Lideri i Lëvizjes Vetëvendosje, Albin Kurti, ka kritikuar Qeverinë e Kosovës se më shumë është duke punuar për plotësimin e dëshirave të zyrtarëve në Serbi, se sa të qytetarëve të Kosovës.
Kurti, në mbledhjen e 14-të të Këshillit të Përgjithshëm të Lëvizjes Vetëvendosje, ka thënë se Qeveria Thaçi, për katër vjet me radhë ka dëgjuar Serbinë dhe ia ka plotësuar dëshirat Daçiqit, kurse tash, së fundi, është kujtuar që për qytetarët e Kosovës që kanë fatin të jenë të punësuar, u është premtuar rritje pagash.

“Kjo është mënyrë tërësisht e gabuar për të udhëhequr me pushtetin dhe shtetin. Ne kemi nevojë për punësim, për kushte më të mira të punës, për shërbime më të mira publike, e jo për sjellje të tilla, ku kryeministri na shfaqet si pronar i buxhetit, të cilin e pranon vet që po e keqpërdor. E pranon vetë që është mbi ligjin e demokracinë”, është shprehur Kurti.

Duke folur për vazhdimin e mandatit të misionit të Bashkimit Evropian, EULEX, dhe formimit të gjykatës për hetimin e krimeve të supozuara të luftës, Kurti ka thënë se shtetësia e Kosovës është vënë në pikëpyetje.

“Nuk diskutohet më a do të jetë Tribunal apo jo, por cili do të jetë motivi. Dhe, nuk diskutohet më a do të jetë Tribunal apo jo, por cili do të jetë vendi i tij. Dhe, ne tash shantazhohemi – na thuhet, duhet ta zgjidhni të keqen më të vogël”.

“Na shkoi jeta duke e zgjedhur të keqen më të vogël. Duke e zgjedhur të keqen më të vogël ti e mirëmban të keqen. Pse të mos e zgjedhim të mirën? Prandaj, këtë shantazh të dyfishtë, Vetëvendosje e refuzon në mënyrë parimore”, ka deklaruar Kurti para anëtarëve të Vetëvendosjes,

Kurti ka kritikuar edhe misionin e EULEX-it, duke thënë se në vend se ky mision të japë llogari për punën dhe mospunën që ka bërë në Kosovë, të njëjtit, sipas tij, flasin për themelimin e një gjykate dhe bëjnë trysni të deputetët e Kuvendit që ta votojnë formimin e asaj gjykate.

Sipas Kurtit, kjo është e qëllimshme që ky mision të mos japë llogari as në Evropë, as në Kosovë.

Ndryshe, partitë politike opozitare, pos Vetëvendosjes, janë deklaruar se do ta mbështesin në Kuvend krijimin e një gjykate speciale për hetimin e krimeve të luftës që pretendohet se janë kryer në Kosovë.

Analisti politik, Halil Matoshi, në prononcimin dhënë Radios Evropa e Lirë, ka thënë se Kosova ka humbur mundësinë që të krijojë vetë një dhomë të veçantë për krime të luftës dhe tani, sipas tij, është para një akti të kryer.

“Është ditur që herë do kur do, nën presion ndërkombëtar Kosovës duhet ta ketë një mekanizëm për ndëshkimin e krimeve të supozuara nga raporti i Dick Martey. Praktikisht, vetëm sa është humbur shumë kohë dhe kemi ardhur në situatë kur presioni ka qenë shumë i fuqishëm, kështu që ky është një fakti i kryer. Dhe, është mirë që më në fund do të spastrohet tërë situata, do të spastrohet Kosova. Dhe, unë mendoj se Kosova fiton dhe nuk prishet imazhi i saj me krijimin e kësaj gjykate të veçantë”, ka vlerësuar Matoshi.

Sipas Matoshit, kundërshtimet që është duke i bërë Lëvizja Vetëvendosje, lidhur me formimin e kësaj gjykate, janë fushatë elektorale për të fituar pikë politike.

“Unë e dëgjova liderin e Vetëvendosjes kur thotë se do të duhej të krijohet një tribunal për gjykimin e krimeve të luftës të Serbisë (që Serbia i ka bërë në Kosovë). Mirëpo, Serbia e ka themeluar tashmë gjykatën, e cila deri më tash i ka dënuar serbët për pjesëmarrje në luftë në Kosovës dhe krimet e tyre, përafërsisht me mbi 400 vjet burg. Ndërkaq, në Kosovë pothuajse ende askush nuk ka dalë para drejtësisë për krimet e tilla të pretenduar”, është shprehur Matoshi.

Thuhet se java e ardhshme do të jetë vendimtare sa i përket krijimit të një gjykate speciale për hetimin e krimeve të luftës që pretendohet se janë kryer në Kosovë dhe vazhdimit të mandatit të EULEX-it.

Partitë politike ende nuk i kanë llogaritur shpenzimet që do t’i bëjnë gjatë fushatës për zgjedhjet parlamentare që pritet të mbahen në muajin qershor. Sipas shoqërisë civile këto shpenzime nuk paraqesin kurrëfarë problemi për subjektet politike, pasi që këto po përfitojnë nga donatorët, të cilëve pastaj po ua kthejnë këtë shërbim me dhënien e tenderëve publik.

Analistët politik e shohin shqetësuese shumën të cilat subjektet politike i shpenzojnë gjatë fushatës parazgjedhore, megjithëse ata thonë se shuma e saktë e këtyre shpenzimeve nuk dihet, pasi që subjektet politike nuk i publikojnë raportet financiare dhe llogaritë bankare.Drejtoresha ekzekutive e Zyrës për Regjistrimin e Partive Politike në Komisionin Qendror Zgjedhor, Miradije Mavriqi, ka sqaruar për gazetën “Zërin” se shuma e lejuar për ta shpenzuar gjatë fushatës është 50 cent për votues..

Kosova është afër liberalizimit të vizave, prandaj çdo tentim për të emigruar ilegalisht në vendet e Bashkimit Evropian, do ta dëmtojë seriozisht këtë proces. Ky ka qenë mesazhi që disa dhjetëra fytyra publike kanë tentuar që të shtunën t’ua përcjellin qytetarëve të Gjakovës, Deçanit, Junikut e Xërxes.

Ata kanë zbarkuar në këto qytete në kuadër të një fushate që ministria kosovare për Integrime Evropiane dhe zyra Zvicerane në Kosovë e kanë filluar në vendin tonë, me qëllim të vetëdijesimit të qytetarëve për rrezikun e emigrimit jo të rregullt dhe rëndësinë e procesit të liberalizimit të vizave, proces në të cilin po kalon Kosova.

Ky projekt po organizohet në stil të një turneu nëpër qytete të ndryshme të Kosovës, me ç’rast aktorë, këngëtarë, sportistë, gazetarë e personalitete tjera të jetës publike kosovare po takohen e po bashkëbisedojnë me qytetarët, duke i njoftuar ata për ndikimin negativ që mund të ketë në procesin e liberalizimit të vizave emigrimi jo i rregullt./zeri/