Degradimi i hapësirës publike në rrugët e “Saraçëve” dhe “Farkëtarëve” ka shtyrë autoritetet lokale që të shqyrtojnë vendosjen e kamerave vëzhguese, me qëllim të identifikimit të keqbërësve, por edhe eliminimin e parkimeve pa leje të automjeteve.
Në këtë hapësirë, që lidh Hamamin e Gazi Mehmed Pashës me Shtëpinë e Kulturës e pastaj me Urën e Gurit, viteve të fundit janë dëmtuar shtyllat e ndriçimit publik dhe shumica e kubëzave ndriçuese, ndërkohë që automjetet vazhdojnë të parkohen pa leje, shkruan sot “Koha Ditore”.
Drejtori i Inspektorateve, Bujar Hasani, ka theksuar se Komuna do të vendosë kamera vëzhguese në këtë pjesë për të parandaluar degradimin e kësaj hapësire, që është pjesë e zonës historike të qytetit.
“Një pikë shumë e rëndësishme vrojtuese do të jetë e vendosur te Shtëpia e Kulturës, ku me anë të kamerave do ta përcjellim gjendjen aty, pasi kemi largim të blloqeve dhe automjete që parkohen, nga persona të papërgjegjshëm. Pra, do të ketë një kontroll”, ka thënë Hasani.