Gjykata Kushtetuese pritet të dalë sot, rreth orës 15:00, me vendimin e saj. Kështu mëson Politiko.net nga burime të mirë informuara me procesin.

Por, vendimi i Kushtetueses mund edhe të shtyhet deri javën tjetër, në rast se Gjykatës do t’i duhet më shumë kohë për disa fakte të reja që ajo ka marrë në shqyrtim gjatë kësaj jave.

Siç mëson Politiko.net, edhe diplomatët e huaj kanë paralajmëruar mundësinë që Gjykata Kushtetuese të dalë qysh sot me vendimin e saj final.

Ndryshe, dje, në ambientet e këtij institucionit që konsiderohet gardian i kushtetutshmërisë në vend, u ballafaquan me argumente të dy palët e përfshira në këtë rast, PDK dhe Blloku LDK-AAK-Nisma.

PDK e konsideron të paligjshme zgjedhjen e Isa Mustafës Kryetar të Kuvendit dhe për këtë është i është drejtuar Kushtetueses, duke pretenduar se gjatë seancës konstituive të Kuvendit është shkelur katër herë Kushtetuta.

Por, këto argumente janë hedhur poshtë nga Blloku LDK-AAK-Nisma, i cili e konsideron si të ligjshëm zgjedhjen e Isa Mustafës ndërsa për shkeljet në seancën konstituive fajëson Kryesuesen e seancës, Flora Brovina, deputete e PDK-së.

Bllokimi i lëndës në Gjykatën Kushtetuese ka bllokuar formimin e institucioneve dhe vendimi që pritet të dalë besohet se do ta zhbllokojë ngërçin politik në të cilin gjenden aktualisht institucionet e vendit.

Është paraparë që gjatë ditës së premte (sot) në Kosovë të mbërrijnë 30 mbetjet mortore të kosovarëve të gjetura në varrezën masive në Rashkë të Serbisë. Por, këto mbetje nuk do të mbërrijnë të paktën deri më 26 gusht. Kjo pasi që pala serbe e përfaqësuar nga Komiteti i Kryqit të Kuq ndërkombëtar, ka kërkuar nga pala kosovare që fillimisht të njoftohen familjarët e këtyre viktimave dhe pastaj të procedohen mbetjet te pala kosovare.

Prenkë Gjetaj nga Departamenti i Mjekësisë Ligjore të Kosovës, ka thënë se pala serbe ka përcjellë kërkesën dhe se e njëjta është duke u shqyrtuar nga pala kosovare. Sipas tij, java e ardhshme është data e fundit për dorëzim të mbetjeve. “E kemi vendos datën 26 ose javën tjetër si datë të fundit në të cilët pala serbe do të na i dorëzojë mbetjet e rreth 30 eshtrave të viktimave të vrara gjatë luftës së fundit në Kosovë”, ka thënë Gjetaj.

Sipas tij, nga raportet ka të dhëna se është rritur numri i mbetjeve mortore dhe se gjatë gërmimeve gjurmuesit kanë hasur në mbetje të reja.

“Tani në raporte kemi parë se kanë ardhur edhe identifikime të tjera. Mbi 30 mbetje, viktima të luftës do të riatdhesohen. Ne po presim përgjigje nga pala serbe e përfaqësuar nga komiteti ndërkombëtar nëse pajtohen për këtë çështje”, ka thënë Prenkë Gjetaj, për gazetën Tribuna.

Gjashtëmbëdhjetë vjet pas “ndalimit” nga UÇK-ja të delegacionit prej 13 vetash, të kryesuar nga Lidhja Demokratike e Kosovës, në Drenicë, duket se do të bëhet objekt i hetimit nga prokuroria e EULEX-it.

Atëbotë, në shtator të vitit 1998, në fshatin Qirez të Skenderajt u ndaluan mjeku Isuf Telaku, kryetari i Degës së LDK-së në Drenas, Mehdi Bardhi, Agim Krasniqi-LDK, Gjergj Dedaj-PLK, Sokol Blakaj-PLK, Kurtesh Devaja, Simon Augustini, Veli Bytyqi – PSHDK , Çaush Bajrushi, Milaim Kadriu dhe tre aktivistë të tjerë bashkë me aktivistet e tjera Nekibe Kelmendi e ndjerë, si dhe Sanie Aliu.

Nekibe Kelmendi dhe Sanie Aliu u lanë të lira ndërkaq të tjerët u mbajtën “në ndalim’ për 3 ditë e 3 net rresht.

Një nga protagonistët e kësaj ngjarje ka deklaruar për Botapress se ka marrë ftesë nga EULEX-i që të dëshmojë për këtë ngjarje.

“Jam ftuar nga EULEX-i dhe javën e ardhshme do të jap dëshminë time për aq sa mbaj mend për këtë përjetim të para 16 vitesh”, ka thënë për Botapress, një nga të ndaluarit nga UÇK-ja në shtator të vitit 1998.

Burime të Botapress-it bëjnë të ditur se tre të tjerë të ndaluar po ashtu tashmë kanë dhënë dëshmitë e tyre dhe pritet që në vazhdim të japin dëshmi edhe të tjerët.

Botapress ka pyetur zëdhënësin e EULEX-it Miguel Carvalho de Faria se a është duke bërë hetime për këtë rast EULEX-I dhe ajo ka dhënë një përgjigje të shkurtër: “Në lidhje me këtë rast, ju informoj se EULEX-i nuk ka hetim aktiv për këtë”.

Pra zëdhënsi Carvahlo ka folur për “hetimin aktiv” dhe nuk ka mohuar në tërësi se një hetim i tillë nuk është duke u zhvilluar.

Themelimi I Gjykatës Speciale do të shtrijë fushëveprimtarinë e vet edhe përtej “Shtëpisë së verdhë’ dhe pretendimeve të Dik Martit. Këtë e ka thënë edhe prokurori amerikan Williamson në konferencën për shtyp më 29 korrik në Bruksel tha se “… gjatë luftës në Kosovë, ka pasur dhunë ndaj
komuniteteve te pakicës, por edhe ndaj figurave politike”.

Atëbotë, në shtator të vitit 1998 me urdhër të Sabit Gecit, komandant i njësisë policore të UÇK-së dhe nën shoqërimin e “Gjarprit” Hashim Thaçit, të 13 të ndaluarit nga UÇK-ja do të përjetojnë një “mikpritje” dhe një “trajtim” të veçantë, kryesisht nga Sabit Geci dhe Komandant Gjarpri, ia
saj kohe apo Hashim Thaçi i sotëm.

Për 3 ditë e tre netë, “njerëzit e Ibrahim Rugovës’ në Drenicë do të mbahen “peng” nga UÇK-ja.

Për këtë rast ishte alarmuar edhe faktori ndërkombëtar në Prishtinë dhe me ndërmjetësimin e tyre, të 13-të të ndaluarit do të lirohen, secili me “pasojat” e tyre fizike e psikike.

“Trajtimin fizik” e kishte pranuar vetë Gjergj Dedaj, ndërkaq një rrëfim më të gjerë për këtë “rrugëtim nëpër territoret” e Drenicës e kishte shkruar Veli Bytyqi dhe u botua në disa vazhdime në gazetën Bota press në maj të këtij viti.

Zyra e Bashkimit Evropian në Kosovë ka njoftuar se është në përfundim të aranzhimeve rreth rregullimit ligjor dhe tranzicionit, të punës së tre gjykatësve ndërkombëtare të Kushtetueses. Kjo në mënyrë që të mos ketë paqartësi rreth anës ligjore dhe legjitimitetit të tyre, pas 31 gushtit, kur edhe është dashur të skadojë mandati i tyre sipas ligjeve që përmbyllin “Pavarësinë e mbikëqyrur”.

Aranzhimet është thënë se po bëhen bazuar në marrëveshjen e ratifikuar në Kuvend, pas letërkëmbimit të Presidentes me përfaqësuesit e Bashkimit Evropian.

Në këtë mënyrë sipas marrëveshjes, Bashkimi Evropian, do të jetë autoriteti që do të propozoj gjykatësit ndërkombëtarë të Kushtetueses në çfarëdo rasti, deri në vitin 2016.

“Bashkimi Evropian është duke siguruar që të ketë vazhdimësi në punën e gjykatësve ndërkombëtarë pas datës 1 shtator. Aktualisht ne jemi në proces të finalizimit të aranzhimeve për këtë çështje”, thuhet në përgjigjen e Zyrës së BE-së/EUSR për Radio Kosovën.

Nga Zyra e Presidentes së Kosovës, autoriteti që emëron gjykatësit e Kushtueses përmes postës elektronike është thënë se “emërimi i gjykatësve ndërkombëtarë do të bëhet në bazë të ligjit, Kushtetutës dhe në respektim të marrëveshjeve ndërkombëtare të ratifikuara në Kuvendin e Kosovës”. Por, nuk është sqaruar nëse do të ketë zëvendësim të gjykatësve aktualë, të emëruar nga ish Zyra Civile Ndërkombëtare.

Kjo marrëveshje thirret në nenin 20 të Kushtetutës së Kosovës që lejon t’i barten disa përgjegjësi specifike organizatave ndërkombëtare. Ky nen në këtë rast do përligj kompetencën e Bashkimit Evropian për të pasur dorë në përbërjen e Gjykatës Kushtetuese të Kosovës deri në vitin 2016.
Për tërë këtë proces asnjë përgjigje rreth situatës me mandatin dhe kontratat e gjykatësve ndërkombëtarë nuk ka dhënë Gjykata Kushtetuese.

Sipas ligjit në fuqi mbi Gjykatën Kushtetuese, mandati i gjykatësit është 9 vite pa mundësi rizgjedhje.
Aktualisht Gjykata Kushtetuese funksionon me 8 nga 9 gjykatësit sa duhet t’i ketë përbërja e saj. Parlamenti më herët nuk arriti të zgjedh njërin nga dy anëtarët e rinj të kësaj gjykate, që duhej të zëvendësonin dy gjykatësit, të cilëve më herët u kishte skaduar mandati.

Në kohën kur Gjykata Kushtetuese pritet të merr vendime të rëndësishme për situatën politike në vend, nga seancat me kontest politik është përjashtuar gjykatësi Kadri Kryeziu.

Ai ishte gjetur në shkelje kur në zgjedhjet e fundit nacionale kishte marr pjesë në një tubim zgjedhor të Partisë Demokratike.

Veprimi i Kryeziut i bërë pak pasi u kërkuar zgjatja e mandatit të gjykatësve ndërkombëtare u vlerësua pikërisht se i ka dhënë legjitimitet kërkesës së kreut të Kushtetueses Enver Hasani dhe Presidentes për t’u zgjatur mandatin gjykatësve ndërkombëtarë. Kjo me arsyen se gardiani i Kushtetutës po rrezikohet nga presioni dhe emisarët politik të ardhur përmes votës në Parlament.

Shtatorja e dëshmorit të kombit Xhevat Berisha është shndërruar në vendparking për biçikletat e vizitorëve të sheshit “Shatërvan” të Prizrenit.

Rastet janë shtuar sidomos gjatë ditëve të fundit, sa është duke u mbajtur festivali ndërkombëtar ‘DokuFest’. Vizitorët për të siguruar biçikletat e tyre i lidhin për rrethojë të shtatores së dëshmorit, Xhevat Berisha.

Asamblisti i Kuvendit Komunal në Prizren, Azzam Dita thotë se vendosja e biçikletave rreth shtatores, është fyrje për dëshmorin e kombit Xhevat Berisha.

“Xhevat Berisha nuk e meriton një trajtim të tillë”, thotë Dita për TV “Besa”. Sipas tij, institucionet përkatëse duhet të marrin masa që të mos i lejojnë vizitorët t’i vendosin biçikletat në shtatoren e dëshmorit të kombit, Xhevat Berisha.

“Duhet të merren masa dhe të ndërpritet menjëherë kjo praktikë e keqe e vizitorëve”, thotë Dita.

Qytetarët shprehen të revoltuar me këtë veprim të vizitorëve. Ata thonë se dëshmorët e kombit duhet të respektohen e jo të nënçmohen. Arben Gashi thotë se Policia e Kosovës nuk duhet të lejojë që hapësira e shtatores e Xhevat Berishës, të shndërrohet në vendparking për bicikleta.

“Policia duhet t’i konfiskojë këto biçikleta dhe t’i ndëshkojë pronarët e tyre”, thotë ai për “PrizrenPress”.

Gashi shprehet i revoltuar edhe për mos reagimin e shoqatave të dala nga lufta e UÇK-së.

”Është turp që përfaqësuesit e luftës deri më tash nuk kanë reaguar për këtë fenomen. Nuk e di se cilat vlera i mbrojnë ato organizata, kur nuk reagojnë në rastet kur fyhen dëshmorët. A ka fyrje më të madhe që parkohen biçikletat për shtatore të dëshmorit. Po dëshmohet se ato shoqata të luftës po i shikojnë vetëm interesat e veta personale dhe se nuk janë të interesuar për t’i mbrojtur vlerat e luftës”, thotë Gashi. / PrizrenPress.com/