Gjatë natës së kaluar në Lazarat, njësitët e policisë shqiptare kanë arritur të kapin 11 persona nga “Grupi i zjarrit”, të cilët mëngjesin e një dite më parë qëlluan për vdekje policin 31-vjeçar Ibrahim Basha dhe plagosën dy të tjerë.
“Grupi i zjarrit”, sipas policisë përbëhet edhe prej 10-personave të tjerë të cilët pritet të arrestohen nga momenti në moment.
Lazarati dhe rrethinat e tij janë nën kontroll të plotë të rreth 400 efektivave policorë. Në ndihmë të tyre që nga mesdita e djeshme janë në dispozicion edhe dy helikopterë të ushtrisë.
Mes pjesëmarrësve të sulmit ndaj policisë të një dite më parë dhe të atyre që janë shpallur në kërkim ka dhe përsona të dyshuar për terrorizëm pasi ata kanë vendosur në disa raste mjete shpërthyese në lagje të ndryshme muaj më parë në Lazarat, transmeton RTK.
Madje, sipas policisë tre nga përsonat në kërkim, në rrjetet e tyre sociale dallohen qartë për simpatitë që kanë për grupin terrorist ISIS.