Tri komitete jo obligative dhe komisioni për emërtimin e rrugëve, kanë mbajtur mbledhjet e para konstituive dhe kanë zgjedhur kryesuesit e tyre, të cilët do ti udhëheqin këto organe në katër vitet e ardhshme, e që puna e tyre lidhet me rritjen e shërbimeve për qytetarët e Komunës së Malishevës. Të gjitha këto mbledhje, janë thirrur dhe janë udhëhequr nga kryesuesi i KK të Malishevës, Enver Hoti.

Me vota unanime, kryesues i Komitetit për Arsim, Kulturë, Rini dhe Sport, është zgjedhur anëtari i KK të Malishevës, Januz Kastrati nga radhët e LDK-së.

Po ashtu unanimisht, është zgjedhur anëtari i KK-së, Muhamet Bytyçi nga radhët e VV, për ta udhëhequr Komitetin për Planifikim Urban, Mbrojtje të Mjedisit, Kadastër, Turizëm dhe Monitorim të projekteve publike.

Ndërsa kryesues i Komitetit për Diasporë (Bashkatdhetar), është zgjedhur Besnik Hoti nga LDK-ja, i cili është anëtar i këtij komiteti, i ardhur nga subjekti i tij politik, jashtë Kuvendit të Komunës.

Komisionin për emërtimin e rrugëve në Komunën e Malishevës, do ta udhëheq Ahmet Rrahmanaj nga radhët e PDK-së, i cili u zgjodh unanimisht si kryesues i këtij komisioni, por që do të ndihmohet nga zëvendësi i tij, Driton Krasniqi, i cili është anëtar i komisionit nga qeveria komunale.

Sot është dashur të mbahet mbledhje konstituive edhe Komitetit për Shëndetësi dhe Mirëqenie Sociale, Familje të Dëshmorëve, Invalid dhe Veteran të Luftës, si dhe për persona me aftësi të kufizuara, por në mungesë të kuorumit, është shturë konstituimi i këtij komiteti.

Sipas Policisë së Kosovës, implementimi i planit policor të quajtur “Java e Sigurisë”, që ka qenë i paraparë të zgjas nga 1 maji deri më 7 maj, do të vazhdoj edhe më tej.

Fushata të cilën e ka filluar Policia e Kosovës për parandalimin e aksidenteve rrugore, ka rezultuar me numër të tiketave të shqiptuara.

Sipas të dhënave të Policisë së Kosovës, vetëm gjatë dy javëve të para të muajit maj, në të gjitha rajonet e Kosovës, janë shqiptuar gjithsej 18036 tiketa.

Gjatë javës së parë të muajit janë shqiptuar 9658 tiketa, ndërsa, gjatë pjesës së dytë të muajit janë shqiptuar gjithsej 8378 tiketa.

Zëdhënësi i Policisë së Kosovës, Baki Kelani, ka thënë për Telegrafin se angazhimi i Policisë së Kosovës ka për qëllim ngritjen e nivelit të sigurisë në trafik, ruajtjen e jetës së qytetarëve si pjesëmarrës në trafik, parandalimin e të gjitha llojeve të aksidenteve, e në veçanti të atyre me pasoja fatale.

“Policia e Kosovës nuk ka për qëllim ndëshkimin e qytetarëve, por ka për qëllim ngritjen e nivelit më të lartë të sigurisë në trafik, andaj apelon tek të gjithë pjesëmarrësit në trafik, duke përfshirë këmbësorët, të respektojnë shenjat e komunikacionit rrugor si dhe t’u përshtaten kushteve të rrugës dhe kushteve atmosferike, gjatë ngasjes së automjeteve. Në të kundërtën Policia e Kosovës do të ndërmarrë masa ndëshkuese ndaj të gjithë shkelësve”, ka thënë Kelani për Telegrafin.

Ndryshe, gjatë muajit të kaluar kanë ndodhur një mori aksidentesh, ku si pasojë e këtyre aksidenteve nëpër rrugët e Kosovës, e kanë humbur jetën katër persona. /Telegrafi/

Kapen rreth 1 ton duhan i përpunuar dhe refuz në pikën kufitare të Vërmicës, që po depërtohej në Kosovë me kuaj. Malli që kontrabandohet, ra në kamerat me senzorë, të cilat janë vendosur një javë më parë në kufirin e gjelbërt në mes të Kosovës dhe Shqipërisë. Rasti është në fazën e parë të hetimeve dhe po punohet në zbardhjen e personave që i braktisën kafshët në kufi.

Sekuestrohet rreth 1 ton duhan në pikën kufitare të Vërmicës në vijën e gjelbërt. Duhani po transportohej me nëntë kuaj, dhe vinte nga territori i Shqipërisë.

Sipas komandantit të vijës së gjelbër të rajonit të Prizrenit toger Shaban Osmanollajt, ngarkesa është vërejtur nga kamerat me sensor të vendosura në kufirin me Shqipërinë në vijën e gjelbërt dhe patrullat policorë të sektorit numër 5-së.

“Në bazë të marrëveshjes për menaxhimin e integruar të kufirit, njësitë mobile të policisë dhe doganës së Republikës së Kosovës dhe ato të Shqipërisë, operojnë si një trup e vetme, duke shkëmbyer informacione edhe në aspektin profesional, në zbulimin e identitetit të personave e më pas, në bazë të kërkesave të veçanta kërkohet ndihmë në ndalimin e të dyshuarve në të dy shtetet”, bën të ditur komandanti i vijës së gjelbër për sektorin 5-së, Shaban Osmanollaj, transmeton RTK.

Sipas Osmanollajt, procesi për identifikimin e personave të implikuar në këtë rast është në fazën e parë, ndërsa imazhet e kapura në kamera, si dhe bashkëpunimi me policinë e shtetit Shqiptarë do të përshpejtojnë punën në identifikimin e tyre.

Dhjetë të rinjë kanë aderuar në Degën e AKR-së në Prizren. Kryetari i AKR-së, Naser Bresa tha se ky subjekt politik ka filluar të zgjerohet në Prizren.

“Dhjetë të rinj janë bërë pjesë e AKR-së”, tha Bresa.

Ai paralajmëroi se shumë shpejtë do të ketë aderime masive në AKR-në e Prizrenit.
“Ky është vetëm fillimi i aderimeve të fuqishme që do të ketë në të ardhmën në AKR të Prizrenit”, tha Bresa.

Ai tha se Dega e AKR-së në Prizren është mobilizuar për zgjedhjet e 8 qershorit.

“AKR në këto zgjedhje do të hyjë më e përgatitur në Prizren.Ne jemi duke punuar maksimalisht që me 8 qershor AKR të dalë fituese në Prizren”, tha Bresa. /PrizrenPress.com/

Lideri i Aleancës për Ardhmërinë e Kosovës Ramush Haradinaj ka postuar sot në mëngjes qëndrimin e tij rreth spekulimeve për negociata parazgjedhore. Në profilin e tij në Facebook, Haradinaj ka shkruar:

“Nuk do hyjmë fare as në debate e as në spekulime parazgjedhore. Sepse duam që qytetarit të Kosovës, në të gjitha viset, pëllëmbë për pëllëmbë t’ia ofrojmë platformën tonë për DREJTIMIN E RI me të cilin do ta ndryshojmë gjendjen. Nuk kemi kohë të merremi me tjerët- Aleanca e ka vetëm një Aleat: qytetarin e vendit!

Sot do të qëndroj në Podujevë ku do të takohem me ndërmarrës e familje të vyera llapjane.
Pasdite në Ferizaj ku do shpjegojmë fjalë për fjalë platformën tonë për Arsim, Kulturë dhe Qeverisje të Mirë, Qeverisje me duar të Pastra!

Vendi im më njeh si njeri që e mbaj premtimin. Këso radhe, si asnjëherë më parë ndjehem i obliguar dhe motivuar që vendit tim t’i premtoj se do ta mbaj Fjalën. Për DREJTIM TË RI!”, ka shkruar Haradinaj në profilin e tij duke bërë të qartë që Aleanca do shkojë vet në këto zgjedhje.

Kijevë me rrethinë edhe zyrtarisht ka dorëzuar kërkesën për themelimin e Komunës së Kijevës, pranë organeve kompetente të Republikës së Kosovës, përkatësisht në Ministrinë e Administrimit të Pushtetit Lokal.Sipas Grupit nismëtar për themelimin e Komunës së Kijevës, kjo është një kërkesë serioze që përfaqëson vullnetin e mbi 20.000 banorëve të territorit që kërkon statusin e Komunës.

“Procesi për Themelimin e Komunës së Kijevës ka filluar para 3 muajve, është zhvilluar në saje të bashkëpunimit dhe koordinimit të aktivitetit të përgjithshëm me fshatra.Përfaqësues dhe aktivist të fshatrave janë angazhuar dhe kanë punuar me vullnetin më të lartë.Fal punës dhe angazhimit të pakursyer të fshatrave është arritur edhe mbledhja e mbi 5.000 nënshkrimeve në formë peticioni, që fuqishëm justifikon vullnetin dhe seriozitetin e kësaj kërkese. Themelimi i Komunës së Kijevës ka si synim afrimin e shërbimeve më afër qytetarëve, zhvillimin ekonomik, si dhe hapjen e mundësive të reja në të gjitha sferat, për komunitetin e kësaj zone. Është kërkesë e interesit qytetar, vullnet i dës hmuar i qytetarëve të kësaj zone, nuk është projekt i nxitur apo motivuar nga asnjë subjekt politik apo grupacion i caktuar”, thuhet në një njoftim të Grupit Nismëtar për Themelimin e Komunës së Kijevës.

Valdete Daka thotë se asnjë person i cili do të bëjë shkelje të rregullave në zgjedhje nuk do të mbetet pa u ndëshkuar. Ajo thotë se KQZ në këtë drejtim është syhapur.

Kryetarja e KQZ-së, Valdete Daka është e bindur se asnjë komisionar në këto zgjedhje nuk do të jetë person i cili dyshohet se ka bërë mashtrime elektorale në të kaluarën.

“Nuk e besoj që do të mundë të emërohet komisionar ndokush që ka vjedhur vota. Ne kemi dërguar shkresën edhe në Prokurori edhe në Këshillin Gjyqësor, nga të cilët presim shumë shpejt emrat e atyre të cilët kanë qenë të përfshirë në keqpërdorimin e votës, apo që janë në cilëndo fazë të procedurës penale dhe ata do të eliminohen edhe nëse na vijnë si emra në KQZ”.

Në një intervistë dhënë për të përditshmen “Zëri”, Daka ka thënë se edhe për këto zgjedhje, askush nuk do të jetë mbi ligjin dhe se për shkelësit eventual të zgjedhjeve, nuk do të ketë aspak tolerancë.

“Edhe herën e kaluar kemi qenë syçelë. Po apeloj te subjektet politike që të fillojnë të punojnë me komisionarët e tyre që t’ua tërheqin vërejtjen që çdo shkelës i rregullave zgjedhore do të dënohet sipas ligjit dhe se nuk do të ketë tolerancë aspak, ashku sikur që nuk kishte tolerancë në zgjedhjet lokale 2013”, tha Daka.