Të paktën edhe 20 persona pritet të arrestohen ditëve në vazhdim si të dyshuar për terrorizëm.

Në mesin e tyre janë drejtues të Lëvizjes Islamike Bashkohu të Fuad Ramiqit dhe të paktën katër imam xhamish, që dyshohen për veprat penale të nxitjes së urrejtjes, rekrutim për të luftuar me organizata terroriste dhe veprime tjera, ka mësuar “Koha Ditore”.

Këta imamë me ndikim në Kosovë që janë nga Prishtina, Gjilani, dhe Mitrovica dyshohen se kanë lidhje direkte me organizatat terroriste ISIS dhe Al Nusra.

“Policia e Kosovës i ka nën vëzhgim të dyshuarit. Ata pritet të arrestohen gjatë këtyre ditëve. Urdhëresat nga Gjykata Themelore e Prishtinës janë lëshuar”, ka thënë një burim i gazetës…/koha ditore/

Nënkryetarja e LDK-së Teuta Sahatqia, e ka akuzuar PDK-në për bllokimin e formimit të institucioneve të reja.

Ajo ka thënë se Gjykata Kushtetuese i ka dërguar në “pushim të dhunshëm” 12o deputetë dhe sipas saj, kjo gjykatë do të duhej sa më shpejt ta lirojë Kuvendin të funksionojë dhe ta formojë Qeverinë.

Sahatqija ka përjashtuar çdo mundësi për bashkëqeverisje me PDK-në, duke u shprehur e bindur se institucionet e reja do t’i formojë koalicioni paszgjedhor LDK-AAK e Nisma.

Ajo ka deklaruar se ky koalicion e ka shumicën e votave në kuvend dhe se për cdo ditë është duke u forcuar.

Ministri në detyrë i Punëve të Jashtme, Enver Hoxhaj, para pak minutash ka bërë publik një lajm të mirë për Kosovën.

Hoxhaj, në një postim në Facebook, ka bërë me dije se Ishujt Solomon sapo kanë marrë vendimin për njohjen e Kosovës shtet të pavarur.

“Një tjetër lajm i mirë për Kosovën. Ishujt Solomon sapo e kanë njohur pavarësinë e Kosovës duke u bërë vendi i 108 që e marrin këtë vendim. Urime qytetarëve të Kosovës”, ka shkruar Hoxhaj. /Telegrafi/

Pamjet e vuajtjeve të komunitetit Jezidi nga pjesëtarët e ISIS-it në Irak, po e kthejnë 15 vite mbrapa Gramoz Berishën nga Suhareka. Ai i kishte mbijetuar masakrës se forcave serbe në vitin 1999, kur u vranë mbi 50 anëtarë të kësaj familjeje.

“Më 29 mars 1999 ka ndodh masakra ma e madhe në Suharekë. Këtu janë vra 50 anëtar të familjes. Kemi shpëtuar vetëm unë, nëna dhe gruaja e axhës”, thotë Berisha për Klan Kosova.

Atij i kujtohen edhe kolonat e gjata të shqiptarëve që dëboheshin nga shtëpitë e tyre. Ndërsa, kujtimet e tmerrit që përjetoi në lokalin fatal të Suharekës, ai ende i ka të freskëta. Madje, Gramozi nuk dëshiron as ta shoh këtë vend në qytetin e tij. Prandaj, dëshiron të shpërngulet për të jetuar në Prishtinë.

Për të mos përjetuar të tjerët vuajtjet e kosovarëve në luftë, ai u lutet bashkëkombësve të tij të mos shkojnë për të luftuar në Irak e Siri.

“Ju kisha lutur, mos të ndodh diçka si familjes sonë, si kemi vuajtur; mos të ndodh kjo në asnjë vend të botës, e aq më pak që ato vrasje të bëhen prej shqiptarëve”, thotë Berisha.

Dhjetëra kosovarë i janë bashkuar grupit terrorist të ISIS-it për të luftuar në vendet e Lindjes së Mesme. Më i njohuri prej tyre është Lavdrim Muhaxheri, i cili ka postuar foto në rrjete sociale duke i prerë kokën një të mituri.

16 vjeqarja Rebeka Rexhepi, vajza e cila vuante nga sëmundja e kacerit, sot është shëruar plotësisht.

Këtë e ka bërë të ditur nëna e saj Xheraldina, e cila përmes një shkrimi në rrjetin social Facebook, ka falënderuar të gjithë ata që ndihmuan për shërimin e saj.

“My baby is kancer free!!!!!!! Miq, Re Beka sot zyrtarisht është e shëruar”, ka shkruar në Facebook.

Ajo ka thënë se kanceri nuk është lojë dhe që nuk duhet mashtruar, përderisa ka treguar se si familja e saj së bashku me të tjerët ka fituar betejën e madhe, por që lufta vazhdon.

Xheraldina ka treguar se ajo dhe vajza e saj Rebeka do të kthehen shumë shpejt në shtëpi dhe se të gjithë se bashku do të festojnë për shërimin e vajzës së saj.

Sipas një njoftimi të misionit evropian për sundim të ligjit, EULEX, Prokuroria Speciale e Kosovës ka ngritur aktakuzë ndaj pesë personave me dyshimin se kanë kryer krime lufte dhe vrasje të rëndë.

Njoftimi i EULEX-it thotë se aktakuza është bërë në Gjykatën Themelore të Mitrovicës, ndërsa njëri nga të pandehurit akuzohet për nxitje për të kryer krime të luftës “në prill të vitit 1999”.

“Po ashtu, ai dhe një i pandehur tjetër akuzohen për nxitje në bashkëkryerje për të kryer veprat e vrasjes së rëndë dhe tentim vrasjes së rëndë në shkurt të vitit 2000. Tre të pandehurit e tjerë akuzohen për veprat e vrasjes së rëndë dhe tentim vrasjes së rëndë në shkurt të vitit 2000”, thuhet në fund të njoftimit të EULEX-it.