Sylejman Selimi dhe Sami Lushtaku kanë angazhuar avokatë me përvojë në Gjykatën e Hagës, ka mësuar “Koha Ditore”.

Selimi pritet të përfaqësohet në gjykim nga avokati amerikan, Gregory Guy Smith, i cili ka mbrojtur Idriz Balajn në Gjykatën për krime lufte në ish-Jugosllavi. Ndërsa Lushtaku do të mbrohet nga Nick Kaufman, nga Izraeli, i cili ka mbrojtur disa prej kriminelëve më të mëdhenj në botë, siç është Kaing Guek Eav, komandant i burgut të kmerëve të kuq në Kamboxhia.

Ata kanë aplikuar për licencim në Odën e Avokatëve të Kosovës. Organet e OAK-së janë duke shqyrtuar aplikimet e tyre.

Ish-komandanti i UÇK-së Sylejman Selimi dhe ish-komandanti i Zonës së Drenicës, Sami Lushtaku, akuzohen për krime lufte, që supozohet se kanë kryer në Likoc në vitin 1998. Ata po ndiqen penalisht nga prokurorë ndërkombëtarë të EULEX-it.

Akuzat kundër tyre janë të rënda, përfshirë torturimin, rrahjen sistematike dhe trajtimin çnjerëzor të të burgosurve. Lushtaku akuzohet edhe për vrasje të një civili shqiptar./KD/

Azem Vllasi thotë se Serbia nuk e sakrifikon BE`në për Kosovën. Sipas tij zyrtarët serbë po bëjnë propagandë që Brukseli mos t`i kushtëzojë me njohjen e Kosovës. Ai thotë se shteti fqinj duhet të kushtëzohet me definimin e kufijve shtetërorë.

Deklaratat e Ministrit të Jashtëm serb, Ivan Mrkic se Serbia do ta refuzonte BE`në për Kosovën, janë tërësisht propagandistike në mënyrë që Brukseli mos të kërkojë nga Serbia ta njohë pavarësinë e Kosovës, atëherë kur të vijë koha që Brukseli ta paraqesë këtë kusht.

Në një intervistë për lajmi.net, analisti kosovar, Azem Vllasi, thotë se nuk beson që Serbia do ta refuzonte hyrjen në Bashkimin Europian për Kosovën.

“Kjo thjesht është një propagandë zyrtare e Serbisë, e paramenduar me një efekt paraprak. Ata mendojnë t`ua bëjmë me dije mos të na ngushtojnë me një kërkesë të tillë, por në Europë kur të vjen ajo fazë, kur të vlerësohet normalizimi i raporteve në mes Serbisë dhe Kosovës në atë fazë është çështje e faktorëve relevantë a do ta kërkojnë nga Serbia njohjen e Kosovës apo jo”.

“Serbia kurrsesi nuk do ta refuzojë anëtarësimin në Bashkimin Europian nëse kushtëzohet me pranimin e Kosovës”.

“Meqenëse ajo kohë kur Serbia i plotëson kushtet për tu pranuar në Bashkimin Europian është akoma larg, tani zyrtarët e Serbisë mund të bëjnë propaganda të tilla akoma”.

Ministri i jashtëm serb, Ivan Mrkic,i ka thënë dje medieve serbe se nuk do ta pranonin kushtin që ta njohin pavarësinë e Kosovës edhe nëse kjo do t`i kushtonte shtetit të tij me anëtarësim në Bashkimin Europian.

Megjithatë, për Azem Vllasin nuk është me rëndësi njohja formale nga Serbia. Ai thotë se kushtëzimi i BE`së për Serbinë duhet të jetë definimi i qartë i kufijve shtetërorë.

“Deri në atë kohë nuk bën të spekulohet, sepse ajo kohë është larg. Por duhet ta shikojmë se çka do të ndodh me këto pesë shtete anëtare të BE`së që nuk e kanë njohur Kosovën”.

“Por gjithsesi do të shtrohet para Serbisë një çështje tjetër që si shtet t`i ketë kufijtë e definuar. Në BE mund të futen shtetet të cilat i kanë kufijtë shtetërorë të definuar dhe e dinë ku janë dhe të cilat nuk kanë pretendime territoriale ndaj shteteve tjera”.

“Serbisë atëherë do t`i kërkohet që ta pranojë faktin se kufijtë e saj janë ata kufij që janë tash, pa Kosovën dhe ndaj Kosovës në mënyrë as tërthoras as direkte, nuk mund të ketë pretendime territoriale”.

“Kjo është ajo kryesorja, që do të jetë si kusht i Serbisë dhe kryesorja që është me rëndësi për Kosovën. Akti i pranimit formal çka do të ndodh dhe si do të ndodh ajo edhe në atë kohë nuk do të jetë e rëndësishme”.

Beogradi zyrtar ka zbuluar para disa ditësh se ka hapur negociatat me Shkupin, Podogricën, Lubjanën dhe Sarajevën për themelimin e ambasadave të përbashkëta në Afrikë, Azi dhe Amerikën Latine pa e përfshirë këtu Kosovën.

Por, gjitha këto pretendime të shtetit serb sipas Vllasit janë të parëndësishme. Ai thotë se nuk është e sigurt se a do ta pranojnë një kërkesë të tillë shtetet tjera të rajonit.

“Ato janë pretendime të Serbisë që akoma të ketë njëfarë roli prijës në regjion, të ketë iniciativa, t’u japë oferta shteteve tjera, por se kanë deklaruar kështu nga Ministria e Jashtme e Serbisë, absolutisht nuk është e thënë që këto shtete do të pranojnë”.

“Ndërsa çështja e racionalizimit, përfaqësive diplomatike nëpër botë, racionalizimi ku dy shtete, tri apo më shumë merren vesh për një përfaqësim ajo çështje sot në botën bashkëkohore është e rëndomtë dhe ajo për Kosovën nuk ka kurrfarë rëndësie’.

“As që mund të presim ne që me një ide të tillë Serbia do ta përfshinte edhe Kosovën, por kjo po ashtu nuk është e sigurt që këto shtete që janë përmend do ta pranojnë një ofertë të tillë”, ka thënë Vllasi.

Përfaqësuesit diplomatikë të Kosovës jo vetëm dështuan që gjatë vitit 2013 t’ia përmirësojnë imazhin vendit në arenën ndërkombëtare, mirëpo disa diplomatë me veprimet e tyre e rrënuan edhe më shumë një imazh të tillë.
Misionet diplomatike të Kosovës po ashtu u shndërruan në “çerdhe” për punësimin e familjarëve dhe militantëve partiakë, duke e anashkaluar kështu dërgimin e personave më kompetentë në Ambasada, shkruan “Zëri”.

Madje shumë prej diplomatëve kosovarë u dërguan në vendet e ndryshme të BE-së pa qenë në gjendje të komunikojnë në gjuhën angleze.

Për të gjitha misionet diplomatike të Kosovës, nga buxheti i Kosovës për çdo vit ndahen nga 15 milionë euro.

Ministri i Punëve të Jashtme i Kosovës, Enver Hoxhaj, ka deklaruar ditë më parë gjatë një interviste për gazetën “Zëri” se Republika e Kosovës në dy-tri vitet e fundit ka pasur përmirësim të imazhit në botë.

Paralajmërimi nga Qeveria e Kosovës dhe ajo e Shqipërisë, për nismën për krijimin e një fondi zhvillimor për Luginën e Preshevës, është mirëpritur nga përfaqësuesit e Luginës së Preshevës.

Kryetari i Kuvendit të Komunës së Bujanocit, Jonuz Musliu, ka thënë për “Epokën e re” se krijimi i këtij fondi është i domosdoshëm për shqiptarët e Luginës së Preshevës.

“Krijimi i këtij fondi zhvillimor është i domosdoshëm për shqiptarët e Luginës së Preshevës. Është një forcë dhe kurajë për mbështetje të shqiptarëve si në formë politike, edhe në formë financiare derisa të zgjidhet problemi i shqiptarëve dhe derisa të bashkohemi me Kosovën. Pra, mund të themi se krijimi i këtij fondi zhvillimor është një thyerje akulli. Nëse me të vërtetë Kosova e Shqipëria e duan Luginën e Preshevës atëherë duhet ta ndihmojnë atë. Me ndihmën e Kosovës dhe Shqipërisë besoj se do të përmirësohet gjendja e shqiptarëve në këtë pjesë”, ka thënë Musliu.

Ai ka thënë se Kosova dhe Shqipëria është dashur shumë më herët të marrin një iniciativë të tillë.

“Krijimi i këtij fondi është i vonuar, por është i qëlluar. Edhe Kosova, por edhe Shqipëria kanë pasur forma të ndryshme që t’u ndihmojnë shqiptarëve”, është ka deklaruar Musliu, duke shtuar se dy shtetet shqiptare duhet të jenë gardiane të shqiptarëve të Luginës së Preshevës.

“Kjo nismë tregon kujdesin e Kosovës dhe të Shqipërisë për Luginën duke qenë gardianë të shqiptarëve të Luginës së Preshevës. Është momenti që dy shtete, dy akademi si dhe dy buxhete ta ndihmojnë Luginën e Preshevës”, është shprehur Musliu.

Ai ka thënë se zgjidhja e problemit kombëtar do të bëhet vetëm me bashkimin e tokave dhe kokave shqiptare.

“Duhet të vetëdijesohen të dy kryeministrat se Lugina është tokë shqiptare dhe duhet të mbrohet së bashku me shqiptarët. Duhet të bashkohen sepse pa bashkimin e tokave shqiptare dhe pa bashkimin e kokave të shqiptarëve do të jetë problem zgjidhja e problemit kombëtar”, ka deklaruar Musliu.

Në Prizren ka filluar aplikimi për trajnimin e të rinjve, që dëshirojnë të aftësohen në udhëheqjen e ndërmarrjeve të vogla.

Ky projekt organizohet nga Shoqata e Zejtarëve dhe Afaristëve të Prizrenit në bashkëpunim me BE-në.

Kryetari i Shoqatës së Zejtarëve dhe Afarisëtve, Afrim Tejeci tha se interesimi për ta ndjekur këtë trajnim është i madh në mesin e të rinjve.

“Për 40 vende sa ka kapacitete janë paraqitur 160 aplikantë”

Shoqata e Zejtarëve dhe Afaristëve në bashkëpunim me shumë institucione vendore e ndërkombëtare edhe gjatë vitit 2014, do të ofrojë aftësime për të rinjtë në profesione të ndryshme, në vende të ndryshme të Evropës.

Pjesëmarrësja e këtij seminari,Arjeta Nezaj, thotë se trajnimet e ofruara nga Shoqata e Zejtarëve dhe Afaristëve, janë një mundësi shumë e mirë për të rinjtë, për t’u aftësuar për punë, ose për të nisur me një ndërmarrje të re./TV Prizreni/
“

Mediat në Kosovë e vlerësojnë KosovaPress-in për punën si një medium kredibil dhe profesional, si dhe kontribuese e madhe për mediat duke marrë parasysh se Kosova është një treg shumë i vështirë i mbijetesës së mediave.

Agjencia e Pavarur e Lajmeve Kosovapress sot feston pesëmbëdhjetë vjetorin e themelimit të saj. Falë ndryshimeve të bëra kjo agjenci ka arritur të bëhet lideri numër një në vend sa i përket ofrimit të shërbimeve me video lajme për televizionet nacionale, ato lokale , radiot, mediat e shkruara e të tjera.

Kjo agjenci tashmë ofron shërbimet e saj për shumicën e mediave në Kosovë dhe rajon qoftë elektronike apo të shkruara.

Në prag të festës jubilare të kësaj agjencie, kanë folur të gjithë drejtorët, kryeredaktorët, pronarët e mediave të ndryshme rreth punës dhe shërbimeve që ofron Agjencia e Pavarur e Lajmeve Kosovapress.

Mentor Shala, drejtor i Përgjithshëm i Radio Televizionit Publik të Kosovës ka thënë se të flasësh për punën dhe krijimtarinë e Kosovapress, është një histori e tërë, duke shtuar se kjo agjenci ka filluar punën në një kohë të jashtëzakonshme që është përcillej me sfida dhe probleme të mëdha.

Shala ka thënë se të raportosh në atë kohë dhe të marrësh guximin për të themeluar një agjenci lajmesh në kohë lufte, duke pasur parasysh tërë makinerinë propaganduese të mediave serbe, ka qenë një vendim i guximshëm.

“Kosovapress është duke kryer një punë jashtëzakonisht të mirë sidomos tash, pasi ka filluar me video lajme edhe mendoi që është bërë si një burim i informacionit për të gjitha televizionet në Kosovë, në fakt neve na ka lehtësuar shumë punën si transmetues publik për shkak se në një pjesë të madhe të ngjarjeve, ne nuk kemi nevojë të dërgojmë fare gazetarë për shkak se kemi informacionin e gatshëm nga Kosovapress. Është një punë e madhe që është duke e bërë, mendoi se Kosovapress është duke u zhvilluar ende, besoi dhe shpresoi duke e njohur edhe pronarin edhe idetë e tij dhe vizion që ka për zhvillimin e një medium, mendoi që shumë shpejt do të bëhet një medium multifunksional, jo vetëm në video dhe në shkrim”, ka thënë drejtori i RTK-së.

Shala ka thënë se mënyra e mbijetesës dhe qëndrueshmëria financiare e Kosovapress është për t`u përshëndetur, meqë sipas tij, kur ekzistojnë idetë dhe vizioni për zhvillimin e mediumit, atëherë kjo arrihet lehtë.

Për Gazmend Sylen, kryeredaktor në Klan Kosova, kur i kishte shkuar oferta për mbulimin e ngjarjeve me video nga Kosovapress, ai ishte skeptik dhe kishte dyshime.

Syla ka thënë se dyshimet e tij kishin qenë të pabaza, meqë për një kohë shumë të shkurtët materialet dhe tekstet, që kishin pranuar nga Kosovapress, ishin të një mediumi kredibil dhe profesional.

Syla thotë se Kosovapress bënë sa katër ose pesë gazetar të tij, për këtë ai ka edhe një shpjegim.

“Me kalimin e kohës Kosovapress vazhdoi të dëshmoi që po bëhet gjithnjë e më e mirë dhe së fundi e them me gojën plot që Kosovapress është i barabartë me nja katër gazetarë të mi çka nënkupton kjo, kjo do të thotë se unë katër apo pesë ngjarje dite ia besoi Kosovapress, sigurisht mund të mos jenë ngjarjet kryesore, për shkak se edhe unë kam qejf që t`i dërgoi gazetarët e mi në ngjarjet kryesore, qofshin ato politike apo nga puna e sigurisë ose çfarëdo qoftë, por në ngjarjet tjera të cilat unë nuk i dërgoi gazetarët e mi për shkak se dua të kem patjetër storien e tyre, ja besoi Kosovapress ato ngjarje dhe ka katër ose pesë lajme siç thash me herët në edicionin qendror të Klan Kosovës, mbulohen nga Kosovapress, edhe unë jam jashtëzakonisht i kënaqur me atë çfarë ofron Kosovapress”, ka thënë ai.

Eugen Saraçini, drejtor i deskut informativ në RTV 21 thotë se asnjëherë nuk kanë pasur dyshime për punën dhe bashkëpunimin me Kosovapress duke vlerësuar se puna që bëhet në këtë agjencion është për meritë.

Saraçini ka konstatuar se qëndrueshmëria financiare e një mediumi, këtë rast Kosovapress-it varet nga vet puna dhe varet prej gjithë asaj që është orvatje e udhëheqësve të Kosovapress-it që të krijojnë hapësira gjithnjë më të mëdha të bashkëpunimit.

Sipas drejtorit të edicionit informativ të RTV 21, në fund të ditës kjo mund të rezumohet si shitje të produkteve të cilat behën dhe rritja e klientëve që i shfrytëzojnë materialet e kësaj agjencie nënkupton qëndrueshmëri financiare.

“Është kënaqësi kur Kosovapress do duhet uruar këtë 15 vjetor, një punë jashtëzakonisht intensive, një punë që ka rezultuar me zhvillim të kësaj agjencie ose të stafit që është duke e kryer një punë jashtëzakonisht të rëndësishëm dhe bashkëpunimi jonë afat gjatë ose tashëm që sa vite nënkupton se ne si radio televizion por edhe unë në krye të informacionit e vlerësoi jashtëzakonisht shumë punën e kolegëve tonë në Kosovapress ndaj edhe ne bashkëpunojmë me juve dhe ju me neve, ne shfrytëzojmë servilet e juaja dhe asnjëherë nuk kemi pasur situata në të cilat është dashur ta diskutojmë bashkëpunimin, por përkundrazi bashkëpunimi ka rrjedhur në mënyrën më të mirë të mundshme, prandaj është mirë të shfrytëzohet ky rast për një urim të veçantë për të gjithë bashkëpunëtorët e Kosovapress, gjithë ata që përkujdesen për punën e tyre dhe në zhvillim e vet kompanisë”, ka thënë ai.

Vet fakti se një medium po shënon pesëmbëdhjetë vjetorin e themelit të saj tregon për suksesin e atij mediumi. Kështu ka thënë Leonard Kerquku, kryeredaktor në Express.

Ai ka shtuar se në Kosovë është një treg i shumë i vështirë i mbijetesës së mediave, por vet fakti se Kosovapress është tash e pesëmbëdhjetë vjet, kjo tregon për një sukses të madh.

“Ne e vlerësojmë pozitivisht bashkëpunimin me këtë agjencion, na ndihmon shumë në punën tonë për shkak se na plotëson aty ku ne jemi të mangët, pra, Kosovapress ka shtrirje në gjithë Kosovën dha tani sidomos me pjesën e videove ka bërë që mediumi ynë të jetë shumë më i mirë sesa ka qenë, pra puna jonë, portali jonë. Kosovapress i ka ndihmu për me qenë ma i mirë se sa ka qenë, pra ky është një hap shumë domethënës dhe shumë i mirë që e ka bërë kjo agjenci e lajmeve”, thotë ai.

Për Enver Mulliqin, drejtor dhe kryeredaktor i televizionit Tv Syri në Gjakovë, Kosovapress mbetet dhe do të jetë mediumi apo agjencioni më profesional në punën që bëjnë.

“Sa i përket bashkëpunimit me Agjencinë Kosovapress mund të thuhen vetëm fjalë të mira, fjalë miradije dhe çdo lëvdatë, i adresohet këtij agjencioni, ne kemi pasur fatin që të bashkëpunojmë që nga fillimi, bile mos të parët jemi ndër kontraktorët e parë të shërbimeve që vijnë në drejtimin tonë nga Kosovapress dhe për këtë kohë që po flasim ne jemi jashtëzakonisht të kënaqur, ato lajmet, filmime dhe ato video materialet që na vijnë nga Kosovapress ne na ndihmojnë shumë në kompozimin të edicioneve të lajmeve”, thotë ai.

Video lajmet që sjellë Kosovapress, për Arbër Grabovcin kryeredaktor në Televizionin Dukagjini në Pejë, kontribuojnë shumë në ngritjen e informimit për qytetarët e Pejës.

“Mendoi se televizioni Dukagjini ka një bashkëpunim të jashtëzakonshëm me Kosovapress që gjatë këtyre viteve vazhdimisht ka kontribuar shumë pozitivisht në ngritjen e nivelit të informimit në veçanti siç është televizioni Dukagjini që është relativisht larg prej Prishtinës edhe prej qendrave të tjera dhe në këtë drejtim bashkëpunimi që kemi pas ka qenë mjaftë i frytshëm dhe ka ndikuar drejtpërdrejt në avancimin e nivelit të informatave që kemi pasur mundësi t`i ofrojmë bashkë qytetarëve tonë, pa dyshim që kam një rast të cilin nuk do ta lëshoi pa thënë se Kosovapress përveç punës profesionale gjatë këtyre viteve ka qenë shumë i paanshëm sa i përket ndikimeve të ndryshme që mund të kenë mediat dhe mu për këtë çështje ka qenë edhe shumë e afërt me mediat tjera dhe televizionin Dukagjini”, thotë Grabovci.

Margarita Kadriu kryeredaktor në gazetën Kosova Sot thotë se 15 vjet për një media dikush mund t`i komentoj se nuk janë shumë, por për Kosovën, shtet tanimë 6 vjeç, të qenit 15 vjeç si media do të thotë shumë.

“I përgëzoj udhëheqësit dhe stafin e “Kosovapress”-it, të cilët edhe përkundër sfidave të shumta në këtë periudhë nuk u dorëzuan, por për më tepër u forcuan edhe më shumë. Të mbijetosh dhe të forcohesh në këtë periudhë, siç ka bërë Kosovapress-i, edhe përkundër faktit se portale po hapen çdo ditë në të gjitha anët, është sinqerisht një storie suksesi, andaj urime ditëlindjen e 15-të dhe iu dëshiroj që të vazhdoni në këtë rrugë përgjithmonë”, ka thënë Kadriu.

Oliver Vujoviç, Sekretar gjeneral i SEEMO – Organizata e Mediave të Evropës Juglindore, pjesë e së cilës është edhe Kosovapress, ka thënë në një letër urimi se Kosovapress nisi dhe vijoi punën në kohërat më të rënda për Kosovën.

Sipas tij, kjo agjenci arriti që të rritet në këto 15 vjet në një dritare shumë e rëndësishme e informimit në Kosovë, por edhe të jetë pasqyrë e informacionit se çfarë ndodh në Kosovë, për ata që janë jashtë Kosovës.

“Prandaj, personalisht rregullisht marr informacione nga Kosovapress që të jem i informuar se çfarë ndodh në Kosovë. Mund të them që jam shfrytëzues i informatave të Kosovapress që nga fillimi i punës së saj. Shumë mirë kujtoj ato informatat e para të marra në fund të viteve nëntëdhjetë të gjetura në internet nën mbishkrimin Kosovapress. Kosovapress është agjencia që merret me shpërndarjen e lajmeve, por për SEEMO dhe mua personalisht, vetë agjencia por edhe drejtori i saj z. Skënder Krasniqi janë partner jashtëzakonisht të rëndësishëm dhe miq, që shumë herë kanë përkrahur aktivitetet regjionale të bashkëpunimit mes drejtuesve dhe gazetarëve nëpërmes konferencave që kemi organizuar bashkë, dhe ku drejtori i Kosovapress ka marrë pjesë”, ka thënë ai.

Sipas tij, Kosovapress tregon rolin e saj të rëndësishëm në regjionin e Evropës Juglindore – si agjenci e cila njeh nevojat e bashkëpunimit e të komunikimit në këtë pjesë të Evropës./rtk/

Ish-deputeti i Kuvendit të Kosovës, Riza Smaka, e ka vlerësuar të panevojshme idenë e kryetarit të PDK-së, Hashim Thaçi, për t’i bërë ftesë Komisionit të Venedikut për ta ofruar ekspertizën e tij në çështjen e reformës zgjedhore.

“Gjykoj se nuk ka nevojë për ndihmë nga Komisioni i Venedikut sepse reforma zgjedhore është një çështje e juridikisht e çartë dhe e lehtë. Këtë mund ta bënte ish-Komisioni për Ndryshimin e Ligjit Zgjedhor dhe atë hiq më gjatë sesa brenda një muaji. Pra, sikur mos të kishte presione politike që, medet për neve, janë të shumta, kjo punë do të kryhej qysh moti, bile do të harrohej”, ka deklaruar Smaka për “Epokën e re”.

Ai ka thënë se reforma zgjedhore nuk është çështje e ndërlikuar. “Reforma nuk është fare problematike. Është tepër e thjeshtë. Në këtë drejtim e shoh të panevojshme t’i bëhet ftesë Komisionit të Venedikut ta japë mendimin e tij për këtë çështje”, ka deklaruar Smaka, duke shtuar se ardhja e ekspertëve nga Komisioni i Venedikut do t’i kushtonte Kosovës edhe në aspektin financiar.

“Ju e dini se ekonomia e tregut mbështetet në probabilitet (fitim). Dhe natyrisht kush i bën ftesë dikujt duhet ta paguajë. Edhe po të vinin pa pagesë ekspertët nga Komisioni i Venedikut, për mendimin tim, nuk është i nevojshëm. Pse? Sepse këtu po del se juristë tanë janë të dobët. Unë e di se kemi juristë jashtëzakonisht të aftë, të cilët mund të punojnë dhe t’i japin instruksione shumë të mira edhe Komisionit të Venedikut. Mungesa e profesionalizimit as që mund të diskutohet. Këtu janë në pyetje presionet politike irracionale”, është shprehur Smaka.