Filmi i metrazhit të gjatë “Mikey Boy”, që është realizuar nga aktori me prejardhje shqiptare, Mike Dusi së bashku me regjisorin Chris Berkenkamp, është shfaqur premierë të enjten mbrëma në Kinemanë “ABC”. Ky film i zhanrit komedi që është i gjatë një orë e tridhjetë minuta, fillimisht ka pasur premierën në New York, më pas është shfaqur në Tiranë dhe ai tashmë po shfaqet edhe në Prishtinë.Personazhi kryesor i këtij filmi, Mikey Boy është një shqiptaro-amerikan nga qytetit i Nju-Jorkut në Amerikë, jeta e të cilit kthehet me kokë poshtë, pasi që ai mëson se duhet të udhëtojë për në Shqipëri për një martesë me tradita patriarkale shqiptare të propozuar nga prindërit e tij.
Picameni Mikey Boy bën çmos që të mos udhëtojë në Shqipëri vetëm për ta rikthyer të dashurën e tij, pasi që e humbi atë kur ajo e kuptoi se prindërit e Mikit nuk e donin atë për nuse në shtëpinë e tyre, përshkruan kultplus përmbajtjen e këtij filmi me pak fjalë.
“Mikey Boy”, është i cilësuar si filmi më i mirë i aktorit me origjinë shqiptare nga Gjakova, Mikel Dushi.
Në këtë film në rolet tjera përpos Mike Dusi janë paraqitur aktorët: Chris Wilde, Kristen Mallete, Robin Charters, Kresh Novakovic, Ed Gale dhe John Lewis.
Filmi “Mikey Boy” shpjegon një tregim shqiptar, ku paraqet fëmijërinë e aktorit me origjinë shqiptare nga Gjakova, Mike Dusi, i cili është rritur me traditën dhe kulturën shqiptare.
Pas përfundimit të filmit, Mikel Dusi, iu ka drejtuar audiencës duke thënë se shqiptarët të cilët jetojnë në Amerikë, gjithnjë mendojnë dhe flasin për atdheun e tyre.
“Ky film është pritur në mënyrën më të mirë të mundshme kudo që është shfaqur. Ne shqiptarët e Amerikës, nuk e di se si jemi rritur, por e di që gjithnjë kemi menduar dhe folur për Shqipërinë dhe shqiptarët”, është shprehur Mikey.
“Mund ta ndryshosh aksentin apo mënyrën e të folurit, mirëpo asnjëherë nuk mund ta ndryshosh gjakun dhe origjinën. Për shtatë vite kam punuar nga Los Angelos dhe tashmë kam njohuri sesi ta bëjë një film. Qëllimisht e kam “prekur” këtë temë në filmin “Mikey Boy”. Faleminderit që ishit prezent në premierë, ju lutem tregojuni gjithkujt përmes rrjeteve sociale si Facebook, Twitter, që të vinë dhe ta shohin këtë film”, ka qenë porosia e Mikel Dusit apo të ashtuquajturit Mikey Boy.
Ai kur ka ardhur ditë më parë në Prishtinë, në një konferencë për media pat deklaruar se e ka realizuar këtë film me synim për të shfaqur traditat e popullit shqiptar.
“E kam realizuar filmin “Mickey Boy”, një film që tregon histori shqiptare. Edhe pse jam i rritur në Amerikë, prapë se prapë jam rritur me një histori dhe me një kulturë shqiptare, si një djalë shumë i vyeshëm në një pjesë të Nju Jorkut ku kam qenë pizzaman. Jam rritur gjithmonë me traditën dhe kulturën shqiptare”, ka thënë ai.
Filmi “Mikey Boy” do të shfaqet çdo ditë në dy termine, në ora 18:00 dhe 20:00, në Kinemanë “ABC” në Prishtinë.