Diplomacia kosovare, zotohet për angazhim maksimal, sa i përket rritjes së numrit të njohjeve për shtetin e Kosovës.
Vizita të shumta në vende të ndryshme, por numri i njohjeve për pavarësine e Kosovës duket se ka ngecur. Të paktën këtë e mendon ish- Ministri Skënder Hyseni.
Sipas tij, puna me njohje nuk po qëndron mirë, dhe se këtë vit ka një ngecje totale.

“Puna me njohje nuk po qëndron mirë, sidomos këtë vit ka një ngecje totale, dhe e gjithë kjo vjen si rezultat i Ministrisë së Punëve të Jashtme”, ka thënë Hyseni për Indeksonline.

Hyseni, konsideron se ‘mos’ njohjet janë si rezultat i punës së minisrisë së Enver Hoxhajt.

“Konsideroj se Republika e Kosovës në planin e diplomacisë ka pas dëshprime evidente gjatë 3-4 vjetëve, këto dështime po vazhdojnë si rezultat i mos punës”, ka shtuar Hyseni.

Ndryshe, në tre muajt e fundit ministri Hoxhaj ka vizituar disa vende të cilat nuk e kanë njohur Republikën e Kosovës si dhe ka marrë pjesë në disa samite multilaterale.

Ndërkohë, që zyra për informim e MPJ-së, thotë se deri në qershor të këtij viti do të vijnë edhe disa njohje tjera.

“MPJ ka informata të sakta që deri në qershor 2014 do të vijnë edhe disa njohje. Nga janari deri në qershor kemi thënë se do të vijnë 7 njohje. Dy prej tyre tashmë kanë ardhur”.

Aktualisht në Kosovë nuk ka të dhëna zyrtare e të sakta se sa është numri i përdoruesve të llojeve të ndryshme të drogave. Megjithatë, llogaritet se në vend janë deri në 20 mijë vartës droge.
Ndërkohë, Kosova ende nuk ka program gjithëpërfshirës të trajtimit me metadon, drogën zëvendësuese që përdoret kudo në botë për largimin e njerëzve nga heroina.

Pretendohet se shifra e përdoruesve të drogës mund të jetë edhe më e madhe, aq më tepër kur gjatë çdo viti është rritur edhe sasia e konfiskimit të këtyre substancave narkotike nga ana e policisë.

Nga viti 2000,kur autoritetet kanë filluar të evidentojnë të dhëna në lidhje me këtë çështje, del se sasia e drogave që kapet në Kosovë vazhdimisht shënon rritje.

Derisa në vitin 2001 janë sekuestruar vetëm 0.8 kg heroinë, në vitin 2007 kjo shifër u rrit në 6.9 kg, ndërsa në vitin 2010 kjo sasi ka arritur shifrën e 55 kg.

Heroina është një nga llojet e nivelit më të lartë të drogës, një gram e së cilës kushton deri qindra euro. /Tribuna/

“Kam qenë ushtar i UÇK-së. Kam luftuar për ta parë vendin tim të lirë, e kjo gjë erdhi, mirëpo, pavarësisht kësaj, unë asnjëherë nuk kam marrë ndonjë gjë. I kam të gjitha dokumentet se jam veteran i luftës, por ne jemi kategoria më e lënë pas dore nga shteti ynë, dhe kjo më dhemb shumë, sepse ne kemi rrezikuar edhe jetën tonë”, është shprehur Milaim Beqiri
I mbetur vetëm me gruan, Milaim Beqiri kishte rënë në mendime të thella.

Ajo që e shqetësonte më shumë ishte se si do t’ia bënte që ta siguronte miellin për ditët në vazhdim, pasi që vetëm edhe dy javë kishte. Në kokën e tij silleshin mendime të shumta, por assesi nuk i vinte ndonjë zgjidhje se si do ta siguronte më pas ushqimin.

Kur ne shkuam për vizitë, ai na e hapi derën e shtëpisë dhe na priti duke u gëzuar që dikush ia kishte hapur derën, pasi që askush asnjëherë nuk e kishte vizituar.

Ai filloi të na rrëfente për hallet e problemet në të cilat gjendej, shkruan Kosova Sot.

“Jam në gjendje shumë të vështirë, pasi që vetëm edhe dy javë kam miell për bukë, dhe pasi të më harxhohet, nuk e di si do t’ia bëj, sepse nuk punoj askund dhe nuk kam të holla të mjaftueshme për këtë”, ka thënë ai.

NISMA për Kosovën sot e themeloi Këshillin Iniciues në qytetin e Rahovecit, ku me këtë rast u mbajt edhe një tubim, ku ishin të pranishëm një numër i madh i qytetarëve që iu bashkëngjitën NISMËS.

Kryetari i Këshillit Kombëtar z. Jakup Krasniqi ka thënë se Nisma për Kosovën ka ardhur në Rahovec për të kërkuar ndryshimin për qytetarin rahovecian, për njeriun tonë kudo që jeton në vendin tonë.
“ Nisma për Kosovën nga ju Rahovecianët kërkon besën për të ndërtuar shtetin e se drejtës me votën tuaj, për fëmijët tanë. Brezi ynë, pesëmbëdhjetë vjet pas lirisë se fituar me sakrifica të shumta, s’ka si mos të ndihemi të pakënaquri me institucionalizimin e lirisë se fituar me gjak. UÇK-në ende nuk po e shohim vlerë të përbashkët kombëtare”, ka thënë Krasniqi. Sipas tij, ky brez ka obligim ta institucionalizoj lirinë, por kjo nuk bëhet pa vullnetin politik për shtetin e se drejtës.

“Bërja e shtetit të së drejtës na bënë me dinjitet në vendin tonë, na bënë të dinjitetshëm për të fituar liberalizimin e vizave dhe i hapë të gjitha rrugët e integrimeve evropiane. Çelësi i të gjitha këtyre është shteti i bazuar në vlera demokratike kombëtare dhe euroatlantike”, ka thënë Krasniqi.

Më tutje Krasniqi ka thënë se, “Kosova ka nevojë për shtetin e se drejtës. Shteti i se drejtës nuk bëhet duke shkelur përditë ligjet e shtetit nga të paret e tij, nga ata që duhet të vihen në mbrojtje të tij. Shteti i se drejtës nuk bëhet as me mashtrime të përditshme nëpër Kosovë, por duke qeverisur me përgjegjësi.

Shteti i se drejtës, na duhet të gjithëve. Po ai nuk vjen vet, ashtu si nuk erdhi deri më tani. Ai nuk vjen pa vullnetin tuaj për ndryshime. Oferta jonë ka qëllimin fisnik me vete: T’ua kthejmë qytetarëve shpresën dhe besimin në bijtë e tyre, në politikën dhe shtetin e tyre, për të ardhmen tonë të përbashkët. Ne me besimin tuaj e përkushtimin tonë mund ta ndryshojmë Kosovën tonë”.

Kryetari i Këshillit Kombëtar të NISMËS, Jakup Krasniqi ka thënë se Kosovës i duhet një Strategji e zhvillimit ekonomik, politika të qarta fiskal që stimulojnë investimet, bizneset dhe janë në shërbim të shtetit social. “Te dy këto çështje mund të harmonizohen, por duhet dije profesionale nga ekspertet dhe njerëzit kompetent, njerëz që e duan vendin dhe popullin e vet. Edhe Rahoveci duhet ta këtë planin e zhvillimit e të përparimit për ndërtimin dhe shfrytëzimit të kapaciteteve të agrikulturës që ofron dhe ofron shume. Por ky ndryshim e zhvillim nuk behet me premtime boshe e mashtrime të përditshme. Ne, të Nismës për Kosovën, jemi sa të fjalës po aq edhe të Besës, prandaj kërkojmë edhe besimin tuaj!”, ka shtuar tutje Krasniqi.

“Ne, jemi të bindur se ka ardhur koha që Kosova të qeveriset nga njerëzit e ditur e kompetentët, për të ndodhur kjo, në Kosovë duhet të behën ndryshime të mëdha në qeverisje. Nisma për Kosovën e garanton ketë! Ne, dëshirojmë dhe garantojmë qeverisje të lirë e të mirë, qeveri transparente që dinë e donë të punoj drejt. Në asnjë vend në vendet e BE-së nuk ka qeverisje me pesë zëvendëskryeministra e mbi 40 zëvendësministra. Ky veprim është dhurim i posteve dhe i parave publike në vendin më të varfër të Evropës. Ky është abuzim i skajshëm i pushtetit të marr nga populli!
Ne, jemi të gatshëm e të vendosur t’i shërbejmë atdheut, qytetarëve u përket besimi për Nismën! Nisma sjellë ndryshimin, por për ketë duhet besimi i Juaj! Ne garantojmë qeverisje të mirë e të lirë!”, ka thënë në fund Krasniqi.

Ndërsa Kryetari i Kryesisë së NISMA për Kosovën z. Fatmir Limaj ka thënë se është koha që djemtë dhe vajzat e Rahovecit të bashkohen me alternativen e NISMËS për ta ndryshuar gjendje në vendit.

“ Që 15 vjet ne ende flasim për institucione të degraduara në të gjitha nivelet, këto institucione identifikohen vetëm me individ. Politikanët në çdo rast e quajnë veten me emër të përveçëm dhe nuk janë në gjendje të flasin dhe të bashkëpunojnë më qytetarin. Ne nuk mund të vazhdojmë në këtë gjendje mbijetese, pasi që e ardhmja është shumë e pa sigurt dhe viti që vjen mund të jetë edhe më i rëndë për të gjithë qytetarët e vendit. Rahoveci gjithmonë ka qenë kontribuues për ndryshime pozitive, si në kohë lufte ashtu edhe tani”, ka thënë Limaj.

Sipas tij, Kosova ka shumë nevojë për ndryshim dhe ristrukturim të plotë të gjendjes në vend. Limaj ka shtuar se “kemi nevojë për ndërtimin e marrëdhënieve tjera brenda institucioneve tona dhe raporteve me miqtë ndërkombëtarë dhe kjo arrihet vetëm me djem dhe vajza të duhura dhe me shkollim të lartë”.
Mungesa e planeve dhe e projekteve në Arsim, Energji, Bujqësi e Shëndetësi, sipas kryetarit të NISMËS për Kosovën, Fatmir Limaj kanë krijuar një gjendje të mjerueshme në Kosovë. “Sot ka ardhur koha që Kosova të ketë një qeveri meritore që di dhe guxon të ndërmarrë projekte të rëndësishme që do të ndryshojnë jetën e qytetarëve. NISMA për Kosovën nuk ka ardhur për të premtuar fjalë të mëdha, por për të bërë punë të mëdha”, tha Limaj.
Ai vlerësoi se Rahoveci ka potencial të madh bujqësor, por shtoi se ka mungesë investimi strategjik dhe kjo e bllokon për ta kthyer atë në vend eksportues.
“ NISMA do ti kushtojë rëndësi të veçantë sektorit të bujqësisë dhe zhvillimit të bizneseve të vogla e të mesme. Për të përkrahur ekonominë tonë, të gjithëve na duhet një sistem energjetik i qëndrueshëm. Energjia është një ndër sektorët që duhet të fuqizohet e mos të bllokohet siç ka ndodhur deri më tani. Koha ka ardhur që secili qytetarë të mendojë dhe reflektojë se a dëshirojmë të vazhdojmë me këtë trend të shkatërrimit të shtetit, të thellimit të krizës dhe varfërisë apo duam ndryshime. NISMA mendon që koha ka ardhur për ndryshime. Prandaj, NISMA është e juaja dhe te gjithë ne duhet të nisemi drejt ndryshimit”, ka thënë në fund Limaj.
Ndërsa kryetari i Nisma për Kosovën në Rahovec, Sadik Krasniqi ka thënë se, qytetaret e Rahovecit për plot 15 vite ende vazhdojnë të kenë zhgënjime për situatën në Kosovën. Sipas tij, edhe Rahoveci është pjesë e kësaj gjendje të rëndë.

“ Populli ynë po përjeton dukuri të këqija siç janë, krimi i organizuar, mungesa e perspektives ekonomike, papunësia e të rinjve e shumë të tjera. Kjo situatë në të cilën ndodhemi na ka shtyer që të hapën dyert për një qeverisje të re dhe një alternativ më ndryshe dhe kjo është NISMA për Kosovën. NISMA do t’i kushtojë një rendësi të veçantë bujqësisë në Rahovec , dhe do t’i ngrit të gjitha problemet që sot ballafaqohen rahovecianët”, ka thënë Krasniqi.

?Kryeparlamentari, Jakup Krasniqi e kishte quajtur ‘lëshim të administratës’ votimin e parë për Avokatin e Popullit në seancën e javës së kaluar, të cilën e drejtoi nënkryetari Sabri Hamiti. Por në seancën e së enjtes, edhe Krasniqi e ndoqi të njëjtën procedurë.

Kandidati që mori vota më së shumti, Hilmi Jashari, thotë se rregullorja është interpretuar gabimisht. Jashari është dekurajuar nga kjo dhe thotë se me këtë legjislaturë nuk do të kandidojë më për Avokatin e Popullit.

Në dy seancat kur u votua për Avokatin e Popullit, Hilmi Jashari mori shumicën e votave, por Kuvendi nuk e ndoqi procedurën e rregullt, sipas nenit 9 të Rregullores për zgjedhjen e Avokatit të Popullit, pika 4 e të cilit parasheh edhe raund të tretë votimi për kandidatin që merr më së shumti vota.

I kontaktuar nga Radio Kosova, kryeparlamentari Jakup Krasniqi tha se rregullorja është respektuar në tërësi. Por, sipas Hilmi Jasharit, ajo është interpretuar në kundërshtim me praktikën e mëhershme të zgjedhjes së Avokatit të Popullit.

“Në bazë të rregullores dhe në bazë të praktikës së mëhershme që ka ndodhur, do duhej të shkonte në raundin e tretë me kandidatin që siguron më së shumti vota”, tha Jashari për Radio Kosovën.

Edhe Driton Selmanaj nga KDI-ja, që e monitoron punën e legjislativit, thotë se në dy rastet e votimit është shkelur ligji dhe rregullorja për zgjedhjen e Avokatit të Popullit.

“Kuvedi do duhej që edhe me një kandidat të vetëm të shkohet në raundin e tretë të votimit, në mënyrë që të provohet nëse ai kandidat mund t’i merr 61 vota apo jo”, tha Selmanaj për Radio Kosovën.

Hilmi Jashari e konsideron të padrejtë faktin që Avokati i Popullit duhet t’i marrë 61 vota të deputetëve, duke pasur parasysh faktin që vetë Kuvendi shpeshherë nuk arrin të ketë madje as kuorum në seanca. Ai thotë se me mënyrën e veprimit të Kuvendit po cenohet kredibiliteti i Avokatit të Popullit.

“Kur bëhet gjithë kjo tollovi për zgjedhjen e Avokatit të Popullit, atëherë çfarë kredibiliteti dhe autoriteti do të mund të ketë një kandidat eventual në të ardhmen kur gjithë këto procese kalohen, interpretohen e bastardohen deri në atë masë”, tha Jashari.

Nga gjithë ky proces, Jashari thotë se është dekurajuar dhe se nuk mendon të kandidojë sërish. “Nuk besoj, nëse ndodhë që në të ardhmen e afërt të shpallet konkursi, në këtë legjislaturë nuk do të konkurroja”, tha Jashari.

I pyetur nëse do të ankohet për këtë padrejtësi që konsideron se i është bërë nga Kuvendi, Hilmi Jashari thotë se çfarëdo ankimi do të ishte pa efekt, për shkak të kohës së shkurtër që i ka mbetur kësaj legjislature.

Ndryshe, Kuvendi ka marrë vendim për rishpalljen e konkursit për Avokatin e Popullit, pasi që asnjëri kandidat nuk mori 61 votat e nevojshme për t’u zgjedhur Avokat i Popullit.