Është ndarë nga jeta Prof.dr.Sehadete Mekuli, njëra nga intelektualet dhe mjekja e parë shqiptare, profesore e Fakultetit të Mjekësisë që në orët e para të fillimit të punës së tij, një gjinekologe e përmendur edhe jashtë Kosovës. Ajo vdiq në Prishtinë pas një sëmundje të gjatë, raporton Koha.
Prof.dr.Sehadete Doko Mekuli, mjeke-gjinekologe e parë shqiptare, shkencëtare e pedagoge, u lind më 16 tetor 1928 në Ohër, Maqedoni. Maturoi në vitin 1947 në Ohër. Fakultetin e Mjekësisë e kreu në Shkup më 7 janar 1954. Gjatë studimeve ka punuar si demonstrator në anatomi, fiziologji, anatomi patologjike dhe mjekësi ligjore. Prej 1 prillit 1954 punoi si mjeke në Spitalin e Përgjithshëm në Prishtinë, në Repartin e Gjinekologjisë dhe Obstetrikës, i cili përbëhej prej vetëm tri dhomave dhe një salle të gjinekologjia dhe obstetrika dispononin me kushte më të volitshme – 70 shtretër, një salle të lindjes dhe një të operacionit. Dr.S.Mekuli specializimin nga gjinekologjia dhe akusheria e kreu në mars të vitit 1960 në Beograd. Prej 1960 deri në fund të vitit 1962 ishte Kryeshef i Repartit të Gjinekologjisë dhe Obstetrikës në Prishtinë.. Më 1963 për shkaqe politike e lëshon spitalin dhe bëhet shef i Dispanserisë së sapoformuar të grave në Shtëpinë e Shëndetit në Prishtinë. Në janar të vitit 1968, me krijimin e rrethanave më të volitshme për shqiptarët, rikthehet në vendin e kryeshefit të Repartit Gjinekologjik dhe Akusherik në Spitalin e Përgjithshëm në Prishtinë. Krahas punës me pacientët, nënat dhe fëmijët, angazhohet për pranimin e kuadrove të reja mjekësore, avansimin e tyre profesional dhe shkencor, krijimin e kushteve gjithnjë e më të mira për mbrojtjen shëndetësore të grave dhe fëmijëve. Po ashtu organizon një sërë ligjeratash nëpër shkolla dhe konvikte studentesh dedikuar edukimit shëndetësor të vajzave. Pas themelimit të Universitetit në Prishtinë dhe hapjes së Fakultetit të Mjekësisë zgjedhet primarius (më 1970), pastaj ligjërues në lendën gjinekologji-akusheri (1972). Pas mbrojtjes së tezës së doktoranturës në Universitetin e Beogradit (1973) merr thirrjen docent (1974), kurse dy vjet më vonë avansohet në profesor universitar. Së bashku me kolegët e tjerë merr pjesë në themelimin e Shoqatës së Mjekëve të Kosovës dhe angazhohet për botimin e revistës profesionale-shkencore “Praxis medica”. Më 1974 themelon Seksionin e Gjinekologëve dhe Obstetrikëve pranë Shoqatës së Mjekëve të Kosovës, të cilin e udhëheq deri më 1981. Prej vitit 1972 është drejtoreshë e Klinikës Gjinekologjike-Akusherike të sapoformuar të Fakultetit të Mjekësisë në Prishtinë dhe Shef i Katedrës së Gjinekologjisë dhe Obstetrikës. Edhe pse ishte i vetmi ligjerues në gjuhën shqipe të asaj katedre deri në fund të viteve të 70-ta, me sukses organizon ligjeratat, ushtrimet, provimet dhe detyrat e tjera pedagogjike. Krahas kësaj, ajo vazhdimisht punon në krijimin e kuadrove të reja profesionalo-shkencore, zgjeron dhe krijon shërbimet në Klinikë, merr pjesë në kongrese dhe takime të shumta profesionale në vend dhe jashtë. Në vitin 1975 inicon dhe udhëheq ndërtimin e objektit të ri për Klinikën Gjinekologjike-Akusherike në Prishtinë. Objekti është përfunduar në vitin 1981 dhe është vlerësuar si njëri prej objekteve më të mira dhe më bashkëkohore në ish-Jugosllavi, me 450 shtretër për gra, sallat për operacione dhe lindje, laboratoret me pajisje moderne e tj., ku punonin 55 mjekë dhe 250 punëtorë të tjerë shëndetësorë. Mbrenda ditës këtu do te lindin 20-40 fëmijë dhe do të arrihet që vdekshmëria e grave dhe të porsalindurve të zvogëlohet dukshëm. Kontributi i Prof.dr.Sehadete Mekuli është i madh edhe në domenin e shkencave mjekësore. Në bibliografinë e saj shkencore rradhiten mbi 31 studime e punime me interes shkencor, duke filluar nga ai mbi hulumtimet e para epidemiologjike të kancerit të mitrës (1965) e deri te barrët e shumëfishta (1980). Vend të posaçëm zë hulumtimi i shkaqeve dhe pasojave të toksoplazmozës në fertilitet dhe në gjendje gjinekologjike , që ishte edhe temë disertacioni.
Viti 1981 është viti i vlimeve të mëdha politike në Kosovë, të kërkesës së popullates shqiptare për barazi politike. Prof.dr..S.Mekuli akuzohet për përkrahjen e kërkesave të demonstruesve, largohet prej të gjitha posteve udhëheqëse në Klinikë dhe deri në pensionimin e detyruar më 1988 vazhdon punën si mjek i thjeshtë i repartit. Pas suprimimit të autonomisë së Kosovës dhe privimit të shqiptarëve nga gati të gjitha të drejtat individuale dhe kolektive, pason, përpos tjerash, edhe dëbimi i të gjithë punëtorëve shëndetësorë shqiptarë nga Klinika Gjinekologjiko-Obstetrike. Në kushte të krijuara politike, ekonomike dhe shëndetësore, në korrik të vitit 1996, nën udhëheqjen e Prof.dr.Sehadete Mekulit, hapet Shërbimi Gjinekologjik dhe Materniteti pranë Shoqatës Humanitare Bëmirëse “Nena Terezë”, ku angazhohen mjekë gjinekologë nga mbarë Kosova dhe ku u mundësohej femrave ndihma adekuate mjekësore.
Gjatë kohës së ekzodit masiv të populates shqiptare nga të gjitha trojet kosovare në kohën e bombardimeve të NATO, Dr.Mekuli vendos që të qëndrojë në Prishtinë. Më 28 prill 1998 torturohet rëndë nga paramilitarët serbë, sulmin e të cilëve arrinë të mbijetojë.
Prof.dr. S.Mekuli është nënë e dy fëmijëve.