Gjykata Kushtetuese tashmë ka dëgjuar argumentet e PDK’së dhe Bllokut Opozitar për seancën konstituive të 17 korrikut dhe pritet të dalë me vendimin e saj për ta qartësuar këtë çështje dhe për ta zhbllokuar vendin nga ngërçi politik.

Ismet Beqiri, Sekretar i Përgjithshëm i LDK’së, beson se vendimi do të jetë në favor të tyre.

Por, çfarë nëse ndodh e kundërta dhe vendimi i Gjykatës Kushtetuese i jep të drejtë PDK’së? A do ta votojë Blloku kandidatin e PDK’së për Kryeparlamentar, në mënyrë që t’i hapë vetes rrugë për krijimin e Qeverisë nga LDK-AAK-Nisma, në raundin e dytë?

“Së pari, ne besojmë thellë se të gjitha argumentet juridike janë në anën tonë dhe Gjykata mbi bazën e tyre do të vendosë në favorin tonë”, ka deklaruar Ismet Beqiri për politiko.net.

“Kurse, ne nuk hyjmë në kurrfarë ‘pazaresh’ me askënd (me PDK, në këtë rast) për kurrfarë postesh.”
“Ne si Bllok deri në fund do t’i shkojmë marrëveshjes sonë. Tjerat janë spekulime dhe të pavërteta”, ka thënë Ismet Beqiri për politiko.net.

Partia Demokratike e Kosovës e mirëpret vendimin e Gjykatës Kushtetuese të Republikës së Kosovës në rastin KO119/14, në lidhje me kërkesën e 30 deputetëve për të shqyrtuar kushtetutshmërinë e vendimit për zgjedhjen e Kryetarit të Kuvendit të Republikës së Kosovës në seancën konstituive të datës 17 Korrik 2014.
Partia Demokratike e Kosovës e vlerëson këtë vendim si një akt të vendosjes së kushtetutshmërisë në vend dhe si një tregues të fuqishëm se vullneti i qytetarëve të Kosovës, i shprehur në zgjedhjet e përgjithshme të datës 8 qershor, është suprem dhe i patjetërsueshëm.

“Gjithashtu, u bëjmë thirrje të gjitha palëve që ta respektojnë këtë vendim meritor, në mënyrë që t’i hapet rrugë konstituimit të Kuvendit dhe formimit të Qeverisë së Republikës së Kosovës”, thuhet në reagimin e PDK-së.

Në këtë kontekst, Partia Demokratike e Kosovës, thotë se si prijëse e proceseve shtetformuese në Republikën e Kosovës, do të punojë intensivisht që sa më shpejtë të formohen institucionet e reja në Kosovë, në përputhje me mandatin që ka marrë nga qytetarët e Kosovës në zgjedhjet e përgjithshme.

“Partia Demokratike e Kosovës mbetet e përkushtuar që të implementojë Misonin e Ri për zhvillimin ekonomik të Kosovës, hapjen e vendeve të reja të punës dhe procesin e pandalshëm të integrimeve evropiane. Edhe në mandatin e ardhshëm, fryma e bashkëpunimit dhe e qasjes gjithëpërfshirëse në proceset madhore për vendin tonë, do të jenë bosht i angazhimit dhe filozofisë politike të Partisë Demokratike të Kosovës”, vazhdon reagimi i PDK-së.

Me këtë rast, Partia Demokratike e Kosovës shpreh mirënjohje për punën profesionale të ekipit të saj, të udhëhequr nga akademik Arsim Bajrami. /Telegrafi/

Kryetari i Gjykatës Themelore në Prizren, Ymer Hoxha është krenuar me punën që institucion ka bërë në gjashtëmujorin e parë të këtij viti. Ai tha se në këtë periudhë kohore është zvogëluar numri i lëndëve.

“Gjatë kësaj kohe kemi mbyllura edhe katër raste të korrupsionit, prej 18 raste sa ka pranur”, tha Hoxha,

Edhe pse gjykata vazhdon të veprojë me kapacitete të kufizuara, sipas tij, efikasiteti i gjyqtarëve gjatë gjashtë muajve të parë të vitit ka qenë 116%, që është dëshmi e përkushtimit të stafit të Gjykatës Themelore në Prizren.

“Gjykata vazhdon të ketë nevojë edhe për pesë gjyqtarë shtesë si dhe dy përkthyes për të shtuar nivelin e efikasitetit”, tha Hoxha.

Ai tha se përveç rezultateve pozitive në punën e vet, Gjykata Themelore është duke punuar intensivisht edhe në rritjen e komunikimit me qytetarët.

Për këtë qëllim, gjykata sot ka promovuar produktet e reja të cilat kanë për qëllim rritjen e transparencës dhe forcimin e komunikimit me qytetarët:Strategjia e Komunikimit e Gjykatës, fletushka “Si t’i qasemi gjykatës?” dhe video sporti “Gjykatë e hapur”.

“Strategjia e Komunikimit vë në zbatim planet konkrete për të nxitur transparencën, të krijoj një lidhje të fuqishme me qytetarët dhe të vë në përdorim mjetet dhe teknologjitë e reja për të forcuar lidhjen e gjykatës me qytetarët”.

Produkti i dytë që u promovua sot është fletushka “Si t’i qasemi gjykatës?”, që përmban informacione relevante për punën e gjykatës dhe të drejtat e qytetarëve. Së treti, gjykata ka prezantuar spotinë shkurtër televiziv, që ka përmbajtje informative për punën e gjykatës dhe to të transmetohet në televizionet lokale të Prizrenit, duke synuar edukimin e qytetarëve për të drejtat e tyre karshi gjykatës.

“Këto janë vetëm produktet e para të komunikimit të cilat gjykata i ka zhvilluar në bashkëpunim me organizatën EC Ma Ndryshe, si pjesë e projektit “Lidhja e komunitetit me shërbyesit e drejtësisë”, që përkrahet nga USAID dhe mbikëqyret nga ATRC”, tha Hoxha. /PrizrenPress.com/

I dyshuari për vrasjen e Ruzhdi Shaqirit, Gani Geci i është dorëzuar EULEX-it.

Burime të Kohës Ditore kanë treguar se ish-deputeti para pak çastesh i është dorëzuar organeve të misionit evropian të sundimit të ligjit në Kosovë, me kusht që të mos ketë punë me gjyqësorin kosovar.

Dorëzimi i tij pritet të konfirmohet në orët në vazhdim, përcjell koha.net.

Ruzhdi Shaqirit ishte vrarë në qytetin e Skenderajt, ndërsa Prokuroria Themelore në Mitrovicë, kishte kërkuar nga gjyqtari i procedurës paraprake lëshimin e urdhër arrestit ndërkombëtar, për ish deputetin e Kuvendit të Kosovës, Gani Geci.

Ruzhdi Shaqiri, dyshohet se ishte vrarë në një restorant në qytetin e Skenderajt, dhe atë pas një fjalosje që kishte pasur me tashmë të dorëzuarin Gani Geci.

Që nga momenti i vrasjes, familjarët e Gani Gecit, deklaronin se Ganiu nuk gjendej në Kosovë, dhe se për shkak të pasigurisë në burgje të Kosovës, ai është larguar në Zvicër apo në Gjermani.

Partia Demokratike e Kosovës thotë se e respekton vendimin e Gjykatës Kushtetuese e cila sot vendosi në favor të kësaj partie për kontestimin e zgjedhjes së Isa Mustafes kryeparlamentar.

Sipas nënkryetarit të PDK-së, Hajredin Kuçi, vendimi i Kushtetueses ishte i drejt, dhe se PDK- nuk ka pasur dilema në të drejtën sic thotë ai legale që buron nga Kushtetuta e Republikës dhe nga legjitimiteti i votës së qytetarëve të vendit.

“Edhe ditën që është arritur ajo marrëveshje, ua kam thënë me bindje profesionale dhe qytetare këtë përfundim edhe para mediave, edhe në emisione, por edhe në pjesën e seancës konstiutive. Kam qenë i bindur si jurist, edhe si Kryetar i Komisonit të Kushtetutës dhe nuk kam thyer kurrizin në dobi partiake, pastaj kam qenë I heshtur për t’I dhënë mundësi gjykatës ta thotë fjalën e vet”, është shprehur Kuçi për Indeksonline.

Kuçi thotë se pret të ketë vendime legale dhe demokratike nga të gjithë pa përjashtim, në ndërtimin e institucioneve të dalura nga zgjedhjet e 8 Qershorit, duke dhënë përgjegjësi të lartë për premtimet e dhëna para qytetarëve.

Ai ndër tjerash thotë se edhepse Kushtetuesja ka vendosur në favor të PDK-së, kjo parti nuk do të mbajë inate.

“PDK nuk mbanë inate, do të sillet me përgjegjësi, me urtësi dhe mencuri dhe tolerancë, ndaj cdo individi dhe subjekti.”
Nënkryetari I PDK-së ka shtuar se faza e dilemave ka përfunduar dhe që sipas tij, tani është koha e vendimeve në dobi të qytetarëve dhe vendit me të gjithë akterët politikë dhe shoqërinë civile.

“Ditët e kaluara kanë qënë një sfidë për demokracinë e re në Kosovë, në të cilën, sjelljet ishin racionale, dhe kemi fituar një përvojë më shumë për tash dhe situatat e ngjashme që mund të vijnë”, ka thënë Kuçi.

Ish-Kryetari i Kuvendit të Kosovës, Jakup Krasniqi e ka cilësuar si ndërhyrje në punët e Parlamentit vendimin e Gjykatës Kushtetuese e cila shpalli jokushtetuese zgjedhjen e Isa Mustafës Kryetar të Kuvendit.

Ai ka thënë për Gazetën Express se kur të publikohet vendimi në tërësi do të ketë mundësi të thotë më shumë sa i përket të drejtës së Gjykatës Kushtetuese për të ndërhyrë në punët e Parlamentit.

“Realisht, është një ndërhyrje e një institucioni në një institucion tjetër. Sigurisht, kjo nuk është e shëndetshme për demokracinë në Kosovë. Por, duhet ta shikojmë në tërësi vendimin e pastaj kur kemi në tërësi sigurisht se do ta komentoj këtë vendim të Gjykatës Kushtetuese”, ka thënë Krasniqi.

Ka reguar koalicioni LDK-AAK-NISMA pas publikimit të vendimit të Gjykatës Kushtetuese.

“Koalicioni LDK-AAK-NISMA e ka marrë në konsideratë njoftimin për media nga Gjykata Kushtetuese dhe është në pritje të publikimit të tekstit përfundimtar”, thuhet ne reagimin e Bllokut.

“Blloku është i bindur që e drejta për kandidim i është njohur koalicionit dhe në këtë mënyrë është hapë dera e vetme për krijim të institucioneve të reja”. /PrizrenPress.com/

Gjykata Kushtetuese i ka dhënë të drejt kërkeses së Partisë Demokraike të Kossovës.

Sipas vendimit të marrë sot, Kushtetuesja ka vendosur në favor të PDK-së.

Vendimi i plotë
Të enjten, më 21 gusht 2014, Gjykata Kushtetuese e Republikës së Kosovës mbajti këshillime dhe votoi në rastin KO119/14, lidhur me vlerësimin e kushtetutshmërisë së Vendimit për zgjedhjen e Kryetarit të Kuvendit të Republikës së Kosovës, Nr. 05-V-001, të votuar nga 83 deputetë të Kuvendit, më 17 korrik 2014.
Kërkesa u parashtrua në Gjykatë, më 18 korrik 2014, nga Xhavit Haliti dhe 29 deputetë të tjerë të Kuvendit të Republikës së Kosovës.

Gjykata Kushtetuese vendosi si në vijim:

I. njëzëri, të DEKLAROJË kërkesën të pranueshme;
II. me shumicë votash, TË KONSTATOJË që:
a. mbledhja dhe procedura e ndjekur pas pezullimit të seancës konstitutive, më 17 korrik 2014, nga Kryesuesja, për shkak të mungesës së kuorumit, kanë shkelur nenin 67 (2) në lidhje me nenin 64 (1) të Kushtetutës dhe Kreun III të Rregullores së punës që zbaton këto nene;
b. Vendimi Nr. 05-V-001, i 17 korrikut 2014, është jokushtetues, si për nga procedura e ndjekur, ashtu edhe për nga përmbajtja, pasi nuk ishte grupi më i madh parlamentar ai që propozoi Kryetarin e Kuvendit dhe, rrjedhimisht, është i pavlefshëm;
c. Seanca konstituive e Kuvendit, që ka filluar më 17 korrik 2014, nuk është realizuar plotësisht, konkretisht nuk janë zgjedhur Kryetari dhe nënkryetarët e Kuvendit. Rrjedhimisht, Kuvendi duhet ta përfundojë seancën konstitutive duke zgjedhur Kryetarin dhe nënkryetarët në pajtim me nenin 67 (2) në lidhje me nenin 64 (1) të Kushtetutës dhe me Kreun III të Rregullores së punës që zbaton këto nene dhe në pajtim me këtë Aktgjykim.

Teksti i plotë i Aktgjykimit do t’u dorëzohet palëve, do të postohet në ueb-faqen e Gjykatës dhe do të publikohet në Gazetën Zyrtare në kohën e duhur.