Lëvizja Vetëvendosje! Qendra në Malishevë, ka mbajtur tubim me qytetarët e fshatit Llazicë, ku kanë shpalosur Alternativën qeverisëse lokale.
Kandidati për kryetar të Komunës së Malishevës, Alban Krasniqi, kritikoi investimet jocilësore, të bazuara vetëm në interesin elektoral, duke u shprehur se fshati Llazicë, njësoj si e gjithë Komuna, duhet t’i dënojë me votë pushtetarët në ikje, që motiv të keqqeverisjes së tyre e kanë pasur trashjen e xhepave nëpërmjet asfalteve të hollë. Sipas Krasniqit, gara në Malishevë është vetëm midis dy subjekteve: Lëvizjes Vetëvendosje! dhe partive të tjera, të cilat janë krejt njësoj midis tyre.
“Vetëvendosje! angazhohet për një qeverisje me qytetarët dhe për qytetarët, duke u përqendruar tek administrata efektive; zhvillimi i bujqësisë dhe hapja e vendeve të reja të punës; shkollat apartiake dhe shëndetësia cilësore për të gjithë; infrastruktura dhe ambienti që sigurojnë një jetë normale për qytetarët”, tha Krasniqi.
Ai tha se është koha që Malisheva të ndryshojë, dhe ndryshimi i vërtetë vjen me Alternativën e Lëvizjes Vetëvendosje!. “Me ne, buxheti i komunës do të jetë thjeshtë dhe vetëm buxhet i qytetarëve, e jo sikurse sot, buxhet i keqpërdorur nga hajnat. Prandaj, të angazhohemi bashkërisht për ndryshimin e madh. Lëvizja Vetëvendosje! ka guximin, idetë, vizionin dhe njerëzit energjikë për ta transformuar e zhvilluar Komunën e Malishevës”, përfundoi Krasniqi.
Ndërsa, bartësi i listës për Kuvend Komunal, Muhamet Bytyçi, para banorëve të Llazijës u shpreh se qytetarët e Malishevës nuk duhet të votojnë në bazë të premtimeve a shantazheve që mund t’u bëhen nga pushtetarët e sotëm, por mbi bazën e veprimtarisë së gjithsecilit subjekt politik. “Lëvizja Vetëvendosje! ka treguar se është Alternativa e vetme, e cila ka qëndruar gjithmonë përkrah qytetarëve. 3 nëntori vendos ndryshimin pozitiv që ofron VETËVENDOSJE!, ndryshim i cili nuk është vetëm për të tashmen, por edhe për gjeneratat e ardhshme”, tha Bytyçi.
Ndërkaq, anëtari i kryesisë së Lëvizjes Vetëvendosje!, Gani Krasniqi, tha se i vinte mirë që kudo ku shkon në fshatrat e Malishevës, vë re një mbështetje të madhe të të rinjve për Vetëvendosje!-n. “Rinia është shpresa për ndryshime rrënjësore, është lokomotiva e ndryshimit dhe zhvillimit shoqëror”, u shpreh Krasniqi. Ai iu bëri thirrje pjesëmarrësve në tubim që ta mbështetësin Lëvizjen Vetëvendosje!, duke u bazuar tek parimet, idealet, aktiviteti i deritashëm dhe programi i saj politik./PrizrenPress.com/