Organizata Joqeveritare “EC Ma Ndryshe”, gjatë muajve të kaluara ka pranuar ankesa individuale nga prindërit e nxënësve në lidhje me mjetet që kërkohen nga menaxhmentet e shkollave publike të Prizrenit për pagesën e sigurimit fizik, mirëmbajtjes, rregullimit të sanitarive apo pagesa tjera shtesë. Monitoruesja Elmedina Baxhaku tha se prindërit janë ankuar edhe për mungesë të transparencës në menaxhimin dhe shpenzimin e këtyre mjeteve shtesë.

“EC Ma Ndryshe” përmes mekanizmit të qasjes në dokumentet zyrtare ka kërkuar informata nga Drejtoria Komunale për Arsim rreth kësaj praktike. DKA-ja e ka arsyetuar atë me ekzistimin e “Udhëzimit Administrativ nr. 28/2012 të datës 31.10.2012, që ka të bëjë me Këshillin e Prindërve” dhe dokumentin ia ka bashkëngjitur përgjigjes së saj”, tha Baxhaku.
“EC Ma Ndryshe”, sipas saj, konsideron se sigurimi fizik, mirëmbajtja, sikurse edhe riparimi i sanitarive hyjnë në kategorinë e shërbimeve dhe jo të projekteve, të cilat duhet të ofrohen nga shkollat e institucionet përgjegjëse për arsimin parauniversitar. “Ashtu si e parasheh UA përkatës mjetet nga nxënësit respektivisht prindërit mund të grumbullohen, por për realizimin e projekteve që do të shkonin në dobi të avancimit të mësimnxënies dhe mësimdhënies në shkollat publike”.

Baxhaku tha se përderisa praktika e grumbullimit të hollave për pagesën e sigurimit fizik, mirëmbajtjes, rregullimit të sanitarive apo pagesa tjera të ngjashme vazhdon nga viti në vit, menaxhmentet e shkollave, këshillat e prindërve por edhe vet DKA-ja ende nuk e kanë zhvilluar ndonjë fushatë serioze për vetëdijesimin apo tejkalimin e vështirësive me të cilat ballafaqohen shkollat, që po ashtu parashihet në UA 28/2012.

“EC Ma Ndryshe’ kundërshton grumbullimin e të hollave nga nxënësit për pagesën e sigurimit fizik, mirëmbajtjes, etj., në shkollat publike të Prizrenit duke u bazuar në argumentin se prindërit e tyre janë taksapagues dhe se të njëjtit detyrohen që shërbimin e njëjtë ta paguajnë dy herë. Prandaj kërkon nga mekanizmat dhe institucionet përgjegjëse që t’i japin fund kësaj praktike”, tha Baxhaku.

Ajo i bërë thirrje DKA-së dhe kryetarit të komunës së Prizrenit që të shfrytëzojnë pushimet verore dhe të vendosin dialog të afërt me MASHT-in, në mënyrë që lëshimet paraprake gjatë ndarjes së buxhetit për DKA-në e Prizrenit, të mos përsëriten më, por të ketë planifikim shumë preciz të pozicioneve buxhetore për rojet e natës, personelin ndihmës, pedagogët, psikologët, etj. në shkollat publike të komunës së Prizrenit.

“EC Ma Ndryshe” rekomandon shkollat, këshillat e prindërve dhe DKA-në që praktika e mbledhjes së fondeve për projekte të caktuara nga bashkësia dhe donatorët të përcillet me nivel të duhur të transparencës, duke i publikuar të dhënat për projektin, kohëzgjatjen, mjetet e grumbulluara dhe të shpenzuara dhe detajet tjera në tabelat e shpalljeve në shkolla, në ueb faqen zyrtare të komunës dhe në mjetet lokale të informimit./PrizrenPress.com/

Ministri i FSK-së Agim Çeku, tha sot se nuk tërhiqet nga deklarata e thënë prej tij më herët se viti 2013 do të jetë viti i Ushtrisë së Kosovës. Ai i bëri këto komente pas takimit me ambasadorin e Britanisë në Kosovë, Jan Clif. Ndërkohë, ambasadori anglez, tha se është duke vazhduar rishqyrtimi i sektorit të sigurisë në Kosovë, e që do të finalizohet në fund të vitit.

Ambasadori i Britanisë së Madhe në Prishtinë, Ian Clif, tha pas takimit me ministrin e Forcës së Sigurisë se Mbretëria e Bashkuar ka pritur që vendimi i NATO-s për kapacitetet e plota operacionale të FSK-së, të ndodh më herët. Mirëpo, ai e përshëndeti dhe e vlerësoi të rëndësishëm vendimin e marrë javën e kaluar, duke theksuar se janë arritur kapacitetet e duhura të FSK-së.

“Tani jemi në fazën kur vazhdon rishqyrtimi i sektorit të sigurisë dhe kjo do të finalizohet deri në fund të vitit. Do të shohim se cilat do të jenë rezultatet. Mbretëria e Bashkuar do të vazhdojë të mbështes punën e Ministrisë dhe gjithë FSK-së. E rëndësishme është që të theksohet se kjo është një fazë e re për Kosovën dhe raportet e saj me NATO-n”, tha Clif.

Clif nuk ka dashur që të përgjigjet në pyetjen nëse FSK-ja tani është gati të bëhet ushtri, duke thënë se në cilësinë e ambasadorit nuk mund të jap vlerësime të tilla.

Ndërkaq, Ministri i Forcës së Sigurisë, Agim Çeku, tha se nuk zmbrapset nga deklaratat e mëhershme që ky vit do të jetë i Ushtrisë së Kosovës, duke theksuar se janë në procesin e rishikimit strategjik të FSK-së.

“Asnjëherë për asgjë nuk jemi zmbrapsur, jemi duke punuar në atë drejtim. Ky është një proces i thellë, i cili kërkon kohë, punë dhe koordinim. Jemi duke identifikuar nevojat reale të sigurisë të Kosovës dhe mundësitë e Kosovës në bashkëpunim të ngushtë me partnerët tanë ndërkombëtar. Ky proces pritet të përfundojë deri në fund të vitit dhe menjëherë do të dalim me rekomandime, ku i rekomandojmë qeverisë partnerëve tanë në NATO, se çka ne mendojmë se duhet të ketë Kosova në aspektin për të qenë e sigurt dhe për të qenë në gjendje të kontribuojë në ruajtjen dhe ndërtimin paqes kudo në botë”, tha ai.

Ndërsa sa i përket vendosjes së FSK-së në veri të vendit, ministri Çeku theksoi se pjesë e marrëveshjes Kosovë -Serbi për normalizimin e marrëdhënieve, është që dërgimi i FSK-së në veri të ndodhë vetëm në koordinim me KFOR-in. Ai tha se FSK është në funksion të zbatimit të marrëveshjes. Ditë më parë, Sekretari i përgjithshëm i NATO-s, Anders Rasmussen, kumtoi vlerësimin e Këshillit Veriatlantik se Forca e Sigurisë së Kosovës ka përmbushur kapacitetet e saj operacionale dhe është plotësisht e aftësuar që të përmbushë detyrat e caktuara nga mandati i saj në bazë të standardeve të përcaktuara nga NATO-ja.

Kosovarët që duan të shkojnë ilegalisht në Evropë duhet të paguajnë 1200 deri në 1500 euro për person. Organizimi nis nga Prishtina, përmes Beogradit e Suboticës, drejt kufirit hungarez.
Po pinin kafenë e mëngjesit në bufenë e Stacionit të Autobusëve në Suboticë(Serbi), derisa po prisnin dy autobusë me qytetarë nga Kosova që ia kishin mësyrë ilegalisht Evropës.

Të gjendur vetëm dymbëdhjetë kilometra larg kufirit me Hungarinë, së paku dhjetë burra, serbë e romë, me padurim pritnin arritjen e kosovarëve. Nga kosovarët që ia kishin mësyrë ilegalisht Evropës, për disa qytetarë serbë në Suboticë, tashmë është bërë përfitim i mirë. Hiç më keq nuk po mbesin as disa serbë të tjerë në Beograd bashkë me disa shqiptarë që organizojnë udhëtimin e kosovarëve nga Prishtina.

Rasip e Ragip Azizi, dy vëllëzër romë nga Fushë Kosova, trafikimin e shqiptarëve drejt Evropës e kanë bërë biznes ditor, shkruan Zëri.

Me këtë punë ata merren për gati një vit. Por, puna u është shtuar dukshëm që nga janari i këtij viti.
Të dy flisnin rrjedhshëm gjuhën shqipe, duke ua bërë më të lehtë që të afrohen kosovarëve për t’i dërguar përmes Serbisë e më pas nëpërmjet Hungarisë drejt Evropës.

I presin autobusët me kosovarë

Dy romët që janë lindur në Fushë Kosovë, por që aktualisht jetojnë në Suboticë, janë në mesin e grupit të organizuar që transporton shqiptarë ilegalisht për në Hungari. Ata biznesin e zhvillojnë kryesisht në kafenenë e stacionit të autobusëve. Në këtë të fundit e njohin thuajse të gjithë klientelën. Ndonjë person i paparë në atë zonë më herët, potencialisht mund të jetë mundësi për biznes për ta. Dy vëllezërit nuk hezitojnë të paraqesin ofertat e tyre.

“A di shqip? A je nis për të shkuar andej (Hungari)?”, thotë Rasim Azizi teksa i afrohet tavolinës. Porosit një kafe e ulet në tavolinë, duke menduar se bashkëbiseduesja kishte qëllim kalimin ilegal të kufirit.

Policia e Kosovës ka njoftuar se Serbia i ka mbyllur te gjitha zyrat e Ministrisë së Punëve të Brendshme të Serbisë në veri të Kosovës.
Megjithatë partitë politike dhe ekspertë të sigurisë, shuarjen e këtyre zyrave e shohin me një skepticizëm të madh. Sipas tyre, këto struktura do të vazhdojnë të funksionojnë në Kosovë, por pak më ndryshe, shkruan “Express”.

Erzen Vraniqi, zëdhënës i lëvizjes Vetëvendosje, thotë se ata nuk kanë mundur ta verifikojnë këtë njoftim nga burime të pavarura, prandaj edhe nuk mund të thonë nëse njoftimi i policisë për mbylljen e atyre zyrave është i vërtetë.

“Pavarësisht kësaj, marrëveshja e dëmshme me Serbinë parasheh integrimin formal të strukturave paralele serbe në struktura të Kosovës, prandaj ato do të vazhdojnë të funksionojnë dhe ti japin llogari Serbisë, por tani nën petkun e ri, atë të Kosovës”, thotë Vraniqi për “Express”.

Derisa për ekspertin e sigurisë Arben Qirezi, mbyllja e zyrave paraqet vetëm njërin aspekt të pushimit të funksionimit të institucioneve paralele. Problemi më i madh për të tash mbetet integrimi i atyre njerëzve që kanë punuar në këto institucione paralele, që sipas policisë, kanë pushuar së ekzistuari.

“Në këtë kontekst hyn edhe personeli qoftë ai i uniformuar apo edhe ai civil i MUP-it serb i cili ka funksionuar apo funksionon ende sikurse në veri ashtu edhe në pjesët e tjera të Kosovës. Pasi ky është aspekti tjetër i marrëveshjes së arritur në Bruksel”, thotë Qirezi për “Express”.

Megjithëse, sipas tij, mbyllja e këtyre zyrave nuk do të ndikojë edhe aq shumë në stabilizimin e sigurisë në veri. Sipas Qirezit, nuk janë zyrat e Serbisë ato të cilat mënyrë të drejtpërdrejtë e kanë cenuar më së shumti sigurinë në veri.

Sigurinë atje, Qirezi thotë se e kanë cenuar më shumë strukturat e rrugëve të cilat kanë qenë në njëfarë koordinimi të organeve zyrtare të Serbisë.

“Tash varet nga vullneti politik i Serbisë që të heq dorë nga politika e destabilizimit të Kosovës”, thotë Qirezi, sipas të cilit Serbia tash duhet të jetë e gatshme që jo përmes mbylljes fizike të zyrave të kontribuojë në qetësimin e situatës në veri.

“Serbia tash duhet që t’i shpërbërje plotësisht strukturat e veta paralele dhe ta ndërpresë ndërprerjen e njerëzve të cilët nuk pajtohen në krijimin e një qetësie në veri në mënyrë që organet kompetente të Kosovës, të mund të ndërmarrin veprime ligjore që i takojnë”, pohon ai.

Mbyllen të gjitha zyrat e Ministrisë së Punëve të Brendshme të Serbisë në veri të Kosovës. Kështu të paktën bëhet e ditur nga Drejtoria e Përgjithshme e Policisë së Kosovës në Prishtinë. Zëdhënësi Baki Kelani ka deklaruar se zyrat e MUP-it serb janë mbyllur nga vet ata të cilët i kanë hapur, që do të thotë nga zyrtarët e MPB së Serbisë. Ky proces është monitoruar nga EULEX-i, në një rast edhe nga Policia e Kosovës.

“Mbylljet e para kanë qenë në Leposaviq dhe më pas kanë vijuar me Zveçanin, Zubin Potokun dhe javën e kaluar me Mitrovicën”, ka thënë Kelani.

Një pjesë e zyrtarëve të këtyre strukturave pritet të punësohen në Drejtorinë Rajonale të PK-së në veri.

Ministri i Punëve të Brendshme, Bajram Rexhepi, bazuar në marrëveshjen politike kohë më parë emëroi serbin Nenad Djuric ushtrues detyre të komandantit të policisë për rajonin e veriut. Policia e Kosovës konfirmon se Djuric ka nisur punën si drejtor policor, por shprehet e rezervuar për sa i përket strukturës organizative që do të ketë drejtoria policore në veri.

“Policia e Kosovës ka pasur zyrtarët e vetë që kanë operuar, ndërsa ushtrimi i detyrës së komandantit për veriun do të jetë për stacionin policor që ka ekzistuar atje”, ka sqaruar Kelani.

Mbyllja e zyrave të MUP-it serb bëhet në kohën që Kuvendi i Kosovës ka miratuar Ligjin për amnisti, i cili është garant për të gjithë serbët se nuk do të ndiqen penalisht për vepra penale që ndërlidhen me thirrje për rezistencë ose cenim të rendit kushtetues, me përjashtim të vrasjes.

Kryeministri HashimThaçi, ka vendosur të shtojë prezencën e Qeverisë në punimet e Kuvendit.

I vetëdijshëm për marrëdhëniet e tij me kryeparlamentarin Jakup Krasniqi, por edhe me mos qëndrimin e ministrave gjatë gjithë kohës së punimeve në Kuvend, ka vendosur që për këtë çështje të angazhojë kujdestar, njërin nga zëvendësit e tij.

Vendimi pritet të merret qysh në mbledhjen e ardhshme të Qeverisë, ndërsa gazeta Tribuna ka siguruar dokumentin me anë të të cilit, kryeministri njofton kabinetin e tij se tash e tutje një njeri do të përkujdeset për punët në Kuvend dhe do t’i raportojë Qeverisë në detaje se çka ndodhë atje