Ndërron jetë në moshën 86-vjeçare aktorja e skenës shqiptare, Besa Imami, e cila vuante prej kohësh nga një sëmundje e rëndë. Aktorja Besa Imami, ka lindur në 8 Gusht të vitit 1928 në qytetin e Gjakovës. Në vitin 1937, familja e saj u shpërngul nga qyteti i Gjakovës për tu vendosur në Tiranë.

Që nga shtatori i vitit 1946 e deri në 1 Shtator të vitit 1988, Artistja e Merituar, Besa Imami i ka dhënë publikut mbi 90-të role, midis të cilave përmendim rolin e Mbretëreshës Teuta tek “Artani”, rolin e Nënë Zyrasë tek “Bashkë me Agimin”, rolin e Prendës tek “Cuca e Maleve”, rolin e Rushës tek “Halili dhe Hajria”, rolin e Lajes tek “Lulet e Shegës”, etj.

Pas një shkëputje, Imami u rikthye përsëri në skenë në vitin 2004 për të interpretuar në dramën “Streha e të harruarve” të Ruzhdi Pulahës në rolin e malësores. Në kinematografi ajo u bë e njohur për publikun e gjerë me rolin e Donika Kastriotit në filmin “Skëndërbeu” të realizuar në vitin 1953. Më pas do të vijonin role të tjera si roli i Martës në filmin “Brazdat” në vitin 1973, roli i Nënë Tanës në filmin “Në fillim të verës” në vitin 1975, roli i Nënës së Gurgenit në filmin “Balada e Kurbinit” në vitin 1989 etj.

Roli i saj më i fundit është ai i Gruas myslimane në filmin “Eduart”në vitin 2006. Në vitin 1961, kur ishte vetëm 33 vjeç, Besa Imami për meritat e saj artistike do të vlerësohej me titullin “Artiste e Merituar”.

Vetëm para 7 ditësh, nga një propozim i Fondacionit Kulturor Mbarëkombëtar “Nermin Vlora Falaschi” ajo është nderuar nga Gjakova, vëndlindja e saj edhe me titullin “Nderi i skenës shqiptare”.

Për 3600 vende banimi në konviktin e Qendrës Studentore në Prishtinë kanë aplikuar 8200 persona, kurse rezultatet për aplikantët pritet të publikohen me 23 shtator.

Drejtori i Qendrës Studentore, Fatmir Sfishta, thotë për RTK se arsyeja që studentët si zgjedhje të parë për banim shohin këtë konvikt janë kushtet e mira, dhe pagesat e ulëta për fjetje dhe ushqim.

Sfishta ka thënë se janë duke pritur lejen për ndërtim edhe të një konvikti, i cili sipas tij pritet të jetë i gatshëm pas dy vjetëve.

Që nga ky vit studentët që do të banojnë në konvikt do të paguajnë 35 euro për fjetje dhe banim.

Me tepsitë në dorë kanë pritur mysafirët derisa kanë zënë vendet, për të vazhduar më pas me lojën e tyre diletante. Katër trupa meshkujsh dhe katër zëra drejt gjetjes së një identiteti, herë duke pretenduar rolin e kurvës e herë atë të dilerit.

Të dyja duken fort të lidhura, nën përpjekjen për të goditur njëri-tjetrin e për t’u dhënë të gjithëve kënaqësinë e plotësimit të egos.

E krijuar mbi tekstin “Në vetminë e fushave të pambukut” të autorit Bernard-Marie Koltès, shfaqja “Dilerat” me regji të Bekim Lumit është dhënë para publikut beogradas që nuk ka kursyer duartrokitjet dhe brohoritjet për “dilerat” e Lumit, të cilët janë vlerësuar për lojën e tyre teatrale.

Përveç tepsive, pjesë e lojës së tyre kanë qenë edhe kafazet, zinxhirët, litarët, këpuca e një “buzëkuq” prostitute.

“Nëse ka qenë absolute vija nëpër të cilën keni ecur, është bërë relative”, thotë njëri prej “dilerëve” të shfaqjes teatrore eksperimentale, e cila për dy herë radhazi është dhënë në Qendrën Kulturore “REX” në Beograd, në kuadër të festivalit “Mirdita, dobar dan”.

Regjisori i shfaqjes, Bekim Lumi, ka thënë se ishte një pritje e përzemërt e artistëve dhe njerëzve të Beogradit, të cilët i falën emocione të veçanta me duartrokitjet e tyre.

“Fakti që ata erdhën në dy repriza të njëpasnjëshme, që na pritën me kaq përzemërsi, me kaq duartrokitje, tregon që predispozita jonë, paramendimi ynë nuk ka qenë i gabuar në momentin kur ne kemi vendosur të vijmë në Beograd, një pritje që padyshim e kam pritur”, është shprehur Lumi.

Ai ka thënë se ajo çfarë përjetuan me dhënien e shfaqjes në Beograd, i bëri të ndjehen krenarë për faktin që prezantuan jo vetëm vlerat estetike të shfaqjes dhe teatrit kosovar, por njëkohësisht edhe ngjyrat, imazhin e shtetit të Kosovës.

Në shfaqjen “Dilerat” luajnë aktorët: Bujar Ahmeti, Ermal Sadiku, Faris Berisha dhe Shahban Behramaj.

Bujar Ahmeti, njëri nga “dilerët” e shfaqjes ka thënë se është shumë e çuditshme që brenda një nate të japin dy herë shfaqjen për shkak të kërkesave të audiencës.

“Po ndihem shumë mirë, pak jam lodhur sepse fizikisht shfaqja kërkon shumë punë”, është shprehur Ahmeti, duke shtuar se publiku i ka pritur shumë mirë. Më vjen mirë që shfaqja ka filluar të depërtojë edhe jashtë, nuk është shfaqje që kuptohet vetëm në Kosovë, por që mund ta kuptojë edhe një gjerman, edhe një francez edhe dikush tjetër.

Faris Berisha, tjetër aktor i shfaqjes “Dilerat”, ka thënë se janë të kënaqur, dy herë radhazi e kanë dhënë shfaqjen, shkaku i kërkesave të publiku.

“Natyra e shfaqjes është universale sepse flet për njerëzimin dhe robotizmin. Mënyrën qysh e kemi humbur anën shpirtërore por e kemi ngritur teknologjinë”, ka thënë Berisha. Ai ka shtuar se festivali “Mirdita, dobar dan”, është shumë i qëlluar, shkaku i marrëdhënieve ndëretnike.

Shfaqja “Dilerat”, prodhim i Teatrit Laborator “Loja”, destinacion të radhës e ka Shkupin, shfaqja do të jepet në edicionin e 39-të të Festivalit Ndërkombëtar të Teatrit “MOT” (Mlad Otvoren Teatar), të hënën nga ora 22:00.

Premiera e shfaqjes “Dilerat” është dhënë më 6 qershor të vitit 2013, ndërkaq reprizat gjatë qershorit dhe tetorit të po atij viti në shtypshkronjën “Rilindja”, në Prishtinë.

Në nëntor të vitit 2013, shfaqja e regjisorit Bekim Lumi, është prezantuar edhe në kuadër të edicionit të 8-të të Festivalit Ndërkombëtar Muzikor “DAM”, përderisa në prill të vitit 2014, ajo është prezantuar në Festivalin Ndërkombëtar të Teatrit Eksperimental “Man.In.Fest”, në Cluj të Rumanisë./Zëri/

Kosovarja Saranda Maliqi sivjet do të garojë në mesin e dymbëdhjetë vajzave të tjera të bukura të Zvicrës për titullin “Mis Zvicra 2014”. Në një intervistë për albinfo.ch, Saranda Maliqi thotë se pjesëmarrja në garën për më të bukurën e shtetit të Zvicrës është një përvojë e re për të, nga e cila pret që të bëjë një karrierë të bujshme.

“Konkurrimi për mis Zvicra është për mua një përvojë e rrallë dhe e veçantë. Kam pasur mundësi të takohem me njerëz që kanë përvoja të ndryshme si p.sh. me media, gara bukurie si dhe parti të ndryshme politike. Shkëmbimi i përvojave dhe bisedat me vajza të të gjitha regjioneve zvicerane është për mua një eksperiencë e posaçme dhe shumë pozitive. Gjithashtu dua të theksoj se kjo për mua është edhe një sfidë”, është shprehur Maliqi.

Ajo shpreson se me anë të kësaj kandidature do t’i hapen dyert e realizimit të ëndrrave të saj.

“Dua të ju informoj se pranë modelimit gjithashtu moderimi dhe gazetaria janë synime për ardhmërinë time profesionale. Ka vite që bashkëpunëtorët, miqtë si dhe familjarët më kanë motivuar për të bërë këtë hap duke marrë parasysh pamjen time fizike, aftësinë time për moderim dhe poezi dhe disa cilësi tjera. Unë mendoj se tani jam në një moshë ku vetë i reflektoj dhe i analizoj gjërat dhe e di se çfarë dua”, ka shtuar bukuroshja Maliqi.

Saranda ka rritur të hyjë në finale ku ka mbretëruar një konkurrencë e fortë. Në garë ishin afër 1000 vajza, ku pas çdo paraqitje kishte edhe diskualifikime, ku numri vinte gjithherë duke u zvogëluar.

Ajo me origjinë është nga Gjilani, është 23 vjeçe dhe jeton në Schönnewerd të Solothurnit dhe punon si asistente e sekretarit të komunës si dhe përgjegjëse për nxënësit në zanat. Deri më tash ajo ka kryer shkollimin profesional për administratë publike, ndërkaq, pjesën praktike e ka përfunduar në komunë. Saranda garon në tetor për më të bukurën e Zvicrës. Ajo dhe Anita Shala do të jenë në mesin e tetëmbëdhjetë kandidateve të tjera.