Një grup i madh gazetarësh, nga nëntë vende të ndryshme të Evropës, gjatë këtij vikendi kanë vizituar Komunën e Malishevës, ku janë njohur me një pjesë të vendeve më atraktive turistike të Malishevës. Kjo vizitë e gazetarëve të huaj, u realizua në kuadër të promovimit të turizmit rajonal përmes medieve ndërkombëtare, ndërsa në këtë vizitë, ishin të pranishëm gazetar nga Italia, Franca, Anglia, Çekia, Kroacia, Turqia, Maqedonia dhe Bullgaria.
Fillimisht, gazetarët janë pritur nga i pari i Malishevës, Ragip Begaj, në muzeun e qytetit “Jahir Mazreku”. “Është një kënaqësi e veçantë, për vizitën që ju sot i bëni Malishevës”, tha kryetari Begaj, i cili më pas i njoftoi me Malishevën, përmes një përshkrimi të shkurtër. Ndërsa drejtoresha për kulturë, Blerta Krasniqi, i njoftoi me kapacitetet turistike të Malishevës. “Përveç që jemi një trevë shumë e pasur arkeologjike, një pjesë të së cilës e shihni edhe në këtë muze, Malisheva është e pasur edhe me trashëgimi kulturore dhe shpirtërore, bukuritë natyrore dhe shumë atraksione, që e bëjnë të veçantë Malishevën”, tha drejtoresha Krasniqi.
Pas muzeut, gazetarët u njohën me “Shpellën e flladit” në Panorc, nga u ndanë të mahnitur me bukuritë e shpellës, ndërsa shumë të kënaqur u ndanë edhe me afërsinë e banorëve të Panorcit, të cilët edhe ju ofruan ushqim tradicional, si flija, kërlanë, djathë, turshi dhe të tjera, nga kuzhina tradicionale shqiptare.
Pas kësaj, gazetarët vizituan edhe bukuritë mahnitëse të “Ujëvarave të Mirushës”, në kanionin e lumit Mirusha, pastaj u njoftuan edhe me pjesën e vetme në botë ku rritet “Lulëkuqja e Kosovës”, e cila rritet pikërisht në pjesën e maleve përreth Panorcit dhe Llapqevës. Përgjatë rrugës, duke u kthyer, gazetarët janë njoftuar edhe me pishinat e Banjës. Gazetarët kanë marrë edhe informacione për kullat, mullinjtë dhe shumë atraksione tjera që janë në Malishevë.
Gazetarët, u ndanë shumë të kënaqur, si me kapacitetet turistike të Malishevës, ashtu edhe me mikpritjen nga vendasit në çdo vend që kanë vizituar, si dhe me pritjen nga ana e kryetarit të Malishevës dhe me zyrtarëve tjerë komunal, të cilët i kanë shoqëruar gjatë gjithë ditës.
Këtë vizitë, gazetarët e medieve të ndryshme nga këto vende evropiane, pritet ta pasqyrojnë në mediet ku punojnë dhe përmes kësaj edhe promovimin e vendeve turistike të Malishevës, në vendet e tyre.