajo ka apeluar të subjektet politike që të bëjnë marrëveshje para vazhdimit të seancës, pasi sipas saj, pa pasur një marrëveshje politike, seanca nuk ka pse të ndodhë ngase rezultati do të jetë i njëjtë sikur i seancës së kaluar.

Por, nënkryetari i LDK-së, Haki Rugova, vlerëson se kërkesa që të arrihet marrëveshje ndërmjet subjekteve politike nuk është në kompetencën e Brovinës. “Seanca duhet të thirret dhe të procedohet më tutje. Sa i përket çështjes së marrëveshjeve në mes të subjekteve politike këtë gjë nuk mund ta diktojë kryesuesja Flora Brovina./tribuna/

Asnjë dispozitë kushtetuese apo ligjore nuk e ndalon presidenten e vendit, Atifete Jahjaga, që të fillojë procedurat për emërimin e mandatarit të Qeverisë, kanë thënë analistët, shkruan sot Koha Ditore.

Duke parë ngërçin politik, ku krijimi i institucioneve të reja ka ngelur tek konstituimi i organeve të Kuvendit, Dren Doli nga Grupi për Studime Juridike dhe Politike ka thënë për “Kohën Ditore” se ligjërisht ekziston mundësia që Kuvendi të vazhdojë së funksionuari me kryesues të përkohshëm, ndërsa presidentja të nisë procedurat për krijimin e Qeverisë. Sipas Dolit, Kuvendi mund të ushtrojë mandatin përfaqësues, por jo edhe atë legjislativ.

“Vendimi i Gjykatës Kushtetuese tregon qartë se Kuvendi nuk mund të ushtrojë funksionin e tij legjislativ para se të konstituohet. Kurse me rastin e zgjedhjes së Qeverisë dhe emërimet të cilat i bën Kuvendi, lidhen kryesisht me rolin përfaqësues që Kuvendi i Kosovës ka.

Vendimi i Gjykatës Kushtetuese pikërisht ka lënë të lirë mundësinë që Kuvendi duke u bazuar në funksionin e tij përfaqësues të fillojë dhe iniciojë procedurat për zgjedhjen dhe emërimin e Qeverisë”, ka thënë Doli.

Anëtari i kryesisë së PDK’së Rrustem Mustafa – Remi ka thënë se pa një marrëveshje në mes partive politike, kryesuesja e Kuvendit të Kosovës Flora Brovina, nuk ka arsye të thërrasë vazhdimin e seancës konstituive të 17 korrikut.

Ai ka deklaruar se posti i kryetarit të Kuvendit i takon vetëm PDK’së.

Edhe analistët janë të mendimit që pa marrëveshje politike s;duhet të shkohet në seancë.

Ndërkohë, lideri i LDK’së Isa Mustafa i ka bërë thirrje Flora Brovinës që sa më shpejt ta thërrasë vazhdimin e seancës konstituive. /Epoka e Re