Trembëdhjetë vite më parë ishte vrarë Tahir Zemaj, bashkë me djalin e tij Enisin si dhe kushëririn Hasanin. Pas luftës ka pasur edhe dhjetëra vrasje të tjetra të cilësuara si politike, por askush s’është gjetur fajtor dhe dënuar. Bashkëluftëtari i Tahir Zemajt, Anton Quni thotë se Policia, Prokuroria dhe Gjykatat sabotuan dhe neglizhuan zbardhjen e vrasjeve politike të pasluftës.

Deputeti i LDK’së, Anton Çuni drejton gishtin kah organet e drejtësisë, të cilat i lë fajtore se pse nuk e kanë zbardhur pothuajse asnjë vrasje politike të pasluftës.

Sipas këtij deputeti, Policia, Prokuroria dhe Gjykata kanë sabotuar dhe kanë neglizhuar zbardhjen e këtyre vrasjeve.

“Po, po ka pasur dhe e kuptoj si neglizhencë, e cilësoj si sabotim si dhe për shkak të obstruksioneve të ndryshme etj. Por, mendoj se është momenti i fundit, do të thotë pas një dekade, që organet të vetëdijesohen dhe të fillojnë të kryejnë detyrën”, ka thënë Quni, në një intervistë, për Express, të shtunën.

Ndryshe, sot, është mbajtur një Akademi përkujtimore në 13 vjetorin e vrasjes së Tahir Zemajt, i cili kishte qenë ushtar i Forcave të Armatosura të Republikës së Kosovës (FARK), të udhëhequra nga Qeveria në ekzil e Kosovës.

Ndërkohë, tri vite para Zemajt, më 21 shtator 1998, ishte vrarë në Tiranë udhëheqësi i FARK’ut, Ahmet Krasniqi, Ministër i Mbrojtjes në Qeverinë e Bujar Bukoshit. Pas luftës, përveç Zemajt, janë vrarë edhe disa zyrtarë të tjerë të LDK’së në mesin e tyre edhe Xhemajl Mustafa, Besim Dajaku, Haki Imeri, Bekim Kastrati etj.

Quni, thotë se është koha e fundit që Policia, Prokuroria dhe Gjykata të zbardhin vrasjet e pasluftës.

“Të gjitha institucionet përgjegjëse për ushtrimin e drejtësisë duhet të angazhohen në maksimum në zbardhjen e të gjitha rasteve pa marrë parasysh se të çfarë karakteri janë”.

Sipas tij, është e qartë se disa prej vrasjeve të pasluftës kishin motive politike, por përmend edhe ndikimin e Beogradit në këto vrasje.

“Por, prioritet të veçantë duhet t’iu jepet vrasjeve, të cilat janë me motive politike. Ka shumë argumente që vrasjet e pasluftës janë të motivuara politikisht. Megjithëse, po ashtu, ekziston dyshimi se burimin e kanë diku në Beograd”, ka shtuar ai.

Ai thotë se nuk do të përfshihet në debatin duke përmendur emra dhe supozime, pasi këto nuk i ndihmojnë zbardhjes së vrasjeve politike.

“Për t’i larguar të gjitha mëdyshjet që i kanë qytetarët në lidhje me këto vrasje – atëherë të gjitha institucionet përgjegjëse duhet të jenë në nivel të detyrës dhe të gjithë të implikuarit në këto raste të dalin para drejtësisë dhe të marrin dënimin e merituar”, ka shtuar ai.

Daut Xhemajli, ish i burgosur politik, thotë se shteti i Kosovës i cili që nga viti i ardhshëm do të fillojë të kompensojë ish të burgosurit politikë, nuk u ka gjë borxh këtyre personave për burgimet dhe vuajtjet e tyre, sepse ata “kanë kryer vetëm një pjesë të detyrës që ka patur secili qytetar ndaj Atdheut të robëruar”.

Xhemajli thotë se paraprakisht duhet të sqarohet një çështje: a do të duhej që këta ish të burgosur të kompensohen për dënimet e padrejta ndaj tyre dhe kush do të duhej ta bënte këtë kompensim?

“Ish të burgosurit politikë nuk kanë kërkuar kompensim të tillë nga shteti i Kosovës, por as shteti i Kosovës nuk u ka borxh asnjë cent këtyre personave”, thotë ai, transmeton rajonipress.

Sipas tij, asnjërit prej ish të burgosurve politikë, në kohën kur janë arrestuar dhe janë dënuar, nuk u ka shkuar mendja që burgu i tyre një ditë do të kompensohet nga shteti për të cilin ata u sakrifikuan.

“Ata kanë punuar dhe vepruar për lirinë e Atdheut të tyre dhe i vetmi shpagim për këtë kontribut të tyre do të ishte liria e vendit të tyre, sepse me këtë do të kompensoheshin të gjitha vuajtjet dhe sakrificat. Ish të burgosurve politikë, që të gjithëve pa asnjë përjashtim, duke filluar nga baca Adem (Demaçi) e deri te i burgosuri i fundit politik… nuk ka asnjë çmim që ua kompenson vuajtjet e tyre dhe të familjarëve të tyre; nuk ka çmim dhe nuk mund të ketë çmim që ua kompenson humbjet e tyre fizike e psikike; dhe, nuk ka çmim që ua kompenson humbjet e perspektivave pas burgosjes si dhe pengesat tjera për zhvillimin profesional dhe politik të tyre dhe të familjarëve të tyre”.

Sipas tij, nëse u ka dikush borxh, ajo është Serbia si ekzekutore dhe trashëgimtare e ish-Jugosllavisë.

“Të burgosurit politik vetëm Serbinë dhe mekanizmat e saj i llogaritin përgjegjëse për ndjekjen, dënimin dhe persekutimin e tyre dhe të familjarëve të tyre. Ish të burgosurit nuk e kanë kërkuar këtë kompensim nga Kosova dhe as e kanë miratuar e as e kanë kontestuar shumën prej 16.70 eurove që është caktuar nga Qeveria e Kosovës për kompensimin e tyre për një ditë të mbajtur burg”.

Xhemajli tha se një pjesë e madhe e të burgosurve që tani janë gati raste sociale, janë falënderues për këtë vendim të Qeverisë së Kosovës, si një shpërblim “modest” për kontributin e tyre për lirinë e Kosovës, pavarësisht se nuk janë të kënaqur me këtë liri ende të cunguar të saj.

Xhemajli e quan marketing politik deklarimin e Elmi Reqicës dhe të Jakup Krasniqit se do t`i dhurojnë këto mjete për nevoja humanitare.

“Ata sikur i harruan shokët e tyre, diku atje poshtë, të cilët ballafaqohen me vështirësi të mëdha jetësore për veten dhe familjet e tyre. Më erdhi keq sepse u fol nga pozitat të cilat i kanë marrë edhe nga kontributi i shokëve që sot janë në gjendje të keqe ekonomike”.

Sipas tij, baca Adem edhe të gjithë shokët e tij duhet t’i marrin këto mjete, e pasi t`i marrin, të ulen e të mendojnë se ku dhe në çfarë fondi do t`i derdhin si donatorë.

“Është e qëlluar ideja e themelimit të një Fondi, ku ish të burgosurit politikë, personalisht, pa pompozitet dhe pa zhurmë do të derdhin shuma të caktuara, sipas vullnetit të tyre të deklaruar nga ky kompensim, apo burimet tjera të tyre (ka nga disa ish të burgosur politikë që kanë burime të mira financiare). Prandaj, i takon Shoqatës së ish të burgosurve politik konkretizimi i një ideje të tillë e cila është shumë humanitare dhe në harmoni me idealin e shenjtë të të burgosurve politik”, ka thënë Xhemajli.

Edhe drejtori i Turizmit dhe Zhvillimit Ekonomik në Prizren, Samir Hoxha, ka vlerësuar pozitivisht rënditjen e qytetit të Prizrenit nga MSN-ja në mesin e më të mirëve në botë.Ai tha se ky epitet do të jetë edhe një sinjal i mirë për investitorët e huaj dhe shtimin e turizmit në Prizren.

“Bukuria e qytetit të Prizrenit është meritë e qytetarëve të Prizrenit”, tha Hoxha për TV Opinion.

Sipas tij, qyteti i Prizrenit, gjatë këtij viti me angazhimin e përbashkët do të mund të pres edhe më shumë turistë.

“Projektet e filluara gjatë vitit që e lamë pas do të vazhdojnë, ndërsa pritet të realizohen edhe shumë projekte me qëllim të zhvillimit të turizmit”

“Prizreni çdo ditë e më shumë vizitohet si një atraksion turistik në të cilin dominon trashëgimia kulturore”./PrizrenPress.com/

Arrestimi i shefit të sigurimit shtetëror kroat, Josip Perovic, mund të zbulojë përfshirjen e Kriminelit Arkan në këto vrasje.

Një ish-pjesëtar i sigurimit shtetëror jugosllav, i cili kohë më parë ka folur për “Blic”, emrin e Arkanit e kishte ndërlidhur me vrasjen e Jusuf e Bardhosh Gërvallës e Kadri Zekës dhe të emigrantit kroat Stjepan Durekovic.

Ish-shefi i policisë sekrete të Jugosllavisë dhe Kroacisë Josip Perovic është liruar nga paraburgimi, por një gjykatë kroate ia ka konfiskuar dokumentacionin dhe ia ka ndaluar që të largohet nga vendlindja.

Avokati i tij, Ante Nobilo, ndërkaq, ka thënë se do t’i kundërvihet vendimit eventual për ekstradimin e Perovic në Gjermani, ku akuzohet për vrasjen e emigrantit kroat Stjepan Durekovic. Ndërkohë, Nobilo ka mbrojtur klientin e tij, duke thënë se shërbimet kroate nuk e kanë kryer këtë vrasje. Për këtë ai ka akuzuar Serbinë dhe Malin e Zi.

Avokati Bernd Von Hajnstel, i cili ka qenë gjykatës kryesor në procesin kundër Krunoslav Prates për vrasjen e Durekovic, është i bindur se Perkovic është pjesëmarrës në vrasje.

“Në fund të procesit kemi qenë të bindur se Perkovic ka qenë pjesëmarrës në vrasjen e Durekovic. Perkovic ka qenë ai që ka dhënë urdhrin dhe që i ka pasur të gjitha në dorë”, ka thënë ai për Deutsche Ëelle.

Ndërkohë mediat serbe shkruajnë se arrestimi i ish-shefit të UDB’së në Kroaci Josip Perovic mund të çojë drejt zbulimit se cili ishte roli i Zeljko Raznatovic-Arkan në likuidimin e kundërshtarëve të regjimit të Ish-Jugosllavisë.

Sipas “Blic”, askush në Serbi nuk ka dhënë përgjegjësi për vrasjet e emigrantëve serbë e as nuk është nisur ndonjë hetim. Por, tashmë dihet roli i kriminelëve serbë, siç është Arkan, i cili ka vrarë në emër të sigurimeve të armatës jugosllave (KOS) dhe UDB’së.

Shefi i dikurshëm i shërbimit shtetëror jugosllav Stane Dolanc, kishte thënë se “Arkan vlen më shumë se sa krejt shërbimi”.

Një ish-pjesëtar i Sigurimit Jugosllav, ka folur në kushte anonimiteti për Arkanin dhe përfshirjen e tij në likuidimin e shqiptarëve.

“Besimin që e kishte fituar në qarqet e udbashëve e ilustron detyra që e kishte marrë atëherë nga sigurimi shtetëror, që të neutralizojë një çerdhe të fuqishme të emigracionit në rrethinën e Shtudgartit. Dy javë është ushqyer me konserva dhe ka fjetur në kulm të ndërtesës ku është dashur të takohen tre terroristët. Ndërkohë që shërbimin e kishte njoftuar se në objekt ndodhen 15 shqiptarë dhe se ky është një rast i mirë”, ka thënë ky oficer.

Sipas këtij, ish-sigurimsi, Arkan e kishte përfunduar me sukses misionin. Siç, dihet më 1982, në afërsi të Heilbronnit të Gjermanisë Perëndimore, ishin vrarë Jusuf e Bardhosh Gërvalla dhe Kadri Zeka. Dyshohet se vrasja është organizuar nga shteti jugosllav por dorasit nuk janë zbuluar kurrë. Ndërsa për atentatin e trefishtë tashmë ka shumë versione.

Rreth përfshirjes së Arkan në këto vrasje kishte folur edhe zëvendëspresidenti i INTERPOL’it Budimir Babovic, i cili ka thënë se është folur shumë që Arkan ka qenë ekzekutor i ngarkuar nga shërbimi shtetëror për eliminimin e kundërshtarëve të ish-regjimit.

“Ai (Arkan) edhe publikisht është lavdëruar dhe i ka treguar edhe revolet që ka marrë nga sigurimi shtetëror nga ish zyrtarët e lartë të shtetit”.

Arkan është vrarë në më 15 janar të vitit 2000 në një hotel në Beograd.

Lëvizja Vetëvendosje ! në Prizren, gjatë vitit të kaluar ka zhvilluar një varg aktivitetesh të ndryshme politike. Kryetari Arbërë Rexhaj thotë se takimet janë zhvilluar me qytetarë, tek tubimet e mëdha, nga aksionet politike tek denoncimet publike, nga konferencat kundër keqpërdorimit të parasë publike deri te konferencat kundër keq-qeverisjes lokale në Prizren.

“Nuk jemi të kënaqur me rezultatin e zgjedhjeve në Prizren, mirëpo këto zgjedhje ishin të para për ne, të cilat dallonin nga zgjedhjet parlamentare. Ne gjatë tërë kohës artikulonim alternativën qendrore dhe qytetarët e përvetësonin më shpejt sepse atë e bëmë me vite, kurse sa i përket alternativës lokale të cilën e prezantuam në komunën tonë nuk mundëm ta shtynim dhe ta depërtonim gjithandej nëpër lagje dhe fshatra të Prizrenit”.

“Ne nuk ishim të barabartë me partitë tjera politike, gjithsejtë fushata jonë kushtoi 9 mijë euro, ndërsa subjektet tjera politike harxhuan pashembull shumë. Ne ishim transparent sa i përket financave tona, ndërsa subjektet tjera harxhonin marramendësisht shumë duke mos i deklaruar e duke mos i dhënë llogari askujt”.

“Në këto zgjedhje u vodh më pak, por u ble më shumë, klientela aktive e subjekteve politike bëri që vullneti i qytetarëve të mos shkonte tek alternative e vërtetë. Koalicionet parazgjedhore të partive tjera, me partitë e minoriteteve në Prizren, ardhja e kryeministrave të tjerë, blerja dhe shantazhi bëri që të mos vinte ndryshimi”.

“Në javët e muajt në vazhdim VV, qendra në Prizren do të punojë me intensitet të shtuar që nëpërmjet ristrukturimit të shtojë kapacitetet e saja organizative dhe intelektuale gjithandej nëpër lagje dhe fshatra të qytetit tonë”.

“Si opozita më e fuqishme ashtu siç ka qenë jashtë institucioneve, tanimë këtë opozitë do ta shtojë edhe brenda asamblesë së qytetit. Asamblistët tanë tani në këtë institucion do të jenë zë i fuqishëm në interes dhe në dobi të qytetarëve prizrenas. Ne do të mundohemi që me të gjitha mjetet tona demokratike të ndalim çdo veprim që bie ndesh me ligjin. Do të denoncojmë publikisht të gjitha aferat korruptive dhe kriminale brenda institucioneve të Prizrenit. Poashtu do të përpiqemi që në përputhje me alternativën tonë lokale të shtyjmë çështje programatike të cilat i kemi prezantuar gjatë fushatës gjithandej nëpër qytetin tonë”/PrizrenPress.com/

Takimi i 21-të në mes të kryeministrit të Kosovës dhe atij të Serbisë në kuadër të normalizimit të marrëdhënieve mes të dy shteteve pritet të mbahet më 17 janar.

Qeveria e Kosovës ka paralajmëruar se dialogu në mes të Prishtinës dhe Beogradit do të vazhdojë edhe në vitin 2014. Ndërkohë që, opozita, e cila e ka përkrahur këtë proces, ka filluar të jetë skeptike. Madje zëvendëskryeministri i Kosovës, Hajredin Kuçi, ka paralajmëruar për “Epokën e re” se ky proces mund të vazhdojë edhe në vitin 2015 nëse është nevoja dhe do të përmbyllet me një traktat paqeje në mes të dy shteteve. “Dialog do të ketë edhe në vitin 2014. Kosova nuk do ta pengojë dialogun. Dialog do të ketë edhe në vitin 2015. Dialogu nuk është një proces që fillon dhe mbaron me një datë të caktuar. Sa më shpejt që përfundon dialogu është mirë, por ky proces duhet të përfundojë me një traktat paqeje”, është shprehur Kuçi.
Kurse atyre që ka filluar t’u humbet durimi me këtë proces, Kuçi i ka porositur se politika kërkon durim dhe kondicion, duke shtuar se askush nuk ka pritur që dialogu me Serbinë do të përfundojë brenda pak ditëve apo javëve. “Duhet ta kemi parasysh se politika kërkon kondicion dhe politika nuk është për një javë apo dy javë. Po ashtu, duhet të dimë se dialogu është një proces, e jo një akt. Askush nuk e ka menduar se dialogu fillon sot dhe përfundon nesër. Është një proces i cili do të ndikojë dhe të vazhdojë. Dhe natyrisht se nuk duhet të kemi iluzion se do të përfundojë në këtë mandat, sepse ky proces do të vazhdojë edhe më tutje, pasi kemi të bëjmë me raporte shekullore të konfliktit”, ka thënë Kuçi.

Megjithatë, Kuçi ka deklaruar se ky proces nuk mund ta ketë të njëjtën vëmendje që ka pasur gjatë vitit që po e lëmë pas. Sipas tij, afrimi i zgjedhjeve dhe i fushatës elektorale mund ta zhvendosë vëmendjen më shumë te çështjet vendore. “Fushata elektorale në Kosovë, njëkohësisht fushata eventuale që mund të jetë në Serbi, do ta vë fokusin më shumë në çështje vendore sesa në ato ndërkombëtare. Dialogu nuk është një çështje me të cilën duhet të matet fuqia apo forca politike në Kosovë, por fuqia e kombit dhe e shtetit të Kosovës përballë të tjerëve”, është shprehur Kuçi. Ai ka thënë se ky proces i dialogut është një detyrë e cila duhet të përfundojë. “Mendoj se dialogu është detyrë që duhet ta kryejmë. Natyrisht se jemi falënderues për kontributin që e ka dhënë AAK-ja për këtë proces dhe për mbështetjen politike që i ka dhënë në Kuvend LDK-ja”, ka thënë Kuçi. Ai ka treguar se dialogu ka qenë një proces që ka dhënë rezultate të veçanta, sidomos në integrimin e veriut. “Ka qenë rruga më e mirë për integrimin e veriut në mënyrë paqësore dhe të dinjitetshme. Po ashtu, dua të shtoj se dialogu ka qenë edhe përmbyllje e kapitullit të konfliktit historik në mes të Kosovës dhe Serbisë”, ka thënë Kuçi. Mirëpo AAK-ja në këtë proces ka filluar të mërzitet. Ajo tashmë haptas po shpreh pakënaqësi ndaj vazhdimit të dialogut.

Lideri i këtij subjekti politik, Ramush Haradinaj, ka deklaruar për “Epokën e re” se Qeveria duhet të tërhiqet nga ky proces dhe të fokusohet në zbatim të dialogut. “Mendojmë se dialogu efektet e tij i ka arritur më 19 prill, kur është arritur marrëveshja, ndërsa pjesa tjetër është riciklim. Nuk mund ta ndihmojmë vazhdimisht një proces që kalon në abuzim dhe i cili mund të sjellë humbje kohe, shpenzime dhe udhëtime të panevojshme. Po kërkojmë nga Qeveria e Kosovës të fokusohet në implementimin e këtij dialogu. Nuk ka nevojë të shkohet vetëm duke ridiskutuar, por duhet të kalohet në instrumentet e tjera. E kemi ambasadorin tonë në Beograd, kurse Beogradi ka një zyrtar këtu dhe duhet të kalohet në raporte ndërfqinjësore”, është shprehur Haradinaj.

I pyetur se është duke menduar AAK-ja ta tërheqë Blerim Shalën nga ky proces, Haradinaj është përgjigjur: “Nuk po kërkojmë ta largojmë vetëm përfaqësuesin tonë, por po kërkojmë ta largojmë Kosovën nga një proces i cili po shkon drejt abuzimit. Pra, duam mos t’ua japim mundësinë e abuzimit me këtë proces as fqinjëve, as aktorëve që e përfaqësojnë Serbinë në Kosovë. Shembull, çfarë lezeti ka dialogu në Bruksel kur ura e lumit Ibër është me barrikadë. Pra, Kosova duhet të fillojë të kërkojë zbatim të dialogut e jo të kënaqet vetëm me biseda. Nuk do të jetë sukses për Kosovën heqja e mbështetjes së Aleancës, e cila mund të jetë opsion. Sukses për Kosovën do të jetë t’i shpjegohet palës ndërmjetësuese se me këtë proces kemi filluar ta humbim vullnetin, sepse nuk po i jep efektet e duhura”.

Për paralajmërimin e qeverisë, se ky proces do të vazhdojë edhe gjatë këtij viti, LDK-ja ende nuk ka qëndrim. Anëtari i Kryesisë së LDK-së, Arben Gashi, ka thënë se nëse Qeveria ka vendosur kështu, atëherë duhet të mblidhen organet e partisë dhe të marrin një qëndrim lidhur me këtë çështje. “Nëse kjo është ashtu siç po thoni ju, normalisht se duhet të mblidhemi dhe ta diskutojmë në forumet e partisë. Nuk mund të jap një përgjigje të saktë për ketë çështje”, ka bërë me dije Gashi. Ndërsa lideri i lëvizjes Vetëvendosje!, Albin Kurti, i cili prej fillimit ka kundërshtuar dialogun, ka thënë se ky proces Kosovës i ka sjellë vetëm të këqija. “Kjo marrëveshje nuk është fundi i kompromiseve, por është një marrëveshje për më shumë dialog, e cila do të ketë më shumë kompromise dhe vazhdimisht do të kemi interpretime dhe riinterpretime shtesë, ku zakonisht dominon Serbia dhe, kësisoj, gjithnjë do të mbetet më pak nga shtetësia e Kosovës dhe perspektiva për sovranitet e integritet territorial”, ka deklaruar Kurti, duke shtuar se bashkimi më i madh i partive në Kosovë ka ndodhur për marrëveshjen me Serbinë, në vend se kjo të jetë për sovranitetin e Kosovës apo për bashkimin kombëtar.

Deputeti i Parlamentit të Republikës së Kosovës dhe anëtari i Këshillit të Përgjithshëm të LDK-së, Xhafer Tahiri po qëndron për vizitë në SHBA, njofton LDK përmes një komunikate për media.

“Me ftesë të Ohio Northern University (Ohio), Xhafer Tahiri, deputet i Parlamentit të Republikës së Kosovës dhe anëtar i Këshillit të Përgjithshëm të LDK-së, po qëndron për vizitë në Shtetet e Bashkuara të Amerikës. Gjatë qëndrimit në këtë universitet, ai do t’u ligjërojë studentëve të Fakultetit Juridik të këtij universiteti në fushën marrëdhënive ndërkombëtare dhe sundimit të ligjit përkatësisht ‘Intervenimi Ndërkombëtar dhe Shtetndërtimi'”, thuhet në komunikatë.

“Në fokus të veçantë të këtyre ligjeratave do të jetë intervenimi ndërkombëtar dhe procesi i shtetndërtimit në Kosovë.
Gjatë qëndrimit në SHBA, përveç ligjëratve me studentët e drejtësisë, z. Tahiri do të ketë edhe një varg aktivitetesh të tjera, si fjalime dhe intervista lidhur me situatën politike, sundimin e ligjit dhe zhvillimet e tjera në Republikën e Kosovës”./PrizrenPress.com/

Analisti Halil Matoshi pret që fjalori politik të ashpërsohet në prag të zgjedhjeve nacionale. Përplasjet në mes partive i sheh si qëllim të krijimit të imazhit të forcës. Thotë se Vetëvendosje mund të bëjë koalicion vetëm me ndonjë parti ose lëvizje të re.

Muajt e ardhshëm pritet të karakterizohen me një fushatë edhe më të ashpër të partive politike.

Përplasjet e fundit në mes të Kryetarit të AAK`së, Ramush Haradinaj dhe Liderit të Lëvizjes Vetëvendosje, Albin Kurti, shihen vetëm si pikënisje e një përballje të ashpër që pritet të karakterizojë muajt e ardhshëm jo vetëm në mes të këtyre dy forcave politike por edhe ndërmjet të gjitha partive që konsiderohen rivale njëra me tjetrën.

Analisti Halil Matoshi përplasjet e tilla i sheh si qëllim të krijimit të një imazhi të forcës.

Në një intervistë për lajmi.net, Matoshi ka thënë se Lëvizja Vetëvendosje është e vetmja parti që e ka një ideologji të caktuar, ndërsa partive tjera, sipas tij, kjo gjë u mungon.

“Natyrisht se tani para zgjedhjeve nacionale që sigurisht do të jenë sivjet, partitë politike për të krijuar një imazh të forcës së tyre përplasen me rivalët e tyre”.

“Sa i përket Vetëvendosjes dhe partisë së Ramush Haradinaj kjo ka ndodhur në mënyrë goxha të ashpër edhe gjatë zgjedhjeve lokale, ku praktikisht z. Kurti ka bërë më dije se ai do të qeverisë me vendin dhe se do t`i hapë arkivat e korrupsionit dhe të gjitha të këqijat që kanë ndodhur gjatë qeverisjes, sidomos në ato Komuna ku partia e Haradinajt ka qenë në pushtet”.

“Kështu që, në këtë kontekst, mendoj se partia e z. Kurti, Lëvizja Vetëvendosje, e ka një diskurs goxha negativ ndaj të gjitha subjekteve politike, jo vetëm ndaj AAK’së.”

“Ç’është e vërteta, Lëvizja Vetëvendosje është e vetmja që e ka një diskurs goxha të fortë retorik dhe ka një ideologji të caktuar, gjë që partitë tjera nuk e kanë, sepse janë mësuar që të qeverisin me komoditet, me një lehtësi të padurueshme”.

“Prandaj, në këtë vazhdë vijnë edhe akuzat aktuale ndaj AAK`së”.

Matoshi pret që niveli i gjuhës së ashpër të rritet edhe më shumë në prag të zgjedhjeve nacionale.

“Është e vërtetë se gjatë zgjedhjeve lokale më 3 nëntor dhe gjatë balotazhit gjuha e urrejtjes pati marrë përmasa goxha shqetësuese, sepse objektivisht tashmë 15 vjet pas çlirimit, njerëzit, qoftë nga pakënaqësia karshi pushteteve të cilat kanë qeverisur me Kosovën, qoftë edhe nga njëfarë animoziteti që është krijuar në mes tyre, mendoj se goxha shumë e kanë ashpërsuar diskursin politik, rivalitetin, dhe unë pres që edhe në zgjedhjet nacionale kjo gjuhë të shkojë duke u ashpërsuar”.

Mundësia e një koalicioni mes Vetëvendosjes dhe ndonjërës nga partitë aktuale, sipas Matoshit, është vështirë e realizueshme.

“Lëvizja Vetëvendosje do ta mbajë tashmë kursin e saj kundër të gjitha partive tjera, përpos nëse në ndërkohë krijohet ndonjë lëvizje ose parti e re me të cilën ndoshta edhe mund të ketë ndonjë lidhje ose ndonjë bashkëpunim”.

“Ndërkaq sa i përket këtyre partive kryesore të vendit LDK, AAK dhe PDK, Vetëvendosje nuk do të ndryshojë qasje ndaj tyre, sepse mendësia politike e tyre vërtet në një mënyrë ose tjetrën është dëshmuar e dëmshme për vendin”.