Kryeministri kosovar, Hashim Thaçi pas ngërçit ndërpartiak të reformës zgjedhore në vend, që ai e quan të panevojshëm, me qëllim të daljes nga kjo situatë mendon se është e nevojshme të thirret në ndihmë Komisionin e Venedikut

“Ky sistem duhet t’ju përshtatet kushteve dhe rrethanave në Kosovë. Komisioni i Venedikut ka pasur një rol të rëndësishëm në të gjitha vendet e Evropës Juglindore gjatë procesit të tranzicionit demokratik. Prandaj, Kosova si shtet i ri me demokraci në zhvillim për Komisionin e Venedikut!”, arsyeton Kryeministri Thaçi përmes rrjetit social Facebook./PrizrenPress.com/

Fillimi i vitit 2014, solli  një lajm të mirë dhe pak më ndryshe se herave të tjera për Prizrenin. Në listën e vendeve më të mrekullueshme të botës të shpallur nga MSN-i për vitin 2013, qyteti i Prizrenit gjendet në vendin e 9-të ndër vendet më të bukura në botë.

“Lumi Lumbardhi rrjedh nën urën 500-vjeçare të gurit në qytetin e Prizrenit në Kosovë”, kështu e përshkruan MSN, qytetin e Prizrenit.

Organizata Joqeveritare “Ec Ma Ndryshe”, vlerëson lartë rënditjen e qytetit të Prizrenit nga MSN, në mesin e qyteteve më të mira në botë.
Elmmedina Baxhaku thotë se hyrja e qytetit të Prizrenit, në mesin e vendeve më të mira në botë,ishte një lajm i mirë jo vetëm për qytetarët e këtij qyteti, por për gjithë Kosovën.

“Ishte një lajm i mirë për të gjithë”.

Baxhaku thotë se sfida kryesore e vitit 2014, për të gjitha institucionet lokale dhe qendërore mbetet ruajtja e trashëgimisë kulturore të Prizrenit.

”Institucionet lokale, por edhe ato qendrore duhet të angazhohen që trashigimia kulturore e Prizrenit të ruhet dhe të mos lejohet të degradohet”.
Sipas saj, fatkeqësisht shumë objekte të trashigimisë kulturore për shkak moskujdesit të institucioneve janë shkatërruar.

“Organizata ‘EC MA Ndryshe’ gjatë vitit të kaluar ka mbledhur nënshkrimet e qytetarëve kundër degradimit të qytetit. Ky peticion shumë shpejt do t’i dorëzohet kryetarit të Komunës së Prizrenit”.

Ajo premton se “Ec Ma Ndryshe” edhe gjatë këtij viti, do të angazhohen për të mbrojtur vlerat të cilat qytetin e Prizrenit e kanë rënditur në mesin e vendeve më të mira në botë./PrizrenPress.com/

Përfaqësues serbë nga veriu i Kosovës nuk u pajtuan me përfaqësuesit e BE-së për protokollin dhe caktimin e mbledhjes solemne të kuvendeve të katër komunave. BE nga ata ka kërkuar që në protokoll të jetë logoja e Kosovës.

Kryetari i Leposaviqit, Dragan Jablanoviq, ka thënë për Tanjug se BE ka kërkuar që në ftesat për mbledhjet solemne të Leposaviqit, Zveçanit, Zubin Potokut dhe Mitrovicës së veriut të jetë logoja e Republikës së Kosovës, gjë të cilën ata e kanë refuzuar.

“Tash kërkuan që logoja e Republikës së Kosovës dhe emblemës së Qeverisë së Kosovës, pos në ftesat për mbledhje, të jenë edhe në tekstin e betimit që duhet ta bëjnë kryetarët e komunave dhe asamblistët. Qëndrimi ynë është që dokumentet të jenë neutrale ose në të jetë vetëm ‘Kosovo*’ (me fusnotë)”, ka thënë ai.

Sipas tij, mbledhja solemne do të mbahet më 9 ose 10 janar, kur dhe është afati i fundit për konstatim kuvendesh komunale.

Takimi me përfaqësuesit e BE-së është mbajtur në Mitrovicën e Veriut me dyer të mbyllura, ndërsa i pranishëm ishte edhe zyrtari për ndërlidhje i Qeverisë së Serbisë në Prishtinë, Dejan Paviceviq

Qeveria e Kosovës nuk do të mund të ndal së zbatuari marrëveshjet politike të lidhura pas negociatave me Serbinë, ku dorëzanë është baronesha Chatharina Ashton. Këtë nuk mund ta bëjë as në këmbim të heqjes së kompetencave ekzekutive të misionit evropian për sundimin e ligjit në Kosovë, EULEX, që ka kompetencë në ndjekjen e krimeve të luftës dhe krimeve të profilit të lartë politik të korrupsionit e krimit të organizuar, shkruan “Tribuna”.

Në strategjinë konfidencale për rishikimin kompetencave të EULEX’it, sipas gazetës, thuhet fjalë për fjalë që misioni i ri i Bashkimit Evropian në Kosovë do të ketë kompetencë në zbatimin e marrëveshjeve të arritura në Bruksel mes Kosovës e Serbisë.

Strategjia do të jetë subjekt i diskutimeve në Bruksel mes Qeverisë së Kosovës dhe BE-së. Pas këtyre diskutimeve, pritet edhe të definohet e ardhmja e misionit që do ta zëvendësojë EULEX-in. Diskutimet pritet të definojnë shumëçka pasi që shtetet anëtare të BE-së, gjegjësisht Gjermania dhe Britania e Madhe, janë kundër heqjes së kompetencave ekzekutive në krimet e luftës dhe ato të profilit të lartë nga misioni i BE-së.

Në këtë pikë, strategjia, një kopje të së cilës e ka siguruar gazeta Tribuna ka lënë dykuptimësi. Aty thuhet se misioni i ri do të ketë kompetencë të plotë në rastet e profilit të lartë që janë duke vazhduar por përmendet se rastet e reja do të iniciohen pas një kërkese (nga institucionet vendëse). Kërkesë megjithatë ky mision nuk do të duhet të ketë nga askush sa i përket veprimeve që çojnë në zbatimin e marrëveshjeve të Brukselit. Në bazë të strategjisë konfidenciale misioni do të jetë ekzekutiv në veprimet e në zbatimin e veprimeve që çojnë në realizimin e marrëveshjeve. Për më shumë, misioni do të ketë kompetenca shtesë të veçanta në komunat në veri të lumit Ibër.

Lideri I Lëvizjes Vetëvendosje, Albin Kurti, ka deklaruar se kjo lëvizje synon të dalë subjekti i parë politik në zgjedhjet e ardhshme parlamentare të cilat pritet të mbahen këtë vit.

Ai në një intervistë për “Epoka e re” ka thënë se me ardhjen e Vetëvendosje-s në Qeveri do të përfundojë epoka e qeverive Thaçi.

Kurti ka thënë se do të jetë i hapur për koalicione me të gjitha ato parti që kanë përputhje të programeve me Vetëvendosje-n.

“Këto parti duhet të ndryshojnë. Vetëm më pas mund të bashkëpunojmë në koalicione. Kështu siç janë sot, jo, por ka shenja që ato do të ndryshojnë”, është shprehur Kurti.

Kreu i Kuvendit, Jakup Krasniqi, u bën thirrje grupeve parlamentare në Kuvendin e Kosovës që një herë e përgjithmonë të heqin dorë nga bojkotimi i seancave, të paktën këtë vit.

Ndonëse pati akuzuar deputetët se në Kuvend erdhën falë vjedhjes industriale të votave, ai tashti thekson se deputetët duhet të jenë në Kuvend kur e kërkon puna, sepse kanë marrë votat e popullit.

Por, shefi i Grupit parlamentar të AAK-së, Ardian Gjini, nuk pret që këtë vit të ketë ndryshime, apo ndërgjegjësim të deputetëve. Për të është piktoreske të mendohet se ata që bojkotuan vazhdimisht seancat do të jenë më të ndërgjegjshëm këtë vit.

Ndërkohë, Instituti Demokratik i Kosovës vlerëson se kjo legjislaturë do të mbahet mend si një nga legjislaturat më të dobëta që ka pasur ndonjëherë Kosova, si nga aspekti i cilësisë së debatit të ofruar, ashtu edhe për nga mënyra e funksionimit të tij.

Valmir Ismaili, nga KDI-ja, i ka thënë KTV-së se nuk shpreson që Legjislativi do të përmirësohet këtë vit. Përplasjet pozitë-opozitë rreth mënyrës së privatizimit të PTK-së dhe tentativës së Qeverisë për të legalizuar këtë privatizim, lanë Kuvendin për kohë të gjatë jashtë funksionit.

Por, jo vetëm PTK-ja. Edhe zgjedhjet lokale dhe angazhimi i deputetëve më shumë në fushatë sesa në Kuvend e kanë paralizuar gati dy muaj punën e organit më të lartë në vend.