Pas disa përpjekjeve të pasuksesshme, së fundmi vendimi për miratimin e Planit Rregullues të Hollësishëm “Zona e Parkut për industri të lehtë në Prizren – Parku i Biznesit” sipas Hartës Zonale të Komunës ka kaluar filtrin e ligjshmërisë në nivelin qendror, kanë bërë të ditur zyrtarët komunalë.
Vendimi në fjalë pas marrjes së dritës së gjelbër nga Qeveria e Kosovës përkatësisht ministritë e linjës është publikuar në ueb faqen e Komunës së Prizrenit.
“Me miratimin e Planit Rregullues të Hollësishëm “Zona e Parkut për industri të lehtë në Prizren – Parku i Biznesit” sipas Hartës Zonale të Komunës së Prizrenit, planifikohet zhvillimi hapësinor në kontekst të zhvillimit ekonomik dhe harmonizimi i tyre me nevojat reale dhe me mundësitë për të arritur kushte optimale të zhvillimit dhe organizimit hapësinor, si dhe rregullimin dhe ndërtimin e zonës për të cilën hartohet plani”, thuhet në dispozitat e këtij vendimi, i cili mbulon një periudhë së paku 8 vjeçare.
Anëtarët e Kuvendit të Komunës së Prizrenit, në mbledhjen e mbajtur tri javë më parë, patën harmonizuar këtë vendim me kërkesën e MMPHI-së.
Gjatë shqyrtimit të kësaj pike të rendit të ditës, kryesuesja Antigona Berisha-Bytyçi pat bërë të ditur se MMPHI konform Udhëzimit Administrativ ka kërkuar që raporti i shqyrtimit publik të jetë pjesë e vendimit.
Ndërkaq, gjatë fundjavës së shkuar, kryeministri i Kosovës, Albin Kurti, ka theksuar rëndësinë e krijimit të Zonës Industriale në Prizren, duke bërë thirrje që Komuna sa më parë të aplikojë në organet e nivelit qendror për themelimin e saj.
Procesi i krijimit të Zonës Ekonomike në Prizren pati filluar para më shumë se një dekade dhe përgjatë disa mandateve në këtë hapësirë janë investuar mjete të konsiderueshme financiare nga buxheti i Komunës së Prizrenit. /Telegrafi/
